【隨時更新】最後倒數!2022即將結業嘅人氣餐廳
1天前

雖然本地第五波疫情過去,但仍有餐廳懷疑不敵疫情而結業,當中有唔少更係開業帶起一陣風潮,一直以嚟深受街坊歡迎嘅小店。希望有一日「說了再見、約定再見,就會再見」。
 


大埔區內人氣餐廳 象月-泰式休閒餐廳
最後營業日:9月25日

大埔呢間cafe風格嘅泰式餐廳,由擁有20年經驗嘅泰國廚師製作地道炸彈蟹、熔岩椰青海鮮焗飯等風味菜式,加上足料大份,一直受街坊歡迎,不過餐廳最近宣佈租約期滿,亦決定唔再續租。雖然最後營業日係9月25日,但現時(按8月11日消息)因廚房設備問題暫停營業,想重溫佢嘅食物,去之前記得留意官方公佈Facebook喇。

圖:餐廳(IG)


懷舊圍村菜 大榮華圍村菜
最後營業日:8月28日

一講圍村菜,自然諗起食家梁文韜「韜韜」主理嘅大榮華酒樓。品牌喺1950年以一間茶樓餅家做起,期後酒樓主打充滿特色嘅懷舊圍村菜,例如招牌豬油撈飯、傳統方法製作嘅奶黃馬拉糕、鳳凰蟹肉炒長遠、煎魚腸等。酒樓全盛時期有3間分店,但繼九龍灣店喺上年結業後,今個月28日則到灣仔店同大家講再見,以後想食圍村菜,就要去剩低嘅元朗總店喇。

圖:Tanita WongNoob_bb


已結業

太子白色門面人氣Cafe  Cafe Paradise
最後營業日:7月30日

喺太子地鐵站附近,呢間白色門面嘅Cafe,由擁有星級酒店經驗嘅廚師主理,定價親民又多選擇。其中香脆豬手加入香料先燜4-5個鐘,落單再即時半煎炸,皮脆用嫩。另外足料嘅All Day Breakfast,以及Cafe少有嘅石燒牛扒都係人氣菜式。但品牌僅餘嘅太子店,日前亦宣佈將於7月30日結業。趁住重有時間,想去回味下就快啲book位喇~

圖:sik6sak1mai5


西營盤和風素食小店  Good Good
最後營業日:7月3日

西營盤呢間樓高兩層嘅小店主打西日素食料理,相當豐富完全無一般食素會寡嘅感覺,例如五目天丼將羽衣甘藍、南瓜、茄子等蔬菜炸至金黃香脆,記得將溏心蛋切開,用蛋汁撈飯啖啖滿足!甜點方面唔少款式會隨季節更改,每次去試都有驚喜。想回味嘅朋友留意返餐廳一半位置可於網上預約,另一半則留作Walk-in。


圖: jcpigpigzhu

 

日賣200份泰式香蕉煎餅  泰小子
最後營業日:6月30日

屯門呢間小店主打泰式香蕉煎餅,有成12款口味任揀,由經典Nutella榛子醬、朱古力,到少見啲嘅芋泥麻糬、芝士榴槤等應有盡有,創下日賣200份嘅記錄!另一熱賣係髒髒鮮奶麻糬系列,麻糬有鮮奶味又煙韌。亦有泰式飲品、泰式甜品例如芒果糯米飯等。小店為咗答謝客人支持,即日起至結業日買滿$50即送指定飲品一杯。


圖: nikileetcmember_510821

 

全港最強巴斯克蛋糕  in the moment
最後營業日:6月12日

港大港鐵站附近有間Cafe藏身於巷仔裡面,但依然有唔少人為咗巴斯克芝士蛋糕而潮聖,皆因係被Foodie們形容為香港最強嘅網店Hemma出品!中心半熟軟滑,外層有淡淡焦香。咖啡同其他食品平均水準都唔錯。小店日前宣佈因租約期滿結業,不過喺IG寫上「完結 是休息後再進發」,希望可以暫休後再相見啦。


圖: Tiffanynyt

 

馳名純素軟雪糕  DAMA
最後營業日:6月7日

尖沙咀呢間健康主題嘅輕食飲品店好受歡迎,皆因佢哋嘅軟雪糕每日有四款唔同口味揀,食落味道自然又軟滑,貓山王榴槤、紅肉火龍果、芒果等都係人氣口味。輕食就有卷物、湯、乳酪杯等等,大部分都係純素,店內更有花草牆方便打卡。喺餐廳搵到新址重開之前,可以去便利店同指定餐廳^搵搵佢哋嘅純素雪糕杯,一樣可以健康消暑。

^雪糕杯銷售點:7-11、sensory ZEROThe Coffee Academics14 South Lane、Slowood、高先電影院


圖: foodie_bunny

 

手工漢堡小店  麻堡
最後營業日:5月31日

深水埗同長沙灣中間,有間主打漢堡嘅小店好受街坊、特別係酮學仔嘅歡迎,因為佢哋有生酮漢堡!麵包係自家研發,用車前子粉、杏仁粉等製作,口感似歐包有咬口。非生酮漢堡都落足心思,安格斯漢堡扒足150g加上每日新鮮手打,配麻辣辣醬或者芫荽都好夾。可惜小店因為人手有限,加上老闆娘有工傷需要休養,唯有忍痛結業。但老闆亦有話希望之後可以喺有堂食嘅餐廳再同大家見面,希望早日聽到好消息啦。


 

粉嶺白色小屋Cafe  添飲咖啡館
最後營業日:5月31日

前粉嶺裁判法院旁嘅一間獨立咖啡店,除咗係北區區內少見坐得舒服又好Hea嘅Cafe之外,小店亦用心推動本地農產,例如選用本地農場出產嘅有機番茄、蘿蔔等。疫情嚴峻前更舉辦過多個市集、咖啡班等活動。可惜老闆之前宣佈餐廳不獲續约,儘管亦有意見指小店定價進取,但再唔把握時間回味或者就無機會喇。


圖: eatingholiccc

 

大埔川式涼皮小店 涼皮小姐‧麻辣米線專門店
最後營業日:5月24日

呢間小店主打自家製涼皮,以紅薯製作,滑溜爽彈,加上青瓜絲、炸黃豆、花生碎、白芝麻,同秘製麻辣醬,唔加餸都已經好夠味。重有米線、小食同冰粉,例如一口酸菜魚,真係細細份咁,一支公都可以滿足到想食酸菜魚嘅慾望。可惜小店即將結業,公告寫上「希望有緣再會大家。希望大家身體健康,疫情快啲過。可以過返無口罩的日子。」


圖: Pleplev3v

 

日籍廚師主理家庭料理 嘉兵衛
最後營業日:5月8日

元朗咁多日本餐廳,呢間食堂依然長期有捧場客,皆因小店由日籍嘅波多野先生同佢嘅港籍太太Emmy兩夫婦主理,主打日式家常料理,好似滑蛋廣島蠔丼定食、名古屋風味鷄翼等,樸實溫暖而有日本風味。日前公告5月會同大家暫別,寫上「見證住香港各種變化,無奈地決定這刻休息一下,然後再展開未來嘅新開始」。


圖: fxfxfh

 

大埔馳名清湯腩 群記清湯腩
最後營業日:4月29日

呢間小店開業多年,門口經常大排長龍,唔少人更係特別跨區去食!日前喺Facebook公告即將結業後,唔少網民都喺下面留言話好可惜,重有留言指佢哋嘅牛腩係全港最好食沒有之一。但近年亦有食評指水準下降,亦有人指員工服務態度差,不過依然無損其人氣。


圖: Kankanmolly

 

元朗足料格仔餅 嘉發麵包小食
最後營業日:4月27日

元朗呢間小食店由夫婦二人主理,佢哋嘅格仔餅同雞蛋仔係唔少區內街坊同學生心頭好,皆因變化多又足料。格仔餅有招牌薄脆同加厚兩個版本,前者非常香脆,後者多一份煙韌口感,加上裡面嘅花生醬、砂糖同煉奶都落得唔手軟!雞蛋仔粒粒都外脆內軟,仲有黃金芝士、海苔肉鬆、粒粒朱古力等口味。


圖: Angie<3

 

灣仔經典港式美食 來佬餐館
最後營業日:4月25日

呢間主打港式「豉油西餐」嘅餐廳12年前喺中環開張,後來搬到灣仔依然有唔少捧場客。不時會有週末及加入早午餐,可以享受自選主菜加任食精選小食同甜品~亦有唔少節日套餐同季節限定嘅美食,例如之前推出嘅原煲窩心暖胃煲仔飯外賣。可惜餐廳早前宣佈營業即將後結業,呢段期間會推出經典套餐,畀各位重溫歷年招牌菜式。


圖: 餐廳Facebook

 

人龍台式牛肉麵 阿木台灣麵 (廣華街)

旺角呢間人氣台灣麵店4月21日宣佈,休業多時嘅廣華街分店正式結束業務。以後大家掛住佢哋,想食返碗份量十足、肉香又入味嘅紅燒牛肉麵時,就記得要去佢哋旺角豉油街店啦。老闆喺Facebook解釋,因為每朝要來回兩間舖頭做嘢實在有啲攰同辛苦,嚟緊就可以更專注豉油街店生活百貨


 

創意多國素菜館 走肉蔬食研究所
最後營業日:4月18日

大角咀嘅人氣素食自助餐餐廳走肉‧朋友年初結業後,估唔到喺荔枝角嘅姐妹店走肉蔬食研究所日前亦宣佈租約期滿後不再續租。餐廳以實驗室為主題,唔單止裝修成個班房咁,連菜式都好有創意,好似望落唔似素食嘅黯然銷魂飯、秘製化皮乳豬伴荷花夾等,都係畀食肉獸們轉試素食嘅好機會,惠顧午市套餐重送自助沙律吧,CP值高。


圖: 食神大媽 Foodie Auntie

 

旺角人氣車仔麵 旺囍車仔麵
最後營業日:4月10日

呢間港式車仔麵店有唔少熟客支持,有超過40款餸任揀,包括陳皮魚蛋、秘製牛筋、辣汁魷魚等等。因為疫情近年亦開始做分區團購,招牌菜就變為古法頭抽雞!先煎香雞皮再浸頭抽汁,皮香肉滑。旺角店因為退租即將結業,不過好消息係老闆宣佈即將喺土瓜灣開外賣店,主打雞、涼拌麵同小食。


圖: 餐廳Facebook

 

美國過江海鮮餐廳 Red Lobster
最後營業日:4月3日

銅鑼灣呢間餐廳店如其名,主打龍蝦同其他海鮮菜式,總部位於佛羅里達州奧蘭多。供應菜式中香港限定嘅港式避風塘炒龍蝦同黃金炸大蝦都好受歡迎,另一特色係同全球其他分店一樣免費提供自家製車打芝士鬆餅!2019年抵港後不時推出新菜式同套餐,可惜最後難逃結業命運。


 

西環打卡台灣菜館 阿元菜市場
最後營業日:3月31日

堅尼地城呢間台灣菜館由台灣人主理,一開始主打火鍋,後來轉型賣台式滷味、牛肉麵等等,而最多人打卡嘅就係用銅爐上枱嘅芋圓火鍋!三色芋圓、仙草、黑糖珍珠等配料加上自選飲品、冰底同沾醬,影相夠搶鏡又可以同朋友開心Share。但日前餐廳指無奈業主加租,只好放棄離開,之後可以去姐妹店繼續支持佢哋。


圖: Eat_dayday

 

尖沙咀燒酎專門店 野武士燒酎吧
最後營業日:3月31日

LMF成員陳匡榮(大飛/Dave)創辦嘅日本燒酎專門店,店內有過百款從日本九州進口嘅燒酎,口味選擇多元化,包括米、芋、麥、黑糖、泡盛。如果對燒酌認識唔多,可以請店員按你嘅口味推介。留意返而家只有星期一至六3至7pm供應外賣。


圖: 餐廳Instagram

 

榴槤飲品+飯糰小店 花果山
最後營業日:3月24日

呢間飲品店之前從旺角搬到尖沙咀,依然有唔少熟客捧場,原因之一係佢哋用足馬來西亞貓山王同D24榴槤製作嘅一系列榴槤飲品!榴槤奶蓋四季春同貓山王沙冰都好足料,另外亦有鮮果飲品,甚至係創意枇杷膏特飲。另一特點係不時會有日本人主理嘅日式飯糰。


圖: JoyfullFoodstagram

 

葵廣即製刈包 刈Bao台式創意小食
最後營業日:3月12日

呢間小店主打台式小食,刈包即叫即做,古早味腩肉配埋酸菜、花生粉等,香口又唔油膩,黑松露雞就勝在松露香氣濃郁。另一必食小食係香芋地瓜球,外層金黃香脆,咬開裡面係綿密微甜嘅芋泥,無得輸。重有甜不辣、鹽酥雞、滷味等台灣夜市嘅常見小食。


圖: hkfoodphoto

 

佐敦人氣無骨雞翼包 好包
最後營業日:3月12日

呢間小店之前從元朗搬到佐敦,一樣咁受歡迎,全因出品用心。麵包係自家製意大利拖鞋包,鬆軟又唔乾~最多人食嘅係香蒜椒鹽雞翼包同蜜糖雞翼包,前者香口後者微甜,最重要嘅係雞翼全部已經去骨,食落啖啖肉!唔怕肥嘅話入口即溶嘅秘製慢煮豬腩肉都值得一試。


圖: 餐廳Instagram

 

深水埗簡約啡店 Coffee of the Day
最後營業日:3月3日

呢間裝修簡約,以白色、水泥同原木為主嘅咖啡小店2020年中進駐深水埗大南街,係唔少Cafe Hopping嘅啡迷嘅必去之選。明亮嘅鋪面加分之餘,咖啡同飲品都有水準。每杯咖啡重會附上一張紙仔寫上句Quote of The Day幫大家打打氣!亦有咖啡掛耳包、袋裝Cold Brew等。


圖: 餐廳Instagram

 

西環手工漢堡 C+ Burger
最後營業日:2月28日(2月28日只做午市)

呢間小店位於港大附近,係唔少學生同街坊嘅愛店。一嚟因為定價親民,由最平嘅素菜熱熔芝士漢堡$38,到最貴嘅雙層牛肉漢堡都係$68咋!二嚟即叫即做嘅漢堡夠好味,自家手打牛肉漢堡扒好Juicy又有牛香。


圖: super yummy

 

觀塘辣汁魚蛋 康和車仔麵茶餐廳
最後營業日:2月27日

呢間喺觀塘屹立36年、由車仔檔起家、以秘製辣汁而聞名嘅車仔麵店一直受街坊歡迎,皆因辣汁用多款香料同沙嗲醬製成,無論大、中、小辣都好惹味,配搭陳皮魚蛋同車仔麵都好夾。價錢親民嘅車仔麵則有近40款餸料,湯底味濃。另外,包含魚蛋、魷魚同牛柏葉嘅沙嗲三寶、蜜汁龍鬚同秘製雞翼尖都係熱賣小食。


圖:hhing91supersupergirl


觀塘高質豉油雞 揚英浦
最後營業日:2月23日

小店主打家常菜,無骨豉油雞、豉油五花肉同無味精靚湯都係推介。無骨豉油雞食落啖啖肉,雞肉嫩滑得嚟又夠入味。而靚湯就每日都有唔同款式,好似滋陰潤肺嘅蟲草花淮山圓肉煲雞腳,有助抗氧化嘅黑蒜姬松茸煲雞腳等等。


圖: h0410232

 

元朗石燒吉列牛名店  The Backstreet Kitchen
最後營業日:2月13日

當年新開嘅時候,佢哋可以話係興起本地石燒吉列牛熱潮嘅始祖之一。就算之後同類舖頭越開越多,依然有唔少客人會專門嚟元朗食,皆因抵食又高質!吉列牛小排外脆內嫩,可以自己用熱石板再燒至理想熟度。就連湯都係切到成朵菊花咁嘅番茄豆腐湯,飯亦有加上自家飯素同紫菜,細節用心。


圖: thegrainyspace

 

大坑馳名精釀啤酒吧  Second Draft
最後營業日:2月11日

大坑係近年開始多咗人去發掘美食嘅小區,當中有呢間開咗接近6年嘅酒吧餐廳,供應多款精釀啤酒,同埋新奇又有surprise嘅菜式,例如有腐乳卡邦尼、賽螃蟹麵等,但最多人鍾意嘅一定係遠近馳名嘅大坑薯條,孜然、乾椒等調味夾埋一齊,好香好啱送酒。可惜不獲業主續租,因而結業。


圖: 餐廳Instagram

 

觀塘文青Cafe  壹小店
最後營業日:1月30日

最特別嘅係裡面有書紙牆,就算唔係文青瞬間都覺得自己多咗陣書卷味~必食推介有蛋餅同窩夫,前者唔係台式而係西班牙式傳統蛋餅(烘蛋),裡面會有薯仔、煙肉等配料,味道豐富;後者口感外脆內軟又富蛋香,點三式窩夫就可以試勻原味、可可同年糕三款口味。之後想食西班牙蛋餅,就要去佢哋嘅姐妹店喇。


圖: 餐廳Instagram

 

上環打卡咖啡  Gwee Coffee & More
最後營業日:1月18日

呢間咖啡店藏身於眼鏡店當中,一到節日唔少人IG都會被佢哋嘅Seasonal Drinks洗版,通常會以咖啡加上唔同配料,再以蛋白糖、忌廉或者布甸製作可愛造型,好睇又好飲~不時又會有其他本地品牌嘅輕食,例如星期一二會有無添加貝果,週末會有適合生酮飲食嘅蛋糕等。可惜小店日前指因為眼鏡店唔續租,咖啡店亦要暫別。


圖: 餐廳Instagram





文:Kar、Cathy.H、Cathy.C
最後更新日:2022年5月30日



關鍵字
全城抗炎
結業
小店
人氣店
元朗
尖沙咀
深水埗
西環
觀塘
葵廣
旺角
銅鑼灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
7天前
【隨時更新】最後倒數!2022即將結業嘅人氣餐廳
1天前
尖沙咀最新露營主題日式燒肉店!3700呎室內Glamping體驗
2022-07-25
全港8大人氣沙嗲牛麵!煲仔沙嗲牛肉麵、 沙嗲牛肉沾麵
2022-08-03