【隨時更新】最後倒數!即將結業的老字號及人氣小店
2020-07-21

疫情又再爆發,飲食業又再經歷一趟大風浪。最近又開始有餐廳忍痛宣佈要結業了。上一輪嘅餐廳結業潮,我哋已經失去咗屹立咗成30年嘅老字號、新開咗一兩年嘅街坊小店、傳統蛇羹、新興甜品等等,嗚,今次又有老店唔做喇。幾唔捨得都好,都係要講句再見。

老字號

百年歷史   公和荳品廠
結業日期:9月尾

 圖:cfung426chtung

位於九龍城,有逾百年歷史嘅老字號公和荳品廠,餐廳日前貼出告示,話會營業到今年9月咋。佢哋嘅豆花又香又滑,仲有坊間少見嘅杞蓉豆花同棗蓉豆花添。另外亦有煎釀豆腐、三寶等小食。趁有得回味時,好去回味喇,愈嚟愈多回憶都將要消失了。

牛頭角老店  蘭香園
結業日期:8月17日

 圖:goodlai1cargo001

呢間老店有成51年歷史,早已成為附近街坊嘅飯堂。由早餐午餐常餐特餐晚餐等等茶記茶餐就梗有,連中式小菜都有,超多選擇。脆皮炸子雞、西多士,沙薑手撕雞等都係客人至愛。不過,佢哋近日就貼出「結業通告」,表示租約期滿,會於8月17號正式結業。開飯仔有打過電話去查詢,回覆指暫時都唔會搵地方重開住了,想重溫回憶嘅朋友仔,抓緊時間了。
 

蛇羹老店  蛇王二
結業日期:4月底

 圖:judzBaby__Nic

屹立咗喺銅鑼灣近40年嘅老字號蛇羹店,曾經獲得多年米芝蓮車胎人美食推介。佢哋嘅臘味飯同燒味飯,亦相當受熟客歡迎。但主角當然係蛇羹,蛇肉佔咗大半碗好足料,湯底以蛇骨熬成,係唔少人冬天保暖嘅回憶,食完好暖身,可惜,佢哋就唔能夠為自己保暖了……

何文田懷舊快餐 天馬快餐
結業日期:4月15日


圖﹕HesperWuSabrinaLau5428

喺何文田長大嘅,一定有食過呢間港式快餐店啦(冇食過都一定聽過啦),經典米高漢堡包,手打漢堡扒又厚又juicy,加埋粗身嘅波浪薯條。食嘅唔係味道,而係一份回憶!香港又少一間懷舊港式快餐店,大家以後要好好珍惜啦~

92年古典西餐廳  Jimmy's Kitchen
結業日期:4月13日


圖:lailaiwonq

中環呢間1928年開業嘅英國餐廳相當架勢,李小龍、威廉荷頓、甘乃迪夫人、球王比利都曾經係座上客,食家蔡瀾盛讚係「香港人最喜愛、最熟悉、最親近的西餐廳」。可惜呢位老友即將要同大家告別,結業前將會供應經典菜單,團隊亦表示物色緊新店希望可以重開。
 

全港首間西班牙餐廳   El Cid
結業日期:3月30日

 圖:bobochan111503cowing

作為全港第一間西班牙餐廳,El Cid喺香港開業咗28年,一直致力引入西班牙地道傳統菜式,再改良以近合香港人口味嘅烹調方法煮製,招牌菜包括華倫西亞燉飯、墨汁釀墨魚同炸釀蘑菇等。華倫西亞燉飯餸料甚多,包括雞髀肉、羽衣甘藍等,圓米飯粒索埋以蕃茄煮過嘅醬汁,香口又粒粒分明。可惜餐廳今個月尾就要結業,不過佢哋都表示如遇有合適條件,都會考慮選址重開嘅,大家繼續期待啦。

荃灣米線   雄記粉麵
結業日期:3月30日

 圖:Kan Lee能能漆

荃灣地鐵站附近有條食街,左右兩旁嘅食店都換過唔少,呢間米線店都算長壽了,做足30年,可惜最後都係敵不過要結業嘅命運。呢度最出名嘅就係打孖上,賣相好似牛脷酥咁嘅魚肉春卷,食落啖啖魚肉又夠飽滿結實,再加自家製辣椒醬真係無得輸!另一推介係墨魚丸,彈牙得嚟真係有墨魚味唔會成口粉。



人氣小店
除咗一批老字號外,亦有唔少口碑唔錯,但只係做咗幾年嘅小店,都要結業。


深水埗日韓小食店 金芝龍日韓美食外賣站
結業日期:7月31日

圖:yuehw_fish

深水埗呢間超人氣、專賣日韓小食嘅外賣小店,主要供應撈麵、丼飯及小食,招牌龍汁和牛牛丸同流心芝士漢堡扒都好受歡迎,不過餐廳早前於官方專頁宣佈正式於7月31日結業,襯呢排多咗喺屋企食嘢去支持吓啦!


大坑人氣牛扒Omakase  Pheromone - Steak House
結業日期:7月底

 圖:hohosick.hk

大坑呢間小酒館招牌係佢哋嘅牛扒套餐,由廚師發辦揀最靚嘅,嚟自唔同國家唔同部位嘅是日推介牛扒,絕對可以滿足各位牛魔王,亦所以有牛扒Omakase之稱。套餐仲包埋餐湯、沙律、薯條、配菜,甜品。可惜嘅係大坑店因租約完結,7月尾就要結業啦,幸好老闆們有意覓址重開,希望早啲聽到好消息!
 

馬來西亞酒吧餐廳 Jalan
結業日期: 5月30日


呢間位於中環嘅馬來西亞菜係附近上班族嘅聚腳點,餐廳取名為JALAN,喺馬來西亞語中係「街頭」嘅意思。餐廳希望可以將大馬風味呈現畀香港人,有啲菜式仲融合咗中式元素添~招牌有巴東牛肉咖喱角、惹味喇沙炸雞、椰子烤大蝦咖喱及斑蘭吉士醬冬甩等。
 

Soho手工Pizza Al Forno Pizzeria   
結業日期:4月30日


圖:bellywongs

呢段時間大家都多咗買外賣返屋企食?中環呢間手工Pizza店就係一個好選擇,採用100%意大利麵粉人手搓,加上訂造嘅磚爐溫度夠高,好快就焗好Pizza,令批底鬆軟香脆得嚟,配料仲Keep到Juicy!但日前老闆表示租約傾唔掂,小店要同大家告別,不過佢哋有意搵新舖重開,希望早日聽到好消息啦。

灣仔Hidden Gem Three Blind Mice
結業日期:4月30日

 圖:EdmundRolston

呢間歐洲風小店可以話係灣仔嘅hidden gem,樓高兩層,每星期有幾日都係主題夜,一日burger一日steak咁,漢堡有牛肉、炸雞同素食選擇,而牛扒亦有肉眼、牛柳、西冷揀,每次主題夜都可以任食埋薯條呢。
 

歐洲現代餐廳 Beet
結業日期:4月25日


圖:clarasyDanSum

呢間位於中環嘅餐廳主要供應多國菜,係唔少鍾意食歐洲菜嘅朋友嘅私人聚腳點,無論裝潢定食物都好有歐洲風味。餐廳於官方Facebook宣佈正式於25/4結業,真係有啲可惜~不過佢哋話有計劃於下年重開,想食嘅朋友仲有機會!

大角咀養生糖水  無糖不歡
結業日期:4月19日

 圖:Adam121

大角咀呢間糖水店主打養生,根據中醫食療配搭出超過六十款養生糖水,喺傳統糖水嘅基礎上再搞下新意,例如手搓糖不甩加入新式抹茶和鐵觀音口味。而且佢哋仲堅持唔用砂糖,只會用天然黑糖、片糖同冰糖去製作甜品,健康啲,甜度亦適中。另外,雖然佢哋頂唔住要結業,但係到呢刻為止,仍然堅持每日將10%嘅生意額捐出,幫助有需要嘅人。

葵廣人氣芋圓   甜圓
結業日期:4月15日

 圖:JAcKLmFwinkie_kwann

前幾年,葵廣人潮旺盛,個個都會去掃街,呢間芋圓店亦係其中一間人氣店。大部分配料都係自家製,包括芋圓、地瓜圓同紫薯圓等都係每日手工製作,有咬口,甜味又夠自然,仲有啲健康配搭,好似燕麥配生熟薏仁咁。不過佢哋約滿後決定唔續約喇,但暫時又未搵到合適舖位去擴充,惟有暫時同大家講聲拜拜先啦。
 

手工石磨黑米、紅米腸粉  鳳鳴石磨腸粉(銅鑼灣店)
結業日期:4月14日


圖:foodiediary_852K2YUS5

石磨腸粉近年喺香港大熱,但多以白米為主,呢間就有少見嘅黑米、紅米腸粉!米漿、腸粉、配料、豆漿等都係手工製作,而且每份腸粉都係即叫即蒸,米香突出而且都相當滑溜。銅鑼灣店即將結業,不過好消息係觀塘新蒲崗兩間分店繼續營業,等疫情好轉可以過海去食嘅。
 

咖啡控召喚  手日土咖啡室
結業日期:4月14日

 圖:adixy06200297mandychoi23

觀塘工廈有唔少特色餐廳,呢間陶瓷工作坊加咖啡室,用嘅杯全部都好特別。主打精品咖啡,提供唔少特色單品豆,仲有手沖鴛鴦,即係單品咖啡豆加高山烏龍茶調泡!其他Milk Coffee都有水準,係唔少咖啡控嘅心水。

彈牙棍打牛丸  潮丸
結業日期:4月4日


圖:phonebus

尖沙咀呢間小店裝修簡潔似Cafe,其實係主打自設工場整嘅棍打牛丸嘅潮式粉麵店,牛丸粒粒彈牙爽口又有牛味。另一食家推介係牛三鮮,即係牛爽腩、牛筋同牛肚。識食一定點埋自家製紅、黃燈籠椒醬!雖然因為租約完結而結業,但餐廳表示會喺未來搵新鋪希望可以以更好嘅面貌同大家見面,Fans記得留意啦。
 

京都過江龍班戟  雪ノ下
結業日期:4月4日


圖:emmi

嚟自日本京都嘅甜品店,主打厚燒班戟同刨冰,前者足4cm厚,用廣島雞蛋同霧島牛奶製作即叫就即製,口感濕潤扎實。後者用日本低鈣同低鎂離子含量嘅天然軟水加原材料製作,冰粒細細碎碎入口即溶。
 

旺角新派特色菜    街坊CAFÉ
結業日期:3月31日

 圖:SAlytWildchildcarol

開咗3年嘅呢間餐廳,將香港特色融入各款菜式中,例如經典街頭小食雞蛋仔咁,就用嚟拌雪糕。最後呢幾日,晚巿仲有75分鐘嘅日式石燒自助放題,可以食到石燒牛之餘,仲有得任飲任食湯、沙律、串燒意粉、甜品等。不過業主要加租喇,佢哋決定唔再續約嚕。

萬花筒主題餐廳 漫花燈火
結業日期:3月31日

圖:emmisrh_

呢間開咗短短唔夠一年,以萬花筒為主題嘅餐廳都宣佈結業啦!餐廳設計以各種顏色、不同花朵、切角鏡面為主題,令顧客仿如置身於萬花筒的繽紛世界內。唔單止裝潢,連食物同餐具都好值得打卡,吸引唔少人慕名而去。咁有心思嘅餐廳,要結業真係好可惜。
 

中環健康素食店 MANA! Fast Slow Food
結業日期:3月27日


圖﹕priscilla_727BonViveur

呢間素食店嘅門面十分有feel,一向都有唔少人鍾意喺呢度打卡,主打沙律同flat bread,配料選擇相當豐富,超過30款,好似酸瓜、甘藍、水波蛋等,令中環嘅打工仔多一個健康嘅選擇。
 



文:Kar、Cathy、Yanica


關鍵字
全城抗炎
結業
小店
老店
灣仔
荃灣
大角咀
銅鑼灣
旺角
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12