【開飯熱店大賞賽前睇】韓風新人王
2016-04-12
近年韓風愈吹愈烈,威力大到十號風球咁。前有《來自星星的你》嘅都敏俊xi,後又有《太陽的後裔》嘅宋仲基,連帶韓食都大受歡迎,所以舊年開飯大賞都新增咗「最優秀開飯韓國菜餐廳」呢個獎項,等班港女想體驗下佢哋「老公」平時食咩嘅時候有個參考。望一望今年個入圍名單,大部份都係榜單上嘅新人,首次入選,其實喺呢個韓式餐廳開到成行成市嘅時代,可以佔一席已經好犀利,究竟邊個可以脫穎而出,成為真正嘅霸王呢?就要睇你哋手上嘅票啦。

李家


Photos by Siucincin


貴為上屆「最優秀開飯韓國菜餐廳」嘅李家,今年繼續入圍。餐廳會送一碟菜絲沙律同酸蘿蔔作前菜,俾你開開胃。首推芝士雞蛋卷,嫩滑嘅雞蛋包著豐富嘅芝士,面頭灑上縱橫交錯嘅茄汁,賣想吸引。另一招牌係炸雞,有多款口味選擇,好似蜂蜜蒜蓉、芝士、甜辣等等,如果覺得太乾太熱氣,就叫杯韓式啤酒乾乾佢,聽著店內大喇叭播著嘅韓流音樂,十足去咗韓國咁。

Outdark


Photos by Soajang0925 & goodfoodgoodmood


作為一間韓式餐廳,Outdark有好多特別之處。首先,店員會派免費小食俾等緊位嘅客人,呢個貼心舉動都攞哂分啦。另外,店主仲會送愛情鎖俾情侶,等佢哋掛上店內鐵網,連南山塔都唔使去。餐廳最出名係芝士肋骨鍋,芝士濃郁,仲設粟米、年糕、泡菜等配菜。最特別係有得自製飯團,店員Oppa首先會教你點整,之後你就要落手落腳DIY,又有得玩又有得食。

OPPA韓國燒肉店


Photos by jobeauty & jasmin4624


呢間韓燒行走街頭藝術風,牆身有好多卡通壁畫,真係入到去都覺得young咗。講起正宗韓燒,點少得爐邊蛋,店員會喺烤爐加入泡菜同章魚嘅蛋漿,稍等片刻就嫩熟,蛋汁四溢。店內提供好多海鮮同肉類嚟燒,好似五花腩、安格斯肉眼扒、大虎蝦等等。如果你好杯中物嘅,就一定要嚟,因為呢度係全港手工啤口味最多嘅餐廳,好似荔枝、鐵觀音咁,非常特別。

Chibee Chicken and Beer


Photos by Foodhistories & everytime


招牌係忌廉羅勒香蒜炸雞,但係見呢度嘅廚師全部都係韓國人,其中一位仲上過當地嘅炸雞課程,就知此炸雞不同彼炸雞。據聞呢度嘅炸雞分兩次炸,以逼出油分,所以食落冇平時嗰種油膩感,濃郁嘅蒜味、忌廉、香草,同香口嘅炸雞配合得相得益彰。

新麻蒲


Photos by Ifanho37 & natfoodiary_


又一間韓燒,前菜可以無限refill,有沙律、泡菜、海帶等等,蔬菜好新鮮,食完味蕾真係好Fresh。肉類主打係護心肉,調味出色、咬落有嚼勁。另一大特色係甜品韓冰,餐廳將冰磨至極細,食落軟綿綿咁,入口即溶,好似食緊雪咁。面頭仲鋪咗紅豆同麻糬,煙煙韌韌,好有嚼口。

School Food


Photos by Riko0310 & tht_dawn


最具代表性嘅韓國餐廳之一,亦都係上屆「最優秀開飯韓國菜餐廳」得主。唔想食嚟食去都係傳統韓食,嚟呢度試吓佢嘅新演繹亦得。招牌係烏卒卒,其實就係墨魚壽司,唔單止餡料係墨魚,連壽司飯都佈滿墨魚汁,賣相特別。再推卡邦尼年糕,將意粉換咗做煙韌嘅年糕,配上香口嘅洋蔥及煙肉,聽到都覺得吸引。

Goobne Chicken


Photos by Siucincin


挾着韓國第一烤雞品牌之名,已經相當有gimmick。最多人推介嘅係蜜糖咖哩雞,單看賣相,烤雞表皮灑上點點蜜糖,閃閃發亮,已經流哂口水。另一特色係鯊魚之淚,港女聽到係咪覺得好浪漫呢?原來佢唔係得個名,而真係有條鯊魚倒插喺一片冰藍色嘅特飲度,就似喺海洋暢泳咁,就算自己唔食相機都餵飽哂。

達人烤肉


Photos by mohkc & ytmxx


再嚟一間韓燒,睇嚟香港人對韓燒係情有獨鍾嘅。賣點係爐邊蛋可以無限添加,側邊仲有泡菜、芝士粟米,可以自己DIY撈蛋或肉食。最特別係牛仔骨,師傅喺醃肉嘅時候加入咗水梨,令牛肉帶有點點甜味,很是創新。

醬缸韓國料理


Photos by au9 & MINNIEMEILAM


最馳名就係醬油蟹,需要兩個月前就預訂,就知人氣幾咁旺盛。佢啲醬油蟹唔單止大隻,而且仲有豐富嘅蟹膏,最適合撈埋啲紫菜飯一齊食。另外大受客人歡迎嘅係芝士海鮮年糕鍋,有多款海鮮如帶子、青口、魷魚等等,加上永遠都唔會錯嘅芝士,味道甜甜辣辣咁,好惹味。

喜來稀肉


Photos by Scarlet cat & ovioleto


相信呢間韓燒大家都有所聽聞,同一般韓燒一樣,前菜同蛋都可以無限添加。招牌仍然係經典嘅護心肉,相信大家都會有疑問,點解護心肉受咁多間韓燒推崇,原來佢係豬橫隔膜同肝之間嘅筋肉,脂肪比例少,所以食落彈牙又唔油膩。另外,大醬湯、煎蔥餅等都值得一試。

韓國菜入圍名單我哋就睇哂啦!你覺得邊間oppa手藝最正宗先?

文: 段

開飯熱店大賞網站:http://tiny.cc/op_2016




隨時接收最新資訊
讚好OpenRice專頁!

關鍵字
韓食
韓燒
韓冰
芝士
炸雞
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【編輯推介】韓風炸雞:屋裡炸雞
2016-06-09
【國際新食力】紅到去韓國?弘大芝士麵包同港版激似
2016-07-20
跟住韓妹韓仔去搵食! 5間首爾當地人鍾意去影相打卡嘅餐廳café推介
2017-03-27
Hello Kitty超巿再發功 新推三色Kitty雪條
2017-04-10
端午糭動員 新潮口味逐隻數
2017-05-18
好新奇!KFC推出全港首部語音及體感偵測技術點餐機(有片)
2017-04-20
餐廳資料
更多
收起
本月熱門
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
人氣主題樂園2024新餐點 Duffy甜品系列、避風塘美食等
2024-03-15
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27