最優秀開飯日本菜餐廳 (2016)
廚師發辦極上海膽杯 鮨文
日文Omakase（お任せ）即係「付託予你」，喺日式餐廳當中即係食客將選擇權交比廚師，由廚師發辦揀當日最時令最新鮮嘅食材製作料理。本來係高級日式餐廳先有嘅體驗，因為鮨文嘅出現而改變咗！
雖然位於元朗，但新鮮優質日式料理令唔少人慕名而嚟，招牌海膽杯，海膽分量十足而且味道鮮甜，視覺同味覺都超滿足。連最後嘅甜品都特別選用軟淋清甜嘅北海道蜜瓜。不過記得唔好掛住比相機食先，因為料理要即刻食先係最好食！
圖：lmythl
最優秀大埔/沙田區開飯熱店 (2016)
工廈中嘅復古文青Cafe 伙食工業
曾幾何時工廠區嘅同義詞就係無啖好食，不過而家越嚟越多餐廳進駐工廈當中，例如火炭呢間復古主題就係附近唔少打工仔嘅食堂之一。
食物由沙律、三文治、台灣料理、意粉到可以慢慢Hea嘅All Day Breakfast都有，當中以台式料理比較出色，無論係滷肉飯、紅燒半筋半牛麵定台南滷水拼盤都有台灣Feel。加上老闆鐘情懷舊美學，裝修復古得嚟好有文青Feel，經過得閒食餐飯打個卡是常識吧。
圖：陸月妹
最優秀大埔/沙田區開飯熱店 (2016)
韓式燒肉加手工啤酒 OPPA韓國燒肉店
電視劇《來自星星的你》帶動咗香港人食炸雞配啤酒嘅熱潮，其實另一樣韓式美食燒肉配啤酒亦係Perfect Match。大圍呢間韓式燒肉店仲要有唔少手工啤酒任揀！
餐廳有成六個啤酒櫃，裡面放滿嚟自唔同地方嘅手工啤酒，猶如一個迷你手工啤酒展覽會。揀啱啤酒之後當然仲要嘆埋美食，韓式炸雞、燒肉、醬油蟹一應俱全，燒肉仲可以請侍應代勞，超細心。
圖：良善熊熊
最優秀元朗開飯熱店 (2014, 2016)
有Heart正宗台灣風味 士林台灣麵
要喺香港搵一碗正宗嘅台灣牛肉麵話難唔難話易唔易，易在香港人鐘意台灣菜所以有唔少台式餐廳，但難在每一間都未必係你心目中嘅正宗台式風味。
而呢間係元朗嘅台灣菜館就由一位住咗喺台灣二十年，跟過台灣酒店大廚學師嘅香港人開設，老闆眼見香港無一碗令佢滿意嘅正宗台式牛肉麵，所以自己堅持由台灣運送食材嚟香港。牛肉麵湯底濃而不咸，牛肉炆得夠腍但保留筋位咬口，麵身煙韌，難怪唔少街坊支持。
圖：Spidey Parker
最優秀九龍城開飯熱店 (2011-2016), 最優秀開飯港式餐廳 (2016), 最優秀開飯快餐店 (2011-14)
真‧香港精神漢堡包 時新快餐店
九龍城嘅長勝將軍，絕對值得所有吃貨特別嚟試一次佢地嘅招牌港式漢堡：新鮮手打牛肉肉感自然鬆軟又有肉汁，加上熱辣辣嘅煎蛋同半融芝士，配埋秘製嘅酸甜沙律醬，味道口感層次出哂嚟。
而且薯條都非常有分量，最重要嘅係十幾二十幾就有交易，性價比高啱哂學生哥同窮忙族。餐廳其他碟頭飯同扒餐都係高CP值之選。
圖：gpmusic、lkhleanne
最優秀開飯西式餐廳 (2014-16), 最優秀九龍城區開飯熱店 (2016)
排隊都要食嘅優質西餐 Simplylife Bakery Cafe
九龍塘大商場裡面其實都有唔少食肆競爭，呢間Cafe之所以能夠突圍而出，就在於佢地嘅水準一直以嚟都Keep得好好，無論沙律、麵包、Pizza、意粉定甜品都叫人回味。
餐廳自設烘焙室，所以麵包、酥餅同蛋糕等都係新鮮出爐，連餐包都特別外脆內軟。主菜嘅水準都唔錯，特別推介嘅係甜品嘅香橙特濃朱古力撻，甜而不膩但依然邪惡度滿分。食飽都仲未夠喉嘅話，仲可以去買啲麵包返屋企。
圖：史提Fun妮、piggy16
想知全部得獎結果及頒獎禮盛況，即上：http://bit.ly/1Ogj2Jm
隨時接收最新資訊
讚好OpenRice專頁！