【開飯熱店入圍名單巡禮】Oishi嘅呢日本菜
2016-02-23
話說今屆開飯熱店大賞又嚟喇,開飯仔就委託咗最Like瓹窿瓹罅搵食嘅喵星人,合組「為食貓偵探團」,上山下海、一帶一路偵查全城大大小小講飲講食情報,廿四小時儘量不眠不休咁四出發掘屬於港喵(oops,唔係,係港人)嘅真正味道。


啱啱公主貓又港貓女上身話要食日本菜,貪佢夠精緻,方便相機食先!美食隊長被帶領之下就出動去搵食,其實日本菜有咁多種類,有拉麵、沾麵、火鍋、放題等等,食邊樣好呢?傻嘅,餓底貓話梗係全部食晒啦!順便教精你啦,而家新興Omakase,即係師傅發辦,由前菜到甜品,都一樣Oishi嘅呢!

四大天王拉麵坐鎮  拉麵天王


Photos by 藍色的天空 & karcc

九十年代香港樂壇有四大天王,而呢間拉麵店同樣都有四大天王:白、赤、黑同限定天王,其實都即係唔同湯底嘅拉麵。前三款都係用港人熟悉嘅豬骨湯底作基本,原味白天王比較清,赤同黑天王分別加咗辣味同黑蒜。定期轉款嘅限定天王亦有驚喜,例如最近推出嘅限定就係胡椒天王,胡椒香氣濃烈惹味,而且仲加埋芝士有得玩拉絲!

優質日式放題之選  極尚大喜屋日本料理


Photos by FoodieOK

日式放題一直都係香港人嘅心頭好,貪可以任食之餘又多選擇,如果上菜速度夠快而且唔會漏單咁就更加好啦!呢間放題店就做到以上嘅要求,而且食物平均水平都唔錯,連平時好驚會中伏嘅創作壽司都有唔少好評!燒物同刺身都係好味又番本嘅必點之選,而且點幾多真係會比足幾多。相比起嚟甜品就失色咗少少,但每人有一杯哈根大師雪糕,補返數啦。

無得輸海膽杯  鮨文


Photos by hkfoodom & 樹太太

Omakase式嘅日本料理店,坐到壽司吧枱嘅仲可以見到Cupid師傅喺你面前即席料理,超過九成食材從日本入口。最受歡迎嘅係其中一道嘅海膽杯,海膽分量十足而且味道鮮甜,視覺同味覺都超滿足。日本鮑魚伴海膽汁亦係必試之一。有特別喜好嘅可以訂枱嘅時候先講低,無嘅話就會按時令同食材嘅質素安排由淡至濃味嘅Set,比你一個完整嘅Omakase體驗。

重口味沾麵新體驗  三田製麵所


Photos by peachpink & KaterinaLin

近年除咗拉麵繼續受到追捧之外,亦多咗港人去試沾麵,雖然沾麵可以話源自拉麵,不過兩者學問就有唔同。講多無謂食嘢最實際,呢間沾麵品牌嚟自日本,拉麵係每日新鮮製造,而沾汁就係濃厚豚骨魚介湯,比較濃稠同鹹,所以唔可以就咁飲,一定要沾麵一齊食。最後剩低嘅沾汁加鰹魚清湯就變「湯割」,又係另一番享受。

任食高質飛驒和牛  盛八日式火鍋放題店


Photos by sosoku & Yan~*

集日本嘢、火鍋同放題於一身,而且品質唔錯,難怪盛八一直都有相當口碑。打邊爐當然要食牛肉,呢度有少見嘅飛驒牛,係高品質和牛嘅一種,油花分佈平均而且肉質細緻鮮嫩。想試清楚和牛嘅美味可以揀喜壽燒湯底。其他配料同醬汁嘅選擇都唔少,更加有甜品供應任食,水準未必及得上五星級酒店,但勝在可以一站式滿足埋甜品胃吖嘛。

新到港最強濃厚拉麵  Bari-Uma 廣島霸嗎拉麵


Photos by mmnwilliam

嚟自日本廣島嘅過江龍,第一間分店就開喺有拉麵街之稱嘅登龍街。主打嘅秘製湯底除咗豬骨之外仲加入雞骨同蔬菜,特別香濃但容易入口,難怪有「廣島最強濃厚拉麵」嘅美名。麵條依然堅持自家製作,麵質幼滑而夾起每條都有掛湯。而且除咗拉麵之外亦有唔少小食,例如羽板燒餃子、燒汁唐揚炸雞同唔同口味嘅雪糕,啱哂貪心嘅香港人。

香港咁多日本菜Fans,入圍嘅日本菜餐廳當然仲包括天然豚骨拉麵專門店一蘭大滿喜日本料理金田家武士拉麵。各有唔同特色,要揀有難度?諗多一陣好啦,記得喺3月7號或之前去OpenRice 優秀開飯熱店大賞2016網站投選最鐘意嘅日本菜餐廳,有機會贏取超過10萬元豐富獎品!
投票網站:http://tiny.cc/op_2016




隨時接收最新資訊
讚好OpenRice專頁!


關鍵字
開飯熱店大賞
入圍名單
日本菜
拉麵
放題
沾麵
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【開飯熱店入圍名單巡禮】來一場正宗葡萄牙盛宴
2017-02-27
【優秀開飯熱店大賞 2017】頒獎禮盛況
2017-05-17
【開飯熱店入圍名單巡禮】渡過美好的小食甜點時光
2017-02-27
【開飯熱店入圍名單巡禮】盡享酒店的五星餐飲體驗
2017-03-08
【開飯熱店入圍名單巡禮】走訪各路中式飯店感動胃兒
2017-03-08
【開飯熱店入圍名單巡禮】小城地道茶記麵檔尋滋味
2017-02-27
餐廳資料
更多
收起
本月熱門
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
7天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18