【開飯熱店入圍名單巡禮】香港地掃街小食精選
2016-02-23
話說今屆開飯熱店大賞又嚟喇,開飯仔就委託咗最Like瓹窿瓹罅搵食嘅喵星人,合組「為食貓偵探團」,上山下海、一帶一路偵查全城大大小小講飲講食情報,廿四小時儘量不眠不休咁四出發掘屬於港喵(oops,唔係,係港人)嘅真正味道。


香港人鐘意掃街是常識吧,從喺街邊篤串魚蛋到拎住包暖笠笠嘅雞蛋仔返屋企慢慢嘆都係咁受歡迎。連今年米芝蓮都新增咗街頭小食推薦。點樣先可以做到受歡迎,甚至被米芝蓮推介嘅小食呢?能力越大,食量越大,食哂咁多間之後,等美食隊長而家要嚟大揭秘!

豬油香滑腸粉  合益泰小食


Photos by 美食無止境~ & mama-gugu

以香滑腸粉馳名,自家古法炮製腸粉有米香,滑身之餘仲彈牙。基本醬汁係鹹鹹地嘅豉油、香濃芝麻醬再加邪惡嘅豬油!當然可以自己再加甜醬、辣醬或者烘過嘅芝麻。香、白、滑、濃、彈五合一嘅熱辣辣腸粉,唔單止征服油麻地嘅街坊同香港嘅食家,連米芝蓮都將佢地列入街頭小食推薦。除咗腸粉,豬皮蘿蔔同綿滑嘅粥都係實惠又好味嘅推介。

無得輸鹵水串  肥姐小食店


Photos by tempo1652 & g__i__n

去旺角掃街要搵肥姐是常識吧,最多人點嘅一定係皇牌套餐,細生腸滑溜唔癡牙,火雞腎爽口,墨魚彈牙,而且鹵水調味得宜又入哂味。而且記得記得記得(好重要所以要講三次),一定要點芥末醬同甜醬,芥末醬有少少攻鼻夠刺激,甜醬亦係特別配方。難得咁多年都保持咁高水準,難怪每日咁多人大排長龍,都要一親肥姐...鹵水嘅香澤。

鬆厚芒果班戟  紅磡雞蛋仔


Photos by sophronia1995 & suzi1005

雞蛋仔老字號之一,而且雖然店名係雞蛋仔,但係識食一定食芒果班戟‬。厚身鬆軟帶蛋香嘅班戟加一層沙律醬後包住一粒粒酸甜多汁嘅芒果,大大份都係一張$20有找!當然雞蛋仔亦係水準之作,粒粒都綿密帶少少煙韌,而且大部分都係實心唔會食空氣同時口感亦唔會死實,有少少似食雞蛋糕咁。而且老闆都好好人,雖然忙起上嚟比較趕,但唔少街坊都話伯伯其實好好傾㗎。

香港良心白魚蛋  林昌記


Photos by 良善熊熊 & Kan Lee

獨沽一味只賣魚蛋,招牌細細粒白魚蛋自家打製,不含防腐劑,魚肉比例超過八成,同街邊食到成口粉嘅無得比。三款口味分別係睇落特別雪白圓潤嘅原味,微辣香口嘅咖喱味同香而不嗆嘅辣味,無論邊款都彈牙兼有魚味。而唔少老主顧就鐘情「炸蛋」:即叫即炸嘅原味魚蛋,餐牌上無㗎!炸皮香脆薄身,而且食落唔油膩,心思之作。

唔同餡料有排試  媽咪雞蛋仔


Photos by wander2wonder & tiffytaf

新派有餡雞蛋仔代表之一,口味多變,既有芝麻、朱古力等大路口味,亦有栗子、紫蕃薯等比較少見嘅餡料,一日試一款都要十幾日。無論邊款口味都係外脆內軟,外面睇落去漲卜卜,咬開平均都有七成滿。另外呢度嘅格仔餅係偏香脆嘅,外脆內軟嘅口感有少少似窩夫,加埋醬料一啖咬落去,味道、溫度同口感都啱哂。

美國手工爆谷  Garrett Popcorn


Photos by Raul L. & Nata Wu

小食店入圍名單中嘅唯一「外國勢力」,以嘅手工爆谷出名,每一粒都係新鮮製造不含防腐劑。最多人買嘅係Chicago Mix,其實即係焦糖同芝士兩種口味各半,一啖甜一啖鹹,意想唔到咁夾之餘仲無咁快膩,唔經唔覺就會成包食哂。最Like佢地嘅用心,幾乎所有爆谷都會爆開哂,而且無論係糖漿或者味粉都上得好均勻,粒粒都食到好滋味。

香港嘅小食店當然唔止咁少!入圍名單仲有公和荳品廠農場鮮奶有限公司低調高手大街小食乜嘜雞蛋仔,你搵唔搵到你嘅心頭好?有心頭好嘅不妨喺3月7號或之前去OpenRice 優秀開飯熱店大賞2016網站投下你嘅心水菜式一票,睇下你嘅選擇同我地為食貓偵探團一唔一樣?!
投票網站:http://tiny.cc/op_2016




隨時接收最新資訊
讚好OpenRice專頁!


關鍵字
開飯熱店大賞
入圍名單
小食店
雞蛋仔
腸粉
魚蛋
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【開飯熱店入圍名單巡禮】來一場正宗葡萄牙盛宴
2017-02-27
【優秀開飯熱店大賞 2017】頒獎禮盛況
2017-05-17
【開飯熱店入圍名單巡禮】走訪各路中式飯店感動胃兒
2017-03-08
【開飯熱店入圍名單巡禮】盡享酒店的五星餐飲體驗
2017-03-08
【開飯熱店入圍名單巡禮】小城地道茶記麵檔尋滋味
2017-02-27
【開飯熱店入圍名單巡禮】渡過美好的小食甜點時光
2017-02-27
餐廳資料
更多
收起
本月熱門
【隨時更新】便利店尋寶 每周新品速報
2天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
7天前
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
日本人氣茶室登陸尖沙咀 招牌Tea Set、甜品推介(有片)
2019-09-25