【開飯熱店入圍名單巡禮】誘惑難擋!街頭小食新勢力
2018-02-26

美食當前,相機食先。作為foodie,先影為敬再放上IG直情係反射動作!優秀開飯熱店2018以「美食大晒 盡情Show Quali」主題,無論你係食家定係大廚,有好嘢自然要晒一晒!即刻睇睇各區同各類型必試熱店如何大晒功架!


愈嚟愈多香港人鍾意 #掃街,😍 #邊行邊食,🍟🍗🍦🍡🍢🍩少少地過下口癮又得,甚至乎掃多幾間當正餐都唔係誇張🙊。所以,今年嘅 #優秀開飯熱店大賞 嘅 #菜式組別 入面,當然唔少得「#小食店」啦。呢十間入圍嘅小食店,你哋又食過幾多?邊間係你心水先?揀啱就快啲去 #投票喇 🙋‍♂️🙋!

紅磡長龍串燒店  美味佳

 圖:irene.laiiiii來自小喇星的我

多數食串燒嘅地方都係外賣店,呢間係少數可以坐低慢慢食嘅串燒店。選擇幾多下,全部都係即叫即燒嘅,由燒牛肉、豬肉、雞肉,到原條茄子等等乜都有得揀,而最開心同最抵食嘅,可能係9蚊嘅燒雞全翼!大大隻,幾多汁,雞肉都算嫩,你話邪惡都係咁話,食咗先算。另外,呢度仲有蛋炒腸粉同車仔麵食。

自選四色手卷    卷王

 圖:chanwinglunhkfoodkiller_

手卷舖係就係開到周圍都係,但食過嘅都知,未必間間都值得回頭再食。呢間手卷店,除咗有官配口味,仲有好多食材畀客人自選4款配做手卷,海膽呀吞拿魚呀通通都有得揀,夠晒自由。就連豉油都有小辣大辣同唔辣揀。丼飯亦係另一受歡迎之選,其中有款「蟹皇丼」,又軟殼蟹又蟹肉,重點係有好多香甜嘅蟹膏呀!

葵廣章魚小丸子    真‧章魚無雙

 圖:Yin177mandycheng0212

葵廣咁多間掃街小店,呢間舖能夠突圍而出都的確係有佢嘅過人之處嘅。主打章魚燒,口味多多,黑松露呀櫻花蝦呀明太子呀咁,樣樣都好吸引,係幾香口嘅。而且,每粒章魚燒都幾大粒,咬開中間仲見到有大大粒章魚添,粒粒都有,算係真材實料啦。

日本過江龍    世界第2好味雪糕蜜瓜麵包

 圖:TMTRAVELERFoodiessssss

呢款雪糕麵包,未喺香港開前,好多人飛返鄉下時都好鍾意去排隊食返個。而家嚟到香港開舖,當然得寵啦。麵包每日新鮮焗製,啱啱出爐嗰陣,外皮香脆,包心軟綿,夾朱古力定綠茶味雪糕都好,一冷一熱嘅口感都係咁match。當你正想話蜜瓜包冇蜜瓜嘅時候,佢哋呢期就出咗期間限定嘅蜜瓜味雪糕,咁就變咗蜜瓜雪糕蜜瓜包喇。

旺角港式滷味   炸理滷味

 圖:astrogirlSneaker Addict

單係睇佢個名同裝修,都係幾有玩味嘅,一面玩粗口諧音,一面行懷舊復古街頭風,而主打嘅,就係港式炸物同滷味。最受歡迎嘅炸雞脾莫屬,生炸嘅,香噴噴,脆卜卜,仲保留到肉汁,等耐少少都抵嘅。而滷味方面,揀返個滷味大全咁就可以一次過食晒鴨舌、大腸同雞腎,滷水膽係自家製嘅,滷得都幾入味,甜甜地。不過,可惜,未試嘅朋友暫時都冇機會鳥,結咗業喇。

菲律賓shake shake fries   Potato Corner

 圖:Koko Layzoeylalala

薯條控一定食過呢間啦,嚟自菲律賓嘅薯條店,全球夾埋嘅分店有成900幾間。薯條、脆薯寶、薯餅都有得食,但通常啲人都係食薯條的啦。呢度賣嘅係幼身嘅直薯條,有芝士味、sour cream、bbq同特辣bbq四款恆常口味加其他期間限定味揀。店員會將你揀好嘅味粉倒落個樽度,shake 呀shake,shake到每條薯條都沾晒粉,夠晒平均同惹味。

懷舊燒魷魚絲  和藏桂林夜市

 圖:yuek01Helenbobo39

旺角係街頭小食嘅集中地,魚蛋燒賣呢啲common小食唔多介紹,嚟到呢間嘅話,必點「功夫魷魚絲」同「避風塘豆腐」啦。前者真係考功夫架,又烘烤又「拉絲」,再搽埋特製醬汁,好香口。後者炸到脆口,入面嘅豆腐仲依然好軟滑,點埋酸辣汁就仲滋味。

以上呢7間都係今年新入圍嘅,#十強 入面另外仲有上榜多年嘅合益泰小食肥姐小食店同埋低調高手大街小食,競爭激烈,最後係新手勝出定係老店穩守,就睇你哋一票喇!投票仲有機會得到豐富獎品添呀!仲等?投票呢邊啦:https://www.openrice.com/info/awards2018/index.html


文:Kar

關鍵字
旺角
尖沙咀
紅磡
葵廣
葵涌廣場
街頭小食
掃街
開飯熱店大賞
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
每日香港仔直送!全港首間一人一蒸氣鍋 食齊龍蝦、鮑魚、蟶子王(有片)
2018-12-18
人氣餐廳進駐長沙灣新Foodcourt 老Come煎餅、十二味酸菜魚(有片)
2018-12-28
一鍋兩食!上層干鍋底層火鍋 荃灣必食龍蝦海鮮山(有片)
2018-12-28
觀塘新開酒店半自助餐 任食即開生蠔、長腳蟹
2019-01-09
荃灣新地標南豐紗廠 4間特色Cafe全介紹(有片)
2018-12-24