【開飯熱店入圍名單巡禮】新晉搵食熱點 荃葵青區美食精選
2019-03-11

常問道人生有幾多個十年,OpenRice啱啱就有兩個。踏入開飯二十年,優秀開飯熱店2019以「歷久嚐新」做主題,擁抱經典、傳統老味道之餘,亦緊貼潮流,飽嚐新世代嘅美食。即刻睇下邊啲必試熱店入咗圍啦。


以為搵食一定要出市中心?荃葵青區近年愈來愈多新餐廳甚至過江龍進駐,可以話係搵食地區嘅後起之秀,而家反而愈來愈多人特登走入荃葵青區搵好嘢食添!今年優秀開飯熱店大賞荃葵青區入圍十強有本土港式茶餐廳,有養生台式火鍋,又有日本嘢韓國嘢,連創意中式點心同打卡Café都有,種類咁多元化,難怪呢區咁快崛起啦!


意大利菜小店 Cossi

區內人氣高企嘅西餐小店,環境舒適寫意坐得又舒服,而且食物水準高之餘價錢仲好實惠,係唔少荃葵青友聚餐之選。必試之選有炭燒美國牛肩扒,牛肉味濃得嚟有陣陣炭火香,肉質軟唸。龍蝦湯入口鮮味,湯內有蝦肉,絕無欺場。蕃薯條炸到好香口,叫一碟同朋友share就啱啦!


圖:PingpingggggYingyo


來自九州的日式café L.D.K. by Ufufu Café

嚟自九州嘅日式cafe品牌,裝修風格係和室簡約風,葵芳分店仲特設西日式洋食菜單。餐廳以超多款芭菲而聞名,宇治抹茶蕨餅芭菲茶味香濃,係人氣之選。主食方面,蛋包飯蛋層厚薄適中,半熟嘅蛋皮下係炒飯底,又幾有驚喜。另外仲有烏冬、鐵板燒同和風意粉㗎。


圖: RitaBailey為食MoJil


韓式火鍋自助餐 樸生 

喺香港地想搵任食火鍋話都無咁易,但韓式自助火鍋又真係少見啲。青衣呢間韓式自助火鍋選擇夠哂多,除咗火鍋基本嘅肉同菜任叫外,自助區都大把選擇,有部隊鍋區、石頭飯區同甜品區,全部都可以自製㗎~又幾好玩喎,另外仲有得任食炸雞,二百蚊嚟講真係好抵食!


圖:mk chan chansupplement_815


天鵝主題café 咖啡灣 

呢間café就啱哂女士們嚟!餐廳以天鵝為主題,周圍都係天鵝嘅擺設,仲有咖啡杯造型嘅坐椅,真係唔影返一輯寫真都唔駛走。餐點方面主打畫上唔同卡通人物同拉花嘅咖啡,另外佢嘅窩夫造型同味道都絕對滿足到食客視覺同味覺,食完真係少女心爆發啊!


圖:Susansyleunghappylucky ning


摩登點心中菜館 唐宮小聚

飲茶再唔係老一輩嘅專利啦~呢間中菜館主打各式摩登點心,所有點心造型都好精緻,味道都好出色添!如黑金流沙奶皇包外型就好trendy,紫蓉豬豬紫薯蓉包又好可愛,你話點捨得食佢呢?仲有珍珠蝦餃、紅粉佳人、蟹粉麻球等都值得一試,飲茶原來都可以相機食先㗎。


圖:JulieLi7563Foodnfoodnfood


荃葵青區十強仲包括老牌茶餐廳嘉樂冰廳、文青風咖啡館荳子、巨無霸刺身丼爆丼丼、舊港式西餐風雅高·33同埋大熱嘅養心殿台式養生鍋,邊一間係你嘅心水?即刻去投票更有機會獲得豐富獎品:
https://www.openrice.com/info/awards2019/index.html


文: Yanica



關鍵字
優秀開飯熱店大賞
入圍名單
地區組別
荃葵青區
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【開飯熱店入圍名單巡禮】深水埗平民美食天堂 新派傳統乜都有
2019-03-07
2月份好評餐廳十強
2019-03-11
Chill嘆週末!黃宗澤蠔吧新推任食生蠔Brunch (有片)
2019-03-06
【開飯熱店入圍名單巡禮】港人最愛 人氣東南亞菜大激鬥
2019-02-21
【開飯熱店入圍名單巡禮】全城熱捧甜品店 疏乎厘班戟芋圓刨冰爭崩頭
2019-02-25