【開飯熱店入圍名單巡禮】大埔沙田平民食店 中西日等多國菜任揀
2018-03-09

美食當前,相機食先。作為foodie,先影為敬再放上IG直情係反射動作!優秀開飯熱店2018以「美食大晒 盡情Show Quali」主題,無論你係食家定係大廚,有好嘢自然要晒一晒!即刻睇睇各區同各類型必試熱店如何大晒功架!



呢幾年 #新界 其實都有唔少餐廳進駐😍,好似 #大埔 同 #沙田 區咁,由 #過江龍 老店 到用心 #小店 都有,選擇眾多而且都相當抵食😃,都係價錢相宜嘅食肆或者水準唔錯嘅 #任食 餐廳。選擇恐懼症發作?😔 嚟睇今年 #優秀開飯熱店大賞 #十強 有無心水,最後記得去投票呀!😚
 

禾輋創意牌檔風味  陳根記


圖:mckey

沙田區最出名嘅大牌檔,2011-16年得過最優秀沙田開飯熱店,舊年一度跌出入圍名單,今年強勢回歸。最令大家心心眼嘅代表菜包括其他大牌檔少見個Wasabi手撕雞同芒果一口脆,創意同抵食兼具。但因為今年3月底租約到期後係咪續到約真係未知數,想重溫呢種牌檔風味嘅朋友仔記得把握時間啦。
 

太和多選擇火鍋店  漁民火鍋雞煲專門店


圖:MokTerry

香港人鍾意打邊爐,連帶火鍋店都多過人,呢間能夠順利跑出,皆因鍋底同配料選擇多元化,質素都值得一讃。好似火鍋有啱哂配新鮮海鮮嘅粥底火鍋,足料鮮甜嘅野紅茄極品龍皇鍋,香辣惹味嘅重慶鮮辣雞煲等。而且配料由基本嘅安格斯牛肉,到特色手打丸類、比較少見嘅米血糕等應有盡有,難怪成為街坊嘅聚餐之選。
 

太和心思西餐Cafe  咖啡灣


圖:ChristineLee4300

Cafe用天鵝嚟做Logo已經夠搶眼,而且食物質素都唔錯,唔少食家都話值得回訪。最出名嘅係用原隻軟殼蟹嘅軟殼蟹黑松露忌廉意粉,Creamy帶黑松露香嘅意粉配香脆軟殻蟹,口感層次分明。而另一必試嘅係心形窩夫,有紅豆綠茶、玫瑰花士多啤梨、紫薯多款選擇,窩夫香脆有蛋香,保證滿足各位嘅甜品胃。
 

法式甜品親民Cafe  Fauchon Paris Le Café


圖:catloveyouFannyCheung43

以Macaron同閃電泡芙著名嘅法國甜品老店Fauchon喺香港開設嘅第一間餐廳,除咗招牌甜品之外,菜單亦加入唔少法國菜式,例如傳統菜法式油封鴨腿伴長邊豆配里昂炒薯,招牌菜肉眼牛扒配沙律等。不過最多人去食嘅係休閒下午茶套餐,價錢親民又可以食到唔同甜品茶點。餐廳仲同時入圍法國菜餐廳最後十強,能唔能夠成為雙料王就睇大家手中嘅一票啦。
 

好食好玩火鍋放題  稻八日式火鍋炸物放題


圖:yemenikwan加比爾

餐廳主打火鍋放題,按肉類級數收費。特別在餐廳一角仲有自助炸爐,可以自己DIY炸串,有得食仲有得玩。而火鍋亦無欺場,鍋底有壽喜燒、牛乳牛骨湯、豬骨濃湯、地獄火岩湯等任揀。其他配料例如蔬菜、丸類、水餃、麵食任攞,仲有無限飲品、沙律吧同雪糕任食,就算係大胃王都可以捧腹而回。
 

大埔濃厚豚骨拉麵  麵屋 元祖達摩


圖:11號巴士

開店不足一年就有唔少熟客,皆因鋪仔細細但落嘅心思時間一啲都唔少。自家湯底用豬骨等材料每日新鮮熬足8個鐘,而其他口味例如墨魚汁、北海道3.6牛乳、櫻花蝦味噌拉麵等同樣足料。而麵可以選擇要幼麵或者粗曲麵,叉燒亦可以要薄切嘅豚腩叉燒、豚肩叉燒,或者厚切個豚角煮。芝麻雞翼同雞軟骨餃子等小食亦係亮點。
 

而入圍名單仲包括2017年都有入圍嘅2+2 Café一鳴拉麵八妹雞煲,同德國餐廳,各位無論係咪大埔沙田友都可以投下你嘅神聖一票!即刻去優秀開飯熱店大賞網站投票,仲有機會獲得豐富獎品呀。


立即投票:https://www.openrice.com/info/awards2018/index.html


文:Cathy

關鍵字
開飯熱店大賞
入圍名單
大埔區
沙田區
大牌檔
火鍋
Cafe
拉麵
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
人氣餐廳進駐長沙灣新Foodcourt 老Come煎餅、十二味酸菜魚(有片)
2018-12-28
一鍋兩食!上層干鍋底層火鍋 荃灣必食龍蝦海鮮山(有片)
2018-12-28
觀塘新開酒店半自助餐 任食即開生蠔、長腳蟹
2019-01-09
荃灣新地標南豐紗廠 4間特色Cafe全介紹(有片)
2018-12-24
M級和牛火鍋放題,90分鐘回本攻略
2019-01-03