【聖誕2023】送禮好介紹 精美聖誕禮盒大集合
2023-12-18

年尾聖誕節如果想向家人或朋友表達心意,揀份精緻嘅禮盒就最好不過!聖誕前夕搜羅咗幾樣聖誕禮盒畀大家,收到嘅人一定覺得好窩心。

目錄

  ► 節日精選雜錦曲奇蛋卷禮盒:YOKU MOKU
  ► 聖誕朱古力禮盒:GODIVA
  ► 「甜品版」聖誕行李箱倒數日曆:Pâtisserie Jane
  ► 迪士尼米奇與好友系列聖誕倒數禮盒、迪士尼米奇與好友系列聖誕小食禮盒:奇華餅家
  ► 歡欣聖誕四色脆卷禮盒:Lady M
  ► Children's Chocolate Advent Calendar、Christmas Merrilossus Biscuits:FORTUNUM & MASON
  ► XMAS Cocktail Set:Ping

 

節日精選雜錦曲奇蛋卷禮盒  YOKU MOKU

來自日本嘅殿堂級甜品品牌,主打雪茄蛋卷~今個聖誕推出多款聖誕禮盒,推介節日精選雜錦曲奇蛋卷禮盒,包括原味雪茄蛋卷 6 件 、朱古力味雪茄蛋卷 4 件、朱古力夾心曲奇 12 件、朱古力杏仁曲奇 12 件及牛油曲奇酥 12 件。雪茄蛋卷以北海道牛油製作,牛油味突出、口感鬆脆。朱古力味嘅蛋卷都好香濃呀。
 

聖誕朱古力禮盒  GODIVA

經典朱古力品牌,今年聖誕繽紛限定朱古力禮盒系列以有趣嘅朱古力工廠作主題。包括三款限定版松露朱古力,分別係南瓜派松露造型朱古力、胡桃餡餅松露造朱古力及百香果椰子松露朱古力,各有特色。另外仲有 Holiday Sujets 經典造型可愛朱古力,三款唔同口味唔同造型,超可愛!
 

「甜品版」聖誕行李箱倒數日曆   Pâtisserie Jane

想有一日一驚喜嘅,呢個「甜品版」聖誕行李箱倒數日曆就啱晒!行李箱造型夠晒有 Gimmick,一打開就見到代表唔同日子嘅小禮盒,由 12 月 19 日開始逐一拆開食。七款特色甜點包括丹麥曲奇、法式朱古力球、英式紅茶曲奇、比利時朱古力、日式抹茶朱古力脆球、意大利脆餅以及聖誕節唔少得嘅薑餅人曲奇,超有儀式感呀。
 

迪士尼米奇與好友系列聖誕倒數禮盒、迪士尼米奇與好友系列聖誕小食禮盒  奇華餅家

呢間餅家同迪士尼合作推出米奇與好友系列倒數禮盒及小食禮盒,迪士尼 Fans 不可錯過!聖誕倒數禮盒有 14 個唔同圖案嘅小盒子,內藏多款聖誕驚喜小食,包括鳥結糖、蝴蝶酥、曲奇及果味金酥等。聖誕小食禮盒包裝好吸引,米奇化身聖誕馴鹿同戴住聖誕帽等迪士尼好友分享佳節歡樂~另外餅店亦有出自家嘅聖誕小食禮盒,小食包括薑味曲奇、杏仁粒朱古力薄片、特濃朱古力蛋卷、鳳梨金酥及鬆脆香甜嘅花生脆糖。
 

歡欣聖誕四色脆卷禮盒   Lady M

人氣蛋糕店推出歡欣聖誕四色脆卷禮盒,選用華麗嘅翠綠色絲帶為點綴,送禮夠晒得體。禮盒包含咗八件脆卷,共有四種口味包括雲呢拿、朱古力榛子、伯爵茶和抹茶。禮盒攤開可以變成八個獨立小禮盒,可作為單獨小禮物或節日派對嘅禮品,好貼心!
 


Children's Chocolate Advent Calendar、Christmas Merrilossus Biscuits   FORTNUM & MASON

來自英國嘅品牌,今年聖誕最推薦係呢個仿照 Fortnum’s 英倫總店設計嘅倒數月曆。每打開一道門都會發現唔同造型嘅牛奶朱古力,更可以搵到聖誕老人形狀嘅朱古力,聖誕節正日門後仲藏有神秘驚喜添!至於聖誕限定嘅 Christmas Merrilossus Biscuits 混合水果、果仁及香料,口感豐富層次鮮明。
 

XMAS Cocktail Set  Ping

百分百香港手工製作嘅樽裝雞尾酒品牌,聖誕推出 XMAS Cocktail Set,一套五支方便大家開小型 Party 用!五款口味分別係再度強勢回歸嘅海鹽焦糖、香料白葡萄酒、薄荷朱古力,仲有鳳仙同蘋果批口味。薄荷朱古力用咗 Valrhona 85% 黑朱古力製作,令呢樽 Chocomintini 嘅朱古力味慢慢滲入 Cocktail~


文: Yanica


關鍵字
聖誕
2023聖誕
禮物
送禮
朱古力
倒數日曆
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!5月壽星「天際」慶生+驚喜杯壽司
2024-05-04
東京炭火現烤手工漢堡扒 100%日本牛肉製作 7/5登陸中環
2024-05-02
【隨時更新】零食速報 每周新款零食、酒品點評
3天前
本月優惠大集合 外賣自取指定食品、茶飲$28 片皮鴨24折
2024-04-22
5大人氣海鮮湯沾麵店 特製龍蝦沾麵、番茄蝦湯沾麵
2024-04-23