【美食博覽2018攻略】開鑼直擊 多款即製小食推介(有片)
2018-08-16

等到啦~ 一年一度嘅美食博覽,今日喺灣仔會展開鑼啦。同往年一樣,都係分有公眾館、尊貴美食區等等。早排就同大家預告咗幾個優惠同必行嘅攻略啦,今日就同大家嚟個現場直擊,睇下有啲咩即叫即製嘅小食,同埋必掃item先~~~

公眾館

韓國蟹醬芝士玉子燒  $40

玉子燒呢款小食,流行咗成年都仲係好受大家歡迎。呢檔仲要加埋同樣係大熱嘅韓國蟹醬落去,唔吸引就奇。即叫即製,芝士有半溶拉絲效果,蟹醬亦好香濃。

攤位:Zi Mu Biotech Food Co Limited (1D-D27 )

鵝肝小丸子  $35/6粒(加黑松露醬加$10 )

章魚小丸子就食得多,呢檔就搞搞新意思,用鵝肝代替章魚,每粒小丸子放入兩粒鵝肝仔。雖然細細粒,吖但又幾香口喎。

攤位:天然食品有限公司  (1E-C28)

即夾雪糕鯛魚燒  $40

成個攤位除咗有雪糕同鮮果乳酪之外,仲有樣新嘢喎,係即夾雪糕鯛魚燒呀,脆脆地,雪糕口味就可以揀紫薯或者宇治金時。

攤位:阿菠蘿 (1E-A10)

一口牛  $45

今年有唔少老店都喺場內擺設攤位,其中包括呢間有近50年歷史嘅金鳳大餐廳。現場就冇扒鋸喇,不過皇牌一口牛就係呢度嘅限定菜式,餐廳都冇得食㗎。將紐西蘭西冷切粒再即場煎香,配埋洋蔥,肉味濃郁。同場都係新出嘅仲有「爭返氮氣金菠蘿」,烏龍茶底,加入菠蘿肉同菠蘿汁,茶香果甜。

攤位:金鳳大餐廳 (1B-A33)

Show me your love 罐頭   $15罐

大家仲記唔記得上年嘅豆腐火腩罐頭?今年佢哋再接再厲,研發咗Show Me Your Love口味,即係咩?粟米肉粒呀!負責人李生表示,研發過程中試咗好多種唔同嘅粟米同豬嘅部位嘅配搭,最後選用豬豚肉。佢仲話希望可以將香港獨有嘅茶記文化放入罐頭,方便煮食用之外亦可當手信送畀外國朋友。唔知下年到咩味呢?btw,據了解暫時只係生產咗1000罐,喺會場限量發售。

攤位:遠大貿易有限公司 (1A-C02)

荳奶紅豆冰 $20

紅豆冰呢啲懷舊飲品,本身都有佢一定嘅叫座力。今次仲要加埋煙霧效果,係更加容易吸引到一眾愛打卡嘅朋友仔嘅。BTW,咪話開飯仔唔照顧酒鬼,介紹返,嚟自澳洲嘅 Rusden Driftsand GSM 2016帶有豐富果香,而且仲有啲啲creamy嘅口感,幾特別,會場價只係$130咋。

攤位:FoodWise(1C-B28)

榴槤手工蛋捲 $88

呢樣雖然就唔係即叫即製嘅,但就係新推出冇耐嘅香港自家品牌手工蛋卷!由前龍島星級餅廚黃炤豪監制,總共有5款口味,包括牛油、抹茶、金沙、榴槤同中國芝士(aka腐乳)。師傅選用紐西蘭嘅天然牛油、日本麵粉等去製作,蛋味香、蛋卷脆,而腐乳嗰隻係取其鹹香之味,而唔係想像中嘅腐乳味,唔錯呀。巿面上好似暫時未有得賣住㗎。

攤位:尊(1C-C33)

尊貴美食區

新出椰子雪條  $35

呢間老字號,年年都有新意思。今年就新出咗條椰子雪條。咪睇佢成條白雪雪好似好plain咁,食落椰子味堅香,都不特止,仲要有絲絲椰肉食到呀呀呀呀呀!正!

攤位:甄沾記 (3B-B17)

金枕頭榴槤雪條 $38

榴槤控,有榴槤嘢啦~ 呢條金枕頭榴槤雪條,啖啖香甜榴槤肉。不過留意返,連埋粒核嘅,食到最尾幾啖就可能會有少少論盡仔喇。

攤位:公啟行(3B-D16)

原個青森蜜瓜汁 $99/個(每日限量50個)、六色蕨餅  $40盒

呢期蜜瓜當造,仲要係嚟自日本青森縣嘅蜜瓜就更加甜身啦。呢檔有原個青森蜜瓜汁飲,即場開頂後,直接攪轉蜜瓜,所以所有嘅果肉同果汁都完完全全咁保留返喺個瓜裡面,冇加水冇加糖,原汁原味,健康得嚟又好飲。仲好啱打卡添,惟一問題係個瓜好墜手下,拎住飲到有啲攰,科科。同檔另外有六色蕨餅同埋新到台灣牛肉麵醬汁,前者嘅紅酒、柚子、蜜柑等新口味全部都係日本研製後引入嚟㗎,後者用嚟煮餸好方便。

攤位:游道有限公司(3B-E02)

IG-able松露蛋糕 $58

鍾意松露嘅朋友,今年繼續有唔少嘅松露產品。其中呢檔就有松露爆谷、松露蛋糕同松露馬卡龍。個松露蛋糕仲好鬼靚仔,原來係Chroma甜品師Jody嘅傑作嚟。Jody介紹話蛋糕用上松露油、松露粉等食材去製作,而且每層都有唔同口感。

攤位:Sabatino Hong Kong Limited(3B-D07)

松露雞蛋仔配鮮意大利黑松露片 $40、黑松露手工啤酒 $20(即場試飲價)

另一款松露產品就係雞蛋仔嘞,貴價食材配入平民地道嘅掃街小食當中,效果亦唔錯。雞蛋仔脆卜卜,有粒粒松露之外,面頭仲會搽上一層松露蜜糖,再刮多層新鮮意大利黑松露片,嗚,配埋吹啤啤最新釀製嘅黑松露手工啤酒,松露怪要失控啦!

攤位:宏展(3B-A20)

巴塞隆那手工啤酒 $38

儲樽迷可能好快就會畀呢幾支巴塞隆那嘅手工啤酒吸引咗,佢嘅樽身圖案好鬼cute,唔係豬仔就係熊仔咁,係好有衝動令人集晒佢郵。講返佢嘅內涵先,呢幾款都係pale ale或者IPA嚟嘅,不過麥芽佔嘅比率就各有高低。

攤位:Bon Bon Paradise(3B-C02)

智利紅酒 Milla Cala 2012   $265

酒鬼絕對要畀多少少錢入嚟尊貴美食區啦,因為呢度真係好!多!酒!呢隻智利紅酒,經過喺木桶內嘅發酵,令到佢強烈嘅葡萄香氣之中亦隱隱帶有煙薰嘅味道。

攤位:Tastar International Limited(3B-F06)

其他美食博覽2018攻略:
早買早享受 中秋月餅會場限定優惠多
精選必行、必食攤檔 鵝肝燉蛋、鮮黑松露手工啤酒
$1優惠大集合 必搶乾鮑、黑松露菌醬

詳情
美食博覽 2017
日期:8月16 - 20日
詳情按此


文:Kar
相:Kar、Cathy


關鍵字
美食博覽
灣仔
小食
掃街
甜品
芝士
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
【隨時更新】零食速報 每周新款零食、酒品點評
7天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
本地搵食有著數!OpenRice x 旅發局 合推 5折餐飲券+餐飲禮遇
2020-09-21
悠閒早晨 3間英、澳、日Brunch推介
2020-09-21
滋味到家!新鮮海野海鮮+逾200款蔬果肉類 食材直送上門網站推介2.0
2020-10-08