33037 0

平時gathering飯局諗食咩都已經好頭痕,遇著好朋友生日,諗餐生日飯去邊食就更加頭痕!通常你問主角想食問,佢都會答你冇所謂。但冇所謂之中,生日飯總不能夠求其,環境氣氛、食物質素、生日驚喜,甚至乎你同呢個朋友有幾friend等,通通都係考慮因素。就等開飯仔畀啲建議你哋參考下,今次首先就講下同好好朋友慶生去邊間西餐廳食好~~

即影即有x 生日歌  The Chop House


圖:JannisT森曼

環境:★★★★☆
位於尖咀商場,枱同枱之間比較闊落,私人空間感相對較大。燈光暗暗地,係有啲情調嘅,另外仲有個戶外用餐區。

食物:★★★★☆
主要分海鮮同鋸扒。海鮮拼盤有蝦呀魚呀魷魚呀青口呀等等,蝦肉鮮嫩彈牙,魷魚薄脆,魚皮亦煎得香脆。甜品方面鍾意cheesecake嘅可以叫Baileys cheesecake,出面唔多有呢隻口味,係幾香嘅。不過最推介嘅係Chocolate Fudge Cake,朱古力味超級濃郁,仲有果仁同脆餅,實令朋友仔甜上加甜。

生日祝福:★★★★★
只要預早卜枱嗰陣講明係慶生飯,就可以預先請餐廳喺甜品上寫上指定祝福字句,上枱嗰陣,就會有一班侍應邊唱生日歌邊捧出嚟,最開心就係仲會幫你哋影返張免費嘅即影即有送畀朋友仔留念添。

生日主題餐廳  HEITI'S House


圖:月巴里里鬼神丸

環境:★★★★☆
唔怕遠嘅可以入到新蒲崗,呢間餐廳直情就係為生日飯局而開啦,成個佈置都係以生日做主題嘅,仲會有埋生日氣球同掛飾,氣氛嚟講冇得輸。

食物:★★★☆☆
呢度直情有二人或四人嘅生日晚餐set,有湯有沙律有頭盤有主菜,必須要講下隻松露雞翼,雞翼微辣,配埋黑松露醬一齊食夠晒香。主菜嘅燒春雞亦頗受歡迎,保留到肉汁,但層皮可以再脆啲。甜品呢,生日就通常都係食火焰雪山蛋糕㗎喇,另外都有心太軟或檸檬蛋糕嗰啲揀嘅。

生日祝福:★★★★★
呢度嘅生日祝福絕對攞滿分,寫字嘅甜品係基本,有埋即影即有相加DIY生日相架都不特止,個火焰雪山蛋糕食食下仲會有驚喜添(唔劇透喇)。

靚靚生日畫字 Gastrobox


圖:nick727棉花糖*

環境:★★★★☆
環境係幾靚,裝修行歐洲風,加埋幾盞水晶吊燈咁,好似幾高級咁。晚餐嘅話枱面仲有蠟燭添,都可以叫做燭光晚餐呀科科。

食物:★★★★☆
黑松露野菌忌廉湯平均嘅評價都幾高,因為啲松露真係好香呀,蘑菇味強,而且相當足料,每啖都可以食到一粒粒嘅磨菇茸。主菜建議揀波士頓龍蝦紫蘇茄蓉意大利粉,完隻龍蝦起肉再切粒,夠鮮夠彈牙,然後蓋返個龍蝦殼喺面,賣相幾有霸氣,用嚟呃like唔錯。甜品就有牛乳布甸、朱古力brownies等等揀。

生日祝福:★★★☆☆
揀咗邊款甜品都好,早啲講定指定嘅祝福字句畀餐廳知,就可以畫碟。值得一提嘅係,呢度啲畫畫得幾靚,卡通公仔或者玫瑰花都應該幾得女生歡心。

生日歌大播送  Chef's Stage Kitchen


圖:糖小妹FY*yAn

環境:★★★★☆
如果新界西嘅朋友,覺得九龍或者港島太遠,呢間喺元朗嘅西餐廳都係一個幾好嘅選擇,地方闊落,以木為主要格調。

食物:★★★★☆
識食一定食炭燒厚切美國天然極黑豬鞍扒,堅係厚呀,不過厚得嚟又唔會話好韌,juicy嘅,肉質爽口,CP值幾高。貪心仔咩都想食嘅就可以嗌個小食拼盤,咁就咩都有啲,雞翼、蕃茄多士、芝士紅椒等等,一個木盤咁上嘅。而生日飯嘅甜品,餐廳多數都會安排係食Tiramisu,酒味都算幾香濃。

生日祝福:★★★☆☆
卜枱嗰陣講定就可以喺碟上寫字,捧蛋糕出嚟嗰陣亦會播埋生日歌,都幾有氣氛。

Live Band Jam歌賀壽   Spark Bar & Restaurant


圖:陸月妹影之使者

環境:★★★★☆
喺蘭桂坊地段,佔地兩層,一層酒吧一層餐廳,餐廳嗰層仲有個舞台。燈光偏暗,裝修格局同樣都係富有情調。

食物:★★★★☆
首推肯定係啤酒煮蜆。係呀,我冇打錯,平時食開嘅多數都係清酒煮蜆,估唔到原來轉一轉用啤酒煮嘅味都幾夾。啤酒酒精含量較低,酒量淺嘅朋友食多少少都唔怕,而且酒味濃得嚟又唔會蓋咗蜆嘅鮮味。另外豬脾伴牛肝菌醬都好香口,豬脾層皮仲烤到脆卜卜。特別提一提呢度有生蠔食㗎,如果撞啱做緊優惠都幾抵食。

生日祝福:★★★★★
都係嗰句,訂枱時講明食生日飯,甜品就可以幫你寫埋字。如果你咁啱夾到係星期五嚟食嘅,呢度仲會有樂隊或者歌手現場演奏同獻唱,可以點返首生日歌,仲分分鐘自己上去jam埋畀你個friend都得呀,係warm嘅。


文:Kar


其他飯局餐廳推介:
唔同Budget都有!情侶鋸扒指南
三兩知己想靜靜傾偈 旺區有咩好介紹?
去銅鑼灣 平有平食 貴有貴食

開飯文章推介:

1. 【專訪】荃灣米線店 堅持排長龍都要逐碗煮
2. 11月份好評餐廳十強
3. 2017年港澳版米芝蓮指南


隨時接收最新資訊
讚好OpenRice專頁!

相片
正所謂一年之計在於春,17年想慳返啲錢,食方面可以考慮一下去熟食中心。北河街市政大廈嘅熟食中心唔單止因為位於深...
相片
講起荃灣有咩食,通常都會諗起路德圍或者嗰幾個連環商場嘅小食店,之但係呢兩個月開咗兩間小店,賣嘅嘢食都好吸引呀!...
unknown
文章搜尋
更多
年份
推介文章
近期英國脫歐問題被鬧得熱烘烘,全國公股,人民的態度就像十五個吊桶 – 七上八下。結果卻像玉女拍三級片一樣,「唔脫又脫」,一下子鬧得滿城風雨。政客們不知怎樣應對之餘,連錢都動盪不安!英鎊一夜之間貶值一成幾! 更多
過去熱門文章
週末與姐妹們 high-tea,當美味甜點端上桌時,你的第一個反應是相機先食的話,那你肯定會喜歡小編發現的新玩意!米蘭的創意烹飪顧問工作室 Tour De Fork 利用 3D printing技術,設計了 5 款戒爪,女孩們可以自由用小蛋糕、水果和甜食等「鑲嵌」在戒指上,變成了名符其實的甜點鑽戒! 更多
Top