【特約分享】食得有意義 食勻美食博覽社企攤檔
2019-08-15

識食,一定係喺美食博覽前,睇定有咩正嘢食。我都知大家已經mark定晒目標攤檔,但係有啲攤檔可能無咁顯眼,但其實抵食又好食,仲有嘢送𠻹,講緊嘅就係社企攤檔啦。社企喺社會上可能唔太顯眼,其實佢哋做嘅嘢好有意義,一直默默耕耘協助弱勢社群由受助變自強,甚至為佢哋重燃希望。快啲睇睇1E展覽廳A18號嘅社企攤檔有咩食啦,記得喺美食博覽支持佢哋呀!

好好社企香港社會服務聯會-社會企業商務中心屬下)只在81516日參展

為香港各間社企提供平台售賣食品、日用品,同時精選公平貿易、有機、本土製作等具社會意義嘅產品。今年喺美食博覽,更聯同本地大學同學推出月餅,有四色月餅、菠蘿包月餅同QQ月餅,月餅包裝全由學生設計,月餅仲係100%手工烘焙!

月餅包裝係由理工大學設計系學生負責。

呢度可以買到唔同社企嘅食品。

土作坊(聖雅各福群會)

嚟到土作坊攤檔,可以買到各類有機食品,包括手工餅、手工糖、茶葉等等。土作坊喺2007年成立,透過支持本土農業、改善農民生活,為社區長者同婦女提供就業同培訓機會,等佢哋可以喺土作坊學製作、包裝或售賣有機農作物等。

手工餅有有機薑餅、芝麻餅腰果餅。

手工糖輕甜煙韌,同樣有芝麻、花生同腰果3款口味。

可以試啱口味先買。

綠家居(仁愛堂有限公司)

綠家居係仁愛堂第一間社企,今次就帶咗有機米麵、有機零食同天然果醋等嚟美食博覽。咁多有機嘢,就係因為綠家居係售賣對環境友善嘅食品同飲品,好似有機蔬菜、環保產品同有機禮品服務等。藉此推廣綠色有機生活模式,同時仲可以為婦女提供就業同培訓機會。

呢度健康食品選擇好多,推薦台灣即飲果醋,方便消滯又健康。

由真正粟米製造嘅零食,放喺辦公室或屋企就啱晒啦!

生活好點(聖公會聖基道兒童院有限公司)

生活好點想向市民推廣健康生活,所以主要售賣有機食品同天然產品,同時亦為青年人同基層人士提供就業同培訓機會。今次就帶咗果乾脆片、有機米、中式湯包茶包同健康沖劑等嚟美食博覽,一齊食得健康啲啦!

HK$100就買到3包茶包或湯包。

又有多款果乾同蔬菜乾揀。

員工好有心機講解每款食品特點

甦爐(明朗服務有限公司-香港善導會轄下社會企業)

甦爐麵包店為更生人士提供工作機會,由麵包師傅教佢哋烘焙麵包、唐餅、甜品同到會小食,幫佢哋重新融入社會,將來可以靠自己技能生活。喺美食博覽就可以買到佢哋嘅手製曲奇、唐餅酥點、小食同月餅。

有多款唐餅揀,全部都係人手焗製,好酥香

仲可以買手製月餅過中秋。

買5盒月餅以上有85折。

安其兒有限公司(星星堂)

幫自閉症青年就業,提供機會畀佢哋學整、包裝同出售健康食品,令佢哋更容易融入社會。市民又可以食到少油、少糖、少鹽、無防腐劑、無人造色素等嘅健康食品,嚟試吓佢哋嘅曲奇、湯包、手工麵、花果茶同健康飲品啦!

各款花果茶,都有唔同嘅養生效果。

手工麵用唔同天然食材製成

博愛 Café(博愛醫院)

喺天水圍嘅博愛 Café為區內青年提供就業機會,駐場社工陪著每一位青年咖啡師,一齊學整咖啡、研發新食品、營運咖啡室。佢哋仲會喺自己嘅農地種植香草入饌,好有心機同誠意!今次就有機會,食到佢哋用自家香草整嘅手工曲奇、香草茶,亦有全手製鳥結糖,好煙韌好特別。

手工製鳥結糖特別煙韌,因為無防腐劑,買返屋企盡快食喔!

香草曲奇嘅香草係佢哋自家種植,健康無農藥。

營康薈(香港復康會)

殘疾人士同慢性病患者都想靠自己能力生活,營康薈就為佢哋提供就業同培訓機會,喺店舖售賣奇亞籽、蜜糖、蘋果醋、果汁、豆奶同冷壓果片等,今次美食博覽都可以買到

呢度有好多款健康食品,例如無糖餅、甘栗同果乾等。

飲品就有南非原味國寶茶,同埋意大利非基因改造米漿、荳漿等。

天天加油站(加油香港基金有限公司)

呢間社區一定好受街坊歡迎,因為佢哋目標係為區內街坊提供平價而優質嘅日用品,亦希望可提供就業機會同職業培訓畀區內青年同婦女,大家可以用抵價買到糧油同有機食品,例如即食甘栗、黑豆、奶粉等。

呢度可以用划算價錢,買到日用食品,例如米、油等。

特別係芥花籽油,比坊間更平呢!

支持社企 仲有精美紀念品送!

頭兩日(即8月15至16日)喺社企攤位買夠一定金額貨品,仲有精美紀念品送,要把握機會喔!(數量有限,送完即止)

一齊嚟支持香港社企啦!

餐具紀念品好環保實用。

客戶專訊
本月熱門
【隨時更新】便利店尋寶 每周新品速報
2019-09-09
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
2019-09-09
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03