7546 0

提到上水,大家可能會諗起港鐵站附近班水貨客,但講到食,大家不如將個焦點放遠少少,嚟到石湖墟街市嘅熟食中心。呢度12年前翻新過,唔算好新但起碼有冷氣有大風扇,夏天嚟都唔會變蒸籠。最緊要嘅係就係貪佢平易近人,有竹蔗茅根粥、菠蘿蛋等獨一無二美食,價錢又抵,唔少學生同老友記都會成日嚟醫肚㗎。
 

滋味焗飯炒麵  佳運餐廳


圖:小美冰琪琳蹟仔

呢間餐廳一到Lunch Time就有唔少學生同街坊嚟堂食或者等外賣,除咗因為價錢合理之外,亦因為佢地嘅午餐同米線大份得嚟夠好食!是日午餐會定期轉款保持新鮮感,焗飯同炒烏冬等都相當有水準。另外雲南米線亦係抵食之選,大大碗而且酸辣湯底夠惹味。最後推介埋下午茶嘅炒公仔麵,熱辣辣炒起,食落味道足又唔會太油。
 


懷舊竹蔗茅根粥  東莞佬粥店


圖:Fabulous Jay

竹蔗茅根水就飲得多,無諗過可以拎嚟煲粥哩?其實呢個係東莞人嘅做法,呢間粥店嘅竹蔗茅根粥會落竹蔗、茅根、黃豆、羅漢果、雪耳、紅蘿蔔等,食落味道天然甘甜。唔少人慕名去試竹蔗茅根粥,如果遲咗賣哂仲有食開嘅皮蛋瘦肉等選擇。識食梗係要食套餐配埋碟豉油皇炒麵,配料唔多但麵條夠乾爽煙韌,鹹香又啱啱好。
 

特色茶記菠蘿蛋  明記


圖:man love food奧志雷

其實咩係菠蘿蛋呢?其實係煎蛋皮包住壓扁咗嘅菠蘿包,非常有港式茶餐廳風味。有食家試完後覺得有少少似西多士,因為蛋皮Keep到Juicy,加埋菠蘿皮甜甜地又有啲脆。成份食哂會有啲膩,建議嗌多個朋友仔一邊飲住杯奶茶或者檸茶Share嚟食。其他都係茶餐廳常見嘢食,價錢公道。
 

學生最愛快餐  騏隆


Joyce Lui(@babyjoycelui)張貼的相片 張貼

無論係附近學校,定週末去圖書館自修室溫書嘅學生,唔少都會一致推介呢間餐廳。椒鹽雞扒雙蛋飯嘅雞扒夠惹味,而且雙蛋仲要係滑溜太陽蛋,篤穿個蛋黃嚟撈飯食簡直一流。唔想食椒鹽仲可以轉咖喱汁、粟米汁甚至係泰汁。而且同學仔都話呢間餐廳嘅姐姐們非常熱情,有人情味當然再加分啦。
 

軟腍牛筋腩粉麵  林德記麵食


圖:美食焚化爐暴食小公主

唔少熟食中心總有一兩間粉麵檔,喺石湖墟街市就搵到佢做代表。呢間最出名嘅係佢地嘅牛筋腩,一睇色水就知滷得夠入味,食落軟腍唔肥膩。滷水雞翼同雞腳一樣夠腍身,但雞皮又唔會無哂彈性。最後唔好話開飯仔無溫馨提示,無論有無嗌牛筋腩都記得要加腩汁,加埋少少店家自制辣椒油,成碗麵會即刻變得更惹味。
 

抵食街坊燒味檔  何俊記


圖:meow_littlecat

想要啖啖肉而且抵食夾大件嘅話,仲有呢間燒臘飯店揀。明爐燒鵝皮脆富肉味而且唔嚡,切雞、乳豬同叉燒等其他燒味出品都有水準。無論係堂食定係外賣返屋企加餸都係大大份又唔貴。另外仲有原盅蒸飯同車仔麵。
 

高CP值咖喱焗包  金曼谷泰國菜館


圖:黑到貼地LuckyDens

嚟到晚市,首先要推介呢間泰國菜館,佢地嘅招牌菜係咖喱焗包有得揀雞、牛肉、海鮮等,用料夠足之餘,香辣咖喱醬汁同焗農夫包又夾到。而冬陰公湯一樣多料,飲落酸辣過癮。仲有泰式炒粉絲、菠蘿雞翼、生蝦刺身同豬肉生菜包等都係推介。
 

惹味海鮮小炒  強記大排檔


圖:*Ting* =)

熟食中心嘅晚市推介當然唔少得惹味小炒,而且呢間大排檔就算搬入熟食中心一樣收凌晨兩點,想嚟食宵夜都無問題!煎蠔餅嘅蠔仔鮮甜肥美,熱辣辣又夠大份。小菜選擇夠多,而且亦可以買海鮮畀店家加工,冬天又可以食招牌羊腩煲。配多支冰凍啤酒就最爽歪歪。


文:Cathy



更多【熟食中心尋寶】:

1. 鵝頸橋之戀先啱!鵝頸熟食中心

2. 平民當中見驚喜 葵涌和宜合道熟食市場

3. 點心奶茶瓣瓣掂 上環市政大廈



熱門文章推介:

1. 【一個人開飯】一個人喺旺角食乜好?

2. 【二人前指南】唔同Budget都有!浪漫海景餐廳

3. 【生日飯局】同好朋友慶生食咩好? 窩心西餐篇




隨時接收最新資訊
讚好OpenRice專頁!

相片
來自日本京都、1967年成立第一家店的「餃子の王将 (王將餃子) 」,不僅在日本全國各地共有約706家店外,更...
相片
問:是否常聽人說:「酒中的硫痠鹽 (Sulphites) 令我頭痛」又或者「新世界葡萄酒含有硫痠鹽,所以我只飲...
unknown
文章搜尋
更多
年份
推介文章
減肥一定要挨餓?誰說的! 只要大家揀啱食物,纖纖身型一樣可以擁有。啱要揀咩食物?唔使心急,揭曉前先同大家講下GI呢樣野。GI即係Glycemic Index:升糖指數咁解,講白啲就係一種食物「造成血糖上升」嘅指數。 更多
過去熱門文章
想食櫻花製品,唔使特登飛去日本嘅,香港都有得食。而且想食幾多都得,任食!因為有酒店即將會喺3月推出櫻花系自助餐,同場「加映」鮑魚、鵝肝同其他海鮮添呀! 更多
Top