【月餅巡禮】靚靚Packing送禮最啱 TsumTsum熊大大混戰(有片)
2017-08-11

幾時都話早買有著數,雖然仲係仲夏天時,但聰明嘅朋友已經開始為中秋做好準備。各大月餅已經陸陸續續開始接受訂購兼有早鳥優惠啦,之但係喺芸芸咁多款月餅之中,揀邊款好呢?就等開飯仔同大家做少少整合嘅介紹啦,先講嘅係送禮自用都啱使嘅「包裝系」。

叫得包裝系,就梗係行出嚟個樣已經完勝先。當中又分兩個派別,可愛卡通版同精美禮盒版。

可愛卡通版

TSUM TSUM   Häagen-Dazs    

無所不在嘅TSUM TSUM,當然唔會放過喺月餅上現身嘅機會。小熊維尼、毛毛、大眼仔同嚕蘇,分別係朱古力、仲夏野莓、呍呢嗱等味嘅雪糕月餅。佢四隻唔係你嘅飛佛都唔使扁咀,仲有好多隻TSUM TSUM印咗喺個冰袋度呀。

Line Friends   鴻福堂   

鴻福堂年中都推出過唔少Line Friends嘅產品,嚟到中秋,梗係會有Line Friends月餅啦。唔止個罐係熊大同兔兔,連月餅面上都係呀。粉絲應該一秒變心心眼。而且唔止得個樣,仲好有內餡,係燕窩楊枝甘露同蘆薈楊枝甘露冰月呀。要矜貴有矜貴,要清新有清新。

KUMAMON   一田

KUMAMON今年好勤力,又化身做生果又化身做各種甜品,而家仲做埋月餅添。O咀樣同笑咀樣兩個造型同樣cute cute。三種口味包括黑糖豆沙、金莎奶黃同薑汁奶黃月餅。一做做全套,連餅盒、紙袋同陶瓷刀义都係KUMAMON,正。

Marvel   美心

Marvel 當然都唔執輸,推出Spider-Man奶黃月餅同Iron Man綠茶紅豆月餅禮盒。兩個英雄都咁吸引,帶哂返屋企都唔係好過份啫。

姆明 奇華餅家

呢度有無姆明嘅粉絲呢?呢個三層屋形嘅禮盒,印咗姆明一族嘅角色,相當精緻,就算食完啲月餅都會唔捨得扔咗個盒。而入面就有印咗姆明嘜頭嘅蛋黃奶黃月餅同朱古力奶黃月餅各兩個。

Sanrio    A-1 Bakery

Sanrio嘅fans唔使諗啦,實係揀呢款流心奶黃月餅啦。赤月隊有Keroppi、Hello Kitty、XO同Pochac,而藍星隊就有Little Twins Stars、Melody同布甸狗,煩緊揀邊隊?Why not both?

Sanrio   山下菓子

繼續都係Sanrio,除咗往年都有嘅Little Twin Stars同My Melody,今年仲多埋Hello Kitty同Cinnamoroll呀。而內餡方面,有奶黃月餅,亦有紫薯月餅,後者用日式菓子桃山皮製造,唔太甜膩。


更多【月餅巡禮】:
1. 月餅大戰 羅漢果、 羽衣甘藍、芝士味都有?
2. 中秋追月又追星 邊個明星出月餅?
3. 茶全部都係茶 抹茶紅茶花茶月餅
4. 奶黃熱未減 6大奶黃月餅介紹返

精美禮盒版

花燈禮盒Lady M 

呢間出名食千層蛋糕嘅餅店,踩過界加入月餅行列,包裝整到鬼死咁靚。成個藍白花燈禮盒,係美國紐約嘅公寓建築嚟,仲真係有個開關掣可以著燈,崇尚美學嘅女生應該大愛。至於個月餅,係迷你蛋黃白蓮蓉月嚟,甜度適中。

荔園特色   荔園   

荔園開完茶餐廳,中秋仲做埋月餅,實行將歡樂延續。限量版禮盒印上荔園嘅遊樂設施,好似碰碰車、旋轉木馬等等嘅標誌,係幾令人回味。盒內除咗有迷你蛋黃奶皇月,仲有副經典「蛇梯卡」,(唔好扮細扮唔知咩係蛇梯棋喎)可以邊食邊玩。

繁星之夜   Starbucks   

年年個禮盒都好靚嘅Starbucks,今年都唔例外,以繁星之夜做主題,將附送嘅三盞LED燈放喺獨立包裝嘅投影盒度,即刻好有氣氛咁。而月餅口味都唔會令人失望,港人飛佛嘅伯爵茶口味,加以創新,以伯爵茶餅皮混合烏龍茶餡料,創作咗全新嘅伯爵茶麻糬月餅,茶味十足,甘香而不膩。

水彩畫風格   大家樂  

呢幾款充滿藝術感嘅月餅禮盒,都係出自著名插畫師郭詠嘉嘅手筆。睇住個盒,就好似欣賞緊三幅水彩畫咁,畫中有燈籠、祥雲同玉兔,粉色系包裝幾受落。口味就相對傳統:雙黃蓮蓉、雙黃白蓮蓉,同埋奶黃月餅。

粉紅首飾盒   朗廷

驟眼望落仲以為係粉紅首飾盒,望真啲先知原來係月餅盒嚟,入面裝住嘅係蛋黃豆沙、蛋黃白蓮蓉同金桔奶黃月餅,成個盒pink pink der,靚到一個點,送畀仙氣女神就啱晒。



文:Kar
片:Cathy


關鍵字
中秋節
月餅
卡通
Häagen-Dazs
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
尖沙咀新開素食自助餐 1.5小時任食40款菜式(有片)
2018-07-27
尖咀酒店澳洲海鮮主題自助餐 任食回本龍蝦生蠔毛蟹
2018-08-13
半島海鮮主題自助餐 四小時任食龍蝦鮑魚蟹腳
2018-08-06
北角新海景酒店自助餐 波士頓龍蝦即劏吞拿魚
2018-07-26
尖咀酒店海鮮主題自助餐 3.5小時食鮑魚龍蝦鮮蟹
2天前