【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09

燒肉放題喺香港都好多選擇,最近又有一間新派日式燒肉品牌進駐佐敦。餐廳引入全港獨家供應嘅「小田A4和牛」,來自日本鹿兒島縣薩摩半島南部嘅牛舍,特別採用混合十二種唔同材料嘅飼料餵飼小田和牛,油花呈大理石狀。另外餐廳亦使用智能化送餐模式,用全港首創嘅「燒肉新幹線」將燒肉送到客人面前。


2021年4月19更新:
*因食材成本上漲,餐廳放題等級最新價錢更改至由最平$348至最貴$1098,而無限量自助甜品、沙律及飲品區價錢改為$68(星期四一至星期四)及$78(星期五至星期日)。

120分鐘和牛燒肉放題價錢方面分成六個等級A、B、C、D、E及F (F為最高等級),價錢由平日最平$298到假日最貴$938不等,對比起一般燒肉放題價錢較貴,但最貴嘅等級係可以食晒菜單上嘅品項共105款,包括鹿兒島小田A4和牛特選盛合7 種類、小田和牛稀有部位及極上牛舌等,如果你係牛魔王兼大胃王可以試吓。中間嘅等級都供應小田和牛部份部位,而最平嘅A等級就主要供應美國及澳洲和牛。不過除咗牛肉,都仲有雞肉、豚肉、海鮮、野菜、肉類刺身、牛舌及九州料理等,選擇都幾多元化。


鹿兒島小田A4和牛特選盛合7 種類(F)

呢個小田和牛盛合包括7 種部位,有里脊肉、牛肋肉、牛肩肉、西冷、辣椒肉、中複肉及三筋,印象較深刻係三筋,入口即溶有牛香,而牛肩肉相對較有口感。。


是日寶箱(D、E、F)

寶箱內其實係當日新鮮即切嘅小田和牛,呈現方式好特別,會將和牛放入一個充滿乾冰嘅寶箱內,然後透過燒肉新幹線送到客人面前,啱晒打卡!


舟・盛合(A-F)

想每款都試少少,可以叫呢個舟・盛合,包括美國及澳洲和牛、豚肉、雞肉、海鮮及野菜。


牛舌壽司、香蔥牛腹肉碎壽司(D、E、F)、生牛肉壽司(A-F)及牛大腹肉壽司(E、F)

餐廳供應幾款肉刺身壽司,牛大腹肉壽司有驚喜,入口即溶無腥味,牛舌壽司坊間都比較少見,生嘅牛舌入口肉質軟腍,同熟牛舌嘅口感截然不同,如果想味道再豐富啲,可以加埋魚子醬、海膽或三文魚籽呀。

更多【新店直擊】:
1. 自家原創焦糖酥皮曲奇Pookie、流心抹茶口味 香港人氣曲奇網店實體店登陸大坑
2. 必試招牌台式蔥油雞+香濃奶油蝦煲 太子人氣台灣菜小店荔枝角重開
3. 超過1200萬打造!佐敦全新50年代舊香港風主題火鍋店 超靚花花主題牛肉拼盤+牛乳玫瑰鍋


炙燒壽喜燒壽司(E、F)

將一大片小田和牛燒香後加上壽喜燒醬汁點生蛋食,味道香甜惹味。


ICHIRO 雙色意式冷盤(E、F)

食得多燒肉想換吓口味,可以試吓由小田牛刺身及澳洲牛舌刺身組成嘅ICHIRO 雙色意式冷盤,鮮味十足。


另外除咗肉類,都有多款嘅海鮮及日式料理選擇,如鮑魚、蠔、明太子海鮮煎餅、明太子薯仔沙律及食燒肉必配嘅香蔥海苔溫泉蛋拌飯等。


自助區更供應多款沙律及甜品,所以話真係啱晒大胃王嚟挑戰!


和牛燒肉一郎

地址: 佐敦佐敦道31-37號百誠大廈3樓





文: Yanica

相: Tom Li

關鍵字
日本菜
燒肉
和牛
放題
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2021生日優惠】持續更新!8月壽星免費嘆麻辣串串鍋
2天前
【隨時更新】零食速報 每周新款零食、酒品點評
6天前
【恭喜張家朗、何詩蓓】多間餐廳立即推出限時優惠一覽
2021-07-28
投奔盛夏 7-8月份下午茶推介
2021-07-08
6月份好評餐廳十強
2021-07-06