話說混茶師Mai遨遊完歐洲返嚟之後，就愛上咗人哋嘅花茶同果茶，而且仲常常回看喺歐洲嘅動人時光，於是就自己嘗試將唔同嘅花茶同果茶溝嚟溝去，鍾意嘅又溝埋啲香草同鮮果落去，溝下溝下，就溝咗間舖出嚟喇。仲溝埋畀狗狗飲。不過佢唔係隨便亂溝㗎，有請教過獸醫先㗎，所以咁多位主人可以放心。
講咗咁耐，係時候睇下啲花果茶有咩花臣。打頭陣嘅係Mojito Underage！唔好話個look似，連飲落都真係有Mojito嘅味道，不過其實係加咗檸檬同鮮薄荷葉嘅薄荷茶。
呢杯以西班牙國飲命名嘅Sangria Splash，有Sangria嘅暗紅，同時亦有百香果嘅香味。
插住兩條蕉嘅呢杯一睇就知係香蕉奶，香口得嚟仲有條蕉咬下口，好實在。但其實亮點係在於佢個名，叫「江南寵寵寵」呀！嗌之前跳返part舞先啦喂！
有世界各地嘅特飲，點少得香港嘅代表呀？Honky Waffle用牛奶同花生醬混埋一齊做咗款街頭小食嘅味道，冇錯喇，就係格仔餅味！聽落巧打耳，食就食得多，飲嘅真係未試過。
而畀狗狗嘅選擇就有椰子水配青蘋果蓉同東歐洋甘菊茶配蜂蜜，店外仲特設咗個開放嘅空間度，畀大家人狗同樂、一人一杯。
文：Kar
隨時接收最新資訊
讚好OpenRice專頁！
關鍵字
花果茶
元朗
歐洲
西班牙
韓國
複製到剪貼簿