【撐小店】出招自救 逾10間餐廳合作推出分區團購食物服務
2022-02-23

確診數字日增,社交距離措施愈收愈窄,餐廳已經被禁晚巿堂食超過一個月。聽日起更要打咗針先入得餐廳食,每枱人數又限制得2人,令到好多餐廳老闆都叫苦連天。不過講真,就算畀堂食,而家好多人都為求安全而選擇留喺屋企食,餐廳生意更見慘淡。有見及此,唔少小店為求生存,紛紛出招自救,近月起更創出新嘅「分區團購食物服務」。

呢啲小店會喺Facebook預早宣佈嚟緊嘅團購送貨地區,大家只要揀返自己所屬地區,填返相應日子嘅google form就可以落單,每區通常都有幾個交收地點選擇,都幾方便。大家記得留意截單日期,同埋落咗訂,就唔好放飛機喇,小店要預早準備食材啊。


 圖:餐廳

西日Fusion x 串燒    HOW to live well 心燒食堂   

西日fusioin café聯乘以串燒為主嘅日式食堂,推出跨區團購食物服務。有套餐亦有得散嗌,例如有慢煮厚切日本四元豚肉、溫泉蛋卡邦尼意大利麵、心燒免治雞肉棒、燒牛仔骨、豚肉生薑燒、黑松露蟹肉炒飯等選擇,而HOW嘅招牌日式卷蛋或者scone都有呢,佢哋嘅scone有好多口味,有啲重有軟糯微甜嘅麻糬喺中間,值得一試!

暫時每日會送去一兩區,每區都有幾個交收地點。不過因為有時車程遙遠,食物就未必可以熱辣辣送到,餐廳建議大家食用前,可以用焗爐或者氣炸鍋翻翻熱先。

團購行程:(3月更新留意餐廳Facebook公佈)
27/2 荃灣 + 深井、28/2荔景+葵芳


 圖:天天食好野餐廳Facebook

串燒+蟹粥   彩虹串燒專門店

位於荃灣嘅串燒店,老闆喺Facebook透露每日生意就快跌到三位數,不得不諗辦法自救。佢哋嘅團購服務由老闆同老闆娘親自出馬送貨,地點由荃灣送到去火炭、油塘甚至南區都送。食物選擇包括有:馳名厚切牛脷丼飯、肥牛金菇卷拼炸蠔丼飯等,連原隻膏蟹海鮮粥都有!另有多款小食串燒,好似燒新鮮大鱔、包皮包雞包皮卷等。

團購行程:(其餘更新留意餐廳Facebook公佈)
28/3 荔枝角、1/3 沙田、3/3 馬鞍山、9/3 東涌、14/3 將軍澳、15/3 九龍灣、16/3 青衣


 圖:natalie_foodd、餐廳

爐端燒     

平日主打手作日式料理同串燒嘅餐廳,即使團購送貨,亦盡量希望客人可以食到熱辣辣又惹味嘅串燒,所以「礼生串燒盛合x炭火爐端燒」會附送醬油掃、一次性炭火燒烤爐同埋日式調味料。全部串燒食材,包括豬、雞、牛肉等,都經低温冷藏處理,解凍後就可自己燒熟再加調味啦。嚟緊26號更首次推出「全日定食」團購,配有沙律、前菜、小食、味噌湯、御飯同水果,夠晒豐富。

團購行程:(其餘更新留意餐廳Facebook公佈)
25/2 康城、26/2沙田、26/2 (全日定食)樂富、27/2 北角/炮台山


 圖:餐廳

米芝蓮甜品 Joyful Dessert House

連續多年獲得米芝蓮推介嘅旺角甜品店,亦要加入團購自救嘅行列。平時出街食完正餐,都總會想有round 2去食甜品,而家喺屋企都可以round 2呢。招牌拿破崙系列、心太軟系列、比利時朱古力mousse等都有得團購,重有新產品金寶系列呢。部分甜品只要以焗爐或微波爐等翻熱就食得啦。

團購行程:(其餘更新留意餐廳Facebook公佈)
25/2 大埔/太和、26/2 南區、27/2 沙田/馬鞍山、28/2 紅墈/土瓜灣/黃埔、火炭


 圖:barbaourszanvsfood

壽司   為食龍

主打日式腐皮壽司嘅人氣小店,團購每日接單,可以叫餐,亦可以散叫卷物腐皮壽司/小食,更有新推嘅御便當同腐皮便當揀。而且佢哋更希望可以為前線醫護送上支持同正能量,佢哋喺Facebook呼籲大家,如果認識相關醫護/救護嘅部門/員工,可以話畀佢哋聽安排時間,免費送出飯糰!

團購行程:(其餘更新留意餐廳Facebook公佈)
25/2 愉景灣/東涌、26/2 九龍灣、27/2 大埔/粉嶺/上水、28/2午餐 鰂魚涌/太古、28/2 晚餐 大圍/沙田


 圖:miss760geegeeo_o

印度咖喱   Gali

位於觀塘嘅正宗印度菜餐廳,團購送貨唔止有招牌咖喱,重有急凍包,方便大家儲下貨之後再食都得。餐廳供應嘅咖喱都有幾種,包括奶油咖喱、印度香料咖喱、特色菠菜咖喱等,各有唔同風味,有啲甜啲,有啲辣啲,但都係好creamy,好送得飯。

團購行程:(其餘更新留意餐廳Facebook公佈)
26/2 荃灣/深井、1/3 油塘/藍田


 圖:arellawzw

冰室飯餐    兄弟幫食堂 

以原條滑蛋鰻魚飯為招牌菜嘅旺角冰室,團購食物當然唔少得呢款招牌菜啦,另外亦有多款主食同小食,如葱油豬扒煎蛋飯、豚骨湯流心芝士漢堡肉稻庭烏冬、意式肉醬拼特大雞脾配飯等選擇,就連麻辣/酸菜魚鍋物都有喎!

團購行程:(其餘更新留意餐廳Facebook公佈)
25/2中午  調景嶺、25/2 鰂魚涌、28/2 火炭/沙田、1/3紅墈/土瓜灣/黃埔、2/3 香港仔/鴨脷洲、海怡、4/3 將軍澳、7/3 樂富/九龍城、10/3 馬鞍山


 圖:bosco2021jchow3

燉湯     一意點心燉湯專門店

天氣凍,但未必人人都識煲湯。呢間葵涌小店就啱晒,團購有齊燉湯、蒸飯同點心,特別如果屋企有長輩,外賣未必想成日食西餐嘅,就perfect池。淨係燉湯都有15款揀,好似貝母海底椰百合燉肉排、淮山杞子花膠螺片燉雞、鱷魚肉花膠陳皮貝母燉肉排等都相當滋潤,飲完暖笠笠。

團購行程:(其餘更新留意餐廳Facebook公佈)
28/2 荃灣/深井、1/3 天水圍、3/3 馬鞍山、5/3 愉景灣、7/3 青衣、8/3 沙田/大圍、10/3 元朗、14/3 青衣、23/3 東涌


 圖:餐廳

泰式風味    泰皇閣泰國菜館

平時要專誠入九龍城先食到嘅泰國菜,只要你係以下地區嘅朋友,Mark返日子就有得團購送貨喇。餐廳由真‧泰國人做大廚,運送嘅食物選擇都幾多,包括有泰東豬肉碎生菜包、各款泰式沙律、冬蔭功、各式咖喱同炒飯等等。

團購行程:(其餘更新留意餐廳Facebook公佈)
26/2 馬灣、27/2 觀塘、28/2 大埔、1/3 大角咀、2/3 荃灣、3/3 屯門、4/3 沙田/大圍、5/3 南區、6/3 馬鞍山、8/3 太古/西灣河、9/3 荔景、11/3紅墈/土瓜灣/黃埔、13/3 北區、14/3 將軍澳、18/3 九龍灣


 圖:Gladys Gladys肥兔日記

素食     Lonely Paisley x 素年

素食嘅朋友仔,一樣有得團購!人氣素食café同深水埗以民族主題風嘅餐廳合作,推出素食x 民族風Fusion嘅團購,可以自選2人、4人 Set Dinner ,亦可單點。既有純素如黃薑焗福花、素甜品土耳其開心果千層酥,又有肉食如自家制阿根廷香辣青醬虎蝦扁意粉等,同時滿足一家唔同人嘅口味。

團購行程:(其餘更新留意餐廳Facebook公佈)
25/2 天水圍、27/2 南區、28/2 屯門、1/3 西營盤/石塘咀/堅尼地城、3/2 將軍澳、3/3 青衣、5/3 火炭、6/3馬灣、9/3 太古



圖:fatkonggirl

芋泥吐司+水果三文治      uen cafeteria

由網店起家,從手作芋圓、芋泥吐司到而家有多款口味嘅三文治供應,最新重有切面超啱打卡嘅水果三文治!例如日本士多啤梨三文治顧名思義用新鮮多汁嘅日本士多啤梨,配搭濃厚少甜嘅忌廉芝士抹醬。而芋泥吐司選用台灣當造芋頭,每日新鮮打成泥。留意返三文治建議即日食用,交收嘅時候最好自備埋保溫袋唷。

團購行程:(其餘更新留意餐廳Instagram公佈)
26/2 將軍澳/九龍灣


文:Kar



關鍵字
全城抗疫
團購
全城抗疫
同心抗疫,為大家提供各種抗疫資訊及健康有營的飲食貼士,祝願各位疫下平安、健康。
餐廳資料
更多
收起
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
3天前
【隨時更新】最後倒數!2022即將結業嘅人氣餐廳
1天前
尖沙咀最新露營主題日式燒肉店!3700呎室內Glamping體驗
2022-07-25
一年一度!全港4大榴槤放題/自助餐集合
2022-07-13