【惜飲惜食】一文睇晒點樣可以食得環保 齊齊走塑.減廚餘
2020-03-04

「你食咗飯未呀?」每次見面,香港人都不期然用「食飯」打開話題。無他,香港人真係好鍾意食嘢。但自問識食嘅你,又有無留意自己有無惜食?喺我哋大快朵頤時,其實耗用緊好多地球資源,想下一代依然食得享受,呢一刻就要開始惜食。除咗自己唔做大嘥鬼外,仲可以揀參加咗「咪嘥嘢食店」計劃嘅餐廳,剩食、廚餘、塑膠用量都少啲㗎!

IKEA推多項減塑措施 特設廚餘機

IKEA 餐廳價錢大衆化,唔少人都鍾意去開餐。但今次開飯仔嚟到就唔只食嘢咁簡單,仲想睇吓已參加「咪嘥嘢食店」計劃之一嘅IKEA 餐廳有咩惜食措施,幫我哋食得更環保。首先嚟到點餐區域就見到電子螢幕一直顯示減塑提示喇!

IKEA 點餐區有一系列電子螢幕。

螢幕會顯示走塑措施資訊。

如果有需要紙袋或食物盒,IKEA會象徵式收取HK$1、$2 ,最重要係員工一句「加HK$2 一個外賣盒要唔要?」成為一個提醒,令大家記得要珍惜資源,盡量避免用即棄餐具。

如果你自備食物盒並購物滿HK$10或以上,可以每張單減HK$1 ;而另加HK$2就可以有一個甘蔗渣外賣盒,呢兩項措施令塑膠外賣盒用量成功減少20% 。此外,亦可以即場買全新耐用食物盒㗎!平時我哋不妨提醒吓身邊嘅人,齊齊自攜食物盒啦。

店內到處都有環保提示。

自攜食物盒可每張單減HK$1。

IKEA 貼心準備全新耐用食物盒。

惜食嚟講,除咗大家最耳熟能詳嘅走塑,一定係「唔做大嘥鬼」啦!只要按自己食量點餐,一粒飯都唔剩就可以從源頭減廚餘喇。咁餐廳係咪無嘢可以做呢?當然唔係啦,IKEA 就特別喺部份分店引入廚餘機處理廚餘,減低堆填區壓力。

廚餘機可處理大部份廚餘。

過程中仲要唔涉及化學成分,完全靠天然微生物就做到,喺處理廚餘同環境友善方面都非常正面。不過,最基本嘅減廚餘方法,真係靠我哋自律,每粒飯都要食晒喔!

廚餘機設記憶體,可記錄廚餘量。

廚餘機仲設有USB 記憶體,可以記錄每年曾處理幾多廚餘,作為指標調整出餐量。每日臨近餐廳打烊時亦會按量出餐,寧願賣少啲都要減少賣剩餐點,避免倒掉浪費。

店內提示食客「吃多少,買多少;吃不完,便帶走」鼓勵大家珍惜食物。

如果你有細心留意,都會發現IKEA 馳名肉丸已提供5粒、10粒、15粒選擇,並有素丸出售𠻹!總之食量少就叫少啲;鍾意健康啲又可以Green Monday, 大家盡力將惜食變成生活習慣就得啦!

員工要明白惜食概念先可以推廣予食客,所以IKEA 非常著重員工培訓,而且公司聚餐唔會提供即棄餐具,變相鼓勵員工將自備餐具變成習慣。

IKEA 辦公室都貼滿環保資訊。

同時亦安排員工到食物回收機構做義工,令佢哋更切身了解IKEA 定期將食物捐去邊、受助者又係咩人呢?親身感受比言語深刻得多。

員工不時會到食物回收機構做義工。

Cafe 330 關愛社會.一齊惜食

其實「食」真係一門學問,除咗惜食,仲要不忘享受食嘅過程,將心神專注於食物係對大自然同廚師嘅尊重,同時係淨化身、心、靈嘅過程。Cafe 330 直接了當用店名表達身、心、靈嘅重要性(330近似音),亦係幫助精神病康復者同參與「咪嘥嘢食店」嘅友善餐廳。

Cafe 330為精神病康復者提供工作機會,讓佢哋從中學習店務、沖製咖啡技巧,同時透過培訓了解惜食概念,每日觀察菜式受歡迎程度,按需求調整食材份量,例如銷量較低嘅菜式會減少備料,藉此降低剩食同廚餘量。

店家有三文治、沙律出售,每當即將過期就會減價促銷,甚至畀員工拎返屋企,避免浪費,同時教育員工同顧客珍惜食物。

Cafe 330同時提供多款意粉、飯類選擇,主要採用有機食材令大家食得健康。

食客可要求少飯或少意粉,減少浪費。

員工培訓亦會提到走塑範疇,佢哋唔會主動提供即棄餐具。若顧客自備杯或食物盒,更會每個減HK$1。即使顧客要求即棄餐具,Cafe 330 亦只提供環保小麥桿製嘅餐具。

小麥桿製嘅餐具,比塑膠、發泡膠更環保。

如果你一時唔記得自備杯,又想為環保出一分力,店家仲有「熱杯借用服務」,用後交還店家就可以,藉此減低即棄紙杯用量。

店內貼有「走杯」提示。

貼心嘅「熱杯借用服務」,可減低即棄紙杯用量。

店外亦設有膠樽回收箱。

Cafe 330 每日都會沖製唔少咖啡,剩低嘅咖啡渣都有好多用途,烘乾後放於雪櫃、鞋櫃吸味;又或用作肥料種植物都得。所以店外放有「咖啡渣循環再用」盒,等大家免費拎咖啡渣返屋企使用,又可以減少廚餘,並為咖啡渣注入第二生命。

食客可免費拿取咖啡渣返屋企。

食,係一種態度。用心揀餐廳、自備餐具、尊重食物先會食得有態度。大家一齊堅守惜食態度,逐步將環保習慣融入生活細節,就可以令我哋同下一代一樣享受食物,享受綠色大自然喇!

客戶專訊
本月熱門
【隨時更新】零食速報 每周新款零食、酒品點評
7天前
【2021生日優惠】持續更新!6月壽星送海鮮拼盤
2021-06-01
5月份好評餐廳十強
2021-06-04
一秒變出 招牌十八層海膽杯 佐敦小店全新體驗 魔術X鐵板燒
2021-06-11
京都昭和風喫茶店登陸旺角 必試自家焙煎虹吸咖啡+香港限定忌廉焦糖吉士布甸
2021-05-28