又攰又肚餓嘅時候，除咗嗌外賣，有無幻想過由機械人幫你煮飯？而家除咗3D食物打印機，喺日本長崎縣一個主題樂園裡面，就有間機械人餐廳，裡面有機械人廚師幫你整高難度嘅御好燒！

位於日本長崎縣嘅豪斯登堡主題樂園，最近開咗個機械人王國，而最特別嘅部分一定係入面嘅餐廳，裡面會有機械人煎御好燒。唔好睇佢外表好似普通機械人，由幫鐵板擦油、攪拌粉漿、倒粉漿到之後反轉塊餅同加醬都由機械人包辦㗎。

有片有真相，而且仲會整整下御好燒中間嚟個表演。

餐廳仲有炒飯、雪糕等食物供應，唔少都係由機械人幫手完成嘅。日後機械人會唔會逐漸取代人類成為大廚仲係未知之數，不過對於又懶又為食嘅朋友仔嚟講，有煮食機械人都係個喜訊嚟嘅。

ロボットの王國
地址：日本長崎縣佐世保市豪斯登堡

資料來源：朝日新聞
圖：ふぃぎゅる！，robotstart