【又到聖誕】麥兜、米奇陪你過聖誕 一家大細開心食主題樂園大餐
2018-12-19

仲有一星期就到聖誕,諗好節目未呢?仲未諗好去邊?唔驚女朋友、仔女或者老婆嬲嬲咁大膽?殺到埋身啦,仲諗咁多!未諗好節目唔知點安排,又唔想四周圍頻撲嘅你,最啱梗係去主題公園直落,一次過玩成日機動遊戲、睇表演同埋重點,食埋個聖誕大餐啦!

今年海洋公園首次同麥兜聯乘,推出全港最大規模麥兜主題美食派對同主題聖誕餐;而迪士尼適逢今年係米奇老鼠90周年,所以趁住聖誕,就同米奇米妮一齊慶祝啦,戶外小食亭就有三眼仔、Pluto聖誕爆谷桶。兩者都一樣咁可愛咁高人氣,係有啲難揀嘅,睇埋介紹再決定啦。

麥兜聖誕餐  海洋公園

海洋公園嘅冰極餐廳有「麥兜春田花花聖誕大餐」陪你喺冰天雪地渡過聖誕。由頭盤去到甜品,你都會見到麥兜個嘜頭同佢個Frd阿輝嘅出現。前菜係挪威煙三文魚伴蝦肉薯仔沙律、青豆蓉湯伴煙火雞,甜品士多啤梨慕絲伴曲奇及鮮果直情係麥兜本尊個樣添,點捨得食?

除咗搵到麥兜「變裝」藏喺菜式入面之外,主菜仲會還原成個聖誕嘅特色場景。就好似威靈頓牛柳配薯菜呢道菜咁,著住聖誕老人裝嘅麥兜坐喺嚿威靈頓牛柳雪橇,仲畀兩隻炸薯球整嘅聖誕小鹿拖住,十萬個cute。即刻覺得麥兜會講句:「媽媽啊,我唔去馬爾代夫,我準備去芬蘭過聖誕啦!」

供應日期:即日至2019年1月1日

米奇過聖誕  迪士尼樂園

而迪士尼嘅聖誕套餐就有超過80 款節日限定美食,包括迪士尼朋友造型嘅嘢食同埋季節特飲。甜品賣相最為吸引!例如星航圖咖啡廳就有為米奇生日而設嘅栗子香草慕絲蛋糕、棉花糖鬆餅配自家製意大利雪糕、而聖誕限定嘅芝味朱古力凍飲就可以喺米奇廚師餐廳度飲到。幾款美食嘅造型都好鬼可愛,拎住嚟同喺餐廳入面嘅迪士尼朋友自拍,即刻呃多十倍like!

有得食仲有得拎,戶外小食亭有聖誕版嘅三眼仔谷桶,巿集餅店又有米奇米妮嘅聖誕曲奇,拎住佢哋周圍行,肯肯定有好多雙羡慕嘅眼神望住你。

供應日期:即日起至 2019 年 1 月 1 日


文:Yanny

關鍵字
聖誕節
主題公園
迪士尼
海洋公園
麥兜
米奇
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13
迎接全新2020 1-2月下午茶推介
2020-01-06