【又到聖誕】睇得又食得!應節聖誕蛋糕大哂冷
2018-12-17

平時食飯最後都會想食甜品,何況聖誕佳節,滿足大餐之後又點少得蛋糕呢?今年唔少蛋糕店都以白色聖誕做主題,或者以可愛造型取勝,打卡一流!
 

The Cakery 冬日毛衣白色紅桑子蛋糕


Pompalicious(4吋$680,6吋$1,260)

呢間以健康生活為理念嘅蛋糕店今年以冬日毛衣做主題!蛋糕外面用無糖白朱古力甘納許唧花模仿麻花冷衫質感,切開裡面係紅桑子蛋糕,富果香而且帶微酸,味道清新。而且蛋糕無添加防腐劑,用天然糖代替精製糖,可以食得健康安心啲。
 

Vive Cake Boutique 浪漫玫瑰聖誕樹蛋糕


(左)Twinkle, Twinkle(0.8磅$580,1.6磅$1,008),(右)Let it Snow!(1磅$780,2磅$1,380)

呢間精品蛋糕就推出呢款一定會令女孩子變成心心眼嘅Twinkle, Twinkle,用粉嫩色系嘅牛油忌廉唧成玫瑰,組成聖誕樹再以珍珠同星星軟糖點綴,夢幻感十足!裡面係紅絲絨牛油蛋糕配忌廉芝士。Let it Snow!仲有傳統口味甘筍蛋糕,同焦糖牛油蛋糕兩款口味選擇。
 

Twinkle Baker Decor 水晶球願望樹蛋糕


(左)願望樹 Make a Wish($598),(右)芝士控 Say Cheese($428)

夢幻水晶球裡面係用綠茶曲奇疊成嘅願望樹呀!下面嘅樹幹係朱古力牛油蛋糕配榛子脆脆同焦糖脆脆,味道香甜口感豐富。而芝士控就名副其實係設計畀各位芝士控嘅,用芝士慕斯、焗紐約芝士夾心同雲呢拿海綿蛋糕組成巨型芝士,加上紅色絲帶超搶鏡!
 

La Famille 聖誕戚風蛋糕


(左)Snow Christmas,(中)Christmas Cheese,(右)Forest Christmas(各15cm$450,17cm$580)

呢間戚風蛋糕專門店亦一口氣推出三款唔同口味嘅聖誕蛋糕!Christmas Cheese好似棵紅色為主嘅聖誕樹,特別選用日本獺祭純米大吟釀帶出北海道同法國忌廉芝士嘅香味。而Snow Christmas同Forest Christmas就分別係戚風蛋糕加士多啤梨,同雙重朱古力戚風蛋糕配焦糖鮮忌廉。
 

Meltlyplace 開心果慕絲聖誕樹


(左)Christmas Joy($48/個),(右)Holiday Wishes(細$48/個,大$380/磅)

Christmas Joy呢顆迷你聖誕樹其實係開心果慕絲蛋糕,上面有白朱古力星星、朱古力條同金箔點綴,而切開開心果慕絲裡面係紅莓夾心,酸酸甜甜咁唔會太膩。另一款Holiday Wishes就係橙朱古力蛋糕。仲有Chestnut Wonderland栗子慕絲蛋糕,同Seasonal Love榛子檸檬蛋糕四款選擇。
 

更多【聖誕專題】:
1. 唔想做送禮勤?精選聖誕禮物建議返
2. 【玩轉聖誕食勻美食】2018聖誕市集遂個睇!
3. 任食各款海鮮、環球美食!聖誕自助晚餐精選

 
Lady M 美式經典紅絲絨蛋糕


紅絲絨蛋糕($68/件)

呢間嚟自紐約嘅蛋糕店今年聖誕再次推出美式經典紅絲絨蛋糕,不過就換上銀白色聖誕樹葉作裝飾,增添聖誕氣氛!可可牛油蛋糕焗成嘅酒紅色後,喺蛋糕當中同外層加上新鮮打發嘅忌廉同忌廉芝士。留意返分店只有切件,原個蛋糕要12月喺官網預訂呀!
 

Häagen-Dazs 快樂小鹿蛋糕


快樂小鹿(細$399,中$509,大$609)

之前就介紹過外賣雪糕火鍋,其實Häagen-Dazs今年聖誕仲有呢個非常可愛嘅聖誕蛋糕!藍色嘅雪糕蛋糕旁邊有兩棵白色聖誕樹,好有冰天雪地嘅冬日Feel,上面再加兩隻鹿仔,得意之餘又有聖誕氣氛。而裡面係經典朱古力口味雪糕,濃厚可可香味。
 

東海堂 聖誕列車長


(左)聖誕列車長($268),(右)雪國企鵝、雪國秋田犬、雪國麋鹿($25/件,$65/3件)

呢間連鎖餅店今年就以開往夢幻聖誕村莊嘅雪國列車為主題,點題蛋糕當然就係聖誕列車長、即係士多啤梨雲呢拿慕絲蛋糕!鬆軟海綿蛋糕當中係幼滑雲呢拿慕絲,同香甜士多啤梨果醬,夠哂Sweet。人數少嘅話以可以考慮買細細件嘅慕絲甜品,有雲呢嗱、芒果,同朱古力三種口味唷。
 

DALLOYAU 白雪歌劇院蛋糕


(左)白雪歌劇院蛋糕($58/件),(右)迷你雪人泡芙塔($58/件)

呢間正宗法式甜品店最出名嘅就係皇牌歌劇院蛋糕,嚟到聖誕佳節就搖身一變成雪白色!一層層分別係浸過焦糖牛奶嘅法式杏仁海綿蛋糕、榛子奶油同榛子朱古力醬,頂部再淋上白朱古力。仲有可愛嘅迷你雪人泡芙塔同聖誕樹頭蛋糕畀大家選擇。
 

美心西餅 法國士多啤梨聖誕老人


(左)聖誕雪人($258)、聖誕老人($278)、聖誕小鹿($258)

聖誕老人變成立體慕斯蛋糕呀!切開裡面有法國士多啤梨的果蓉同乳酪慕絲,甜而不膩。而小鹿雪人同小鹿同樣係可愛立體造型,口味分別係紫薯雲呢嗱慕絲同軟芝士比利時朱古力慕絲。另有一系列唔同口味嘅聖誕蛋糕同聖誕甜品,選擇豐富。
 

Italian Tomato 日本士多啤梨蛋糕


(左)赤姬‧雪($330),(右)夢幻芝味聖誕($238)

每年冬天就係日本士多啤梨開始當造嘅季節,所以聖誕食返個士多啤梨蛋糕應節都係個唔錯嘅選擇。呢間連鎖店皇牌推介就係選用日本直送新鮮原粒士多啤梨配海綿蛋糕嘅赤姬‧雪。而夢幻芝味聖誕士多啤梨雙重芝士蛋糕,另外仲有朱古力黑森林蛋糕、朱古力紅茶慕斯蛋糕等選擇。
 

Das Gute 白色聖誕夢工場


(左)白色聖誕夢工場($270),(右)夢幻閃爍聖誕($238)

芝士控亦可以一試呢個白色聖誕夢工場,即係KIRI忌廉芝士慕絲蛋糕呀!用KIRI忌廉芝士慕絲搭配比利時朱古力脆脆同黑加侖子棉花糖,蛋糕上面仲有精緻白朱古力聖誕樹裝飾。而夢幻閃爍聖誕就係海綿蛋糕配福岡縣「甜皇」士多啤梨醬同芒果粒,上面再加新鮮士多啤梨。
 

A-1 Bakery 森林歡欣雪人


(左)森林歡欣雪人($238),(右)聖誕樹頭卷蛋($168)

而呢間連鎖日式麵包店就以雪人做主題,好似森林歡欣雪人其實係黑森林蛋糕,蛋糕當中有幼滑比利時朱古力忌廉同香甜車厘子夾層,上面再加朱古力碎同可愛嘅雪人。另一款聖誕樹頭卷蛋就用以秋田縣米粉製作嘅海綿蛋糕搭60%朱古力,食落唔會過於甜膩。

 SIFT  法式別緻聖誕蛋糕棒

聖誕蛋糕棒($36/件),($180/5件) 

精緻法式餅店SIFT今年聖誕嚴選世界各地高質食材,推出各款造型蛋糕。就好似呢個聖誕蛋糕棒咁,用上唔少聖誕元素,將馴鹿同聖誕樹化成色彩繽粉嘅蛋糕棒。香濃嘅朱古力脆面,包住鬆軟嘅蛋糕,最啱開Party嗰陣,人人拎住一條食住玩!總共有榛子、柑桔、朱古力、紅莓、雲呢嗱咁多隻味,梗有一款你啱!

文:Cathy
關鍵字
聖誕節
蛋糕
戚風蛋糕
紅絲絨蛋糕
歌劇院蛋糕
雪糕蛋糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-11-08
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24