43256 0

老實講,浪漫呢樣嘢其實都幾虛無縹緲,不過任何時候想同另一半浪漫一下嘅話,海景餐廳就係其中一個無得輸嘅選擇。唔好以為海景嘅餐廳環境離地價錢都一定離地,搵啱餐廳嘅話平平地都有靚海景附送!
 

親民價($101-200)

睇青馬大橋食西餐  Cafe Roma


圖:Yan~*

想睇靚海景其實唔一定要逼喺維港嘅,去遠少少到馬灣一樣有超靚沙灘海景,仲附送埋青馬大橋𠻹,無論中午定夜晚嚟睇都各有特色。嘢食方面最多食家推介嘅係焗法國軟芝士,芝士軟綿可口,加埋白松露油同香草焗完之後香而不膩。另一招牌香烤天然美國雞亦香味十足,雞肉入味嫩滑,少少雞油更加係畫龍點睛。
 

坐窗邊睇維港  PizzaExpress


圖:carol.tsangns

唔講大家未必知,呢間連鎖薄餅店嘅海港城分店環境相當加分,唔單止地方夠大樓底又夠高,枱同枱之間亦夠空位。而且仲可以喺訂枱嘅時候要求坐窗邊位,咁就可以一邊食Pizza一邊睇維港海景!佢地招牌之作當然係唔同口味嘅Pizza,四式芝士薄餅同北京烤鴨薄餅都唔錯。記得嗌埋意式焗肉丸配麵包球做前菜。
 

西貢抵食自助餐  UniQue


圖:Michaeawhoiking

有舒服山景同海景,而且逢星期五六夜晚仲有相當抵食嘅BBQ自助晚餐,有沙律、熱食、壽司、甜品等等,但重點當然係廚師即燒燒烤啦!有原隻龍蝦、大蝦、豬肋排、串燒同蔬菜等。平日亦可以嚟食個Dinner,卡邦尼意粉香濃彈牙,炸魚薯條外脆內嫩。住附近或者有車嘅朋友仔必入科大試一次!
 

中等價($201-400)

淺水灣沙灘食Pizza  Amalfitana


圖:hero生活旅~*

想同陽光與海灘玩遊戲,淺水灣當然係其中一個好選擇。呢間餐廳前面就係沙灘,週末唔少人都會帶埋狗仔出嚟玩下水。而嘢食方面主打地中海式手工Pizza,用石窰以高溫烘熟,食落特別香脆乾爽。而且唔單止有香港人見慣見熟嘅圓形薄批Pizza,而且仲有成隻餃子咁嘅意大利式Calzone選擇,特別有新鮮感。
 

赤柱大街英式酒吧  Pickled Pelican


圖:drink7upshuann96

另一個有浪漫海景又不失悠閒感覺嘅選擇就係赤柱,嚟到呢間英式酒吧餐廳,唔少人都會自然放慢腳步,望住海景Chill返半日。想飲啤酒嘅可以喺地下Bar枱坐,想慢慢嘆「好西」嘅話就要上二樓。牛扒、虎蝦意粉、洋蔥湯等等都係推介,不過講到英國菜,當然唔少得炸魚薯條啦。魚柳本身夠新鮮,脆漿同火候都控制得宜,簡單滋味。
 

32樓無遮擋海景  Sugar (Bar.Deck.Lounge)


圖:Yan~*

嚟到商業區一樣有無敵海景餐廳嘅,呢間酒吧位於酒店頂層32樓相當開揚。Happy Hour嚟呢度飲返杯特色Cocktail,再配小食或者甜品,時間啱嘅話仲可以睇埋日落同夜景,情調同美食兼顧無得輸。靜靜雞話埋畀各位女士們知,佢地不定期會出唔同主題嘅下午茶三層架,而且日頭嘅海景都非常吸引,啱嘅就可以同姐妹們嚟Encore!
 

山頂懷舊日本菜  富士山媽媽


圖:eddie_ilovefood777

想居高臨下嘅話,山頂亦係熱門選擇,想食得特別啲嘅話,可以考慮下呢間以懷舊東瀛風做主題嘅日本餐廳。唔單止窗邊有山頂靚景,懷舊日本裝飾啱哂打卡,仲可以坐喺Bar枱前睇住師傅整嘢食,最啱鐘意相機食先嘅朋友仔。想豪少少嘅話不妨先點一份富士山刺身併盤,乾冰仙氣效果十足。大阪燒同炸泡菜餃子都有水準。
 

豪裝價($401-800)

坐窗邊鋸澳洲牛扒  Wooloomooloo Prime


圖:obigorangechanzoyi

講到睇到維港景致嘅高級餐廳,呢間澳洲扒房相信係唔少人嘅推介之一。一樣如果想飽覽靚景嘅話建議先訂枱時候講明要窗邊位。招牌Wooloomooloo Steak同普通扒房比較少見嘅Beef  Wellington都係主菜推介。而前菜就可以揀同樣出名嘅Crab Cake同新鮮生蠔。有食家話服務麻麻,不過就勝在有靚景之餘性價比都唔差。
 

對住維港飲嘢嘆大餐  Aqua


圖:KumabeardiaryMiwo

另一間尖沙咀「食環境」嘅高級餐廳之選,重點係佢地嘅落地玻璃窗可以180°無遮擋睇到維港海景,所以被《亞洲時代》雜誌評為全球最佳夜宴景觀餐廳之一,每逢有煙花匯演都一定Full Booking!所以特別日子建議早啲訂枱。29樓係意日Fusion餐廳,樓上仲有一層係酒吧,不過餐廳同酒吧環境都比較暗,小心唔好跌親呀。
 

118樓亞洲最高酒吧  OZONE


圖:betty.wei.94

想真正將維港海景一覽無遺嘅話,呢間身處118樓頂樓亞洲最高嘅酒吧就係終極選擇!一邊喺高空飽覽醉人靚景之餘,佢地嘅Cocktail同食物亦充滿心思。無論係Dinner、星期六日嘅Brunch定送酒小食都有唔少選擇,而且仲會不定時推出新Menu,例如之前嘅「周遊世界」壽司之旅又或者Dom Perignon Brunch,新鮮感滿分。



文:Cathy



更多【二人前指南】:

1. 撐枱腳最啱 工廈特色西餐廳

2. 港日台韓式任揀!情侶暖意鍋物推介

3. 唔同Budget都有!情侶鋸扒指南



熱門文章推介:

1. 【一個人開飯】一個人喺旺角食乜好?

2. 【熟食中心尋寶】鵝頸熟食中心

3. 【生日飯局】同好朋友慶生食咩好? 窩心西餐篇




隨時接收最新資訊
讚好OpenRice專頁!

相片
丼飯嘅熱潮,由上年年尾一直帶到嚟而家,都依然係咁熱!話說最近又新開咗幾間丼飯店呀,記性好嘅應該記得上個月中,開...
相片
麻辣雞煲、辣子雞丁、麻辣水煮魚......這些重口味的四川菜總讓吃素的朋友懷念不已,來到本真東后齋就可以吃到G...
unknown
文章搜尋
更多
年份
推介文章
開飯仔介紹過唔少日本限定「好西」,但如果以為日本人有咁多美食就唔會嫉妒其他地區限定就錯喇。例如台灣麥當勞最近就有個新地區限定令唔少日本遊客都特別去試!呢個叫雙茶花聖代嘅新地,究竟有咩咁吸引? 更多
過去熱門文章
無論你係咪少女,平時鐘唔鐘意台灣都好,都應該聽過嚟自台灣Dazzling Café嘅大名。舊年終於嚟香港喺尖沙咀開咗第一間分店,而家仲過埋海喺銅鑼灣開咗第二間以Garden為主題嘅分店。唔單止招牌蜜糖吐司有Upgrade,仲加推銅鑼灣店限定餐點! 更多
Top