【不一樣的饈行】OpenRice x 留白 玩味十足工作坊 甜品師帶會員一齊整分子料理甜品
6天前


開飯喇陪伴咗大家原來已經20年啦!為慶祝20週年來臨,OpenRice將會舉行一連串20週年慶祝活動。第三撃係同荃灣創意分子料理Cafe留白合作舉辦「玩味十足工作坊」,喺報名會員中抽出四組幸運兒一齊親手製作屬於自己獨一無二嘅分子料理甜品!
 


分子料理聽起嚟好似好高深,但留白嘅店主兼甜品師傅Ken就話無大家想象中咁「離地」,其實廣義上大家成日見嘅士多啤梨啫喱都係分子料理嚟㗎。當然今次搵得Ken帶會員一齊整,就唔會係啫喱咁簡單,而係Cafe招牌甜品之一:「蛋」。
 


為咗保留神秘感,參加嘅會員事前唔知道整嘅係「蛋」,跟住Ken嘅教導逐步製作,先知自己用朱古力、芒果等材料整嘅原來係一隻識流心嘅蛋!
 


一開始先用調溫朱古力整裝飾,各位會員就立刻發揮創意畫出唔同圖案,亦有會員用朱古力寫名。Ken亦提醒大家學識整唧筒嘅話,之後自己整唔同甜品都用得著。
 


而各位會員一致認為最好玩嘅步驟係:整「蛋黃」!用芒果同熱情果蓉模仿黃色嘅蛋黃,最重要嘅原來係靠浸入海藻酸溶液,喺外面形成一層薄膜,咁就做到蛋黃切開即流心嘅效果喇。
 



按部就班完成「蛋」嘅唔同部分後,最後就係裝飾。各位會員用Ken提供嘅唔同食材自由發揮,完成屬於自己嘅分子料理甜品。
 


Ruby同Alvis第二次報OpenRice嘅工作坊,今次係第一次成功被抽中。之前有食過分子料理但就未見過過程,今次可以自己落手落腳整覺得好好玩。
 


Mojo同Yan本身就鍾意周圍搵好嘢食,而且亦會自己煮下飯仔咁,覺得今次整分子料理雖然步驟比想象中多,但就唔算好難,希望之後可以參加更多唔同類型嘅工作坊。
 


 

留白
地址: 荃灣西樓角路202-216號荃昌中心昌寧商場地下12號舖
 

OpenRice 20週年慶祝活動陸續有嚟,想參與的話記得緊貼OpenRice Facebook以及網站:
https://www.openrice.com/info/or-20/special-experience/index.html



關鍵字
OpenRice
二十週年
分子料理
甜品
留白
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01