【一個人開飯】一個人喺觀塘食乜好?
2017-01-10

「一個人食飯食乜好?」相信呢個係好多人都諗或者面對嘅問題,好似冇乜奶油一支公去食放題或者鋸扒,於是有人會揀掃街、有人會揀食便利店或者快餐店,甚至有啲人會寧願唔食。但其實一個人食飯又有咩好怕喎?邊個話要一班人先可以食好西?下次唔使再問一個人喺xx食乜好喇,等開飯仔幫你揀啦,今次講下觀塘。

魷魚車仔麵 來多碗車仔麵


圖:BrellaVegneicla328

呢間車仔麵舖同其他同類麵舖最大嘅唔同就係地方相對較為企理同寬敞,就算一個人食都唔會有頹食嘅感覺。而且價錢算係親民呀,兩餸麵24蚊,四餸嘅都不過係36,符合一個人食通常都係低消費嘅原則!食車仔麵必揀之餸當然係豬皮、蘿蔔等等最索汁嘅配料,而嚟到呢間記得揀埋魷魚,爽口彈牙呀,食得辣嘅就加埋秘製辣醬啦。

黑豉油撈麵 拿督星馬大飯店


圖:supersupergirlsosoku

各區嘅熟食中心係幾啱要自己一個食飯嘅朋友,就好似觀塘呢間星馬食店嘅黑豉油撈麵咁,麵條味濃唔使講,就連配料嘅豬腳同雞腳都一樣用黑豉油炆到好入味。講真,平時有幾可會約朋友去熟食中心食飯吖,又有幾可會喺朋友面前盡情咁吮豬腳雞腳吖,自己食咪啱晒囉,唔使顧忌。仲有榴槤白咖啡都值得試呀,香香甜甜。

香辣毛血旺 又一川


圖:mandymanlovefoodieSumyiYu

都係嗰句啦,一個人食嘢最好就係唔使就人,自己鍾意食乜就食乜。鍾意食內臟嘅朋友,呢間川辣米線有毛血旺啊,成碗紅卜卜咁浸住牛柏葉、豬紅等等,可以盡情食返夠本啦。另外,米線同紅薯粉亦都夠香辣啊,仲有田雞配嗰下先開心嘛,田雞肉幾嫩滑下。

台式芝士牛肉包 米拉


圖:Simbaeat_eat_everyday

一個人嚟呢間台式小店都唔錯呀,想快嘅可以叫個芝士牛肉包,熱辣辣嘅,內餡固然之有芝士同牛肉,仲有洋蔥添呀,夾埋一齊食幾香幾惹味。懶得諗嘅最好就係叫碗雜錦米粉,咩餸都有,雞翼、鴨胸、花枝丸、貢丸等等,款款都有得食下,感覺好似好豐富咁。

豆漿油炸鬼 永興豆漿王


圖:Miss叮技巧樹熊

一個人仲可以食咩?豆漿栥飯油炸鬼吖,又平又快又好食,仲好有那些年嘅味道。油炸鬼脆卜卜食又得,叫返碗熱豆漿浸落去食又得,簡簡單單又一餐。雖然有啲街坊認為水準已經比當年嘅遜色,但豆漿同豆花都仲係好滑口呀。


文:Kar


【一個人開飯】系列:
一個人喺銅鑼灣食乜好?
一個人喺尖沙咀食乜好?
一個人喺荃灣食乜好? 


                                                                                                                                                                                                                  
  

隨時接收最新資訊
讚好OpenRice專頁!

關鍵字
一個人開飯
觀塘
台灣菜
車仔麵
油炸鬼
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【一個人開飯】一個人喺大埔食乜好?
2017-02-09
【一個人開飯】一個人喺銅鑼灣食乜好?
2016-12-30
【一個人開飯】一個人喺旺角食乜好?
2017-01-18
【二人前指南】撐枱腳最啱 工廈特色西餐廳
2017-01-18
一個人喺灣仔食乜好?
2017-03-08
夠麻甩夠地道 元朗4間香口車仔麵店
2017-02-22
本月熱門
【愛心熱店專訪】派飯背後 深水埗明哥:我唔認為自己有愛心,我只係用心 (有片)
2017-03-07
The Cheesecake Factory 確定5月登陸尖沙咀 Menu率先睇
2017-03-15
2月份好評餐廳十強
2017-03-06
【開飯熱店入圍名單巡禮】新晉美食集中地 荃葵青區餓虎藏龍
2017-03-07
一個人喺灣仔食乜好?
2017-03-08