呢排試得太多台式奶茶,不如試下轉口味吖。旺角新開咗間泰式茶飲店呀!泰式奶茶當然係招牌啦,另外仲有其他啲檸檬同青檸嘅飲品,行街行到熱辣辣時飲返杯即刻降兩度呀~~
泰式奶茶同台式奶茶雖然大家都係奶茶,但係望落同飲落都有啲分別呀。泰式奶茶嘅顏色通常較深,飲落亦都較甜同杰身,香味濃啲。呢間舖選用泰國北部高山茶葉,用泰國人手造嘅沖茶茶壺,以及煉奶、淡奶製作,睇住店員來回拉茶幾轉,而每一壺都只係大約沖到4杯茶出嚟,就知道係手工茶嚟呀!亦都係因為咁,茶香同茶味都唔會流失,飲落感覺balance,都幾地道。
想要fresh啲嘅話,可以諗諗椰果爆檸烏龍。店員用泰式方法榨檸檬汁後加入烏龍茶,然後會喺原個檸檬嘅表層切幾下,就咁放埋入隻杯度,令到成杯嘢都充滿住清新嘅檸檬香,但係又唔會話好酸好酸咁。
泰式爆檸紅茶亦係另一個refreshing嘅選擇,泰式紅茶底較一般紅茶香,而且又冇咁澀,夾埋青檸一齊製茶又幾小清新。
介紹多兩杯幾啱女生或者需要打卡呃like嘅朋友,一杯係玫瑰鮮果花茶,一杯係芒果青檸豆碟花梳打。前者係每日用新鮮生果,橙呀蘋果呀西瓜呀咁再配即叫即沖嘅玫瑰花茶,清香得嚟又帶有果甜,而且玫瑰味都突出呀。至於後者,上紫下黃,絕對吸睛。
部分飲品仲可以揀加埋珍珠、椰果、奇亞籽,或者係比較特別嘅香茅!食開泰菜嘅朋友仔都會知道,泰國嘢有好多香料,香茅係其中一種。不過唔使驚,唔係真係成條香茅插入杯嘢飲度,係只取其香而不取其肉呀。
曼活泰茶
地址:旺角廣華街1號仁安大廈地下G1D號舖
文、相:Kar