做完嘢個朋友話唔想宅在家，所以又跟我去幫人派糭，之後佢仲請我去tea就帶我嚟呢間，我就求其咁指吓門口餐牌話叫個併盤囉，入到去睇完餐牌都係叫併盤。 兩條友係食唔晒架。 (P.S. : 我地11點幾食完早餐到4點幾先食呢餐)

首先要特別提醒男士們，千萬唔好諗住可以當一餐！ 想試咗好耐，但次次去親都排長龍，今日因為去覆診可以早d去，點知6點去到都係排長條，等咗9個字先有位。 同事叫咗榛子蕉糖香蕉pancake, 我叫咗抹茶紅豆pancake。 榛子cream好朱古力，蕉糖香蕉冇乜特別。 抹茶cream冇乜抹茶味，紅豆蓉好實亦冇乜紅豆味，到梳芙里pancake, 感覺好似食空氣咁，而且冇味，連蛋味甜味乜都冇。真係試過就算！ P.S.: 可能我比較愛好格仔餅個隻pancake, 有口感有味道！

去完北角一個傷心地之後同個朋友去食晚餐，由於我同朋友好少去東區食飯，突然諗起太古城以前food court有間日式平價鐵板燒，朋友又有興趣，咁就搭車落去食，點知去到個food court已經搬咗，而且冇咗間鐵板燒，就是是旦旦搵間，見到呢間唔駛等位又見門口個二人前餐牌好似都ok, 咁就入去試食。 坐抵先睇清楚個二人前係主要食吞拿魚，但其實我唔食赤身，不過太多選擇喇，所以朋友都想試吓個餐，而個餐牌亦幾得意，一版文字一版圖片，就因為咁，我見到我鍾意既三文魚籽仲配上我最愛既溫泉蛋，唔食對唔住自己！ 朋友冇酒不歡，雖然佢最愛係啤酒，我陪佢食吞拿魚，咁佢就陪我飲saka, 因為佢間中會試吓saka, 所以我就揀咗支李白既吟釀，大家都覺得一個5xx蚊既二人前如果好食都應該唔會太大份，所以都諗住食完要再叫其他嘢，不過都係食完先決定啦。 先上saka同溫泉蛋，手機食完我唔駛3秒都食完我既最愛，雖然溫泉蛋冇加味，但夾埋三文魚籽一齊食就啱啱好，因為三文魚籽本身有一份海洋既鹹味，但若然分開食就會一個鹹咗d, 一個就太啖。 之後到個二人前慢慢上，第一樣係吞拿魚沙律，都幾多大大嚿既吞拿魚，而個汁亦唔太酸，味道恰到好處。 第二樣係韓風醬吞拿魚漬，個醬漬吞拿魚輕微辣，適合任何人，用紫菜夾埋牛油果一齊食味道剛好，但如果牛油果切長條形就更好。 燒吞拿魚鮫，見到有嚿成個拳頭咁大諗住會好"鞋", 但估佢唔到咁滑，而且唔腥，正！ 四式吞拿魚丼，心諗四式吞拿魚仲唔係到赤身出場？點知佢又真係冇赤身，四式係三件唔同級既腩同一羹腩蓉，真心滿足，再加埋個吞拿魚味噌湯真係飽到一個點，見到隔離枱件好吸引既蛋糕都自知食唔落。

之前食過牛扒唔掂，今日行過同事話要食呢間，因為要食薯條，唯有諗住伏多一次啦。 今日叫咗個焗豬扒飯，同事叫牛脷伴薯菜，又係互分小小試食啦。 牛扒唔掂但係牛脷竟然掂喎！ 焗豬扒飯整體味道唔錯，冇諗過佢地個豬扒炸完咁軟淋淋，簡直係入口即熔咁，正！

之前夜晚行過好想試，今日終於 的起心肝約埋鐵脚同事一齊去食晏。 食晏時間好多人，但好快已經有台。 我叫咗豬粉腸，魚皮餃，鮮牛脷豬油撈飯，仲有脆門鱔魚皮同金銀花茶。 同事叫黑豚肉餃，鮮牛柏葉銀針粉同醉雞翼。 我些牙咗d餸。 鮮牛柏葉係黑色個隻，爽口！ 黑豚肉餃係堅有豚肉味 醉雞翼夠味，但好實，筷子好難篤入。 豬油撈飯夠晒豬油香，可惜d飯有點硬，不過因為餸係連湯上，可以撈d湯食 豬粉腸，好怕出面個d細鋪駛唔干爭，但佢真係洗得好干爭，爽口彈牙 鮮牛脷，夠膽寫明新鮮牛脷，當然要試，果然夠新鮮，同個d急凍真係兩種食法。 魚皮餃係堅魚皮餃，唔似其他粉麵鋪個d層皮得個煙靭感冇魚味。 附帶一提係佢地自家製辣菜餔，唔食得辣既要三思。

想搵人地個孫阿食晏，點知比人帶咗去街，唯有一個人去。 上次試咗上環店，之前又試咗香港仔總店都覺得好食，今日就試埋天后店。 係上環店提議佢地紅豆冰要用粗飲管，今日去天后店真係轉咗，果然係聽客人意見，仲會改。讚！ 今日叫咗周記蝦餃，海鮮脆腸粉同鴛鴦紅豆冰，外賣就叫咗茄子塔，小龍飽同炒腸粉。 蝦餃爽口，蝦夠大及鮮。 海鮮腸粉，先有腸粉皮包住脆網皮，而餡料係蝦肉同芹菜，雖然芹菜唔多，但對住唔鍾意食唐芹既我就覺得好大味。 鴛鴦紅豆冰雖然冇得小甜，但係小冰既情況都唔甜，正！ 外賣茄子塔因為見對面個碟賣相好靚，拎到返屋企都冇散，而且比個d煎釀三寶既釀茄子咁油，好！ 小龍飽，比較清啖(可能會有人覺得咁叫冇味), 對於鍾意食清d既我覺得ok的。 炒腸粉夠香，而且用新鮮腸粉做，仲夠大碟可夠女士一餐。

見到新開就去試新嘢。 入到去差不多滿座，之前聽過佢地香港仔店d點心好出名，又聽聞d芝麻蝦多士同流心西多士，所以都想試吓，但因為得一個人又唔食得多，為有叫兩個最想試既。 鵪鶉蛋燒賣 - 唔係買返黎翻熱，真係自家製，第一次食到鮮味既鵪鶉蛋燒賣而且唔駛加豉油。 芝麻蝦多士 - 成個多士面都係芝麻，中間夾住好厚蝦肉，雖然好香芝麻，但又唔會蓋過蝦既鮮味，直得一試。 見到餐牌有紅豆冰，而且有好多飲品都可以加紅豆，就叫咗杯鴛鴦紅豆冰，第一啖飲落覺得只有奶茶味，但慢慢會有少少咖啡香，不過失敗在冇粗飲管，唔可以紅豆同鴛鴦一齊飲。

首先講吓比餐廳搞到我冇啦啦少咗25 A.M.里先，本來用TableMap book咗6月2號，點知餐廳打黎話個日full咗，跟住問我改唔改期，我就順便同佢book遲一星期，因為我癈事一陣我用TableMap book完佢又打黎話full咗。 入正題，6月9號3大人一個BB一齊去食，$140唔駛既lunch buffet預咗唔多選擇，但係冇諗過令我以為自己失去味覺。 熱揮有六款，有牛，魚柳，豬扒，白飯，闊條麵，仲有一個唔記得。美食應有色/香/味/美，但以上數得出既都只有色！ 凍盤肉腸有3款，一個ham, 凍盤ok, 如果唔ok就真係死得。 一款西湯，冇味。 生果及沙律都幾多款，切好既生果都有d酸，原隻生果就好多都未熟，沙律就一般般。 甜品有幾款，我只係試咗類似 tiramisu既勁甜cream同一杯以為係 mousse既冇味雪。

又係食晏時間，又係對脚帶路行咗去W square後面條巷睇下食乜好， 發現有間叫後街牛扒，牛魔王既我就緊係話試下都好喎，點知。。。。。 叫得後街牛扒咁應該主打係牛扒啦，見到餐扒有牛肩里脊扒，真心未食過，牛頸脊打邊爐就食得多，就一於叫呢個要5成熟啦。 同事就叫咗個焗豬扒飯。 個牛肩里脊扒完全冇驚喜，叫個普通什麼西冷都係咁差不多，而且都一樣有筋，個扒應該似3成熟多過5成。70分 反而同事個焗豬扒既豬扒仲好食過個牛扒。85分 間嘢其實係咪應該改名呢？ 個餐跟一杯(sake杯咁大) 面豉湯，都有隻蜆仔既。 最最最差係杯咖啡，你用即沖都唔緊要，夠膽C叻到用3合1 個種，仲要係一包沖兩杯水既比例 半個咖啡控既我只可以比30分佢。

係灣仔做咗咁多年，lunch真係食到唔知食乜好，見到呢間算係新嘢，而同事有個 app可以有一次買一送一優惠，咁就試新嘢啦。 首先提提大家要英文點餐的(可能我英文差，所以提提大家，並冇不敬之意) 頭盤有六選二。 我地兩個都選咁鷹咀豆蕃茄紅蘿蔔湯，而我就再點個唔知乜醬半熟蛋，同事點咗芝士焗薯。 主菜就一樣係西班牙海鮮飯。 先飲個湯，鷹咀豆唔太霖但唔係硬，絕對係99%可接受既軟硬度，蕃茄湯底有茄味但一點都冇過份搶味， 紅蘿蔔就夠霖，整體90分。 唔知乜醬半熟蛋，似係沙律醬加咗d唔知咩汁，隻蛋既蛋白可以話係熟晒，但中間蛋黃係半熟，有小小動彈個種。 80分，欠20分因為佢唔係我想像中個種流心半熟蛋。 芝士焗薯，有兩片，每片約5-6cm厚，面個塊芝士焗得有小小燶既效果，但下面個塊就冇燶喇，不過冇影響味道興口感。 90分。 主菜西班牙海鮮飯，雖然唔係好大碟飯，但海鮮都唔小，有兩隻中蝦細小小啦，又唔可以話係細蝦，仲有5隻青口 同魷魚圈，再加小許青豆切絲同其他菜絲，個飯底亦非常合格。 呢個我比95分