上星期日，經外賣平台想試吓呢間泰國菜，當時點咗一個套餐（泰式蝦炒金邊粉配冬陰功-迷你）同埋青咖喱豬扒焗飯配魚餅兩件再加椰汁西米糕兩件，最後叫多隻香茅炸乳鴿。 喺個平台度睇，出餐慢，到預期送達時間先至見到餐廳出到餐。送貨員亦都好快送抵我屋企。 1. 泰式蝦炒金邊粉，份量大概半盒外賣盒，食落完全冇味道，莫講話用泰式炒，簡直係南轅北轍，色香味通通皆無。 2. 跟餐嘅迷你冬陰功湯，用一個細膠碗承載，份量少得驚人，以為送餐期間倒瀉，但係外賣袋完全乾爽，冇打寫過嘅痕跡，簡直唔可以用迷你嚟形容。飲落得個鹹字，冇酸亦冇辣，成碗湯有一嚿秀珍菇。 3. 青咖喱豬扒焗飯，用錫紙兜承載，味道偏淡而且偏甜，豬扒味道一般，一條條碎碎上，賣相雜亂。 4. 魚餅食落似現成貨，口感同魚蛋冇乜分別，完全唔似一般泰國菜館食到嘅魚餅。 5. 香茅炸乳鴿，一啲香茅味都冇而且調味不足，只屬一般炸乳鴿貨色，而且偏瘦，普通燒臘舖都俾佢出色。 6. 跟餐叫咗兩杯凍咖啡，姑勿論係唔係啲冰融晒，飲落口只係覺得係奶水完全冇咖啡味，我未飲過咁難飲嘅咖啡，所以放棄，倒掉。 7. 椰汁西米糕，漏單。 有關個冬陰功份量問題，我曾經致電餐廳查詢，餐廳回覆：於舖頭用膳承載冬陰功湯個碗嘅份量同我外賣嘅份量係一樣。 總括食物質素差，完全冇泰式嘅味道，份量少。

呢間酒店喺旺角開咗之後我都想試吓鷹巢，根據我爸爸敘述呢間酒店同中菜廳以前係喺中環。所以諗住復活節長假期同爸爸去飲中午茶。 公眾假期星期日，為咗免等位，所以一早已經預約定。當日去到其實客量唔多。裝潢嘅感覺好似大陸嘅酒樓。 點心選擇唔多，而且冇乜太大特別，唯一可以講嘅係錦鹵雲吞，而家喺出面嘅酒樓比較少見。 總括嚟講我只可以有兩個點心，覺得唔錯之外，其他都完全敗筆。 比較好食嘅有：- 第一款 金巢香酥帶子芋角，口感表面香酥，芋蓉香綿，味道清香。 第二款 金牌叉燒皇，叉燒嚟講佢唔係特別好，只不過係成餐飯嚟講佢都算OK，切到成3cm厚，女士見到有啲卻步，始終女仔都係鍾意細細件咁食。但係食落去肉質鬆軟，有一貫叉燒嘅質素。 其他當日點咗嘅點心同菜色有：- 1. 蜜汁燒脆鱔 - 勁咸，咸到食唔到任何味道，鱔皮都算脆嘅，蜜汁完全唔多覺。 2. 韭菜蟹肉酥 - 一般過一般，完全食唔到有韭菜味，莫講話蟹肉，蟹味都唔多覺有。 3. 福建炒飯 - 都係一個字《咸》，完全食唔到其他味道。 4. 錦鹵雲吞 - 好失望嘅一道餸，首先個炸雲吞，一啲都唔鬆脆，仲好似潮咗咁，咬落去濕濕淋淋一啲都唔脆。仲有塘油喺底浸住啲雲吞，食到成口油。濕料方面，汁嘅色水同味道都一般，裏面嘅海鮮料全部好似浸咗漂白水咁，得過爽字完全冇嚟味道。 5. + 6. 蝦餃同燒賣，一般貨色。 7. 鮑汁鮮竹卷 - 莫論飽汁味完全欠奉，而且都係實咸，咸到食唔到餡料係咩。 8. 方魚炒芥蘭 - 呢個完全唔可以係喺任何酒樓出現到嘅餸菜質素。芥蘭又黃又老，食落口完全係渣，根本吞唔落肚。只有咸味，方魚味當然欠奉。（同當場侍應反映呢個菜嘅質素「食咗2條菜」，佢哋淨係收咗碟菜，最終帳單照收我錢）。 9. 酥脆蘿蔔絲腸粉 - 其實美其名，實質係炸兩，食落口感就知道條油炸鬼番炸好耐，係硬脆，蘿蔔絲見到係有啲，不過食落完全唔覺有蘿蔔絲嘅存在。 總括嚟講，普通酒樓質素都未達標，如果係屬於酒店食肆嘅話，價錢同服務都唔入流，而且CP值低。所以唔會有第二次。

除夕日特登走去K11 食個lunch，大佬專登訂位下午2:30，準時入到去，大概六成滿座。餐廳內燈光陰暗，但係窗邊陽光普照，影射入舖頭非常刺眼，相信係光暗對比太大。 餐牌都算琳琅滿目，款式眾多，當未拿定主意揀緊嘢食時，在場待應不斷走近催促落單，感覺非常之不良好。 前菜小碟，應該係醃製嘅酸蘿蔔，食落淡而無味，又唔酸又冇清爽嘅感覺，蘿蔔本應是脆脆的口感，但係感覺係淋嘅。 最終選擇以下菜式：- 1. 滕椒牛𦟌 - 餐前小食一碟，以小食來講份量都算OK，但係冇嚟味道，而且牛𦟌可以烹調到有黐牙嘅感覺，都應該幾難。 酸菜桂魚（半份）- 上菜嘅時候已經發覺個酸菜魚唔係好熱，第一樣當然先試下個湯啦，一啖入口成陣泥味，酸菜味道唔夠，又唔酸又唔辣，再加上唔夠熱，已經大打折扣。魚肉唔算太滑身，食落都係一陣泥味，內有冬瓜同寬粉，其實咁濃味嘅菜式，冬瓜應該好入味，但係就格格不入，冬瓜完全冇味道。寬粉份量大概有10條左右，魚片大概有七片，酸菜份量，都唔多。肝腰合炒 - 非常鍾意豬腰同豬潤嘅我選擇咗呢味，說實在，味道中規中矩，配菜有啲萵筍同蘑菇片，略嫌豬膶食落口感比較老同實，豬腰切成條狀，反而口感不錯。成都擔擔麵 - 碗麵嘅size等同於花生小碟，目測感覺良好，但係整體冇嚟味道，麵質一般，只係感覺食到成口油，兩啖已經完事。入座大概半個鐘，食物到咗一陣，侍應已經走過來問我哋仲有冇order落，如果冇就埋咗張單先。大佬就問咁我哋可以坐到幾點，侍應回覆係3:30。首先訂位嘅時候冇講到要3:30離開，成件事食得好倉猝，係一件非常唔好嘅經歷。

知道佐敦店即將結業，而且想食壽司郎好耐好耐啦，可惜佢個預約App永遠都用唔到，都試過喺長沙灣店買過外賣，但係只可買特定款式，而且想感受吓久違嘅迴轉壽司氣氛，決定星期日去食頭輪。
店舖10:30開店，當日10:00前到達已經有大概50人排緊隊，大家都好有秩序。

大概10:20左右店舖開門同開始派籌。因為太多人，有仲排緊隊等派籌，已攞籌嘅人逼晒喺舖面範圍，好擠迫同空氣唔太流通。因為我都算隊頭，所以唔洗等好耐10:35分左右已經可以安排入座。入座時會俾張指示你坐枱位置嘅膠牌，同時亦係你找數時張單。坐好後，有位服務員親切咁講解落單流程等事項。

之後我同大佬就開始用個平板電腦點餐，每次只可以點4款食物，而點咗嘅食物會用輸送帶方式送到你面前。點咗一轉即時挑戰迴轉帶上嘅壽司。以下就係當日享用過嘅食物:-

特選大吞拿魚腩入口油香滿溢，中吞拿魚魚腩配上醬漬海膽整件一口而盡，中吞拿魚魚腩油香都不遜，加上少少海膽甜美，好感動。劍魚腩爽口魚肉入口魚油清新，梳乎里海鰻，鰻如其名，入口即化如空氣，但不失海鰻應有味道。油甘魚同北海道帶子都食落鮮甜。松葉蟹軍艦，香濃蟹膏同清甜蟹肉份量足。三文魚籽軍艦魚籽比較細粒，但粒粒飽滿，入口魚油咸香適中，唔需要沾豉油都好夠味道。(三文魚籽我哋食咗兩 round，魚籽份量有參差)醬烤鰈魚鰭邊，大大塊同厚厚魚鰭邊，一咬魚油微焦香氣四溢，配上少少甜味嘅醬油，簡直係完美組合，是日呢款壽司係我個人最推介。蝦三味中規中矩。鯖魚押壽司，大佬點嘅時間我唔太睇好，不過一食入口，真心好驚喜，押壽司面嘅蔬菜應該係醃漬物，少少咸咸酸酸，夾埋件肥厚而且魚油豐富嘅鯖魚，真係百感交集。另外件大吞拿魚腩壽司都係一啲都唔會令你失望。本身池魚肉應該濃味，但係呢款日本產頂級池魚就冇咩魚味。真鯛魚肉口感清爽，魚肉甜味欠奉。厚切燒鯖魚，係大佬食完鯖魚押壽司後加，諗住有同樣質素，只不過會係口味同做法唔同，可惜事與願違，魚肉冇前者厚，而且又乾又硬又柴皮。炸蝦天婦羅拼盤都係失望之極，油膩而唔太脆嘅外皮內有唔出色嘅餡料。用餐時間一小時，雖然係有啲急，不過明白有咁多客人等緊，冇理由唔限時。不過略嫌部點餐儀器，成餐裡面8成時間都係系統繁忙，落唔到單order食物，喺呢個時侯人人都未落到單，全部專注喺條迴轉帶，我哋個位喺帶尾，當系統繁忙時完全乾坐飲水。攪咗一輪先派實體餐牌俾你點食物。結帳時服務員用儀器Scan吓叠碟之後，可以攞住入座時嘅膠牌去排隊埋單。整體用咁嘅價錢喺香港食到呢啲質素嘅迴轉壽司真係物超所值，當然冇得同日本迴轉壽司比較。但係呢度嘅壽司上面魚肉大大件同有厚度，品質都真係唔差，令其他連鎖壽司店相形見絀。

夫婦朋友約食飯，地方由佢哋選擇，之前未認識呢間位於山林道嘅餐廳，朋友推介食物新鮮同價錢相宜。我同大佬都係當日先知原來去搵鐵板先生。朋友已預定鐵板活龍蝦套餐(二人前)。原因老闆只會一日前親自去攞海鮮，於餐廳養過一晚夜，確保食材品質先供應俾客人享用，所以想去食海鮮鐵板燒嘅朋友就要早一兩日打去預訂。

是日星期六大概8:00到達，舖頭唔太大，鐵板燒前座位加埋我哋一行四人已經坐滿，見師傅同其他客人交流有講有笑，好溫馨熱鬧。

師傅知我哋預定咗龍蝦餐，喺水缸捉咗兩隻生猛活龍蝦即席生劏，佢表示餐廳著重海鮮等食材要新鮮。

套餐食物方面如下:-

1. 木魚絲蟹籽沙律 – 一貫蟹籽沙律，不過加咗木魚絲，多一層口感同香味，蔬菜都清甜爽口。2. 時令刺身 – 赤蝦、魷魚、三文魚同北寄貝，平平凡凡。3. 魚頭豆腐麵豉湯 – 雪白嘅湯一入口就品嚐到濃濃魚味，配料豆腐海帶一啲都唔遜色。不過怕魚腥嘅朋友一定要襯熱飲同小心魚骨。4. 龍蝦 - 師傅劏好龍蝦肉喺鐵板度先煎香，龍蝦頭嘅膏加適量調味炒香，最後將炒好嘅龍蝦膏加落龍蝦肉翻炒至均勻上碟。龍蝦肉香口彈牙，件件都散發住蝦膏味，鮮甜回甘恆久不散。5. 鵝肝 – 沾上少少粉喺鐵板慢慢煎香，滲出鵝油後件件都差不多仲有2厘米厚，生熟度適中，表面金黃香脆，裡面香滑軟熟，味道唔太濃郁，連埋脆多士食落口感覺唔會太油膩。6. 銀鱈魚 – 煎得比較過火，雖然表面金黃，但冇咩油份，魚肉食落好乾冇應有嘅魚香，略遜一籌。7. 安格斯牛扒 – 因每人都要求唔同嘅生熟程度，師傅都做到唔同嘅要求。我要四成熟，完全合晒標準。表面微微焦香，肉質軟淋，肉汁同油香一般水平，不過牛肉味偏淡，勝在有炸蒜粒增加香氣。8. 炒雜菜 - 師傅用牛扒肥膏煎出嘅油嚟炒，雖然牛油味唔算太重，椰菜同雜菌等蔬菜都有沾上香氣。9. 炒飯 - 都係用牛油同牛油渣炒，見師傅打咗白雞蛋同啡雞蛋混合喺白飯，炒到粒粒飯都均勻有蛋漿包裹，灑上櫻花蝦、蔥花同蒜粒，食落乾爽煙韌，口感豐富調味得宜。10. 龍蝦頭麵豉湯 - 再嚟麵豉湯，原來係用個龍蝦頭熬煮，個湯完全充斥住好濃郁嘅龍蝦香味，仲飲到啲龍蝦膏粒粒，十分滋味。11. 甜品 – 分別係綠茶味雪糕同豆腐味雪糕選其一。綠茶味濃，豆腐味清甜，兩者都好香滑，感覺完滿。

當日食到咁上下，老闆娘叫我哋去影相，我嗰時心存問號。原來我朋友Book檯時提及呢餐飯係為我慶生，特意喺鐵板上舖咗公仔同祝福字句，我第一眼見到好感動，而且塑圖可愛而不失精緻，而呢個繪圖製作由老闆娘完成，真係好有心思。食物份量都好足夠，同行兩個大男人都食唔得晒個基本二人前，樣樣足料。 其實師傅就係老闆，而老闆娘就負責樓面工作，夫婦二人親切隨和。傾談下得知餐廳因為政府防疫政策導致難以經營，曾經一度想放棄。宜家都係因為一班熟客勸籲下咬緊牙關繼續做落去。呢類溫情小店已經唔多，食飯之餘令你感受到暖暖窩心。支持！

一家人同我食餐生日飯，大佬Book咗呢間，食5:30 – 7:30時段，預訂6人檯嘅窗邊位置。其實我就唔太鍾意食餐晚飯要限時限刻，不過大佬Book檯時冇了解清楚，而且被要求之下又落咗Deposit，咁費事取消又再搵地方，就照原定計劃。 當日我同大佬準時到達，餐廳唔太大，大概都有20多張檯，當時計埋我哋只有兩檯客人。安排入坐時發現分開2張檯，一張4人，另一張2人檯，檯質與之間離行離迾，仲有一張賿片相隔，一家人（當日只有5人出席）食得好疏離，而且因為大家share啲dish 嚟食嘅關係，下下都要離檯行嚟行去交換食物，成餐飯嘅過程都幾唔舒坦。 嗰日旺角大塞車，家人兩位成員遲到，因為限時，所以唯有我發板叫咗以下食物:- 1. 燒慢煮16小時辣豬助骨 – 豬助骨味道一貫，肉質有啲嚡。薯角配菜沙律普普通通。 2. 意大利手卷意粉伴野菌、辣肉腸及巴馬臣芝士 - 手卷意粉一條條，紐紐哋，口感煙煙韌韌，成碟粉都係靠辣肉腸帶出味道，都幾香濃野味。 3. 煎慢煮美國頂級安格斯牛柳 – 是晚餐廳食牛扒唯一選擇，Order Medium Rare，生熟度係完全達致要求。牛扒面煎出整齊格格，小小焦香，肉質有咬口得嚟都軟淋冇渣，調味適中，不過牛肉味略遜。伴碟薯蓉都好香滑，小露荀同蕃茄乾都不遜色。 4.白汁野菌鮟鱇魚臉頰 (個名唔太記得) – 白汁夠香、濃、滑同稠度適中，魚臉頰煎到金黃色，件件一口size，咬落去有意想不到嘅彈牙，配上啲白汁連野菌一啖入口，口感豐富。 5. 慢煮黃油雞髀沙律 (個名唔太記得) - 雞脾表面煎到金黃香脆，內裡肉質鮮嫩多汁，味道略嫌唔太突出，食唔出係黃油雞。新鮮沙律菜配上橄欖油同蕃茄乾都好清爽。 6. 半打生蠔連兩杯白酒set X2 – 白酒係一般House Wine，容易入口得嚟清新。佐酒生蠔口感一般，宜家嘅季節啲蠔都係偏瘦，而蠔本身甜味同海水味都欠奉。 7. 火焰朱古力球 – 用燒著咗嘅酒淋落個古力球，令古力溶喺球裡面嘅雲呢嗱雪糕，連伴碟士多啤梨一齊食，加上有酒香餘韻，令呢餐寫上完美句號。 另外都叫咗兩杯Cocktail & 一杯 Mocktail – Passion Fruit Mojito, Classic Mojito & Karffir Lime Collin，飲品方面質素都唔差，不過每杯都需要等好耐，情況有漏單再加上製作過程效率慢，大概每杯order後平均需要20分鐘左右後至會上到檯，最好不時提提服務員，因為試過一杯飲品漏單兩次。 大概到7:00服務員已要求last order， 7:30準時過嚟埋單。離開嘅時候目測餐廳都係6成滿左右，又唔見有其他客人等入坐，可能有晏啲booking 啩。不過其實當時本身我哋都想再叫啲飲品，不過餐廳又好似唔想你留底，怕我哋唔會冇消費坐喺度，同行親人感覺唔太良好。其實食物同飲品質素都比預期好，餐廳環境都尚可，不過服務同其他配套好似略遜一籌。

大佬之前同我都想試吓田舍家，不過上次心血來潮就咁Walk-in冇位，今次大佬訂咗位，星期六食個Lunch。 12:00準時喺預約時間到達，目測當時入席率唔夠一半。接待員問我哋想坐房定大龐，都係窗口位置。見到房內只有兩張檯，而且空間感十足，所以我哋揀咗房內位置。不到一會，另一檯客人都安排坐喺房內另一張檯，仲不時大聲高談闊論，聲線困喺房內，好嘈吵。 當日選擇咗以下兩款午市套餐:- 1. 鵝肝、活鮑魚及美國牛肉套餐 ž   沙律 – 食材普普通通，配上日式酸醋同橄欖油，面有啲疑似綠色蝦籽，卜卜脆嘅口感，都未嘗唔係一款開胃前菜。 ž   刺身 – 有一隻蝦、赤身吞拿魚同油甘魚各兩片。刺身品種唔太特別，不過都尚算新鮮，蝦有應有嘅海鮮甜味，赤身肉是呈紅色，肉質實而冇渣，魚肉濃味適中。油甘魚食落淡淡甘甜，鮮爽清新。 ž 煎鵝肝 - 鵝肝面香脆，內裡係少少生，呢個程度係最好食，口感入即溶，鵝油帶有濃郁香氣恆久不散，配上既係伴碟又係醬汁嘅黑醋，完全唔會有油腻嘅感覺。 ž 汁煮活鮑 – 鮑魚切片跟殼上，上面鋪咗啲三文魚籽，魚籽粒粒飽滿，”卜”一聲魚油滿溢口腔，鮑魚片厚薄恰到好處，醬油味算重，但係都不失鮑魚鮮甜，不過略嫌有啲過熟，食落雖然算脆夾煙煙韌不過都有啲硬同有啲咬唔爛嘅感覺。 ž 煎牛肉粒 –用鐵板燒方法烹調，粒粒大細平均，嫌面煎得唔夠香脆，不過一咬就肉汁四濺，牛味唔算突出，肉質軟淋如綿花糖，配埋少少醬汁同啲冇香味嘅蔥花，可互補不足。 ž   炒菜 – 一貫鐵板燒嘅炒芽菜、椰菜同紅蘿蔔絲，勝在芽菜乾身冇出水。 ž   炒飯 - 鐵板燒式炒飯，不得不讚，色香十足，粒粒飯都呈金黃色，代表粒粒飯都有蛋漿包裹，食落有微微焦香，滿滿一碗飯裡面夾雜住三文魚同帶子粒，口感豐富，不過味道偏淡。 ž   麵豉湯及漬物 – 麵豉湯咸淡適中，上檯到進食嘅時間都相隔5-10分鐘，不過入口時油豆腐同海帶都未軟透。醃牛蒡同黃蘿蔔都好入味出色，反而醃昆布我就覺得有啲腥，但係大佬意見就OK。 ž 甜品 – 牛奶布甸中規中矩，奶味唔夠香濃，質地都軟滑得嚟實淨，口感好飄逸，甜度屬中等，夾埋啲酸酸哋啫喱同迷你生果達到平衡。 2. 特選懷石料理 ž   前菜 – (冇介紹嘅情況下估計) 爽脆香甜多汁嘅生粟米一嚿仔夾雜啲豆、一嚿仔蕃薯、一粒紅桑子、一件有肉嘅卷物同埋有一嚿疑似魚肉嘅物體，呢個前菜令我覺得自己唔知食咗啲咩。 ž   刺身 - 兩款魚類都疑似係鯛魚，其中一款有燒過，食落有焦香，唔太肥，魚味濃。另一款白色魚肉似真鯛刺身，喺口中慢慢咀嚼時，清甜味在唇齒中流連忘返，鮮味突出。普普通通厚帶子半件，反而似烤過嘅熟螺肉兩小件有啲驚喜，螺味重而突出，口感鮮美軟糯。 ž   京燒銀鱈魚 - 醃味非常之平均，魚肉雖然唔係魚油滿溢，不過尚屬肥美，香滑魚肉充斥甘甜嘅味噌焦香，中和了銀鱈魚的油膩感。 ž   茶壺湯 – 清澈嘅昆布湯汁，加上青橘汁享用十分清新，湯內海鮮食材有帶子同蝦，仲有啲吸飽高湯嘅菇菌，咀嚼時都感受到高湯嘅味道。 ž   天婦羅 – 食材分別係蝦，蝦頭同蝦身分開炸、蓮藕片、茄子同粟米芯。 食感完全敗筆，天婦羅粉漿炸出嚟又厚又硬，冇嚟味道。一啲應有嘅輕、脆、酥完全冇，件蓮藕仲要濕淋淋黐住張紙，食到滿嘴油膩，不論食材如何新鮮，都只可用難食嚟形容。而且天婦羅沾醬上檯時已經落好蘿蔔蓉，唔係分開上，感覺好似唔太專業。 ž 鐵板燒牛肉卷 – 牛肉片卷上啲蔬菜碎，醬汁味過濃，食唔到牛肉原身味道。 ž   炒飯、麵豉湯及漬物 & 甜品 – 同上面個餐質素一樣。 總括食物質素有參差，平均值都係一般，更稱唔上物有所值，如果計埋個VIEW、餐廳環境同服務，個CP值都係低。每位服務員都有一股高高在上嘅態度。明白可能佢哋需要留意我哋食嘢進度去安排下一道菜上檯，但係碟上面嘅食物都未食完 (非擺盆裝飾)，就嚟要求收拾，而且有一種好似被監視同被催促感，但係到最後都係一堆頭送上檯，好似有一種叫你食快啲離開嘅感覺。

經過幾次芳華絕代，見到面口餐牌都幾吸引，星期六去試一試，大概2:00左右，都尚算食晏時間，去到量體溫，做好政府要求入食肆前嘅動作，無需等待就安排坐喺收銀處及霓虹光管附近位置，好有feel。而且枱與枱之間空間寬闊，感覺舒適。

坐低都未點餐就發現有張印有QR Code嘅單喺枱面，係嚟點餐用，方便得嚟又可以減少接觸。

當日見到個Lunch Meun都幾多款式種類，而且價錢又得宜，就點咗:-

1.         泰式炒金邊粉，選擇咗雞肉。橙紅色嘅金邊粉煙韌彈牙，而且唔會斷到一嚿嚿，口感十足，仲要條條粉無論色香同味道都好均勻。重點係雞肉一啲都唔遜色，唔係一般雞肉或者雞粒，而係一件件嘅燒雞件，食到雞肉充滿香烤味道，醃味都十分出色。配料都有豆乾、芽菜同韮等，不得不提係當中嘅蝦米數量唔少，味道濃郁，啲size都算厚同大粒，非常滋味。
2.         泰北海南雞飯配油飯，油飯粒粒煙韌分明，油香平均。雞肉嫩滑連爽口雞皮一拼入口，感覺水潤想滑入喉嚨，不過雞肉調味略遜，雞本身味道都係偏淡。不過配上個獨製嘅海南雞醬就截然不同，醬汁味道薑味好有後勁，十分刺激。
餐飲叫咗:-

荔枝菠蘿梳打 - 荔枝味果汁加上菠蘿粒，甜特得嚟相當清爽，加上有汽梳打，忍唔住想一飲而盡。

凍齋啡 – 咖啡味香同突出，不過略嫌水份量太多，加上冰粒，攪到杯咖啡好啖。

總括環境舒適，服務都好周到，仲有食物都令人滿意。唯獨係場內播放音樂好大聲，感覺有啲吵耳。

成日喺公司樓下見到工廠大廈外牆上嘅廣告，估唔到喺棟寫字樓大廈會有賣呢類食物。

星期五大佬話想食泡椒類食品，咁我就諗起啲工廠大廈外牆上嘅廣告，就去試吓麻辣夫妻。初時以為只係賣食物，上到去先知原來有堂食。大概5:30上到去，二話不說就點咗泡椒雞翼尖(半磅)同半隻麻辣手撕雞。誰不知泡椒雞翼尖冇現貨，要即做需時半個鍾，咁我落咗單半個鐘之後上去攞。因為現場即時真空包裝，攞嘅時候都等咗一陣，親切嘅唔知係老闆定係服務員將保溫袋遞上，因為趕車關係急急腳踏上回家之途。

返到屋企，即時打開個保溫袋，泡椒雞翼尖係暖嘅，麻辣手撕雞係凍嘅，心裡即時對個保溫袋用處有啲疑惑。 一剪開兩包食物，都有一股唔同嘅香味撲鼻而出，頓時胃口大開。
泡椒雞翼尖倒咗落個碗，見到有大量蒜粒，泡椒同香葉。一食落去甜甜哋，泡椒味唔太重，冇啲醋酸味，反而有啲似泰式口味。辣感後勁凌厲，口感入口即化，唔似之前食開嗰啲雞皮會爽爽脆脆，所以有少少落差。
麻辣手撕雞味道好香，夾雜咗一股好難形容嘅香料味道，比起以往食過嘅麻辣味道多咗份層次，雞肉連雞殼手撕，可以食到雞肉連骨位，格外野味。辣味都係食嘅時間唔覺，但係慢慢滲出嚟，非常刺激。雖然係麻辣口味，不過都食得出有雞味，可惜略嫌肉質比較韌，除此之外其他都非常出色。
店內環境都幾舒適，感覺溫馨，佢哋有烏冬同飯餐堂食供應，有機會都想試吓。

呢排成日經過，初時都毫不起眼，望落都係一般車仔麵舖頭，但係再經過數次，發現條排隊長龍好誇張，舖頭出面有幾張檯俾食客享餐，偷偷望吓，啲餸又幾大份，而且見到冇染色嘅生腸，仲要係大Size，好吸引咁喎！之後諗住走去幫襯試吓佢龍定鳳，幾次都係大排長龍，放棄咗。今日我派大佬買外賣，終於試到啦！ 分別買咗兩碗都係油麵底，湯底分開，而餸方面分別有:- 1. 魚皮餃 – 皮香肉厚，唔係街市同超級市場嘅一般貨式。 2. 牛柏葉 – 爽脆唔韌。 3. 雞翼 – 一般鹵水雞翼，都幾入味。 4. 豬大腸 – 鹵味出色，一啲豬腸騷味都冇，但係嗰股豬腸應有嘅油香充足，而肥膏又唔多。口感彈牙軟糯，一圈圈層次特出。 5. 生腸 – SIZE大大件，完全冇染色，食落係冇味道，只係口感爽脆夾彈牙。 6. 牛筋腩 – 通常牛筋腩俾到我嘅概念牛腩同牛筋係個體分開嘅，但係呢度嘅牛筋腩將我一貫嘅概念完全打倒，係二合為一，牛筋腩係一層腩一層筋，兩層緊緊相扣，筷子夾上感覺實淨，但係食落牛腩部份淋而不散，牛筋淋得嚟仲好黏口，一啖牛筋腩多種口感，之後仲會有微微牛肉味係口腔徘徊。 不得不提個湯底，唔似一般車仔麵嘅湯有陣皂水味，而係雪白色，味道香濃得嚟清甜，忍唔住飲多幾啖湯先倒落個麵度。加咗落啲有醬汁嘅麵度，溝勻後色澤有所改變，但係冇影響個湯嘅味道，反而加添一份野味。