最近去咗好耐冇食嘅炑八，估唔到宜家Menu豐富咗好多，食落都幾有驚喜！

☄️長牛舌
真係長到要企起身先夠高放落嚟，圍住爐邊燒啱啱好可以卷成一圈，食落有咬口，打卡一流！ ☄️外裙肉
肉質鬆軟，醃料嘅味道又唔會蓋過肉味，非常惹味！ ☄️香烤豬五花肉
五花肉豬味濃郁又唔會有豬嘅羶味，生菜包埋泡菜食就最啱啦！ ☄️韓國鰻魚 - 全份
如果你鍾意鰻魚一定要試下。份量足夠四個人食，燒之前店員會幫你更換新嘅燒烤鐵板，咁就唔驚燒到痴哂底啦！ ☄️海鮮煎蔥餅
煎餅外皮鬆脆，餡料十足！除咗海鮮之外仲有少少辣椒襯托，食落唔似一般海鮮煎餅咁單調！ ☄️韓國薄脆牛角酥甜品
牛角酥甜品嘅雪糕口感豐富，外面係普通嘅雲呢拿雪糕，食落順滑得嚟中間夾住少少嘅綿綿冰碎，加上薄脆牛角酥同士多啤梨做成餐嘅結尾，邪惡感十足啊！ 整體嚟講，食物味道同質素都唔錯，想方便就腳食韓燒嘅話不妨一試。

尖沙咀不嬲都唔少放工聚腳點，見到個名幾得意，今日就嚟咗試呢間雞煲火鍋專門店 - 香香宮煮。 ☄️昭陽公主椰子雞湯鍋 湯底好足料，滿滿一座椰子肉山，清新濃郁。雞肉同蜆肉都好嫩滑，蜆肉隻隻都乾淨冇沙，非常開胃。 ☄️艾莎公主牛肉寶盒 寶盒包括牛腱、安格斯牛柳粒、牛舌同美國雪花肥牛等唔同種類嘅牛肉。牛腱肉好彈牙同有肉味，安格斯牛柳粒口感爽口。 ☄️ 紫菜櫻花蝦豬肉丸 (四粒) 肉丸用咗3種材料製作，分別係紫菜、櫻花蝦、豬肉。紫菜嘅香氣同櫻花蝦嘅鮮味好夾，口感彈牙。 ☄️伊比利亞橡果豬 伊比利亞橡果豬肉肉質爽口同豬味濃郁！ ☄️香香宮煮響鈴拼盤 黃金即炸嘅響鈴同鹹蛋令到響鈴由外到內都係咁酥脆，表面薄薄一層嘅鹹蛋非常惹味 ☄️香香宮煮餃子拼盤四粒 餃子味道有4種，包括黑松露蟹、韭菜豬肉、龍蝦豚肉同蟹黃餃。黑松露餃子味親濃郁，龍蝦豚肉餃食落鮮味十足。 整體嚟講，食物味道同質素都唔錯，放工想同朋友Chill吓嘅話不妨一試。

今日入開屯門，同朋友諗住食少少嘢再食晚餐，就嚟試咗呢間位於屯門市廣場嘅牧羊少年咖啡館。
餐廳內環境唔錯，下午茶時間人數都唔算多，所以都有幸坐到窗邊嘅卡位可以慢慢CHILL吓。 ☄️黑松露海鹽薯條（$68）
薯條即炸呢點值得一讚，鹽嘅份量都足夠，加上黑松露醬，呢個價錢嚟講算係冇咩投訴。 ☄️天多利烤雞薄餅（$138）
Pizza整體嚟講正正常常，少少辣味幾開胃。不過粒蕃茄唔知點解超熱，食嗰陣要小心啲。 ☄️香蕉朱古力窩夫配HaagenDazs雪糕（$118）
兩球雪糕有得免費轉一球做HaagenDazs雪糕，份量足夠3個人分。 ☄️冰伯爵茶咖啡（$68）
第一啖飲落有啲似黑糖珍珠奶茶，奶同啡嘅比例，奶佔得比夠重，唔太好啡嘅朋友都飲得到！

海防道附近不嬲係一眾打工仔同遊客覓食嘅好去處。今日嚟到呢間晚市人氣都唔錯嘅打邊爐餐廳，試下佢哋嘅午餐如何。 ☄️川貝海底椰鱷魚湯 配 桃膠肉餅蒸飯套餐 （$78） 鱷魚湯飲落清甜，飲完都唔會好口渴。飲得出係真材實料。桃膠肉餅啱啱蒸起，食落唔會太咸，完住滿足到嗰種想食住家飯嘅感覺。 飯嘅份量都唔少，淨係想食飯或者飲湯嘅朋友可以單點蒸飯（$55）/燉湯（$68）。餐廳內位置都唔算少，喺附近返工嘅朋友趁住天氣仲涼涼哋不妨試下！

今日介紹嘅係位於荃灣西嘅燒肉店 - 牛繁 我地叫左Set A 超值二人套餐（$568） 二人套餐非常豐富又抵食，份量岩岩好夠兩個人食。 ☄️蔥燒中落牛肋肉 ☄️木屐骨間牛肋肉 ☄️特上牛胸腹肉 ☄️ 上級和牛腹肉 ☄️ 薄切肩胛片（月見汁） 牛肉新鮮，油脂分布平均，就咁燒唔點調味料都好好食，有牛味之餘，口感入口即溶。 有醃製過嘅牛肉都好出色，醬汁又唔好覆蓋牛本身嘅肉味，相輔相成。 ☄️ 櫻姬腿胸肉 雞肉唔韌，好嫩滑 ☄️蔥燒！新瀉雞皮 （$38） 另外我地額外叫左份雞皮，燒完脆卜卜又非常香口，再配埋檸檬汁有少少酸，十分開胃 總括而言，牛繁唔止抵食，環境都寬敞舒適，值得一試。

今日趁天氣仲涼涼哋就嚟咗油庥地試呢間開咗好耐嘅 四季煲仔飯
未夠7點去到已經坐咗八成人，煲仔飯款式都唔少，但除咗煲仔飯之外，現場亦都不乏叫炸蠔餅嘅客人。

☄️臘腸滑雞飯 （$86）
雞肉雖然唔會太多，做唔到啖啖肉嘅感覺。之不過肉身嫰滑，加埋惹味嘅臘腸同飯焦，難怪咁多人食！ ☄️鴨蛋蠔餅 - 細 （$72）
雖然叫咗細份，但份量都唔少。蠔肉數量唔多唔少，炸粉味道都唔錯，算係幾出色！ 現場本地客同遊客人數都唔少，食完出去已經排滿哂人，唔想等位嘅朋友可能要早少少到啦！

☄️豬護心肉（$158）
豬護心肉食落有啲似腎，但係就有啖啖肉嘅感覺！☄️牛舌（$158）
牛舌味道正常，薄切易入口。☄️真雪花牛肉 & 喜來韓豚五花肉（$228 & $180）
牛五花同豬五花，脂肪同肉質嘅比例啱啱好，有油脂味得嚟又不失咬口。
豬五花醬汁入味，唔點醬都夠哂味！☄️ 喜來烤肉（$158）
喜來烤肉嘅醃味都好恰到好處，又唔會蓋過肉嘅味道。☄️ 水冷麵（$95）
麵質彈牙份量夠哂多，嚟緊夏天就啱哂啦！佢地嘅抽風系統良好，到繁忙時間坐滿人都唔會好大油煙。店員定時更換鐵板同埋提供消臭劑，確保大家食得盡興又唔會成身臭賓賓！
總括而言，喜來希肉唔止好食，環境都好舒適，值得一試。

大滾友花膠雞湯鍋好足料，花膠彈牙！
雞煮到八成熟，只需要滾三分鐘就食得，肉質嫩滑雞味濃郁。
豉油配料拼盤款式繁多，仲附送拍青瓜小食。響鈴拼盤有兩種款式，即炸黃金響鈴表面有一層咸蛋黃，鬆脆唔油膩！傳統嘅響鈴放入湯浸完都唔會淋哂，值得一讚！
牛肉拼盤有嚼勁，越咬越有牛味。
伊比利亞橡果豬，肉質同脂肪比例都啱啱好，筋位爽口。
蔬菜拼盤包括蓮藕、粟米、金菇、生菜、油麥菜等多種蔬菜，一次過滿足哂鍾意食菜嘅你！
總括而言，大滾友嘅牛豬雞都好高水準，環境舒適，絕對值得一試。

☄️ 花膠雞湯鍋 - 半隻（$328） ☄️滾友牛肉拼盤 - 細 （$428）
☄️ 手打鵝肝墨汁墨魚丸($72) ☄️ 伊比利亞橡果豬（$228） ☄️ 大滾友雜菜拼盤（$118） ☄️ 大滾友響鈴拼盤（$88） ☄️ 竹蔗茅根/一渣（78）

最近成日都心思思想去日本，見到幾抵食，所以就試咗呢間喺康城嘅日式燒肉店午餐，順便止止我屋企長老嘅旅行癮！

☄️Suki燒定食（$98）
壽喜燒雜菜鍋裡面超足料，有冬菇、金菇、娃娃菜、菠菜同煎豆腐！豆腐煎過之後冇咁易散，我完全唔記得咗佢，留到最後食都仲係完整一舊！肉方面係日本牛胸腹肉，食落有咬口得嚟又唔會靭。秋冬季節食完暖笠笠就啱哂啦！ ☄️牛之味定食（$118）
除咗枱面上嘅調味料，燒肉定食隨餐跟三種醬，包括鹽醬、生蒜同泡菜醬。三款都非常惹味，同燒肉超夾！燒肉定食有牛板肩同牛胸腹兩種肉。牛板肩油脂分佈明顯，相反牛胸腹就比較平均同有咬口。但兩款都幾重牛味！ 兩款定食都包有麵豉湯、沙律、中華沙律、飯同飲品。麵豉湯亦配料十足，入面有幾隻蜆仔！當日仲有埋甜品雙色日式蕨餅。一款係原味黃豆粉，另一款係抹茶粉。食落唔會太甜，抹茶味又解到油脂！飲品除咗汽水之外，仲有舖頭自家嘅樽裝冷泡茶，飲唔哂都可以拎走慢慢飲！ 總括嚟講，$100左右有咁嘅份量，個人嚟講真係十分抵食！嚟開康城嘅朋友不妨去試下！

有時食完晚飯想喺旺角搵個位食糖水都唔係咁易，咁啱比我哋喺花園街搵到呢間手搖店竟然有芋圓做配料，即刻忍唔住買咗杯嚟試！ ☄️芒椰小丸子（$40）
最頂嗰層係芒果沙冰，下面喺滿滿嘅小丸子。小丸子煙靭得嚟又唔會咬唔爛，啜一啖就有齊沙冰椰汁同小丸子啱哂我呢啲又鍾意食又懶嘅人。

☄️芋圓烏龍鮮奶茶（$33）
芋圓有橙、紫兩隻色，食落大細啱啱好啱會撠住飲管。烏龍奶茶飲落茶味比較重，飲落幾順滑唔會太甜！

☄️草莓の奶（$38）
舖頭所有奶類飲品都用咗鮮奶製造，飲落鮮奶味好出，同草莓超夾！ 飲品包埋綁咗繩嘅杯套，啱哂鍾意一路行一路飲嘅人。當日我哋撞正紅雨，就算擔住遮都唔會太論盡，超感激舖頭有呢個杯套！