Cordis酒店旗下餐廳Alibi聯乘Valrhona推出朱古力下午茶，依個百年法國品牌被譽為朱古力界Hermès🌟成日都喺甜品見到用咗佢嘅朱古力，超受烘焙師歡迎！今次難得有機會，一次過享受依個朱古力盛宴😍🍫仲會每人一盒Valrhona朱古力俾你帶走！ —— 𝑺𝒂𝒗𝒐𝒖𝒓𝒚 煙鴨胸鵝肝芭菲卷 手捕帶子他他 香辣爆谷雞粒 粟米意大利飯波配朱古力咖喱醬 鹹點嘅款式幾特別，喺平時tea set比較少見﹐由其鐘意個鵝肝卷！配搭櫻桃醬又幾夾；帶子他他加上飛魚籽更添鮮味。鹹點整體唔錯👍🏻 —— 𝑺𝒘𝒆𝒆𝒕 瓜納哈70%黑朱古力撻 歐帕莉絲33%白朱古力, 開心果泡芙 吉瓦那40%牛奶朱古力, 威廉斯梨軟凍 加勒比66%朱古力腰果蛋糕 單一產地黑朱古力英式鬆餅 熱肉桂朱古力特飲 甜點完全滿足到朱古力控嘅胃口！超有心機用上品牌各款朱古力，食到不同可可口味，善用混合水果、堅果入甜點，將可可味帶出新嘅感覺；威廉斯梨軟凍幾有驚喜，清新濃厚嘅配搭。熱朱古力加上玉桂倍添香味，口感絲滑 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 Alibi – Wine Dine Be Social (旺角) 旺角上海街555號香港康得思酒店5樓

原來銅鑼灣donki 對面有間坐得咁舒服嘅餐廳，木系裝潢，加上簡潔嘅裝飾營造出寧靜嘅氣氛。經過就比門口吸引，超有回到日本嘅感覺！Pancake Senmon主打無麩質班戟及多款輕食，班戟選擇款款心動好難揀啊😍 —— 松露香燒帶子意粉 $138 主食包括餐湯及茶，帶子保有海鮮嘅鮮甜加微微焦香，咬落柔軟嫩滑；意大利麵口感煮得啱啱好彈牙掛汁，松露香氣濃郁 —— 和栗班戟 Montblanc $158 成餐最期待依個！Montblanc可以自由選擇班戟同雪糕嘅味道，今次揀左原味班戟同焙茶雪糕都好夾。定價唔平但食得出真材實料，內餡有大量栗子蓉，外層栗子泥絲滑細膩，豐潤又保有濃郁栗子香氣，絕對唔係一個hea過只有甜味嘅栗子montblanc，喺香港食到真係有濃郁栗子味嘅甜品好難得🥹 —— 貓貓朱古力 $56 用左真朱古力唔係朱古力粉！仲要整成貓貓造型超有心思😍臨近新年佢都戴上舞獅頭超可愛！牛奶煲熱即時沖到朱古力融化，溫暖柔滑，散發濃郁可可味🍫 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 Pancake 專門 (銅鑼灣) 銅鑼灣百德新街57號海華大廈地下B號舖

🔸新年團年食咩好？🔸 又到新年，又開始諗去邊到啱一家大細食飯？樂天除左傳統中菜，晚市仲有好多人氣點心，最出名就係小籠包😋料理精緻，環境舒服，同長輩後生一齊食都一定好滿意😎 —— 烤麩 $58 烤麩鬆軟，吸滿哂醬汁，甜甜鹹鹹幾好味，食完真係打開咗嗰個胃咁，做前菜啱晒 —— 蘿蔔絲酥餅 $48 肉眼都見到炸得好有層次，外脆內軟，酥皮輕盈又唔油膩，蘿蔔絲帶有自然清甜，切得好幼，口感細膩 —— 蔥油餅 $40 外層金黃酥香，內餡塞滿晒蔥，鬆軟細緻，啖啖都有蔥嘅鮮香味 —— 李白醉雞 $88 酒味濃郁，每件雞都可以食到酒嘅香味，雞皮爽彈，肉質滑嫩。可以另加$10轉雞脾✅ —— 皇朝小籠包 $142 餐廳招牌必試！每款食落都成功還原到個口味，仲會教你跟住順序由淡食到濃，比較特別嘅係鵝肝同芝士，同小籠包一齊又幾夾🤣唔會太濃味，每粒都充滿肉汁，好鮮甜 —— 重慶水煮魚片 $208 色香味俱全！鮮嫩魚肉配上辣椒同各種香料調味，底下仲有大量薯粉芽菜木耳，超惹味😋辣度可自選，唔食得辣嘅人都可以食到小辣👍🏻 —— 皇朝擔擔拉麵 $68 湯底好香花生味，撈底仲會見到唔少花生粒，辣到似譚仔5少辣😂但嗰種辣係食完好快過，好過癮；拉麵有嚼勁掛湯👍🏻 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍 樂天皇朝 (#銅鑼灣) 波斯富街99號利舞臺廣場6樓

如何忍住不咬一口小甜點🍓 長洲特色cafe有好多，今次黎到依間離碼頭20分鐘距離，但都有唔少人去朝聖，就係為左個招牌水果蛋捲！最多人食嘅係蜜柑口味，可惜今次晏左去賣哂，但試左其他甜點都好好味！ ⚠️留意翻一星期只有四至六營業⚠️ —— 日本士多啤梨乳酪卷蛋 $65 整個粉粉嫩嫩加上日本士多啤梨，真係完美篤中少女心💗打卡又靚又好食，蛋糕濕潤有空氣感，乳酪內餡好有驚喜！比一般忌廉更加輕盈，質感細滑，同水果蛋糕十分夾👍🏻士多啤梨用左日本嘅果然都好甜😋 —— 栗子巴斯克芝士蛋糕 $60 估唔到咁濃栗子味！！！未食栗子蓉，淨係食芝士蛋糕本身已經好香栗子味，內層軟心，栗子蓉綿密香甜，係香港真係難得食到咁好味嘅栗子甜點😍 Drinks: —— Cappuccino —— 日本手打抹茶 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 Heima Heima (#長洲) 長洲贊端路25號地舖

🔸得獎拉花舒適cafe🔸 去親cafe遇上靚嘅拉花都會特別開心，Pause It已經有幾年參加latte art比賽嘅經驗，仲有唔錯嘅成績，唔少人去打卡佢杯咖啡，定期有不同拉花款式，今次終於可以一見佢嘅真身🤣 —— 科布沙律 $68 滿滿一盤沙律好大份，超多蔬菜，全部都好新鮮爽脆錦加蕃茄、雞肉粒、牛油果、粟米等，連沙律醬汁食幾惹味 —— 黑椒牛肉多士 $84 見到隻燶邊太陽蛋隻眼已經發晒光🤩食落嗰邊好香口，我自己就鍾意篤穿隻蛋黃，啲蛋汁流喺啲牛肉同多士一齊食仲好味!!! 本身仲連埋超多薯條，超豐富！ —— 溏心蛋牛油果多士伴鷹嘴豆泥 $98 十分鐘意依個配搭！比起一般牛油果多士，多咗鷹嘴豆，口感同味道都多咗層次，豆味本身清清同牛油果好夾，同埋兩者都係切到粒狀，食落好和諧，好似融為一體咁 —— 黑芝麻Latte $40 唔啱咖啡，叫其他味道都可以有拉花✅黑芝麻味超香濃，濃到諗起啲黑芝麻醬咁。拉花就係大笨象，整體造型都好似樣，圖案設計複雜，每部分嘅落點都好準👍🏻 —— 伯爵茶朱古力 $48 朱古力味為主﹐伯爵茶味做配角，質感順滑 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 Pause It (#炮台山) 電氣道183號友邦廣場地下18號舖

大角咀嘅Lost Stars開業以黎大受歡迎，今次踩到黎港島開酒吧餐廳，氣氛輕鬆好chill，以黑膠唱片做主題，懷舊又時尚，定期會有唔同駐場DJ，享受美食同時聽下歌放鬆下😎

—— 黑松露薯條 $148
幼薯條好食香口，金黃脆身，可惜黑松露唔係好痴得上啲薯條，好多時都係食緊普通薯條咁😂另外有巴馬臣芝士可以點黎食

—— 慢煮法國鴨腿 $298
鴨腿幾大隻，外皮薄脆，肉質經慢煮鮮嫩多汁，味道濃郁鹹香；合桃沙律仲大份🤣用左18個月意大利黑醋汁，加上無花果同埋蜜柑，清新解膩

—— 炙燒松葉蟹膏帶子意大利飯 $298
依款係聖誕限定🎄希望之後變常規！除左松葉蟹膏，仲有澳洲海膽同北海道剌身帶子；啖啖risotto充滿蟹膏香氣，帶子厚嫩鮮美，超豐富嘅配搭！

—— 黑松露牛肝菌意大利雲吞 $198
雲吞包裹著豐潤牛肝菌餡料，雲吞皮Q彈滑嫩，牛肝菌加上黑松露味道偏濃，食多幾粒會比較heavy，適合幾人share

—— 冰釀氣泡法式伯爵花茶 $98

🌟推薦指數：8/10
▫️▫️▫️▫️▫️▫️▫️▫️▫️▫️▫️▫️▫️
📍 Mercury Recalls by Lost Stars (銅鑼灣)

經過歌賦街就會望到好大幅寶藍色外牆，真係好搶眼啊！其實係間西班牙菜餐廳，環境光亮舒適，情侶或者朋友聚會都好啱。難得除夕嘅時候book到食晚餐，當日仲有tasting menu，菜單好有誠意，總共試到7款菜式，整個晚餐食完都好滿意🥰 🔸🔸🔸🔸🔸🔸🔸🔸🔸🔸🔸🔸 𝑺𝒕𝒂𝒓𝒕𝒆𝒓 -Chef’s Rusa -Tuna Tartare -Ham Croquettes -Padrón Peppers 前菜已經好豐富，每人都試到4款tapas！除左西班牙菜常見嘅火腿可樂餅同青椒，幾特別嘅有薯仔沙律同三文魚子配餅乾；另外吞拿魚他他每個都成座山咁，一口成啖都係吞拿魚鮮味 🔸🔸🔸🔸🔸🔸🔸🔸🔸🔸🔸🔸 𝑴𝒂𝒊𝒏 Lobster Rice (Special offer) 本身tasting menu個主菜係紅蝦飯﹐超幸運餐廳話可以免費升級做龍蝦飯或Rib eye，咁就選擇左前者😋一上枱就俾成大隻龍蝦驚訝左🤣底層完全係龍蝦嘅濃縮精華咁！！啲飯吸哂啲龍蝦汁﹐蝦肉鮮美彈牙，超多肉食，食左依個成個tasting menu都變到好抵食🤣 🔸🔸🔸🔸🔸🔸🔸🔸🔸🔸🔸🔸 𝑫𝒆𝒔𝒔𝒆𝒓𝒕 -Flan de Nata -Cheesecake 甜品都可以一次試齊2款！焦糖布甸口感滑順，加入大量雲呢拿籽，充滿蛋香同焦糖嘅香甜味；巴斯克蛋糕質地綿密，多左啲莓醬平衡芝士膩感，食到微焦香味 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 Chueca (中環) 中環歌賦街8號地舖

嗰日天氣幾凍，鋪頭外面到都有成串人排隊，就係為左碗雞湯米線，依到特色係每碗都有個爐熱住，包你食到尾都仲㷫恰恰🔥 —— 招牌花膠雞米線 $78 （轉脾另加$10) 見個湯咁金黃都知正野！湯底雞味好出，連埋啲雞油味道更加出色，加左花膠飲落就再濃稠啲唔係水滴滴，用火一路煮越煲越好味😋雞件份量唔少，轉左雞髀肉質好嫩，花膠夠哂淋，都有3-4塊﹐成碗米線勁足料 —— 椰子雞米線 $60 依個湯底更清甜﹐一路飲完仲想飲😂當飲湯都覺得好好味！今次冇轉雞髀就俾左啲雞胸肉，不過都唔係好柴，仲留有雞味 —— 金磚豆腐 $42 同酒樓嗰啲有得揮😋即叫即炸，粒粒上粉好均勻，炸皮夠薄又好脆，豆腐超嫩滑﹐下次再去都一定encore！ 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍 癡膠雞 (灣仔) 灣仔軒尼詩道254號地舖

長洲美食多到數唔哂，今次介紹依間餃子冰室好受歡迎，亦係我再次回訪👍🏻餃子多達9款口味，煎餃蒸餃樣樣齊，晏左去嘅部分口味已經售罄，想試記得早啲去喇！ —— 鹹蛋黃黃金餃 依款最多人食！鍾意鹹蛋黃嘅超推介一定要試！半煎炸餃皮好脆，外層沾咗大量鹹蛋黃醬，肉眼都見到大大粒鹹蛋黃，邪惡十足😍餃子皮好薄，一咬爆汁，餡料滿滿 —— 蔥爆牛肉餃 牛肉味超濃！！！一食成股牛味湧入黎咁，同樣爆汁好juicy！葱味都唔輸蝕，成個餡好惹味，整體都好好食 —— 荷葉津白餃 估唔到蒸餃都係咁好食😋比煎餃更加食到餃皮薄滑，但夾起一啲都唔會穿，荷葉香氣滲入餃皮，津白肉餡鮮嫩香甜，津白切到一定大細，留有清爽口感 —— 酸辣湯 湯嘅調味偏辣有啲剌激感，酸味就後面滲出黎，幾足料有豐富木耳絲，邊飲湯邊多左份口感，幾開胃 —— 雞絲粉皮 粉皮份量好多，中規中矩，麻醬一啲都唔孤寒，夠哂撈均全碗 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍餃子冰室 (長洲) 長洲大新海傍路86號地舖

12月就係俾自己藉口放肆食嘅時候😎今年聖誕嚟咗Cantina，依個環境可以讚十萬次﹐太靚喇😍😍😍餐廳行歐洲風路線，空間感十足，置身喺大館毫無違和感。 餐廳整體料理都係著重帶出食材本身嘅味道，再加創意調味畫龍點睛，完全唔會覺得過鹹或太重味。服務水準都一流，食完每個course都會換碟，無論環境食物服務都媲美得上酒店級👍🏻 𝑺𝒕𝒂𝒓𝒕𝒆𝒓 前菜已經好有驚喜!!! 唔係平均水準，食完仲想再食🤣最鐘意薄切紅蝦，充滿膠質，蝦味濃郁，而且唔洗剝殼，啖啖肉食好方便😋另外值得一讚吞拿魚醬小牛肉，牛肉本身肉味好出色，醬汁調味啱啱好唔會蓋過前者，整體平衡得好好 —— 薄切西西里紅蝦配黑魚子及開心果 —— 小八爪魚配豌豆及辣蕃茄醬 —— 意式吞拿魚醬小牛肉 —— 炸蝦，魷魚及西蘭花苗配烤蒜蛋黃醬 𝑷𝒂𝒔𝒕𝒂 蜆肉意粉每啖都滲透鮮味，蜆肉幾大隻處理乾淨，成碟就係蜆肉嘅精華咁😋燒豬肉貝殼粉好惹味!!! 巨量燒豬肉撈埋貝殼粉食好好味，貝殼粉口感煙煙韌韌👍🏻平時都好驚啲意大利雲吞好膩，今次依個完全冇問題，size比一般細粒，比起超濃忌廉醬汁係用湯汁浸住，係輕盈版嘅意大利雲吞，值得一試🌟 —— 蜆肉意大利扁意粉配烏魚子 —— 燒豬肉貝殼粉配意式牛肉茴香香腸 —— 意式牛肉及豬肉意大利雲吞 (🎄限定) 𝑴𝒂𝒊𝒏 咁多main之中呢兩份比較特別係二人用。海鱸魚會係餐桌前再用火燒，然後原條起肉，好鍾意香草油醋，做到提鮮嘅效果同魚肉好夾，肉質嫩滑👍🏻炸牛小排就反而係今餐唯一冇特別推薦嘅菜式，size大到兩個男人先食得晒，食落好似日本吉列炸豬扒嘅薄身版，唔係好食到牛味，亦都冇任何醬汁，只有檸檬汁可以額外加就咁齋食，有啲單調同埋唔知自己食緊豬定牛😂 —— 鹽焗海鱸魚配西西里燉菜及香草油醋 —— 意式炸牛小排配海鹽迷迭香 𝑫𝒆𝒔𝒔𝒆𝒓𝒕 呢度嘅Tiramisu好特別!!會由Server係餐桌面前製作，可以睇晒成個過程🤩生日嘅話，當然唔少得會寫上祝福。Tiramisu嘅芝士層幼滑到好似忌廉咁，好流心，一食落口就溶化晒；面層嘅咖啡粉有微苦嘅可可味，想食甜品絕對推薦tiramisu👍🏻 —— 開心果Tiramisu —— 經典Tiramisu 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍 Cantina (#中環) 中環荷李活道10號大館1座1樓