Donki後面都收埋咗唔少餐廳，經過見依間門口幾有特色，藍白異國風裝飾，原來係食西班牙菜，又中咗我鐘意嘅就去試下🤣 —— 西班牙火腿炸丸子 $50 外皮炸得乾脆，一咬就食到火腿嘅鹹香，入面係滿滿嘅薯蓉忌廉餡，好幼滑好食！ —— 西班牙蕃茄多士 $55 表面鋪滿蕃茄蓉，多士偏薄，脆得黎麵包外層有啲硬身 —— 大蝦紅辣椒薯仔蛋餅 $110 蛋餅質感柔軟，唔太油膩，值得加錢有埋大蝦，個醬汁好惹味，蝦味本身都好濃 —— 香煎鱸魚 $160 魚皮煎得香脆金黃，鱸魚好有鮮味，配烤紅椒堅果醬幾夾，加添風味又唔會搶味 —— 傳統墨汁香辣魷魚焗飯 $250 墨魚汁飯幾濃郁，但魷魚炸得唔太靚，有啲炸皮甩甩地同偏油，整體不過不失 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 Calle Ocho (銅鑼灣) 加寧街8號Fashion Walk 地下K號舖

品香樓除左係附近大學生嘅聚腳點，仲有超多屋邨住客捧場，開業多年仍然人氣不減，有多款港式鑊氣小炒，啱哂成班人聚會夠哂熱鬧！ —— 風沙雞 (半隻) $155 必叫！炸得超靚金黃色，外皮好酥脆，雞皮真係好好好好食，啲脂肪炸到出哂油，濃郁鹹香，大量炸蒜灑上去一齊食，超正！ —— 火焰蜜椒牛柳粒 $123 上枱仲著緊火，好keep到熱辣辣🔥牛柳粒軟腍，有大量三色椒同薯仔，醬汁甜中帶辣，黑椒味出哂黎，好食！ —— 啫啫通菜煲 $98 份量十足！通菜炒得鮮嫩唔黃，口感清脆，好惹味！ —— 七味椒鹽豆腐 $88 豆腐好滑好柔軟，外皮炸得乾身香脆，完美包裹每舊豆腐，仲要大大粒，普通椒鹽調味已經食到停唔到口😂 —— 回鍋豬頸肉 $88 濕炒薄片豬頸肉，香辣辛香，嫩滑入味，不過食到後面略為有啲油膩 —— 凍朱古力 $28 名物之一！幾乎每枱必點！朱古力味濃郁，加埋忌廉更滑，唔會太甜 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 品香樓中西風味餐廳 (石硤尾) 南山村南山商場平台204-5及210-13號舖

自從JOMO進駐太古，無論想食正餐、甜品、飲咖啡都諗起佢💕新店一貫簡約純色設計，提供一系列嘅輕食，少糖少油少鹽，健康又好味真係好難抗拒🤣 —— Oreo Basque Cheesecake $55 好濃郁嘅芝士味！中間特別軟心處理，口感超幼滑，入口即溶！甜度啱啱好，Oreo同芝士係絕配，仲會咬到啲餅碎，食哂成件都唔覺膩 —— Black Sesame Chiffon Cake $55 戚風蛋糕採用全天然食材，麵粉同雞蛋產地都黎自日本，仲選用低糖配方，質感好輕盈鬆軟，空氣感滿滿，咬落濕潤，芝麻味夠哂濃！ —— Dirty $40 咖啡同牛奶相互融合好和諧，容易入口，一啖飲到濃烈咖啡味，又會同時有微凍嘅牛奶衝擊住，好豐富嘅味道又攞到個平衡 —— Piccolo Latte $32 入口柔滑，奶泡比例完美，品嚐到濃郁咖啡味之餘，仲會滲出啲奶香味 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍 JOMO Kitchen & Health Hub (太古） 太裕路安盛臺地下501A號舖

成日去銅鑼灣都唔知有依間樓上嘅Cafe，原來就喺馳名嘅麻糬波波店附近，鬧市一上條樓梯就去咗第二個空間咁，復古暗黑設計，牆上仲有惡搞塗鴉；佢嘅lunch set CP值超高，旺區咁嘅價錢包埋餐湯同飲品，食得過！ —— 蒜香煙三文魚雜菇炒意粉 $88 呢款意粉蒜蓉味超香超濃郁！炒到條條都沾滿蒜蓉，愛蒜人士必叫！配埋雜菌正啊👍🏻 —— 慢煮雞胸配南瓜意大利飯 $78 雞胸經過慢煮處理，肉質嫩滑，份量好多；意大利飯口感煮得啱啱好，南瓜汁香甜creamy —— 蜜糖單骨雞翼 +$38 炸得好好，金黃香口，皮脆肉嫩！單骨食起黎又方便，鹹香之上加埋蜜糖仲好味😋 —— 黑松露醬薯條 +$38 薯條即叫即炸熱辣辣，酥脆粗身，食到停唔到口😂沾埋個醬好濃黑松露味！ —— 豆腐花焙茶Latte $38 幾特別﹐有茶味得黎又有少少豆腐味，毫無違和感 —— Yuzu U $38 混合菠蘿、橙同柚子味，諗住會清新啲但飲落比較甜 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 悉尼樂園 (銅鑼灣) 銅鑼灣邊寧頓街9-11號登龍閣2樓A室

前身coffeeology結業嗰陣好傷心，大愛佢個芝士蛋糕！！！好彩係銅鑼灣重開，仲多咗甜點款式，增加鹹食，地方更闊落舒服🫶🏻 —— Carbonara $112 金黃蛋黃超吸精！特別用左日本雞蛋更香蛋味！同醬汁撈均好惹味，質地濃稠，粗管粉彈牙掛汁，beacon微微鹹香 —— Matcha Cheesecake $58 舊店嘅時候已經好鐘意食！味道質感都同以前相若，抹茶味好濃郁回甘，芝士部分超creamy，絲滑輕盈 —— New York Cheesecake $58 完全唔覺得膩嘅芝士蛋糕！比一般紐約芝士蛋糕口感更柔軟，一啲都唔實，芝士味比另外嘅芝士蛋糕更濃，餅底充滿焦糖味 —— Tiramisu $52 比起芝士蛋糕，tiramisu相對普通，酒味同咖啡味唔太出，芝士入口即融，唔會過甜，濕潤到啱啱好 🌟推薦指數：9/10 ▫️▫️▫️▫️▫️▫️▫️▫️▫️▫️▫️▫️▫️ 📍 Caflex by the coffeeology (銅鑼灣) 銅鑼灣勿地臣街15A號地舖

又想食雞煲？又想食放題？依到幫到哂你！行入去好似去翻80年代香港🇭🇰裝修佈置充滿懷舊風，火鍋最多人叫招牌沙嗲湯底，有超過80款配料，包你食到夠😎 —— 經理套餐 $328 全店總共3個套餐，主要分別喺牛肉種類，今次就係揀咗最平依款，有牛板腱、封門柳同黑毛豬，牛肉兩款都係手切，最鍾意牛板腱，脂肪唔係好重，但肉味比平時放題食嗰啲更加燶，肉質有彈性偏嫩，就算係最平呢個餐都覺得好OK！對牛肉有更高要求，可以揀其他套餐另外有安格斯同牛小排 一開始先上椒鹽燒賣同鹽酥雞，包你全程唔會冇野食😂鹽酥雞又真係唔係hea幾好味！之後再上麻辣雞煲，好有誠意有大量豬皮豆卜索吓汁，如果個麻辣再出啲就更好；食到差唔多就會轉火鍋，沙嗲牛湯好香濃，質地上就唔係好杰身嗰種。配料超齊，基本上你諗到平時邊爐食嘅都會有！最後仲送埋仙草甜品，飽到捧住個肚出黎😂 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 火水爐冰室火鍋 (旺角) 旺角煙廠街33號朗廷軒1樓

🔸嚴選茶葉 細味純茶🔸 存在與茶主打頂級茶飲 對茶葉質素要求甚高 仲連續兩年被勞斯萊斯選做送禮🌟 難得係K11開店 提供多款無糖純茶 可以即場欣賞沖泡過程 絕對係愛茶者必試！ —— 月光美人 $78 店員泡茶後會先倒入茶杯 俾客人細嚐一口 再繼續泡茶 依款白茶散發白蘭花香氣 幽香醇厚 淡淡回甘🍃 後續滲出大豆及菜蜜餘韻 每啖飲完嘅清香一直圍繞口中 價錢就當然唔平 但茶葉質量一飲就知 絕對係一分錢一分貨 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 存在與茶 (尖沙咀) 尖沙咀梳士巴利道18號維港文化匯K11 Musea 2樓LA202號舖

永共嚐係Bar Pacific嘅合作店，夜晚經過你可能唔認得佢，因為佢朝早係社企cafe，夜晚就變翻酒吧🎇佢地好支持聯合國永續發展目標，例如幫年青咖啡師創業同家庭主婦創造收入來源、宣傳環保意識、回收咖啡渣，定期舉辦各種工作坊✨就算食飯都可以有選擇，幫到地球社區🌱 —— 慢煮紐西蘭牛柳 $118 依個價錢食到慢煮牛柳真係幾抵，粉嫩柔軟，鎖住肉汁，配紅酒洋蔥汁好夾。每份仲連薯蓉及白汁蘑菇長通粉，份量十足 —— 慢煮美國豬柳 $108 豬柳厚切得黎咬薄都係好淋，香草調味帶出肉香，特別鐘意個白酒橙汁醬，橙嘅果香減低豬柳本身嘅飽滯感。除左薯蓉，仲試咗即將推出嘅南瓜蟹肉意粉，超多蟹肉，南瓜汁好creamy!!!! —— 元素咖啡 原｜赤 $60 元素咖啡係依間餐廳嘅特色咖啡！由健康角度出發，選擇合適嘅咖啡豆組合，我依款就有助降血脂😎味道上偏柔和，好易入口，酸度適中微澀 —— Nut Latte $58 奶味香濃綿密，口感醇厚，伴隨堅果香味同飲埋面上啲堅果碎，好飲！ 💫💫 消費三次可獲得環保文青咖啡杯，由 35%的咖啡渣及穀物製成，BPA Free ，遇熱都唔會產生有害氣體🌱 🌟推薦指數：8/10 ▫️▫️▫️▫️▫️▫️▫️▫️▫️▫️▫️▫️▫️ 📍 永共嚐 (西營盤) 德輔道西60-64號西城六十地舖

真材實料！就係我咁鐘意依間茶飲店嘅原因！茶久嘅飲品都係用左原茶葉泡製，嗰種茶香一飲就知係有分別，芳香清醇，絕對係平時少見嘅高質茶飲店👍🏻 —— 海鹽鴨屎香奶茶 $29 店舖招牌！必點！ 嚴選純牛奶調製，口感格外絲滑 加上海鹽神奇地激似飲緊奶蓋😍 甜鹹嘅比例令人上哂癮﹐超好味 每啖飲完留有回甘茶香餘韻 另加5蚊配寒天波波，細細粒好煙韌！ —— 蜜桃爆檸冰茶 $34 蜜桃味自然清新 加入原片檸檬微酸開胃 果茶都附有馬蹄爆珠﹐十分罕有！ 咬爆入面係粒馬蹄肉，爽爽哋又幾夾 配料份量足足有成杯嘅三分一 設計特別用咗透明易拉罐，打卡超靚😍 ▫️▫️▫️▫️▫️▫️▫️▫️▫️▫️▫️▫️▫️ 🌟推薦指數：10/10‼️ 📍茶久 (紅磡) 紅磡必嘉街103-105號寶石戲院大廈B座地下L號舖

Casamigos位於商廈入面，銅鑼灣地鐵站一出過馬路就到，超方便！搭𨋢一開門就即刻感受到酒吧餐廳嘅氣氛，仲有室外位置佈滿燈飾。食物質素超水準，小食主食甜品都咁正！店員服務都好細心👍🏻絕對會回訪❤️ —— 西班牙薯仔蛋餅 $98 蛋餅好有驚喜！！！唔怪得知每枱都叫咁滯，係我食過最好食嘅蛋餅！蛋餅成個脹卜卜，一切開原來入面好有層次，每層夾雜炒過嘅洋蔥同火腿十分香，蛋味好香又鬆軟﹐沾埋面上嘅沙律醬仲好味！ —— 西班牙乳豬 1/4 $398 乳豬起肉起得好準確，留翻哂最嫩肉嘅位置，乳豬皮超香口，唔會覺得好硬，連埋皮下油脂食好香好邪惡啊！！嗰種油酥味真係冇得彈！特調蒜蓉醬汁同乳豬超夾，4個人叫1/4分量都好足，每人2-3塊啱啱好唔會太膩。本身想叫半隻，店員超好溫馨提示翻個份量，如果唔係飽到食完豬就走人🤣 —— 西班牙海鮮飯 $298 海鮮飯配料超豐富，有兩大隻蝦、青口同蜆，全部都好鮮味，由其是蝦肉爽彈；飯粒好有嚼口，越食越滋味 —— 巴斯克芝士蛋糕 $98 蛋糕中間流心㗎！！！一食好較滑，芝士味出哂黎好濃郁，成個蛋糕都好輕盈，甜度perfect，食哂都唔覺膩，餐廳做到咁嘅質素嘅甜品絕對超水準！！ —— 紅絲絨油條 $88 Churros炸得出色！！淨係表面嗰層好脆，入面好軟熟，幾特別係油條用咗紅絲絨，士多啤梨朱古力醬平衡得好好，係好啱沾churros嘅醬，全部一齊食都唔會覺得過甜 🌟推薦指數：10/10‼️ ▫️▫️▫️▫️▫️▫️▫️▫️▫️▫️▫️▫️▫️ 📍 Casamigos (銅鑼灣) 銅鑼灣駱克道487-489號駱克駅3樓