今日同朋友嚟到話要天后一間好傳統嘅餐廳，餐廳已經開業30幾年，一直熱賣牛舌，深受街坊歡迎！ 厚燒牛舌飯 $158 牛舌一黎到就散發一陣香味，燒完嘅表面有微微嘅焦脆感，牛舌本身味道好濃厚，加上黑椒同鹽嘅調味，令味道更加升華。而且唔驚會食都好濟，因為飯上面有好多酸酸甜甜嘅紅薑可以作解膩用途，配住飯食都非常不錯。套餐仲有沙律作為開胃菜，而且仲有麵豉湯，非常滿足！ 吉列豬排定食 $148 吉列豬排外皮炸得好脆，肉質軟霖而且肥瘦均勻，充滿油香同埋肉味都好夠。再點上隔離嘅醬汁或沙律醬，有開胃的感覺，味道都好夾！套餐仲有中華沙律同好足料嘅麵豉湯。麵豉湯入面有菇同大大件蘿蔔，味道濃郁，十分滿足！ 炸雞軟骨 $90 小食方面，我哋叫咗個炸物。雞軟骨即炸，好香，好脆。軟骨好脆，點埋沙律醬食簡直一流。 巨蜂梳打 $23 呢杯飲品好夠氣，有甜甜地嘅葡萄味，食完野飲有refreshing嘅感覺。仲有佢好大杯，可以一路食一路飲到尾。 青檸梳打 $23 青檸梳打好fresh，有青檸嘅酸味同香味，亦唔會太甜，好清新！

今日同朋友嚟到位於觀塘嘅Nata西餐廳，前排見到好多人推薦！其實我已經食過一次，上一次食已經覺得好高質，今次決定帶埋朋友過嚟試吓。今日夜晚嚟到，餐廳都好full，大家記得要book位。餐廳設有長枱，好適合一大班人嚟食飯！ 三色芝士焗帶子薯蓉 $78 薯蓉賣相好吸引！表面佈滿芝士，而且芝士烤到金黃色。芝士分量多，仲可以拉絲。薯蓉好creamy，已經壓到好滑。另外，帶子都有好多粒，口感非常好。 美國1855 安格斯肉眼 $283 肉眼會用鐵碟上，店員會幫忙點蠟燭，一直熱住個扒。我地交左三成熟，肉眼扒表面煎得好香，肉質就保留到軟嫩嘅質地。肉眼牛味好濃，好淋，又冇筋，輕輕點啲海鹽調味就足夠。 慢煮伊比利豬鞍（10pz）$198 豬鞍已切片，一樣地，豬鞍都會一直熱住。豬鞍一睇就睇到選肉用心，豬肉淋中帶嫩，肥瘦相間，食落又嫩又帶油脂感。醬料有燒汁、青醬同海鹽。 巴斯克芝士蛋糕 $48 巴斯克cheesecake好高質！Cheesecake中間呈流心狀態，好軟心，好少餐廳做到咁嘅texture! 蛋糕芝士味好濃，食落夠creamy。 新鮮芒果配原味麻糬梳乎厘班戟 $138 梳乎厘班戟都係必點，nata聯乘cobber cafe嘅熱賣甜品！梳乎厘班戟好fluffy，充滿空氣感同埋蛋香。麻糬煙煙韌韌。班戟仲配有新鮮芒果，芒果好甜。另外，仲有芒果醬同楓糖醬～我好鍾意有一個椰子味嘅忌廉，椰子味好濃郁，同芒果好夾！ Tiramisu Latte $45 Tiramisu latte比較甜，不過Tiramisu味好濃，直程飲緊Tiramisu甜品咁。 Green tea latte $42 綠茶鮮奶好清香。

Terrace in seaside (又一城)
地址: 九龍塘達之路80號又一城LG2樓LG2-26號舖
今日同朋友去咗又一城，經過Terrace in Seaside見到裝飾好靚就已經俾佢吸引咗，最後就同朋友入去食晚飯。 泡菜牛肉炒飯 呢度樣樣嘢都好大份，一定夠飽。泡菜同肉嘅份量都好多，牛肉充滿泡菜酸酸辣辣嘅味道，泡菜亦好爽口，加上一條條蛋，將佢哋撈埋一齊食好好味！ 山蓟菜大蜆意粉 意粉口感彈牙，醬汁味道好濃郁，每一啖都好Creamy，並且香氣十足。而且啲蜆隻隻都好大粒同埋好多，十分滿足！再加上表面嘅菜，令到食落冇咁膩，有清新口腔嘅感覺。 BBQ辣炒豬肋排 豬肋排味道好濃郁，醬汁完全滲透到肉裏面，而且配菜例如椰菜和蘿蔔絲都充滿香辣的味道，好惹味。隔離仲有啲生菜同埋紫蘇葉，可以包住豬肋排一齊食，減低油膩感，亦可以增加一啲爽脆嘅口感。 蜜糖無骨炸雞 炸雞外皮好脆，肉質嫩滑，淡淡都好Juicy! 再配上蜜糖嘅甜甜地嘅味道，味道配搭上好正，食到停唔到口。隔離仲有炸得好香脆嘅薯條。上面有少少紫菜，而且仲有兩款醬汁分別係茄汁同埋千島醬可以點黎食，整體非常良好。 柑橘布甸 布甸晶瑩剔透，裏邊仲有兩片好Juicy的柑橘，播啲味道甜甜地，作為飯後甜品好適合。隔離仲有兩片超級甜嘅柑橘，同埋cream可以一齊食！ 西柚戀曲氣泡梳打 裏面有西柚同檸檬，味道好清新！而且充滿氣，飲落好爽，同埋可以解油膩感。 咸咸地奶油維也納咖啡 咖啡上面有一層好厚嘅cream ，陪住咖啡一齊飲好夾，少少苦澀感又帶啲甜甜地鹹鹹地的味道，味道好豐富。

今日晏晝係尖沙咀附近做嘢，放lunch嗰陣同事介紹左我嚟柯士甸路附近食lunch! 餐廳位置較隱蔽，要留心啲搵到。今日lunch time嚟到啲set多好抵食，支持！餐廳裝修好有日本風格，牆畫好靚。 牛肉壽喜燒 $68 午市套餐送配珍珠米飯同味噌湯，而且免加一，好抵食！壽喜燒賣相好好，面頭有隻生蛋黃。依款壽喜燒味道偏鹹，唔同出面嘅偏甜啲，我覺得咁樣反而冇咁膩。牛肉分量好多，吸滿壽喜燒汁，味道香濃。珍珠米粒粒爆滿，黏黏地～ 天井漢堡扒 $98 漢堡扒即叫即煎，香噴噴。漢堡扒好juicy，肉味香濃，仲充滿油香。醬汁鹹鹹地，作點調味，唔會cover 漢堡扒嘅味道。伴碟仲有粟米同西蘭花。 加配是日甜品 +$5 今日供應芒果大福，大福外皮煙韌，雪糕creamy~ 可口可樂 +$8 是日果味冰紅茶 +$8 今日供應桃味🍑冰紅茶，好fresh，好清爽。

今日同男朋友一齊嚟到銅鑼灣食fine dining，餐廳就係time square付附近，好容易搵。餐廳位置唔大，專做幾枱客，食物少量咁預備同烹調，特別新鮮同高質，大家嚟記得book位！餐廳氣氛浪漫，燈飾昏暗，枱面更設有蠟燭，好有格調，適合情侶約會。餐廳只有一個Set，$928一位。 首先，嚟嘅係一籃香草麵包同芝士片。麵包烤得表面香脆、內裏保持面保濕潤而鬆軟嘅質感。香草麵包同普通餐包比更香口。另外，配有餐廳自家製嘅南瓜奶油醬、香草茄子醬，當然仲有醋同橄欖油。 STARTER 香煎法國鵪鶉配鴨肝脆雲吞 法國鵪鶉size較細，所以肉質食落特別幼嫩，鵪鶉外皮好薄，煎到好香脆，鵪鶉肉好話好juicy，帶點油香。另外再有脆雲吞，雲吞好脆，食落好重菇菌味。底下廚師擺放左青蘋果沙律，食落好fresh，可解膩。 SOUP 法式龍蝦湯 龍蝦湯好香好濃郁，飲落好有厚度，龍蝦味好鮮甜好突出，裏面仲要唔少龍蝦肉，彈牙又美味。 ENTREE 黃金焗帝王蟹腳 黃金焗蟹腳係指用上左鹹蛋黃，焗帝王蟹腳表面好脆，好似有啲面包糠咁。帝王蟹腳啖啖肉，好鮮甜，有海水味。以鹹蛋黃作調味好特別，更多一層香味。 果味雪葩 下一道菜係荔枝味雪芭，店員解釋係希望食客品嚐main dish前清新下口腔。荔枝味雪芭好fresh，質地輕盈。 MAIN 燴澳洲和牛牛面頰 Main方面都有好多選擇，例如有魚、羊架、肉眼扒等等。我就俾燴澳洲和牛牛面頰吸引左。和牛牛面頰大大份，一切落去有驚喜，非常軟淋，所有肉同筋都煮都好淋而且好入味，食落黏黏地，好好味！ 茶 差唔多嚟到尾聲，店員為我地遞上茉莉花茶。茉莉花茶味道清香，可解膩。 DESSERT Dessert of the day 甜品都有兩款，今日供應栗子並肩同埋朱古力mouse，我揀咗海鹽焦糖朱古力mouse。mouse朱古力味好濃郁，好似食緊朱古力醬咁。表面有燒過嘅棉花糖，仲有朱古力脆片，口感獨特美味。 除咗呢一款甜品，餐廳仲要提供左榛子朱古力、伯爵茶Macaron、熱情果朱古力。 Signature Cocktail Tiramisu Martini $108 呢杯飲落比較甜，同食緊Tiramisu差唔多，好容易入口。

已經有一排冇食燒味，但係偶然都會掛住嗰陣味道！今日經朋友介紹嚟咗深水埗嘅棋子燒鵝，品嚐佢哋嘅美食。棋子燒鵝主打燒味，可以配飯、瀨粉、米線等煮食。而且仲有常餐、下午茶供應，選擇非常豐富。今日嚟到就梗係要主要試吓佢哋嘅燒味啦！廚房有大型玻璃窗，可以見到立立令嘅燒鵝，肥美嘅叉燒等等。 燒鵝髀飯 $108 一嚟到嗰陣有驚喜，燒鵝鵝髀勁大隻！燒鵝味道非常正，有濃濃嘅炭燒味，非常特別、好味。燒鵝髀肉質鮮嫩，充滿鵝油香，鵝肉非常香滑美味。而且鵝肉非常多汁，好Juicy，鵝味滲透飯粒，令個飯都更加之好味。另外，伴碟仲跟咗啲蔬菜～ 例牌叉燒 $88 另外，我同朋友都試咗佢哋嘅招牌叉燒。叉燒半肥瘦，質感非常好。叉燒肉質鬆化同軟腍。肥膏位充滿油脂感，香噴噴。另外，叉燒佈滿蜜汁，甜甜地，表面燒得朝朝地，帶點脆身，非常美味。 凍奶茶 +$7 跟餐凍飲熱飲都係加$10。凍奶茶茶底香濃，茶同奶嘅比例剛剛好。 凍檸茶 +$7 凍檸茶有好多片檸檬！紅茶茶底本來都已經調配得好好。

Yadllie Plate 야들리애플래이트 (兆萬中心)
地址: 旺角西洋菜南街1N號兆萬中心11樓
今日帶朋友嚟咗一間我好鍾意嘅韓國餐廳食晚飯，餐廳喺兆萬中心11樓。平日過嚟餐廳都好受歡迎，大家記得book位！Yadllie Plate 食物選擇豐富，有炸雞、年糕、仲有牛扒添，啱晒一大班朋友一齊過嚟食。 蜜味乳酪粉無骨雞 $128 我哋嗌咗份小份嘅炸雞。炸雞即叫即炸，非常香脆，雞肉又滑又Juicy。面頭佈滿咗芝士粉，甜甜地，好惹味。除咗炸雞之外，底下仲有大量蕃薯條，蕃薯條好脆好甜，比一般薯條冇咁膩。 八爪魚煎餅 $128 煎餅必叫，每次嚟我都一定會食。煎餅啱啱煎完外表好脆，而且好香。煎餅裏面有好多八爪魚粒，非常足料，仲有唔少香蔥，所以食落特別香。另外仲有兩款醬，分別係韓式醬油同埋韓式辣醬，點埋一齊食味道更加豐富。 玫瑰牛肉炒年糕 $128 依款年糕一啲都唔辣，反而比較Creamy，同出邊食嘅唔同。醬汁好Creamy，有濃濃嘅芝士味，表面仲有一層芝士碎，所以有拉絲效果！年糕有條狀同片狀嘅，兩款都好煙靭。另外，牛肉份量都好多，調味好好。 海鹽焦糖沙冰 $68 沙冰超大杯，好爽，飲得出有啲鹹味！而且面頭也會一層忌廉，甜絲絲。 藍橙荔枝梳打 $48 荔枝梳打好夠氣，荔枝味都好出。 蜜瓜雪冰 $88 最後我哋仲食咗個冰，啲冰好綿密，而且有淡淡蜜瓜味。除咗有一條蜜瓜雪條，仲有好多球蜜瓜果肉！

最近天氣又凍咗，我同朋友約咗佢打邊爐！講開打邊爐，我哋多數都食牛大人，因為除咗火鍋之外，仲有好多台式熟食可以食，美味又豐富，非常推薦！今日晚餐就去咗旺角瓊華中心品嚐牛大人台灣火鍋，我哋叫咗極上和牛吃到飽套餐，每位$328。 湯底選擇眾多，我哋揀咗阿嬤養生濃湯鍋，裏面有好多菜、養生材料、桃膠、大骨頭等等，清清地，飲落好滋潤。 澳洲和牛M5牛肩卷 澳洲和牛比較多油脂，所以食到比較滑身，肉質都好軟腍。另外，澳洲和牛油脂分布平均，唔會太過膩。 美國SRF極黑牛肩胛肉眼 肉眼片就牛肉味濃啲，因為肉嘅部份比較多。 牛柳粒 牛柳粒一口size，非常容易進食，食落去唔會韌，而且肉味濃。 澳洲M9和牛牛丸 和牛牛丸十分推薦，好好味！牛丸充滿濃汁，好彈牙！ 黑松露海鮮漿 煮熟後好彈牙，黑松露味濃郁，味道好鮮甜🤩。 沙白 沙白大大粒，脹卜卜，好新鮮，食落好鮮甜，一啲沙都冇。 海蝦 海蝦新鮮，又大隻，肉質彈牙。 梅甘酥脆薯 最鍾意依款小食！番薯即叫即炸，外脆內軟，外皮薄薄一層，脆卜卜。再加上酸酸甜甜嘅酸梅粉，非常夾。 鹽酥雞 鹽酥雞都係即叫即炸，熱辣辣。外皮香脆，雞肉juicy！ 最後餐廳會附送甜品，大家可以揀台式甜品或者雪糕。仙草凍有花生、紅豆、椰果、黑糖珍珠豆腐花同仙草，有好多料，口感豐富。 冬瓜茶 冬瓜茶好甜而不膩，好解渴，啱晒打邊爐飲。

今日朋友生日，知佢鍾意食關西風嘅壽喜燒，我揀咗間位於觀塘嘅餐廳同佢慶祝！餐廳位於駱駝漆大廈，位置容易搵。餐廳環境舒適，枱與枱之間有距離。喰楽晚市主打關西風壽喜燒套餐，店員會全程幫手烹調，簡直係五星級享受！餐廳一共提供三個套餐，唔同套餐提供唔同級別嘅肉類，今日我同朋友就食咗一個A餐、一個B餐（日本赤身和牛、日本霜降和牛套餐）。我幾鍾意餐廳呢種做法，唔使個個嚟到都要嗌一樣嘅套餐。 餐廳供應嘅茶幾特別，有陣陣白桃味，可以解膩。 前菜 首先，一坐低店員就提供前菜，分別有廣島蠔、和牛薯餅同吞拿魚刺身壽司。廣島蠔好大隻，好新鮮，食落去脹卜卜、好Creamy。和牛薯餅非常脆，牛肉味好香，薯仔好滑身，點埋沙律醬非常美味。吞拿魚刺身壽司都好新鮮，吞拿魚蓉配上魚籽嘅配搭非常好。 套餐B為日本霜降和牛套餐，含4~5個不同部份，每位$498。霜降A5和牛油花分布明顯，油份比較多，食落非常軟滑，肉質幼嫩，入口即溶，配搭住壽喜燒甜甜地嘅醬汁非常好口味。肩里脊肉都係比較多油脂，食落都比較滑身。另外，餐廳為每人附日本產雞蛋，點埋一齊食之後肉類更加滑。之後就係肩胛心同牛肩胛，呢兩款肉類肉味較濃郁，肉嘅部份比較多，啱晒鍾意肉味濃嘅朋友仔～ 野菜拼盤 蔬菜拼盤選擇豐富，有娃娃菜、洋蔥、冬菇、蓮藕、芋絲、豆腐、菇類等等。洋蔥、菇類同娃娃菜好吸汁，蔬菜一直係鍋入面煮，吸滿晒壽喜燒甜甜地嘅味，非常美味。店員仲會為我哋配搭唔同蔬菜同肉類～ kuuraku 特式飯點 去到尾聲仲有個炒飯！店員會將壽喜燒汁、飯、和牛粒、雞蛋同蔥一齊炒，炒飯比較濕身，甜甜地，幾特別。 是日甜品 Daily Dessert 甜品係火炙豆腐雪糕，食落唔會好甜，好Creamy，豆腐味好濃！

觀塘一向都有好多新餐廳，但係好多都係樓上店，所以我平時都唔太覺有咁多好餐廳！最近的朋友推介嚟咗位於國基集團中心嘅NATA，餐廳主要供應西餐例如係牛扒、意粉等等嘅美食。更特別嘅係NATA同好出名嘅cobber coffee crossover，可以嗌堤cobber疏乎厘pancake同埋意粉嘅選擇。 美國1855 安格斯肉眼 $283 首先主菜食咗NATA主打嘅牛扒，佢哋提供安格斯肉眼扒，我哋叫咗五成熟。牛扒表面燒過，五成熟剛剛好，牛扒肉質好軟腍，好Juicy，再帶一點肥膏位，充滿油脂感，好好味！表面有蒜片，另外仲有鹽同兩款醬料好似係燒汁俾我哋點。 Cobber意粉 $96 之後仲叫咗個cobber主打嘅意粉！意粉煮得剛剛好，醬汁係蕃茄味。醬汁甜甜地，有好多蕃茄蓉。我哋嗌咗小辣，所以更惹味！意粉仲有好多大蝦，蝦肉好彈牙爽口。 南瓜湯 $58 南瓜湯熱辣辣，好Creamy，有好多泡泡喺面頭！飲落忌廉味好重，再淡出濃濃嘅南瓜味。 薯條 $68 薯條好大盤，份量十足！餐廳供應有薯條，食落更加脆，新鮮即炸，外脆內軟。我哋再加配咗黑松露醬，更香口美味。 榛子朱古力焦糖香蕉梳乎厘班戟（2件） $95 既然餐廳聯盛cobber，咁一定要食埋個梳乎厘pancake先！大家記住返製作時間需要30分鐘到～ Pancake有兩片，好軟身，充滿蛋香。榛子朱古力醬好滑，比較杰身，味道濃郁，面頭仲有幾粒榛子！焦糖香蕉嘅焦糖薄薄一片，同香蕉好夾。 綠茶忌廉碎冰 $48 綠茶冰唔會太甜，綠茶味好清幽，面頭仲有忌廉😋。 鮮奶伯爵茶（熱） $42 伯爵茶鮮奶茶味香濃，加咗牛奶之後更為清甜。