今日行街經過見到KFC門口拉咗呢個海報！ OMG又係我最期待嘅優惠桶餐啦 因為耐不耐就有鋪癮 好想食煎炸嘢或者好想食甜嘢 最近就係好想食煎炸嘢啦！ 今日瞓醒覺趕住出門口咩都冇食 直至到差不多，下晝兩三點先有時間 一個人叫左$50/6件雞桶餐 另外加咗杯凍檸茶 坐低堂食慢慢嘆 雖然都好多人 見到好多公公婆婆同埋學生都叫呢個餐 但係上餐速度都好快 俾完錢都唔使3分鐘就已經拎到個餐啦 皮脆肉嫩又多肉汁 見到呢個紙杯蓋就知道KFC已經實行走塑啦 所以而家去到KFC都冇膠手套派啦 唯有用多幾張紙巾抹手，或者直接去洗手啦

今日接近中午時段，嚟到呢間譚仔 可能未去到午市最旺嘅時間 店舖入邊人都唔係好多 快快脆搵到個位 之後見到枱面已經有點餐紙 自己掃code落單 因為瞓醒覺冇耐 想食個早午餐唔係太肚餓 少少哋叫咗兩個小食 分別叫咗一個大嘅紅油青瓜同埋一個蒜椒雞腳筋 以我平時一向食開 清湯同埋10小辣嘅人嚟講 呢兩個辣度可接受 佢嘅紅油青瓜，青瓜爽口清甜 面頭有啲芫荽 唔鍾意食芫荽嘅朋友 可以喺落單嘅時候揀走芫荽 雞腳筋爽脆 有好多粒粒辣椒絲蔥碎蒜粒 少少麻少少辣，香口惹味～

今日收到屋企人嘅指示 臨急臨忙要買個蛋糕 佢哋嘅要求係話簡簡單單唔使花巧 最緊要清新好味 收到呢個指令 我第一時間諗到嘅就係買芝士蛋糕 嚟咗美心買咗「澳洲軟芝士蛋糕」 呢個size夠三至四個人食 佢雖然唔係好似疏乎厘咁軟熟 但係反而咬落有啲口感 聞落去好香 食落去有浸好濃嘅芝士味 $42呢個價錢絕對物超所值 其實買嗰陣見到 佢哋仲有一個焗疏乎厘輕芝士蛋糕配水果 但係屋企人要求要最簡單嘅款式， 同埋唔需要有生果 所以最終冇買到 但係下次可以一試 嗰個都係細細地唔到一磅 又係啱晒人少少輕食蛋糕嘅話最佳選擇

今日過開嚟金鐘做facial 早左到所以喺附近行吓街 口痕想搵啲甜嘢食吓 就過咗嚟呢度睇啦 本身俾佢嘅曲奇同埋小蛋糕吸引咗過嚟 後尾睇多兩睇先發現原來佢有好多味嘅芝士蛋糕 總共有六隻味: 原味焦香芝士蛋糕 焙茶焦香芝士蛋糕 抹茶焦香芝士蛋糕 斑蘭焦香芝士蛋糕 70%特濃黑朱古力焦香芝士蛋糕 柚子焦香芝士蛋糕 我自己個人嚟講， 最鍾意食原味同埋斑斕 原味食得出嗰個芝士濃香 斑斕嘅話好清新 可以一件件咁樣單買 亦都可以原個咁訂蛋糕 同埋問咗職員唔止櫥窗見到嘅size 可以WhatsApp佢哋 詢問價錢同埋蛋糕有冇其他尺寸 如果要訂蛋糕嘅話，提早兩日就可以㗎啦

週末長假期入嚟長洲逛一逛 留港消費，當自己去咗旅行 今日同屋企人嚟長洲行吓休息吓 當然唔少得就係要食嘢掃街啦 嚟到長洲必須一定要食超巨大魚蛋 離遠已經見到好多人排隊，排晒長龍 呢一間店唔止有巨大魚蛋仲有兩三款丸類 但係我同屋企人第一時間都係買超巨大魚蛋 佢哋嘅魚蛋好彈牙 一串有兩粒，每一粒個size大概好似一個小朋友嘅拳頭仔咁大😂😂 買咗兩三串食，老闆同我哋講每日限定數量 賣晒就收工㗎啦 佢哋每日大概下晝四五點就收工 所以大家如果要嚟食嘅話盡早啦～

今日喺附近做嘢 未到晚飯時間下午茶時段有少少肚餓 走咗入嚟KFC食個下午茶餐 叫左個x8三件炸雞套餐， 再追加咗兩隻巴辣香雞翼 可能因為呢個時段人流唔係好多 非常容易搵位，而且上餐速度好快 啱啱落單，等咗3分鐘都唔使立即執好咗個餐 拎返埋位慢慢食，所有雞都係啱啱炸起 外皮非常之脆，但入邊仍然好滑而且充滿肉汁 見到佢哋最近搞緊優惠 下載佢哋KFC個Apps 填埋資料做埋會員，即時送你一件雞 可以留意住每個月嘅優惠 兼且每次有新嘅產品推出都會即時收到通知 有着數嘅嘢我所即時下載咗

我個人好鍾意食甜嘢 就算唔係睇戲， 成日耐不耐就心思思會去買爆谷食 有時經過戲院會特登入去買一桶爆谷 自從Garrett popcorn開咗之後就多咗選擇啦 以前成日都會去元朗或者太古買 而家比較多去觀塘APM 佢哋嘅爆谷真係一絕 而我個人特別鍾意朱古力味同埋焦糖味 每一粒爆谷都被焦糖包住 甜甜脆脆，唔覺唔覺又食咗好多啦😂 今次因為同朋友有party慶祝 預先同佢哋訂購左超大桶嘅friend tin 真係睇見都開心 佢哋耐不耐都會有啲優惠 或者期間限定嘅口味 鍾意食嘅爆谷嘅朋友絕對唔可以錯過

話說lady M呢間千層蛋糕店由佢啱啱嚟香港 俾人講到佢好誇張 仲好記得頭一兩次幫襯佢舖頭排晒長龍 嗰陣仲心諗有冇咁誇張呀🧐 但係食過就知簡單 喺出邊都有join話啲蛋糕製作工作坊 啲老師都有同我哋講， 其實Lady M每一層都整得咁平均 其實係好難嘅手工野 試過喺佢哋舖頭問，佢哋嘅員工講 唔係機做個個蛋糕都係人手做，所以製作需時 之前都係外賣，或者堂食咁樣買一兩件返屋企 點知阿哥食過好鍾意 自此佢生日我就會預先喺網上訂蛋糕 先預訂再喺相關日子，同時間去返 你所揀選嘅店舖取貨超方便 每一層都好平均，好有口感 個個cream淡淡甜味 就算男仔都好鍾意食 之後身邊有人生日都keep住有買 超好味呀🤤 佢喺唔同時間都會有啲期間限定 記得之前佢有伯爵茶、有玫瑰 但係屋企人都係鍾情原味

對上一次幫襯妹記大排檔 已經係幾年前嘅事啦， 當時仲喺另外一個地址 今次有朋友喺外國返嚟 佢話好想食大排檔，但係又唔想熱辣辣 所以我哋今次就揀咗嚟食妹記啦 我哋一行五人有男有女 總共叫咗八個餸 全部都即叫即做好有鑊氣 有啲嘢食仲要一嚟到即刻掛住食 相都唔記得影㖭 黃金蝦球好好味 蠔餅炸得嚟完全唔油膩 吊燒雞皮脆肉嫩 椒鹽墨魚嘴辣味爽口 沙嗲牛肉煲牛肉非常嫩滑入味 扇貝 蟶子 海鮮類別都好新鮮 食咗咁多濃味嘢， 叫返個西蘭花帶子清一清個口 最後埋單落樓$1300 唔錯唔錯，都幾滿意

難得有幾日紅日假期 留港周圍逛吓，西貢一日遊 喺香港做吓遊客留港消費～ 揸車入到嚟西貢，泊低咗架車之後 第一站即刻要嚟呢間西貢咖啡餅店 次次嚟到都係坐低食， 但係今次想望住個海食 所以就決定外賣拎走 今次我哋嗌咗鮮牛油菠蘿包同埋葡撻 本身個菠蘿包夾住一塊好厚嘅鮮牛油㗎 但係因為個菠蘿包啱啱做起出爐 新鮮滾熱辣 我哋拎住行去海邊跟住碼頭位置 行得嚟個牛油都溶左大半啦 下次都係買完要即刻食🥲 食唔到佢最好味嘅一刻添 食完菠蘿油食埋個葡撻 葡撻唔太甜，但好香蛋味而且酥皮鬆脆 嚟得西貢一定要食