平時經過荃灣見到呢間豚道樂都好想試下，但見位比較少，夜晚多數要等，難得今次終於試到！見到佢地有個只係周末先有海老湯拉麵，所以就特地點呢個試下😛 湯底十分濃郁同鮮甜，唔會太鹹。我揀左曲拉麵，麵條要左特硬，麵質彈牙又煙韌，而且盡吸惹味蝦湯嘅濃香。櫻花蝦咬落仍然脆卜卜，口感層次一流，豚肉肥瘦適中。推介😛😛 仲有值得一讚嘅係店員會主動幫手斟水，又會介紹拉麵比我地，服務態度唔錯，而且上菜都好快👍🏿👍🏿

特意揀左一個星期五黎mini friday食晚飯。本身係openrice book左位，但下晝miss左店員既confirmation call同埋voice message, 所以佢當cancel booking, 星期五晚座無虛席，無book位基本上好難有位，但好彩店員幫我地安排，等左一陣就有位😛😛 所以記住book左位要留意住有冇missed call, 如果唔係就要再排過架喇。 餐前小食：墨西哥脆片 餐前小食係墨西哥脆片，份量都唔小，而且炸得非常香脆，即使放左一段時間仍然脆卜卜。食落似係脆嘅酥皮，唔會話只係食到炸粉嘅味道，加上千島醬就好惹味。 西式爐端燒烤：安格斯牛柳肉 店員見到火熄左會定時過黎點番著個火，等我地可以keep住燒肉。安格斯牛柳肉質鮮嫩，我地燒至七八成熟左右先食，醃料加上牛肉食落不但香口，而且非常juicy!! 白松露法國野菌溫泉蛋意大利飯 好香松露味道，將溫泉蛋輕輕拮破之後，將蛋汁撈係飯度，唔會過於濕潤，飯粒仍然有咬口。 香草白酒煮活蜆 極推介呢味白酒煮蜆!! 每隻蜆殼入面都有蜆肉，唔係果d呃人淨係得個殼冇蜆肉果種。而且每粒蜆肉非常鮮味非常飽滿，配上白酒後將海鮮嘅腥味都辟左，仲帶有一種鹹香，好食到停唔到。 星期五甜品碟 星期五甜品碟有三款甜品，包括焦糖布甸，macaron同埋tiramisu。焦糖布甸表面脆脆嘅嘅焦糖同布甸嘅軟綿配合得啱啱好；而macaron對我黎講有d過甜；tiramisu就係用杯裝住，幾有特色，一開始都睇唔出佢係tiramisu，creamy嘅蛋糕帶有淡淡嘅酒香，糅合埋可可粉同表面嘅麵包粒，層次十分豐富。

見帝都酒店出左個tea set，就約左朋友黎試下。兩個人食388蚊加一，平均一人200零蚊，性價比都ok。 下午茶有鹹點，甜點同埋兩杯野飲，先講下鹹點~ 香燒帶子伴藜麥餅係我嘅最愛，藜麥餅唔會油膩，而且帶子燒得幾香；而煙三文魚黑麥多士嘅煙三文魚都幾新鮮，黑麥多士就有咬口得黎帶少少甜，同煙三文魚嘅鹹香夾得剛剛好。 沙葛蟹肉脆卷十分之爽脆香口，係另一樣我最鍾意嘅鹹點；香蒜玫瑰蝦都幾爽口，但其實唔係好食得出玫瑰嘅味道；牛油果蕃薯塔有豐富牛油果味道，蕃薯亦十分軟綿綿；煙鴨胸芝士蛋卷嘅外層有d似印度薄餅咁，而鴨胸、芝士同蛋呢個配搭都飽肚；小金菊檸檬撻嘅金菊有股微苦嘅味道，但檸檬撻嘅酸甜又可以中和番金菊嘅苦，係一個有創意同幾balance嘅配搭! 不過鹹點食物嘅溫度唔算熱，只係微暖，如果下次可以更加熱辣辣咁上碟就好了。 玫瑰蘋果酥好搶眼，酥皮夠薄，加上香脆蘋果片，甜度適中；薰衣草藍莓芝士蛋糕芝士味道濃郁，但又唔算好漏，配上酸酸甜甜嘅藍莓，係一個輕盈又迷你嘅甜點；而迷迭香意式奶凍就幾香幾滑。 玫瑰香檳啫喱係另外上嘅，造型真係無得彈，做到好似杯香檳咁，好有心思，食落嘅層次同口感都幾豐富。 英式鬆餅伴玫瑰草莓果醬同忌廉芝士係一個比較大路嘅甜點，鬆餅焗落都幾鬆化。 兩杯野飲方面，可以揀熱玫瑰熱情果蜜桃茶或者凍蔓越莓梳打。我就飲左熱飲，熱玫瑰熱情果蜜桃茶酸酸甜甜，可以中和食物嘅飽滯感。但由於環境都幾凍幾大風，熱飲放係個壺入面好快吹到凍哂，如果可以比個細細嘅燭台溫熱住杯野飲會更好，反正黎食tea嘅人都會坐一段時間先走，野飲凍哂就無咁好飲。

終於食到B仔涼粉! 人人都話黎元朗一定要食B仔，雖然近年都聽到d人話覺得呢間野嘅野食言過其實，不過都係想試下! 元朗呢間B仔比我想像中大好多，入面有好多位，雖然星期六嘅下午都有好多人，不過好彩唔使等位。 黎得緊係要叫碗B仔涼粉試下啦。開頭見到81蚊都嚇一嚇，但睇番佢個size又真係好大碗下，最好係同班friend黎share，一個人食真係會太多。呢碗B仔涼粉堆滿左啫喱、蒟蒻同埋各式各樣嘅水果，包括桃、西瓜、哈蜜瓜、蜜瓜、菠蘿、龍眼、荔枝、香蕉、木瓜、奇異果，而涼粉就沉左底，要食左面嘅生果先會食到涼粉，仲有一碗椰汁可以按自己喜好加入。其實成個感覺就好似食緊雜果宴，感覺係幾健康，但涼粉就好似變左配角咁。 另外仲叫左腸粉，正常味道，無話特別好食/唔好食。

本身因為太遲打黎book，所以無位，不過店員話可以留電話，如果有位會再通知，點知第二日就打黎話有位，真係好好彩😛 如果想食就記住一定要book左位先，星期五晚walk in有位嘅機會真係好低，一路食一路見住唔少客人都摸門釘。 hami harmony係間好文青feel 嘅一間餐廳，無論係裝修定音樂，都比人一種好溫暖好舒服嘅感覺。我地咁啱坐到卡位，有cushion可以墊下條腰，又可以安靜同朋友傾下計。 日本帶子黑松露雜菌意大利飯 帶子好鮮甜，不過只有兩大粒，如果帶子份量多d會更好。risotto整體不錯，十分creamy，飯粒唔會太硬，仲有大量雜菌同芝士，而且黑松露味好香濃。 北海道軟殼蟹黑松露意大利粉 叫左第二道主菜都係有黑松露，軟殼蟹炸得香脆，咬落十分煙韌，意粉同軟殼蟹嘅味道十分配合，相輔相乘。 甜品方面本身最想食蛋白脆餅，可惜當晚無哂😢 於是轉左叫tiramisu, 幼滑嘅忌廉加上蛋糕作餅底，好味🤩 朋友就叫左伯爵紅茶法式焦糖燉蛋，呢款甜品外暖內熱，表面嘅焦糖口感好脆，而內裏嘅燉蛋就充滿蛋香👍🏽 食完甜品抖左陣，再叫左macaron食🤤 如果本身叫左甜品嘅話，可以加38蚊食兩粒macaron。今晚店員就比左玫瑰同埋玫瑰香檳味我地，macaron偏硬身，帶有淡淡玫瑰花香。另外見到呢度menu寫住仲有十粒裝macaron賣，下次有機會一定買番屋企食🤩🤤 值得一讚嘅係呢度嘅店員非常有禮貌，非常nice，服務態度好好👍🏽👍🏽 會再幫襯🤩🤩

其實本身當日係想去H8棟樓嘅其他餐廳食，但因為去到已經下晝2點幾，有d餐廳只係營業到3點，為免食到好趕，就同朋友去其他樓層睇下，而呢間Espuma咁啱有下午茶serve，限時1.5小時，於是我地就入左去試下。 見到個menu覺得呢個下午茶都幾得意，同一般sell高貴/high class嘅下午茶唔同，呢間以魚、蝦、蟹為主題，食材亦都係以魚蝦蟹為主，鹹點甜點一應俱全，價錢又唔貴(兩位$258再加一)，重點係環境寧靜又坐得舒服，好啱同friend靜靜地係度spend一個下晝。今次仲咁啱分到窗邊位，可以望到厚福街添~ 呢個tea set嘅擺盤真係好有趣，將D食物放係在轉盤上面， 可以同friend輪流轉動揀野食，方便大家拎想食嘅野。 先講鹹點啦，鹹點方面有吉列蟹棒、牛油果蝦多士卷、黑椒雞粒伴約瑟布甸、冬瓜蘑菇紅菜頭撻。 蟹棒炸粉唔會太厚，脆脆地嘅外層包住蟹柳，香口之餘，食完唔會覺得好油膩。 個人係超鍾意食蝦多士!! 蝦肉彈牙新鮮，炸粉同樣唔會太厚，配上牛油果味道一流。另外黑椒雞粒伴約瑟布甸係個幾新鮮嘅配搭，黑椒雞粒微辣，幾惹味，放係焗香左嘅麵包布甸上面，麵包外脆內軟，食落好有層次。 冬瓜蘑菇紅菜頭撻雖然聽落有d九唔搭八，但原來冬瓜、蘑菇同紅菜頭呢三種食材又可以係出奇地夾，呢個一口撻脆卜卜，份量拿挰得剛剛好。 而甜點方面就有葫蘆蝶豆花鬆餅，蟹仔紫菜蛋糕、杏仁豆腐錦鯉、鮮果雪糕漢堡、蘋果金寶。 從外表睇覺得呢個藍藍地色嘅鬆餅係藍莓鬆餅，後尾睇番先知係叫葫蘆蝶豆花鬆餅。鬆餅外脆內軟，充滿蛋香，可以點jam或者忌廉食。 題外話，第一眼見到個jam以為係茄汁哈哈。 蟹仔紫菜蛋糕真係有隻細細嘅蟹仔放係上面，好搶眼。其實唔係好食得出紫菜味，但可以當佢係牛油蛋糕果種質地咁食。 杏仁豆腐錦鯉真係幾趣緻，實際上佢係一個鯉魚造型嘅杏仁豆腐奶凍，甜度剛剛好，非常滑溜。另外一開頭以為奶凍上面係xo醬，後尾食落先知係桂花，哈哈~ 第一眼睇以為個鮮果雪糕漢堡中間夾住嘅係肉，但仔細d留意就會發現中間係朱古力味雪糕黎! 店員上碟時亦都建議盡快食漢堡，因為雪糕會好快溶。漢堡入面仲有士多啤梨同奇異果片，配上雪糕感覺幾refreshing。 蘋果金寶係忌廉加鹹蛋黃加蘋果粒，玉桂味非常香濃。 擺盤正中間嘅骰仔係用白朱古力做，偏甜同埋微硬，但幾有特色，無骰仔就唔似賭錢架喇。 套餐本身包左兩杯基本飲品，可以揀咖啡、伯爵茶、綠茶、紅茶等等，亦都可以加$15升級做其他飲料，我就加左杯熱蜜桃柚子茉莉茶。而呢杯茶係有燭台溫熱住杯野飲，非常貼心，咁樣無論幾時飲都係暖笠笠；而且可以見到杯入面有真蜜桃粒，倒茶出黎嘅時候桃味超級香濃，甜度適中。 總體黎講真係好欣賞呢個tea set，菜式好有特色好有創意，玩味十足又非常引人入勝；食材上有好多令人意想不到嘅配搭，但食落嘅味道又係出奇地夾；加上性價比又高，強力推薦!

係旺角街頭隨意行，見到有間韓國野就決定試下。一入去發覺成間餐廳燈光都幾昏暗下，不過呢度播kpop都勁大聲。 伴餐 都係韓式餐廳一般會提供嘅伴餐: 泡菜、青瓜、芽菜同埋粉絲。推介呢味醃青瓜，混雜左酸、甜同辣味，幾開胃。另外芽菜都會推介，幾爽口幾清甜，食完d辣野可以食啖芽菜中和番。 傳統石頭鍋飯 (烤肉) 65 上碟時充滿鍋氣，標哂煙，熱辣辣，呢個石頭鍋飯仲有生雞蛋同埋其他蔬菜配料可以拌飯，配上韓式辣醬就更加惹味。石鍋底仲有一層薄薄地嘅飯焦，卜卜脆好有口感，鍾意食飯焦嘅人一定會好開心haha。 鐵板燒黑椒栗米肥牛 66 上枱時有沙沙聲，肥牛香氣四溢，仲有隻半流心嘅荷包蛋添！ 蘿蔔蔥餅45 薄餅外層微脆，夾雜住蘿蔔絲同埋蔥絲，但個人覺得蘿蔔味唔算突出 ，同埋覺得食落有少少油膩。 韓國柚子蜜 柚子蜜清甜潤喉，唔係死甜，唔錯。食完辣野叫杯甜甜地暖暖地嘅飲品都係個好選擇。 題外話，我地食完大概8點幾，呢個時候出面有人係度等位，侍應已經迫不及待掟張單比我地，變相趕我地走，希望可以改善下。

身為甜品控，一定要周圍試下唔同嘅甜品😆 呢間餐廳位於朗豪坊，細細間，位唔算多，仲有d位係正扶手電梯隔離，我同朋友就prefer坐番入面，所以都等左一陣位。同埋呢度比較少staff幫手執野，通常上一手食完野嘅杯碟都未有人黎清理。但呢度嘅碟好靚，用左可可粉砌高音譜號，好有心機☺️ 而且呢度甜品選擇好多，成個玻璃櫃都係唔同種類嘅甜品，適合同朋友一齊飯後歎。 檸檬撻 左邊嘅係檸檬撻算係偏酸，仲帶有幾條檸檬絲，酸酸甜甜幾開胃。撻皮軟硬適中，有香甜牛油味，食完唔會覺得太滯。 焗朱古力芝士餅 右邊嘅係焗朱古力芝士餅，芝士味香濃。 希望下次黎試下晚餐😛😛

真係極鍾意食越南菜，今日黎到位於雅蘭中心二期嘅品越試下😍 我地book左位，咁啱分配到窗口位，望到彌敦道嘅景，而且座位非常舒服，好適合同朋友食個飯傾下計。 香茅燒豬頸肉串撈檬 豬頸肉微辣，充滿住炭燒味，非常惹味同juicy。檬粉配上魚露，酸酸甜甜，仲有生菜絲、青瓜絲、蘿蔔絲，十分開胃，食到停唔到口。 燒大虎蝦米紙卷 米紙卷一碟六件，本身expect米紙卷嘅size會大舊d，同埋蝦肉份量會多d，不過整體配上青瓜、米粉等材料都算幾豐富，而且非常米紙卷非常結實，唔會一咬開就散哂。 香芒軟殼蟹炒飯 軟殼蟹炸得啱啱好卜卜脆，唔會話太厚太多粉漿，而且香芒令充滿鹹香嘅炒飯添上少少甜味，仲可以balance番炸軟殼蟹嘅油炸感，成個炒飯好有驚喜! 越式炒金邊粉 侍應送呢碟炒金邊粉上黎果時真係標緊勁多煙，完全feel到係充滿鍋氣! 食落又唔會覺得好油，出面好多餐廳嘅炒金邊粉都會落太多油，令人覺得太肥膩，但呢碟反而剛剛好。 法式焦糖燉蛋 燉蛋非常滑，甜而不膩，唔錯呀! 即製窩夫配雪糕 窩夫有兩件，其中有一件好似圈狀嘅雞蛋仔咁，幾得意。窩夫食落外脆內軟，充滿蛋香。雪糕方面我地揀左乳酪味，感覺好似食緊froyo咁，仲有紅豆同煉奶可以點。微溫嘅窩夫配上冰凍嘅雪糕，衝擊味覺! 推介! 雪梨蘆薈蜜 呢杯飲品帶清甜，可以潤喉，而且蘆薈份量足夠，啱哂呢d轉季天氣飲用。 香橙西柚沙冰 沙冰幾清甜，夠哂解渴同開胃，食完咁多鹹嘅菜式可以叫番杯中和一下。 洛神花茶 侍應會先係蠟燭台上點蠟燭，再將茶壺放係上面，等d茶變滾就可以飲用，變相仲可以keep住保溫。味道酸酸甜甜，係消滯之選。 總括黎講，其實呢間餐廳嘅食物真係冇乜大挑剔嘅地方，唯一係呢度嘅冷氣風有d大，本身d食物上碟仲熱辣辣標緊煙，但都會好快吹到凍哂，希望可以調教下冷氣😊

某日突然心血來潮想食越南野，先發現原來新蒲崗唔多食越南菜嘅地方，難得搵到呢間小店。呢間餐廳唔算大，但坐得舒服，而且上菜上得都幾快。今次叫左個豬扒撈檬，有好多香蔥，花生碎同炸蒜，非常香口；豬扒有成五塊咁多，肥瘦適中；配上酸酸甜甜嘅魚露（每張枱都有支，可以隨自己喜好倒落碗撈檬度），食落好開胃😋😋 呢個餐40蚊仲包埋野飲，性價比幾高，值得再黎👍🏽👍🏽 下次有機會想試埋佢地嘅米紙卷，睇落都唔錯咁😋😋