近排同朋友講起日式居酒屋, 知道銅鑼灣有間心之食堂都開咗好耐, 但一直未有機會去試, 難得今天同同事收早, 一於就去試下😋! 🥢胡椒豬骨湯煮蜆🍲 類似平常飲開嘅胡椒豬肚湯嘅味道, 以豬骨代替豬肚好適合好怕食內臟嘅朋友仔, 蜆嘅份量都唔少, 濃郁嘅胡椒豬骨湯加埋蜆嘅鮮甜, 估唔到幾夾🤤! 🥢蟹肉忌廉餅🍘 好特別嘅口感, 雖然蟹肉已搞成醬混入忌廉餅, 但都食到淡涼嘅蟹味, 外面炸得好脆; 裡面口感就軟綿綿。 🥢心之蛋卷🧈 聽個名應該食呢間餐廳嘅招牌菜式之一, 就咁睇好似平平無奇, 蛋卷上面有滿滿嘅沙律醬同埋用蕃茄醬畫咗代表"心之"嘅圖案 食落相當有驚喜, 裡面包住爆漿嘅半溶芝士, 蛋香味好重, 亦唔會太乾, 果然係招牌菜👍🏻! 🥢蒜片牛柳粒石鍋飯🥘 呢個飯份量十足, 差唔多多到溢出嚟, 牛柳同蒜片都無慳住慳住, 夠哂2-3人食, 而且蒜片同牛香味好重, 抵食! 🥢原條日本燒魷魚🦑 一上枱就已經聞到陣陣嘅魷魚嘅焦香味, 食落都好爽口，因為最怕魷魚煮到好膠, 呢個煮出嚟個口感啱啱好, 賣相亦都好吸引, 做下酒菜真係一流! 另外仲叫咗煙肉荔枝串和原條燒茄子, 味道中規中矩, 不過不失。 整體食物質素都好高，雖然地方唔大，但座位擺枱都唔會好迫，最適合幾位朋友聚會、收工宵夜嘅好選擇！

聽朋友講砲台山新開咗間平民價日式居酒屋食堂，今日去完寵物展就順面去試下💁🏻‍♀️。 呢間日式食堂裝修好有日式風格，木枱木凳木地板磚，有種入咗榻榻米嘅感覺! 店鋪選用QR code掃碼自助下單，都幾方便，菜式種類都有好多， 有便當、煎飯堡、壽喜鍋、丼飯、拉麵/烏冬、串燒同炸物等等。 價錢好親民💕 🍲牛肉壽喜鍋 & 豚肉壽喜鍋 (配飯) $58 壽喜鍋湯底做得好出色，因為加咗好多蔬菜，所以飲落濃郁得嚟亦好清甜，再將隻日本蛋搞勻，送飯一流! 🦀和風辛味軟殼蟹 (配辣蟹籽醬) $52 呢道軟殼蟹好有驚喜，本身以為軟殼蟹會好細隻好迷你，點知同正常蟹差唔多大細，入面清楚見到有蟹膏，而且炸到外脆內軟，表皮灑咗和風辛味粉好惹味，配埋辣蟹籽醬好涮嘴! 🍤吉列黃金蝦 (配手作他他汁) $36 炸蝦都炸得好香脆，而且蝦肉唔會太細隻，沾埋店舖手作他他汁，味道都幾唔錯! 🍢另外叫咗幾樣串燒: 荔枝煙肉卷、燒帶子、肥牛竹筍卷、雞中翼串、雞軟骨串; 值得一提荔枝煙肉卷真係好好食，可能見識少未食過，第一次食覺得好特別，估唔到荔枝同煙肉一咸一甜會咁夾! 🐡最後食開咗個胃，再叫多樣燒雞泡魚乾，焦香味好正，好想嗌返枝啤酒，不過今日有揸車所以忍咗口。 呢餐叫咗咁多嘢食，最終埋單每人都係百幾蚊，CP值真係好高，下次一定會再嚟食!

今日偷懶唔想煮飯，於是黎左呢間叫圓苑既中菜館食飯。呢間中菜館位置係尖沙咀山林道，係佐敦地鐵站一出去行兩個街口就搵到，十方方便。 蕎頭 野食未到都會有個開胃小食，十分懷念既味道。 龍眼咕嚕肉 第一次食用龍眼伴菜既咕嚕肉，感覺十分新鮮。 鮮露筍黑木耳炒鮮淮山 食落十分清新，去油膩感一流。而且露筍，木耳同淮山炒出黎係十分爽口👍🏻。 枝竹火腩炆龍躉頭腩 除左枝竹，火腩同龍躉頭腩，入面仲有冬菇，聞落香氣四溢。 總括黎講，食物份量算多，價錢適宜，而且環境舒適。餐廳既座位相當闊落，我同行有架bb車都唔會好迫夾。

餐廳由外到內都非常闊落，估計都有一千多呎以上，仲分開咗兩邊:一邊主要係酒吧; 另一邊主要係用餐地方同沙律吧 裝修好有傳統外國酒吧餐廳的風格，燈光亦都故意偏柔和同暗淡，有種令人好放鬆嘅感覺☺️，整個氛圍真係啱哂收工約埋成班同事嚟呢到摸吓杯底🍻! 🥢德州燒豬肋骨🍖 (半份$188) 豬肋骨肥瘦適中，經烤煮後肉質juicy、軟腍，咬落去骨肉分離，餐廳調配嘅燒烤醬食落有淡淡嘅炭燒香味 配菜有椰菜沙律同薯條，份量都好足，就咁叫半份已經夠哂兩個人食 🥢卡邦尼意粉🍝 ($128) 第一次嚟呢到食嘢，所以嗌咗個穩陣啲嘅卡邦尼意粉，嗰汁都幾濃郁，配搭香草同煙肉粒，增加口感之餘都幾香口 意粉軟硬度適中，不過卡邦尼都成日食，有少少係預期中嘅味道，中規中矩。 🥢瑪格麗特手工薄餅🍕 ($138) 因為前面食咗兩道菜都比較重肉、重口味，所以叫咗一個瑪格麗特薄餅，清清地、無配料，只有羅勒、Mozzarella芝士同埋濃濃嘅蕃茄汁，其實好多時候食薄餅嘅靈魂係餅皮，呢到嘅餅皮唔會太乾硬，色澤都唔錯，食落有種麵粉的香氣，醬料嘅味道同餅皮都平衡得幾好。 另外嗌咗兩杯Cocktail🥂: Socialada同埋Smoke on the water 🍹Socialada其實即係Pina colada，本人最愛，不過好多酒吧餐廳都未必有，見到有即點! 鳳梨同椰汁味勁香，酸酸甜甜而且酒感低，真係好啱夏天飲! 🍸Smoke on the water就第一次飲，侍應會用類似煙槍打出一個氣泡落杯嘢上面，氣泡裡面包住啲煙，之後會自己爆開，啲煙就會散開，視覺效果滿分!

好耐都冇去韓燒，於是揀左係銅鑼灣呢間韓牛牧場準備食返餐飽！餐廳位置都十分近地鐵站，出口行兩分鐘就到啦！ 我地係食晚市放題既世子牛盛套餐，每位都係$298，價錢十分之抵食。 6色刺身拼盤 望落刺身既種類都幾多款，而且食落都新鮮。 4合時令海鮮拼盤 除左海蝦同青口，仲有我至愛既帶子同帆立貝，燒完出黎都好好味！特別係帶子，連埋蒜蓉一齊烤，lam lam脷！ 4合安格斯牛肉盛合 有4款牛既唔同部位，每種都食落唔同層次，唔同感覺，正呀！ 醬油蝦 食落彈牙而且鮮甜，醬油味唔會太咸，突顯到蝦原本既鮮味。 呢餐食得十分滿足，睇住個爐轉下轉下就有得食真係十分治愈。最重要係食完一啲油煙味都冇！

最近疫情穩定少少, 好多餐廳堂食又開放返, 食野嘅氣氛好咗好多, 即刻瘋狂同朋友一齊搵好野食😋 今日就來到呢間都幾出名嘅八木橋日式燒肉放題店, 一坐底覺得環境都唔錯錯, 我地兩人分配到比較寬敞嘅卡位, 卡位椅背都幾高, 私隱度較高👍🏻 另外枱邊貼咗各樣頭盤食物的建議煮法, 呢個加分💯! 順面講埋通風都好好, 我地食嗰段午市時間都幾多人, 但都無太大油煙☺️ 今日我地揀咗燒肉放題套餐 - 霞 ($438/每位) 限時兩小時, 而家做緊買一送一優惠，不過要加一。 呢個套餐包咗特色頭盤 (頭盤的食物如需追加, 要另外付費) 🥢濕式熟成M5和牛西冷🥩 - 啲油脂分佈都幾靚, 食落都好重牛味, 肉質都算幾軟腍, 我地呢轉啲肉唔覺意燒得耐咗少少都完全唔會柴 🥢水牛芝士雞腿肉🧀 - 呢個係會有個用錫紙兜裝個啲水牛芝士絲, 先放係爐上面座溶啲, 同一時間燒埋啲雞腿肉, 再夾起啲雞肉沾落啲芝士到, 一夾起拉咗勁長嘅絲, 好玩又好食 🥢韓風瓷壺醬油牛肋肉🍯 - 牛肋肉有少少脂肪, 唔會太瘦, 燒到入面有少少紅就OK, 味道同肉質都係中規中矩 🥢米澤三元豚肉🌟 - 呢款豬肉可惜脂肪較多, 唔知點解仲自帶少少炭燒味🤣 但食牛食到悶可以燒返幾件中和下 🥢鮑魚✨ - 鮑魚啲質素都唔錯, 淡涼嘅鮮甜味 🥢味淋魚干🐡 - 燒完剪開一條一條, 油脂清香, 美中不足嘅係我地無配酒食, 如果有配埋酒真係一流! 🥢比目魚西京燒 🐟- 肉質都唔錯, 幾鮮嫩, 另外好似魚肉上面有少少似抹咗蜜糖, 燒完外面有少少焦香甜味, 本身自己都鍾意食魚, 所以呢道我另外再添多一份😋😋 除咗燒肉, 都仲有啲前菜、沙律、小食叫下嘅, 我地都試咗幾款, 都幾似模似樣, 賣相唔錯, 味道尚算可接受 最後食埋個雪糕Häagen-Dazs雪糕 (口味隨機 - 今次係蜜瓜味) 中和返食完成餐燒肉嘅油膩同熱氣的感覺🤓 飲品都係任飲種類都中規中矩, 要值得一提嘅係竟然可以任飲OOHA嗰隻0糖份、0卡路里、0脂肪透明汽水, 出面便利店賣緊$1x一罐, 呢到竟然任飲, 仲要勁好飲又健康🤤! 其實之前對放題店不太感興趣, 因為好多都會有傳統放題店的拖時間問題, 即係點完食物遲遲未上, 限時兩個鐘根本食唔到幾多。 不過呢間燒肉放題店的上菜速度都幾快, 完全沒有拖時間嘅感覺, 食得好爽好暢快👍🏻👍🏻!

呢間醉辣鮮交通還算方便，錦上路西鐵站落車行大概15分鐘就到。 一入到鋪頭，店員就非常熱情咁問我幾位同帶我入去坐底然後就細心介紹幾個餐比我，最後我揀左個218蚊套餐，樣樣鮮活海鮮都有得食下。 係我以為等野食黎時，店員話我知，原來係自己挑選自己既餐牌食物，興奮到我不能形容。我首先揀左隻生猛龍蝦、然後大飽魚、再到大肉蟹，隻蟹夾到我流曬汗，實在太重，手力唔夠，揀好就比師傅處理然後上枱比我。 望下周圍，因為食夜晚燈光暗暗地，好舒服，好適合約幾個朋友黎一邊食一邊吹水傾野，我仲睇到店員介紹既自助夾蔬角，有瓜有菜仲有菇，係個set包埋既，覺得海鮮食唔飽既客人可以蒸下蔬菜食。 店員上左個鍋落埋粥教埋我點計時就比反曬個主場比我自己郁手。 首先要蒸雞先，比雞汁流落去粥底索味，雞好時就放龍蝦，元貝，聖子，飽魚，蝦...逐樣逐樣計時呢個時候叫留杯樣飲品一流。 當食曬海鮮我肚都飽左十分六然後夾起隔網食粥啦。粥底由骨頭，南瓜配料加之前蒸落既海鮮汁流落去下面煲成，好鮮甜（落埋飯焦仲正） 食完粥之後一定一定要食埋佢甜品，佢甜品係用雪蛤煲既，好適合女仔食架唔好錯過左。 由於我食218都夠曬飽，就冇自助到蔬菜瓜，客人唔夠食既話仲可以加錢去升級個餐，海鮮又會多d。唔好睇少佢218蚊 我走果陣係捧坐個肚走 好大大既滿足✌️

最近晚市堂食重開, 終於可以久違地約朋友去烚下烚下, 今次揀咗呢間位於天后嘅特式火鍋店 - 叁不館! 未入門口, 已經感受到餐廳舊式香港嘅風格, 無論店門外招牌設計、門口牆身貼滿嘅日曆、仿夜總會的燈牌, 以至店內仿舊式戲院的壁畫、收銀台等等, 都有大量八、九十年代舊式香港的裝修風格, 非常有格調, 好多打卡位✨! 餐牌就以舊時香港報紙的黑白設計📰, 排版都有心思, 幾特別! 基本上應有嘅打邊爐食材都齊全, 各部位嘅牛、雞、豬一應俱全, 仲有羊肉、丸類、炸物、餃類、菜類及各式海鮮, 另外有幾款港式椒鹽小炒可以選擇。 上菜之前, 店員會先上一盆有齊各式各樣嘅醬料, 店員簡單介紹後, 可以自行配搭自己喜好嘅醬料, 個人極力推薦鋪頭自家製嘅蔥油醬🍯, 真係勁香勁惹味, 再加返少少蒜蓉、辣椒、芫荽、鼓油同埋沙茶醬, 我呢個自製醬料真係一流👍🏻👍🏻! 湯底款式都幾多, 加加埋埋都有十幾款, 有平有貴, 亦可以另加$20雙併湯底, 個人偏愛沙嗲湯底, 所以揀咗復古味沙嗲湯🤤 🥢頂級安格斯牛頸脊($328) - 打邊爐緊係唔少得肥牛, 牛方面我地想食盡啲, 於是叫咗一份大嘅, 啲油脂分佈好靚, 入口濃濃嘅牛味, 口感都好軟腍, 真係非常高質, 份量都好合理, 對得住呢個價錢, 因為切得幾厚身, 唔係薄片, 所以兩個人差啲食唔哂🤣 🥢自製即炸魚皮($68) - 即炸真係好加分, 超香脆, 食落"索索"聲😋, 而且炸得並不油膩, 味道比出面普通嘅火鍋店好食好多! 🥢炸響鈴($68)都唔錯, 唔係出面坊間現成一盒嗰隻, 應該都係自家製, 大小不一但隻隻都好大舊, 入面仲有包住紫菜, 更加酥脆😆! 因為朋友對海鮮敏感🥲, 所以遷就我朋友無叫到海鮮類🐟, 蘿蔔、芋絲、菜類、豆卜等等都係正常水準, 中規中距, 無咩特別 另外值得一提嘅係店員服務態度都好好🥰, 隨時都會留意你嘅需要, 佢見得我一個一飲一枝啤酒都主動比個冰桶我, 呢間火鍋店一定會再嚟食, 鐘意打邊爐嘅朋友仔都快啲嚟試下啦👍🏻!

突然好想好想食韓燒，難得而家夜晚恢復晚市堂食，緊係要出去食返餐！今晚揀左來太子炑八韓燒😋


餐廳環境頗大同舒適！岩曬我哋慢慢坐同燒。


呢排韓劇社內相親大熱，等我叫個五花肉與海鮮既社內相親套餐先。套餐包括： 五花肉二吃，梨汁雞肉，牛五花，大啡菇，八爪魚，大蝦同泡菜煎餅。



爐上既泡菜雞蛋，芝士粟米同所有前菜包括生菜，大豆芽，蘿蔔，泡菜同海帶都係任食，真係抵食，岩曬我呢啲大胃王。




主食來拉，睇賣相都流口水，海鮮類睇得出非常新鮮！



我哋燒左五花肉先，一放落爐，好快就香氣撲鼻。好快就食得啦，即刻包返塊生菜，放小小泡菜，蒜片，一入口，久違既美味感覺返晒嚟😍去吾到韓國，食下韓燒都吾錯😆其他肉類同海鮮都好好味，呢個份量岩曬2個人👍


泡菜煎餅值得推介，煎得金黃香脆，入面啲泡菜超爽口，成碟冇乜油膩感，配埋醬汁食一流。


食得韓燒梗係要配上一杯冰凍嘅飲品，見飲品限定推介有皇牌士多啤梨乳酸梳打同埋冰涼薄荷乳酸梳打，跟餐只係$48一杯，緊係要試下！當然仲有其他特色飲品😝


成個套餐連前菜，令到我哋食到非常滿足。掛住韓燒既朋友仔可以過嚟試下個社內相親套餐🥰

近排疫情嚴峻下, lunch time想搵餐好西食都難, 好彩朋友介意咗呢間位於旺角與油麻地之間嘅拉麵店🍜 - 麵屋神匠. 話一定要試下咁話喎! 入到去見鋪面都幾闊落, 座位與座位之間都唔會太逼, 而且樓底都幾高, 裝潢風格都幾有日本拉麵店嘅元素, 清一色木台木凳, 一解呢兩年幾冇得去日本嘅"思鄉"情懷🤤。 聽朋友講呢間拉麵店最出名嘅就喺佢哋招牌濃厚蝦湯拉麵，以蝦頭製作拉麵湯底，充滿醬油蝦味，拉麵湯底的蝦味濃厚，飲得出十分足料。配上日式叉燒、櫻花蝦乾同埋紫菜片，令成碗拉麵嘅味道更濃。鐘意食拉麵嘅朋友一定要試試啦！ 除咗拉麵好食, 佢哋神匠蕃茄🍅蝦湯沾麵都好出色, 啖啖濃郁蕃茄味出哂嚟, 大家都知食沾麵一定要湯麵要夠濃, 因為沾麵分湯嘅食法如果湯底唔夠濃, 就會好容易食落好淡口, 而呢碗蕃茄有過之而無不及, 湯汁嘅掛湯能力都好勁, 夾一束麵沾一次, 麵條已經上哂汁! 另外仲叫咗個日式唐揚炸雞, 都炸得香脆可口, 一路食住味道濃厚嘅拉麵同沾麵, 一路食炸雞, 成件事好連貫, 仲有好邪惡! 最後飲埋罐Anson Lo代言嘅新汽水品牌OOH, 標榜「0糖0卡0脂」, 岩岩好中和返哂!