主旨：有其他選擇的話，我唔會再黎 2人，各自叫咗個晚市套餐，1個安格斯牛扒，1個西班牙海鮮焗飯，再加左個甜品朱古力窩夫，總共$900 優點： - 環境優美，有落地玻璃，大部份位置靠窗，可以欣賞到中環和半山風景 - 員工態度合理，會主動協助影合照 - 位置安排幾好，晚飯時段每張枱都會有燭光 - 套餐前菜嘅黑松露多士幾好食 缺點： - 食物性價比低： > 套餐餐湯質素十分一般，似罐頭忌廉湯； > 最大問題係個牛扒，定價$400，但質素同茶餐廳牛扒相近，十分之薄（圖片中有薯蓉墊底，所以望落去好似好厚），冇乜肉味，叫5成但煎到10成熟，食落似$100；薯蓉冇落忌廉打滑； > 西班牙海鮮焗飯嘅海鮮唔新鮮，隻蝦食落係「梅」嘅，而且飯量偏少，十分失望 > 甜品窩夫脆身但冇乜蛋香，朱古力醬質素十分普通 結論： 食物性價比低，我唔會返轉頭再試

喺荔枝角行開街 同行有個friend介紹呢間餐廳唔錯 所以就決定試下 入到去發現個環境好靚 好有格調 每張枱都有獨立嘅燭光 而且周圍都佈置咗啲乾花嘅裝飾 女仔一定會心心眼 我地先叫咗前菜 白胡椒牛油煮蜆 味道非常之鮮味而且啲蜆肉好肥美 配埋個牛油 真係令人食指大動 好想連個湯都飲埋 至於個主菜我哋叫咗慢煮豬鞍架 同埋帶子墨汁意大利飯 豬鞍架食落有啲似豬頸肉 配埋個菠蘿莎莎醬非常清新 有頗多塊 而且配有一份小薯蓉加豆 所以唔錯 至於個意大利飯 就比較濃味 帶子有三粒 非常大粒而且好鮮味 如果個飯可以煮淋啲冇咁硬就更好啦 最後我哋唔夠喉叫咗個甜品放題試咗七款唔同嘅甜品真係非常抵食 個人最喜愛芝士蛋糕同埋芒果拿破崙 焦糖燉蛋都唔錯 窩夫食落有啲似麵包就唔推薦呀

同個friend喺元朗行開街又唔想食連鎖嘢 見到呢間店嘅餐牌都幾多選擇 所以就入去試下啦 入到去一坐底 侍應好快就會問你飲咩茶 同時會送上一碟炒花生同埋醃蘿蔔 同大家喺茶樓食飯非常相似 啲前菜因為太過肚餓 所以好快畀我哋清曬啦哈哈 呢度有小菜叫 亦都有不同上海小食或者地道野 而我哋兩個人就叫咗一碟上海炒年糕同埋京滬炒飯 多人嘅話不妨叫餸食飯 見到其他枱都係咁 兩碟菜上菜嘅時候都係新鮮炒出嚟 熱辣辣 炒飯嘅料豐富 有蝦仁蛋白同埋小魚肉碎 啲飯炒到粒粒分明 配埋啲蟹仔食味道相當唔錯 至於碟炒年糕 有肉絲同埋椰菜絲 味道無出面食嘅咁鹹 年糕質地亦都偏軟身容易消化 分量亦都唔細 食到我哋好飽 中途見到人哋叫咗片皮鴨同小籠包 賣相非常吸引 下次有機會一定會試下

同frd去觀塘海濱公園行完 就去附近搵間餐廳食晚飯 見到呢間餐廳餐牌多選擇而且價錢非常合理 所以就入咗去試下 餐廳環境唔錯 空間比較大 坐得都舒服 可以慢慢同frd傾偈 另外欣賞佢會播好多唔同嘅廣東歌 支持本地音樂！ 講返正題 揭開個餐牌有好多嘢都想食 因為本人非常喜愛食滑蛋、奄列、蛋捲之類嘅菜式 最後我揀咗吞拿魚芝士玉子燒 忍痛放棄咗流心奄列系 而我個frd就揀咗個英式早餐 貪佢包埋沙律同蘑菇湯 首先黎嘅蘑菇湯令人非常令人驚喜 冇唸過係普通餐廳都可以飲到咁香濃嘅蘑菇湯 如果可以打滑佢就更好 之後食埋個沙律令到把口清新唒 主菜黎喇！個流心奄列十分大份 啲料爆唒出黎 有勁多吞拿魚 配埋個燒汁 好好味 嗰幾粒炸帶子香口之餘味道亦唔錯 至於港英式早餐亦非常豐富 我最鍾意就係個炒滑蛋同大蘑菇 煙三文魚同埋腸就比較鹹 配埋個方包食呢就啱啱好 到甜品喇！本來想叫個窩夫但係怕太大份食唔曬 所以最尾加少少錢叫咗個木糠布甸同terimisu 木糠布甸的忌廉唔會太甜 配埋個餅碎食剛剛好 不過個terimisu對我嚟講就甜咗少少 食到尾有啲腻 總括嚟講呢餐非常唔錯 喺觀塘可以用呢個價錢食曬前菜主菜甜品加埋餐飲 性價比真係好高 服務態度亦都幾好 有咩需要都會主動幫你 希望呢間餐廳可以keep住呢個質素！ 最後希望各位叫嘢食之前 諗清楚自己食唔食得曬 先好嗌呀！ 惜食咪做大嘥鬼！

去到經濟實惠嘅euro gogo 叫咗我最鍾意食嘅煙肉蘑菇焗薯蓉 味道真係相當唔錯 上碟嘅時候熱辣辣 一不出嚟有好多芝士拉絲 亦都有唔少蘑菇同埋煙肉粒 配上個香滑嘅薯蓉 真係好正 而且份量食落比想像中多 都夠飽㗎 一個字:正！

今次試咗個粟米薯蓉撻 薯蓉份量都幾多 夠香滑得黎又唔會太軟身 薯蓉底下係忌簾粟米粒同火腿絲 個味道喊喊地 同淡味嘅薯蓉好夾 可惜份量較少 唔夠餸薯蓉 個撻底焗得幾脆身 同上面嘅料非常配合 所以都係好味嘅

條街有幾間粥粉麵檔 見呢間最多人 所以就入咗去叫咗碗鮮牛肉粥食 雖然係袖珍版 但係都好大碗 黎到熱辣辣 一睇就知係新鮮滾出嚟 食落去有上湯嘅味道 淡得黎非常唔錯 個牛肉亦都好滑 而且份量都幾多 以呢個價錢黎講 非常推薦呀

今次專登同朋友嚟食呢間舖頭 比上次叫多咗好多野食 先叫咗一人一杯三色冰 椰汁味唔算太重 而且比較多冰 所以相對嚟講都幾細杯 個海南雞飯味道比較普通 個雞都算嫩滑 金邊粉就非常大份 有唔少料 味道都唔錯 冷盤雞腳味道比較淡 得個辣字 馬拉盞炒通菜都幾惹味 不過我最鍾意嘅係個冬陰功湯 夠料得黎又夠味 推薦呢個

知道lunch set比較平 所以今日又嚟試下 今日試咗呢個滑蛋雞扒飯 賣相都幾吸引 最好嘅係 送埋前菜 所以分量都ok 個蛋幾滑 配上嗰個茄汁味嘅飯黎食非常唔錯 不過塊雞扒就有啲薄而且雞皮比較厚 食落去就麻麻地 唔洗加一 呢個價錢嚟講都算唔錯

天后一向多小店 今次就揀咗間食車仔麵 麵底一個價錢 再逐樣逐樣餸咁加上去 我叫咗雲吞 魚腐 同埋 貢丸配粗麵 分量都可以 啱啱好夠食 個人嚟講最鍾意係個腩汁湯底 令到碗麵惹味好多 另外其他餸都係中規中矩 總括嚟講都算唔錯