我得閒就會去Ufufu飲杯嘢食個晏，佢哋環境好悠閑，系一個放空自己享受me time又或者約三五知已小聚一下嘅好地方。
又要再贊吓呢度店員，真係超級nice笑容滿滿，成個氣氛都特別輕鬆。
呢度提供日式輕食料理、甜品同咖啡都好出色！

牛油果雞胸多士
佢哋嘢食嘅擺盤都係色彩繽紛，熟度正好嘅牛油果系我嘅至愛，雞胸肉高質唔鞋，配上薄荷醬汁清新開胃。加入糖心蛋、沙律菜、車厘茄、蘑菇，口感層次好豐富！另一邊系法式西多士，口感鬆軟濕潤充滿蛋香，用咗高質士多啤梨點綴，新鮮爽甜，配上忌廉同楓糖漿，系超級滿足又好味！
照燒親子雞薄餅
日式薄餅，薄餅金黃酥脆，充足嘅雞肉口感嫩滑，流心蛋做到親子嘅配搭，配上沙律醬，味道層次豐富。

午市12:30-14:30仲可以加錢升級coffee set，多款咖啡都好精美香濃，連凍摩卡都有拉花，真係好抵食吖！

天山
抹茶雪糕茶味好香濃，配上紅豆蓉同白玉，尤其加入脆片，令口感十分豐富！

UFuFu Cafe
荃灣大壩街 4-30號荃灣廣場3樓 321-323號舖

吃茶三千分店越開越多，k11 Musea 都開咗新店，經過遠遠已經聞到誘人嘅茶香，佢哋萃茶機現泡現萃茶葉就係好味，所以都超多人排隊，不過好味系值得等待嘅！落咗單周圍行吓好快有得飲，另外佢哋都有少量枱凳可以坐低飲。 香橙冰茶 可以揀茶底，玉露青茶/水仙桂花/松針綠茶+香橙果露，我就揀咗水仙桂花，再加纖玉果子，口感清新爽口，柳橙味突出。 水仙桂花蜜 充滿桂花氣息嘅水仙茶，茶味淡雅！同樣加入纖玉果子，飲落口感層次好豐富。 吃茶三千 尖沙咀梳士巴利道18號維港文化匯K11 Musea 4樓411號舖 港鐵尖沙咀/尖東站 J 出口, 步行約1分鐘

主打星馬菜嘅「樂天經典」新推出咗抵食套餐，仲包埋蟹，CP值相當高！吸引咗好多街坊幫襯。

黃金魚皮
超級邪惡呢！新鮮熱辣，現炸口感非常脆香，唔會太油膩，咸蛋黃入口即溶，咸香惹味！

星洲黑胡椒蟹
星洲蟹好大隻份量十足！真心贊！
有四種口味選擇，我哋揀咗星洲黑胡椒味。啖啖蟹肉，肉質結實鮮甜，黑胡椒味重，好香，但唔會好辣。附有手套蟹鉗，啖啖蟹肉好掂。

主食系蝦味魚子蝦球炒飯，賣相吸引，炒飯香氣四溢，飯粒分明，夠乾身。蝦球大粒又新鮮，肉質彈牙，用魚子點綴，味道層次好豐富。

沙拉排骨，其實冇骨，大大塊肉扒口感外脆內冧又入味，沙律醬均勻，份量仲要好滿足。

招牌酸柑香茅凍
估唔到佢哋甜品都咁正！
賣相一流，好似小盆栽咁，用青檸點綴，上面鋪咗奇亞籽增加口感，啫喱清新帶有薄荷嘅清香，酸酸咪咪非常解膩。

清心丸綠豆爽
質地比想像中濃稠，好多綠豆蒜，加上清心丸，好味又有益。
自家製薏米水
檸檬味突出，好鐘意薏米嘅口感，仲可以去濕養生。

超級正嘅日式鐵板燒料理店三日月是由日本籍主廚主理，坐在料理席睇著大師精緻嘅廚藝，每道菜都有美美的擺盤，細緻又充滿儀式感！不得不大贊日本師傅精益求精既職人精神！餐廳裝修充滿和風木系風格，落地玻璃望出去令人很舒適，侍應好熱情又用心介紹各菜式，最開始會先拎食材出來比客人睇。A5宮崎和牛龍蝦鮑魚套餐HKD2480前菜三小點
賣相精緻，由明太子沙律、胡麻醬豆腐、煙燻雞肉組成，很清爽開胃。前菜沙律、極上刺身、季節時令生蠔，生蠔、刺身非常新鮮估唔到質素咁高！茶碗蒸
呢個都係餐廳嘅招牌菜式，蛋味出眾，蒸蛋非常滑溜，上面用咗鰹魚汁，所以非常入味。A4鹿兒岛和牛薄燒卷會同鐵板燒日本野菜擺在同一隻碟度，和牛肉質非常有保障，將鹿兒島和牛薄燒卷住香菇絲，牛肉入味，同燒野菜好夾，加上蒜片，特製醬汁、黑胡椒鹽，香口又惹味，日本野菜有蘑菇、蘆筍、蓮藕片、南瓜，質素高，食落非常新鮮爽口。鮮活龍蝦（約500g）
非常足量嘅龍蝦令眼前一亮，龍蝦肉質爽彈鮮甜，富有龍蝦膏，實在太鮮甜啦，色香味俱全，擺盤超級精緻，師傅用咗紫薯粉畫碟，顏色超級美，再加入花瓣、醬汁令賣相變得豐富又吸引，仲要可以食埋紫薯粉，口感層次真豐富。侍應交待保留蝦頭，之後會用黎煮龍蝦湯。鮮活南非鮑
睇住師傅燒超大隻鮑魚，用咗昆布去吊味，經過慢煎再加牛油焗，令鮑魚肉質非常軟冧入味，仲帶有昆布嘅香味，配埋秘製嘅鮑魚汁同一齊食，味道非常 match。鮑魚肉質彈牙爽口，再將鮑魚肝煎香伴碟，口感層次好豐富。鐵板炒飯
鐵板炒飯加入酸梅醬，非常上色，酸酸的味道又很開胃，食到一半再倒入鰹魚湯同wasabi，好似食茶漬飯咁。龍蝦味噌湯
用龍蝦頭煮湯，龍蝦鮮味突出，味噌湯底非常特別，仲可以食埋龍蝦肉，好正！升級 焦糖多士
充滿儀式感嘅擺盤！師傅在碟上畫畫，非常有藝術感，吐司金黃香脆，帶有焦糖同牛油香味，色香味俱全，實在系完美嘅一餐。三日月
尖沙咀金馬倫道23號金馬倫廣場2樓B號舖
港鐵尖沙咀/尖東站 B2 出口, 步行約3分鐘

和牛燒肉一郎不嬲以高質和牛放題為賣點，今次正值3週年驚喜大優惠！只要惠顧晚市燒肉放題A-F套餐，就可亨「四人同行一人免費」真係勁抵食！ 荃灣廣場分店門口有好多牛牛公仔可以打卡，環境闊落，設有好多卡位梳發非常好坐。 Qr code 落單，簡單方便，佢哋仲有「和牛識別番號」！即系食緊啲牛牛嘅出世紙，可以比我哋了解多啲牛肉品質，和牛嘅口感就係最正㗎啦！ 套餐由A-F，價格由HKD198-HKD990/位，節假日價錢會貴少少，我哋揀咗Set D： 有日本黑毛和牛6款放題，頭盤已經有黑毛和牛 4款＋海鮮3 款＋ 是日黑毛和牛精選 ！ 任飲梅酒、清酒及啤酒，食物多達132款，非常豐富！ 自助區提供沙律、甜品、雪條、多款果茶、果汁及罐裝飲品，其他食物就 Qr code 落單。 店員先送上兩碟和牛燒肉拼盤，連擺盤都很精緻，有種高級感，今日嘅和牛精選系牛肋肉，里脊肉，一口牛，肉眼。先用牛脂肪燒吓個爐，食肉獸就可以開動啦！ 和牛肉質素超高，油花分佈均衡，油脂超豐富，入口即溶。餐廳提供多款醬料可以自由混醬，我就最鐘意柚子醋，酸酸咪咪開胃。 嘢食都上得好快，呢邊未食晒，轉個頭又嗌到成枱嘢，仲可以嗌埋主食、小食，我就最鐘意冷麵同牛肉飯卷，質素都非常不錯。 自助區仲有雪糕雪條、嘢飲、爆谷、棉花糖，呢啲都好岩塞去另一個胃，真係超級超級大滿足吖！ 「3周年驚喜優惠」，由2024年3月1日 至3月31日，只要登記成為<和牛燒肉一郎＞會員，於推廣期內到全線＜和牛燒肉一郎＞惠顧晚市燒肉放題 A-F套餐，即可享四人同行一人免費優惠。

朋友臨時book咗間隱世美食帶我去食，上環永樂街的「Sabor Spanish Touch Private Kitchen」。餐廳燈光昏暗，落地玻璃望出街景，環境寫意浪漫，餐廳仲免收開瓶費，好適合一班朋友包場慶祝活動。 其實我已經聽聞過佢大名好耐啦，呢間私房菜已經開咗十幾年，主打西班牙菜式，最近佢哋推出新菜式：「Sabor Signature Chicken Box」 食材系用咗廣東三大名雞之首「杏花雞」，將雞肝、雞肉、雞皮化身成三道不同特色料理，成隻雞都可以食返。 Chicken Liver Pate 前菜賣相唔錯，系特製雞肝醬同麵包，面層系焦糖洋蔥，味道甜甜哋好易入口，雞肝醬口感細膩柔滑，仲好香。擦在麵包上非常好味。 Oven Baked Chicken 主菜系隻雞，講到隻雞都幾巴閉，餐廳先會拎全隻雞出嚟show吓，再表演現場火燒打卡，淋上Vodka燒幾秒，驚太鞋唔會燒太耐。 之後再拎返去拆肉，用煙燻處理隻雞，雞皮金黃油亮，慢煮雞肉嫩滑，不過我個人覺得可以煮耐啲啲。 Chicken-skin Oil Rice 雞皮飯夠晒特別，將杏花雞雞皮炸到脆卜卜放入飯內，閂蓋焗，食之前再噴上特製醬油，香口好味，趁熱食啦！餐廳準備咗12款鹽，如果想再重味啲可以同侍應講。 另外餐廳都有好多西班牙菜式，Tapas選擇都唔少 Grilled cuttlefish with alloli 即場唧番茜蒜蓉醬，大大朵泡沫狀醬汁好靚，但好快就謝，影相要快手，呢個生蒜味道勁突出，微辣。墨魚粒軟冧夠味，同蒜醬好夾。 Garlic shrimp 大大隻蝦啖啖肉，蒜香突出，呢個都要趁熱快食，唔好浸太耐油。 Catalonia Cream with homemade ice cream 甜品嘅Catalonia Cream加雲尼拿雪糕，賣相幾好，面層有脆焦糖微熱，Cream系冰涼口感，溝埋一齊絕配，食埋雪糕大滿足。

高級意大利餐廳ARIA位於中環蘭桂坊加州大廈24樓，餐廳用咗落地玻璃，景觀開揚，採光出色，可以欣賞到維港景色，令人心情舒暢，超級寫意。裝修以歐陸式風格，配上掛畫、歐式古典傢私，尤其為復活節擺放咗一系列嘅公仔裝飾特別吸睛！ 我就最鐘意甜品區隻巨型復活蛋同兔公仔，真係打卡一流！ Weekend Brunch 週末早午餐 HKD628/ Per Guest HKD318/ Per Child 以半自助形式供應環球海鮮冷盤、沙律吧及芝士區，配搭精選餐湯及自助甜品吧。 意大利主廚為客人準備各種豐富美食，食材新鮮，擺盤美觀。 冷盤前菜同沙律都係相當多選擇，淨係芝士就有勁多款。 有超級豐富嘅海鮮區，有阿拉斯加帝王蟹腳、波士頓龍蝦、青口、生蠔、法國田螺，沙律大蝦肉，非常高質，龍蝦好大隻，仲有好多膏，大蝦啖啖肉。 我哋仲加錢升級自選主菜：意式烤澳洲西冷牛扒配番茄及火箭菜，牛肉肉質嫩滑，份量亦好滿足。 甜品區非常出色，五款蛋糕同Tiramisu 都想試吓！仲有朱古力噴泉配咗好多生果同棉花糖，實在太幸福啦！

中環大館旁邊嘅黎巴嫩菜，入到餐廳有種中東神秘感，昏暗嘅燈光下卻透著中東貴族藍嘅主色調，有特色嘅窗花鏤空出迷人嘅影子，無論系椅凳定係燈具都充滿中東特色，就好似穿越時空進入阿拉丁嘅神話世界.餐廳設有矮梳發，相信呢啲位系觀賞肚皮舞最佳位置，可惜當晚就冇表演。呢度服務非常周到，會幫客人慶祝生日送出即拍即有相，留住甜蜜回憶。Mix Cold Mezze💰195HKD
中東菜真係要食當地特色嘅菜式，好似鷹嘴豆蓉、煙燻茄子蓉同紅菜頭沙律，尤其喜歡鷹嘴豆蓉，入口綿密充滿豆味，紅菜頭新鮮清爽，搭配pita Bread，就真係太有特色太吸引啦。Lebneh💰95HKD
是自家製乳酪加上蕃茄、酸瓜配菜，酸酸的好開胃
用咗自家製乳酪，超好味。Shrimp Matffie💰128HKD
有啲似西班牙蒜油蝦，加上檸檬汁，口感清爽不油膩，蝦仁爽口彈牙，用蒜碎、芫荽點綴，很有特色。Kibbeh💰118HKD
做為小食嘅羊肉丸，系用羊肉碎同小麥碎搓成肉丸，煎香表面，非常脆香，切開有好豐富嘅餡料。Samake Bil Tahini💰238HKD
中東特色嘅香煎鱈魚柳，鱈魚柳肉質扎實，賣相唔錯，鱈魚柳煎到表皮薄脆，帶有金黃色澤，加入香料，紅石榴粒，浸在酸忌廉醬中，再擠檸檬汁調味，非常開胃。Kebbeh Bel Labban💰238HKD
黎巴嫩料理就最鐘意食羊，呢道菜同小食羊肉丸好似，羊肉丸浸在乳酪汁中，非常有特色，食到肉丸嘅香脆又可以沾住酸咪咪嘅乳酪，上面再用紅石榴同芫荽碎點綴，好味又有特色。Peppermint Tea💰55HKD
非常有儀式感嘅茶壺同杯，薄荷味突出，同餐飯極配，必點項目。Yakult Lemonade💰88HKD
酸酸甜甜幾開胃，賣相仲好出色，打卡一流。值得一提，大家應該去吓廁所，佢個廁所裝修都超有特色，非常鐘意吖！！

Shahrazad Lebanese Dining Lounge & Bar
中環雲咸街75-77號嘉兆商業大廈2樓
香港站C出口，行7分鐘

Chatterbox Cafe新店開在Airside B1層,餐廳闊落，裝修環境以木質為主調,搭配綠色元素擺設,很有東南亞色彩。QR code落單非常方便，夜晚仲設有二人套餐，選擇都幾多。因為Airside系寵物友善商場，餐廳門口張大枱都係特別為帶寵物嘅客人設計，都幾貼心。 海南雞飯 套餐配有黑醬油、薑蓉、雞醬、油飯、豆腐湯、例牌海南雞，雞肉可以加10蚊轉雞髀，雞皮爽滑，雞肉都幾嫩滑，最鐘意雞油飯，香噴噴雞油味。 香脆腐皮卷 炸至金黃，豆腐皮薄脆香口，非常惹味。 椰子雪糕配斑斕蛋糕 賣相唔錯，好大一球椰子雪糕，椰子味突出，最鐘意斑斕蛋糕，口感細膩充滿斑蘭香味。 Chatterbox Café (AIRSIDE) 九龍城啟德協調道2號AIRSIDE B1樓B114號舖

尖沙咀棉登徑嘅「N.28 Teppanyaki 」系一間CP值極高嘅日式鐵板燒，環境型格又有格調，設有長身吧枱座位，可以欣賞到廚師的烹調手藝，睇住燒系好食啲㗎啦。 好欣賞呢度除咗精湛廚藝外，佢哋都會擺盤靚靚，令食嘢都充滿儀式感，侍應同大廚仲有非常nice，同客人打成一片，氣氛非常好呢！ 佢哋有個大大魚缸，可以確保海鮮品質。 午市期間提供多款超值嘅鐵板燒套餐，套餐包括仲有主菜、田園沙律、茶碗蒸、季節湯及廚師精美甜品。 田園沙律 沙律菜新鮮，有車厘茄、藜麥及蒟蒻，味道清新，口感豐富。 帶子青海苔茶碗蒸 用一粒蛋殼型杯仔裝住，下面鋪有細鵝卵石，造型有心思，將海苔汁同蒸蛋撈勻，口感細膩綿滑入味。 南非鮑魚配乾貝汁 睇住師傅將隻鮑魚放在鐵板上燒，鮑魚仲勁生猛，感覺有少少殘忍，但真係非常非常新鮮，鮑魚高質，燒得好入味，將鮑魚切成薄片，在上面加咗黑松露更加惹味。用乾貝汁伴碟，擺盤相當出色。 鐵板大蝦配雞尾酒醬 大蝦啖啖肉，去殼留蝦頭，肉質鮮甜彈牙，用雞尾酒醬伴碟有心思。 美國安格斯牛柳 師傅會先問清楚客人想要嘅熟度，而且配有蒜片同鹽、醬料，口味自己決定就唔洗驚太咸啦，呢個真係非常好！牛肉非常高質，牛肉味香濃而且細膩冇渣，非常香口！ 季節湯物系海帶豆腐湯，精美甜品系芝麻雪糕亦非常高質！