其實之前已經去過一次，想食吉列豬扒拉麵，但點知賣晒，結果食咗照燒雞扒拉麵，其實都唔錯。 今個星期打風，諗唔到食乜嘢外賣好，唔甘心上次試唔到，所以今日又去過。晏晝已經打咗電話去問佢哋開唔開先，費事白行，接電話果位哥哥好有禮貌，話8號風球所以唔開，叫我夜晚落咗波再去過。 今晚真係去咗買，終於比我買到。以咁嘅價錢來講，真係好抵食。個吉列豬扒用紙袋分開裝，唔會俾啲湯浸到林晒。仲要送埋沙律醬，真係細心。下次會試埋佢哋其他拉麵。

之前坐巴士經過呢度樓下，見到呢棟大廈睇落都幾decent咁，已經黎呢度睇下呢幾間餐廳係咩料，見咁多好評就心郁郁想黎呢間試下。 上到黎見地方都闊落又唔太多人，同朋友坐低就點餐了；佢叫左壽司套餐。 我就叫左自選三味餐。 兩個餐嘅份量都幾細下，我同朋友係大食女士都驚唔夠飽，最後都真係叫剛剛好，唔算好飽（男士就應該唔多夠，建議叫大大份嘅吉豬飯餐應該會飽肚啲）。同埋我個吞拿魚蓉飯pat蓉個顏色睇落都幾唔新鮮下，不過食落口感同味道都正常嘅。 最後黎到甜品，係抹茶布甸，真係幾好味，抹茶味濃郁，唔係揸流攤。 服務就一般啦，食到尾時個場無晒侍應，得左5分鐘至有人出現埋單手。 每人200幾-300蚊，坦白講唔算係平，食品性價比唔算高。

以前去開食元朗yoho果間好ok, 幾好味又唔算好貴，所以都食左好多次，但果間已經執左，覺得幾可惜。最近返工發現金鐘原來有分店，所以即刻去試啦，試完就開始明白元朗果間會執嘅可能其中一個原因。 唔知係咪因為要方便金鐘多白領take away, 加上可能租金貴、地方細、請洗碗工人又難又貴....咩都好啦，而家就算堂食都係用紙碗。 好心啦，如果個客一心連拉麵都選擇take away, 相信對拉麵都冇乜要求（即使將湯同麵分盒），但揀得堂食，都真係希望唔好用紙碗！ 唔要求有咩服務，但堂食環境可以差到堂食客食完啲紙兜、膠兜、餐具，叫啲客自己掉去落單櫃檯隔離個大垃圾桶，但個垃圾桶冇蓋不特止，仲要積到好滿都冇人清理，好唔合衛生！而且啲拉麵有湯架喎！［咁當然大家食完都知機唔會連湯倒埋落去，而係方返上佢地出餐（拉麵/飯）嘅枱］ 佢餐單幅相冇話加左錢至有半隻蛋，但實物原來冇蛋嘅！我加左錢要多兩片叉燒，加埋本身有果兩片，相信個疊埋都唔知冇第二啲拉麵店正常一片咁厚！洗唔洗寒底成咁？ 午餐話送一罐罐裝飲品，但落晒單至同你講冇晒，得返250ml 紙包飲品，好心啲職員知人叫午餐就一早單聲同人講冇罐裝飲品啦！又或者你啲職員怕醜唔想講就痴張紙出黎通知啦！排我前面果個人又係堂食叫午餐，但可能佢冇留意午餐包飲品，但個職員又冇出聲，佢係之後等餐時聽到我問飲品佢至知包埋問個職員。 咁嘅質素但收咁嘅價錢，雖然我本身唔鍾意一風堂，但下次想食拉麵都係過返對面間一風堂算，唔洗俾人揾笨！

呢間上海食堂真係好耐歷史了。 除左銅鑼灣呢間，尖沙咀分店未執前我都有去幫襯咖～ 冇改錯名，佢地啲排骨菜飯真係好懷舊、好好味，件排骨（豬扒）外層有厚厚蜜糖，有叉燒嘅感覺，但其實係豬扒。😋 記憶中次次去親都必點排骨菜飯，我食果陣聽到枱枱都又係有點排骨菜飯；另外，仲有雞絲粉皮都好美味咖～👍🏻 而家星期一至五下晝三點至五點半仲有八折：大部分套餐原價$62，折左齊頭盛惠$50。呢個價錢食一個下午茶同好多茶餐廳比，可能未必算好平，但同佢地自己晚餐時段比，食同樣嘅野的話，就非常抵～ 非常飽！非常滿足！🐷

出開老旺行行下見肚餓，拿拿林喺附近搵間餐廳醫肚先。 其實一向都覺得啲舊港式茶餐廳好吸引，因為而家已經買少見少，好多都被連鎖或新式茶記取代。佢地仲用緊80-90年代筷子套包住對筷子，卡片設計又非常懷舊，正～ 呢間餐廳話就話自己係星馬style、出名食海南雞，但餐單其實主打港式。 其實本來入去坐底都冇乜期望，但求快快脆有野食；試左佢地個乾炒雞絲意加凍檸水，味道比預好喎，好夠熱又好味，下次如果有機會經過都會再黎。

晚飯時間行yoho, 行到餓又落雨都懶得返出去搵食。見到以前homeless同H&M執左，個位變左food court就順便試下啦，見呢間唔洗等就即買，點知中伏。 叫吉列豬扒飯，塊豬扒烤左好耐，唔熱唔脆又硬又細塊，都算！佢幅相影出黎有啲雜菜伴碟跟飯，事實係冇嘅，真係得碗白飯！完全有被騙感覺。塊豬扒係乾柴柴乜汁都冇，得一細pat沙津醬喺碟邊。同佢貼出黎幅相完全係兩回事，但好意思收52蚊。仲衰過食頹飯，咁冇心做不如米做啦！