今日唔食Burger唔食魚湯烏冬，試咗慢煮西班牙黑毛豬丼，味道的確唔錯。可能就係因為用慢煮嘅方法去煮D黑毛豬柳，所以食落去就覺得D黑毛豬柳juicy d，夠晒淋不過肉質仍然保持彈性，另外佢D黑毛豬柳嘅外層煎到微微燒焦，食落特別香，打埋隻溫泉蛋落去撈飯，令D飯特別香，另外佢飯面仲有D紫菜絲，好有日式風味。 同魚湯烏冬一樣會跟一份詰梅漬番茄仔，其實呢個小食真係唔錯，清得黎又夠晒健康，開胃醒胃，不過如果比多兩粒就會更開心啦。

食來食去都係覺得呢一間嘅小菜最出色，淨係個咕嚕肉已經值回票價，材料新鮮已經贏咗起步點，呢度啲咕嚕肉係用新鮮豬肉，連菠蘿都係新鮮嘅，咕嚕肉外面炸咗個層皮脆脆哋，入面舊肉仲有肉汁，值得一讚係冇乜肥肉，唔使一邊食一邊咬走啲肥膏。
乳鴿都做得好，唔會炸到燶晒over晒，乳鴿嘅肉都幾嫩滑。 招牌雞睇個樣平平無奇，食落好夠雞味，隻雞冇乜肥膏，我哋要咗半隻，竟然都有雞潤雞腸呢啲內臟，幾好。 什菌豆腐啲豆腐好滑，佢個芡汁雖然好似有啲厚，不過個味啱啱好唔會太鹹。

正宗意大利「小」餐廳因為呢間餐廳真係好細，不過D野食就好好味，特別係佢嘅Set Lunch，價錢比晚市平30%至40%，但係老闆又唔會將個份量減少，所以性價比好高。
Set Lunch送餐包，個包面頭有一塊車厘茄，點黑醋同橄欖油，好有意大利嘅感覺。另外佢嗰支黑醋加橄欖油混合體嘅玻璃樽都好有型。Set Lunch的前菜可以揀意大利黑醋沙律或者餐湯，我揀咗沙律，份量比想像中多，而且好新鮮好有誠意。 因為驚如果叫Pizza會食唔晒，所以揀了意粉，呢個係香蒜橄欖油海鮮意大利粉現意大利辣椒，好香蒜頭味，D海鮮亦夠新鮮，配埋佢上面D香草，撈勻佢，好好食。佢仲有杯餐飲跟埋，咁先係$108再加一，真係又抵食又好食。

經過親粉嶺聯和墟就會行黎呢間腸粉店幫襯一下，價錢加咗，不過都仲係好平，好似我呢碟腸粉加唔辣魚蛋再加燒賣，先至係$18。 不過食落去總係覺得無以前咁好食，究竟係我錯覺定係真係無以前咁好食呢？睇Openrice又唔覺有人話差咗。

試了一家新開嘅拉麵店，都幾好食，佢有幾款招牌拉麵，我就叫了檸檬牛油雞白湯拉麵黎試吓，佢個湯底真係唔錯，好有雞味但係又無乜油，D雞肉同魚餅都唔錯，不過都係個湯底精彩D，食呢個斱嘅時候個人建議要拎起D檸檬唧晒D檸檬汁落去，再攪勻個湯先食，效果更理想。 我地叫咗兩款拉麵同兩款小食，都係炸雞，不過梗係唔同味啦，一個係廣島黑醋拌炸雞，另一個就係月詠炸雞。 廣島黑醋拌炸雞有D似咕嚕雞球，個雞肉嘅肉質真係唔錯。月詠炸雞都炸得幾好，又唔會太油，兩款炸雞之中廣島黑醋拌炸雞好似有特色少少。

今日試了騸牯牛Burger，我鍾意佢D牛肉味濃D但係又唔會好重油脂，唔會食到成口油，所以食嘅時候就唔會食到一半已經好漏，佢唔似安格斯或者和牛咁樣D油會比較多，令人食嘅時候好快就飽飽滯滯，呢樣野真係可能只有騸牯牛先可以做得到。原本打算叫個黑松露薯條，不過原來夜晚堂食有細薯條送，所以就無叫到黑松露薯條，佢個薯條雖然係免費贈送，不過以半份薯條黎講份量比想像中多，仲要係新鮮炸出黎嘅，一D都唔孤寒。另外佢仲送埋汽水，咁樣以百幾蚊黎講都算幾抵。

有高人指點話呢一間潮式粉麵店一定要試，上Openrice先知原來係新店，試過之後真係無介紹錯，當中極力推薦魚蛋，食得出佢嘅新鮮。淨紫菜四寶入面當然有紫菜啦，另外亦有我極力推介嘅魚蛋，仲有魚皮餃、墨魚丸同埋札肉，最可惜無魚片，下次要另外叫碗魚蛋米試下。我地仲試咗牛雜粗麵，D牛雜好入味好新鮮，而且價錢算好平，印象之中好似係$38一碗，真係抵到無朋友，而且牛雜嘅質素算係高。另一碗粉麵就試咗魚皮餃麵，佢個魚皮餃都做得好，餃皮薄得黎煙煙韌韌，D餡料都幾新鮮。炸魚片都OK，夠硬身，浸一浸湯再食都唔會林晒。

呢一間位於上環尾西營盤頭的Coffee Shop真係物超所值，食物同飲品的味道好，但係個價錢就比同質素嘅較低，仲要有個大玻璃窗，對住個City View慢慢嘆，仲可以見到電車經過，成個人開心晒。今日杯咖啡揀咗Iced Americano，因為成日覺得Americano先至可以試到佢Coffee Bean的純味道，好多時加咗milk加咗cream就會蓋過佢嘅原味道，呢度嘅咖啡豆同埋佢嘅沖調方式好啱我，咖啡味夠出但係又唔好太濃，淡淡然的帶一點微酸，喺呢D悶熱嘅天氣下飲就最啱。
我個Friend就叫咗玄米茶Latte，呢個配搭好好，其實即係玄米茶加奶，又或者直接叫玄米奶茶，最啱嗰D late afternoon唔飲得咖啡因為驚瞓唔著嗰D人(即係我個Friend)。 我地另外仲食咗一個牛角包，真心好食，夠香夠鬆夠軟，同嗰D長龍名店有得Fight。

呢間位於上環街市上面熟食市場嘅潮州打冷舖質素唔錯而且收費合理。我哋今晚叫咗潮式凍蟹、韭菜豬紅、薄殼、潮式春菜煲同埋蠔仔粥。

老闆娘推介我哋食凍蟹真係冇介紹錯，味道鮮甜兼且好多肉，隻隻腳d肉都實淨，唔會得d水，咁大隻都只係$600，物有所值。
韭菜豬紅加咗沙嗲汁所以好惹味。
蠔仔粥d蠔新鮮肥美。
潮式春菜煲雖然係用五花肉而唔係教授嘅排骨，但係一啲都唔油，真係唔錯。
薄殼就唔係好夠肥美，可能季節唔啱啦，不過佢個汁夠正宗，落咗九層塔所以好好食。

今日黎呢間雞煲因為佢除咗麻辣雞煲之外仲有唔辣嘅椰子雞煲，3個人食要半隻雞就fit晒，因為仲想食少少其他野。
雞同湯底分開上，睇落去佢哋嘅雞都幾大隻，半隻雞都有咁大碟，同埋佢嘅雞都幾靚。
飲完原味椰子雞湯之後加湯開始打邊爐，其他配料就叫咗手打墨魚滑、蓮藕片、蜂巢豆腐、西洋菜同烏冬，啲火鍋配料樣樣都好新鮮，都幾抵食。手打墨魚滑竟然一份有兩Set墨魚滑，抵食。 蓮藕片打邊爐夠爽。蜂巢豆腐即係冰豆腐啦，打邊爐一流。西洋菜都洗得幾乾淨。 烏冬好食。