醉鍋 今日天氣凍凍地，於是決定收工喺銅鑼灣搵一間打邊爐，就去咗喺VPoint嘅醉鍋，由於餐廳位於27/F同埋我哋坐正窗邊，都會望到好唔錯嘅維港景色！ 坐低之後，店員推薦咗醉火入鍋依個湯底俾我哋，真係唔講得少，依個湯底嘅精緻同埋豐富程度真係我見過嘅數一數二，個湯底分咗五格，中間好signature 嘅有酒浸住幾隻蝦，上嘅時候店員會喺我哋面前點火，儀式感十足，而蝦嘅味道俾啲酒釣一釣顯得更加鮮味。而其餘四格比較特別嘅係有半隻龍蝦嘅湯底，仲有好足料嘅麻辣湯底，入邊有豬皮、雲耳、豆卜同埋芽菜，煮耐少少真係好入味！而剩返嘅兩格就係比較健康同埋清啲嘅，比較適合煮蔬菜。 首先嚟嘅係手打芝士蝦丸同黑松露蝦蟹餃，我哋都食得岀食材嘅新鮮，個蝦丸嘅芝士味唔會太濃搶咗蝦丸應有嘅鮮味，而且會有啲淡淡嘅芝士香。 作為一位黑松露控，個蝦蟹餃就真係冇得輸，大大粒！用龍蝦湯底嚟淥會最夾，松露味亦都好重，食完絕對會齒頰留香！ 之後就到打邊爐嘅主角啦，我哋兩個人嗌咗一份細嘅頂級安格斯牛小排，份量都足夠，切工唔錯，牛味重而且油脂分布均勻，唔錯唔錯！會推薦試咗用清湯嚟淥試試牛本身嘅味道先，再試其他湯底。 另外就有我每次打邊爐必叫嘅響鈴，呢度標榜係即炸手工響鈴，嚟到果然冇令我失望，一睇就知啱啱炸起，響鈴本身好多層非常鬆化，亦都非常之索湯！而為咗食得健康啲，我哋亦叫咗個蔬菜同埋雜菌拼盤，值得一讚嘅係佢嗰個蔬菜拼盤，種類多之餘份量亦都預得好好，有生菜、油麥菜、西蘭花同埋秋葵等等，啲菜新鮮到索索聲！最後叫咗個三色鮮制生麵，三隻色嘅面味道略有少少不同，都屬於比較黏身少少嘅麵，個人覺得有比較似蕎麥麵嘅質感，但都好掛湯，個人推薦一定要用麻辣湯底煮！ 飲品我哋就叫咗竹蔗茅根同紫貝天葵，打住邊爐咁熱氣飲就最啱，潤喉得來又非常清熱！

今日賀朋友新居入伙經開黃埔，又突然想食韓國嘢，於是就去咗附近一間叫韓宮嘅餐廳入到去發現啲店員全部都係韓國人，已經知道今餐應該會食到好地道嘅韓國嘢餐前配菜唔少得都係嗰幾款，有我最鍾意食嘅Kimchi，所以我好快就食完，而阿朱媽老闆娘亦都好細心，見我食完問我需唔需要加 韓宮主打嘅係韓式燒烤，而我哋就叫咗個Set A，主要就係食豬肉嘅，因為我覺得韓燒唔同打邊爐，係要燒啲肥肥地嘅肉先夠香🫣個set包咗五花腩、豬頸肉、辣醬五花腩、茄子同芽菜等等！豬頸肉比較厚切亦都好有豬嘅香味，而兩種五花腩油脂味比較重，就建議燒到燶邊同埋用生菜包住食落會香啲同冇咁流
🥬講到生菜就想讚一讚佢嘅生菜非常新鮮，咬落去索索聲，加埋佢個秘製醬汁，成件事係好夾嘅🫶🏻 除咗韓燒，我哋仲叫咗個醬油蟹加白飯，蟹膏蟹肉鮮甜，醬油唔會太鹹而且有一種清新嘅感，會令到蟹味本身冇咁腥，食完蟹腳仲可以將啲蟹膏同蛋黃撈埋有紫菜嘅白飯一齊食，正呀 總括嚟講，嘢食嘅味道唔錯，老闆娘雖然英文唔係好叻，但都會好盡力去招呼我哋同埋同我哋傾偈，係一間好有人情味嘅餐廳👍🏻

今日放工陪朋友行開銅鑼灣，經過希雲街見到間餐廳好似幾chill裝修又幾特別，於是就入咗去試吓🤓

入到餐廳細心留意，環境好別緻，周圍擺咗好多唔同嘅植物，燈光好舒服，而且每張枱上邊都有個蠟燭仔，令人好放鬆🥹小食方面，我哋先嗌咗個Buffalo Wings同埋黑松露芝士薯條。先講過雞翼，嗰醬惹味得嚟唔會太辣，而且係單骨雞翼，令我哋唔會食得好狼狽。
而個黑松露芝士薯條就真係好抵讚，份量多就不在話下，薯條仲要係我最鍾意嘅粗身薯條，每一條薯條都滿佈芝士粉，基本上唔點醬食都好好味，當然點埋個黑松露醬就錦上添花啦🫣主食方面，主要有意粉同意大利飯，我哋就叫咗法國鵝肝南瓜意大利飯同埋黑松露忌廉汁扁意粉。個意大利飯我真係要大讚，賣相一流而且鵝肝好香，啲意大利飯粒粒都有南瓜味，而且仲有啲蘆筍喺上面，令到食落去口感層次更加豐富😋 而個扁意粉就真係做到好creamy, 每條意粉都有黑松露醬，真係不得了🤪嘢飲方面佢都真係好多選擇，我哋兩個都係朱古力愛好者，所以分別嗌咗一杯凍嘅Ecuador dark chocolate 同signature嘅blend chocolate，兩杯都好重朱古力味，但又一啲都甜，對於我呢啲鍾意朱古力，但又怕肥嘅真係冇得輸

餐廳環境好靚，睇得出裝修用咗好多心思，燈光、音樂同座位都好舒服，而且重有露天座位，打卡一流。打開Menu發現有各式各樣嘅嘢食，主打應該係泰國菜，憑感覺嗌咗啲唔同嘅嘢食，一路等一路好期待。 Salmon Tartare with Avocado and Wasabi Mayo
前菜先嚟個三文魚他他配蛋黃醬，第一道菜我已經感覺到呢間餐廳係玩fusion野，三文魚他他竟然有牛油果同Wasabi味，你都咪話唔頂癮😂

  Earl Grey Mango Soup  呢個凍湯賣相不得了！個湯下面配咗乾冰，上枱時煙霧瀰漫，感覺好有奇妙。叫呢個動湯嘅原因係好奇芒果同埋伯爵茶呢兩樣平時風馬牛不相及嘅嘢點樣喺一個前菜裏面呈現， 但食落芒果甜酸度適中，配埋伯爵茶嘅茶香，味道出乎意料地有驚喜！

  Tom Yum Bouillabaisse with Crispy Rice
平時我都唔係好飲冬陰公湯，因為覺得比較辣，但佢呢個冬陰功湯辣到適中，飲落去會覺得好舒服，而且好足料，有蜆有青口，最過癮呢反而係佢有啲脆米令到成個菜式俾到多一份新鮮感我地。 US Prime Rib-Eye Steak 280G with Bone Marrow
牛骨髓好重牛脂味，牛肋肉的話我覺得medium rate熟度啱啱好，肉質嫩滑得嚟肉汁豐富😍   Giant River Shrimp with Mix Cheese Pasta
由三種芝士包括parmesan、mozzarella 同埋cheddar cheese製成，芝士味濃郁就一定㗎啦！上面有仲大大隻肥美嘅蝦，廚師開咗方便我地，同埋應該出餐前炙過，我建議可以將啲蝦肉連埋意粉一齊食，味道會更好！   Thai Lettuce Wrap in Taco Style
呢個菜式首先真係要讚讚佢個碟，用嚟裝住個生菜包真係好fit。我哋平時食開嘅生菜包，通常就真係搵生菜包住啲肉碎，但佢外層就再用tortilla皮包住，都係嗰句，味道夾得嚟又帶到啲新鮮感俾我地😌

  Pecan Tart with Lime Sherbet
其實已經好飽，但都想試吓佢個甜品，核桃撻有好濃嘅果仁味，配埋旁邊既青檸雪芭一齊食，又唔會覺得好流，可以畫一個完美嘅點綴！

之前行過尖沙咀都會成日經過呢間日本居酒屋，今次終於的起心肝入去試試佢！入到去嘅第一個感覺就係餐廳好闊同舒適，燈光亦好舒服，而且職員亦都好有禮貌，會主動問我哋有啲咩唔食，然後介紹返俾我哋🫣 我哋先叫左個刺身盛合(上)，有赤蝦、吞拿魚、帆立貝、三文魚、海膽同油甘魚。我想講佢出嚟嘅擺盤仲靚過menu張相🤭每一款刺身都擺得同第二款有適當嘅距離，確保啲味唔會混埋一齊👍🏻最值得一讚嘅係帆立貝真係好甜！當然我最愛嘅油甘魚 切出嚟嘅油脂比例亦都好好😛 之後就係上個鐵板和牛粒同帶子牛油燒，兩味餸一拎過嚟已經勁香🥹啲帶子勁大粒，牛油味好重，食落亦有啲蒜香，咬落鮮味爽甜，而個鐵板和牛粒嘅汁配埋啲蒜片加上juicy嘅和牛，一絕🫣 我哋見食完頭嗰三樣嘢已經由五六成飽，就再叫多咗個生蠔麵豉鍋。個鍋真係好滿好足料，除咗有目測至少八隻生蠔，仲有冬菇、豆腐同埋菜等等，煲煲吓我仲成日驚佢滿瀉🤔啲生蠔雖然唔係話好大隻，但係味道同數量絕對對得住佢個價錢，性價比極高。嗰日好凍，食完個鍋已經好暖身個人仲有啲㷫烚烚添，所以就叫咗兩個雪糕做甜品，非常滿足！

今日嘅lunch book咗位於尖沙咀嘅遖，食得omakase有時就係唔想諗，等廚師可以攞嗰日最靚嘅同最新鮮嘅魚俾我哋食！
喺講嘢食之前，想先講一講個環境，喺行入餐廳嘅時候已經發現佢嘅裝修落咗唔少心思，而且採光十足，俾人一種好舒服嘅感覺。
坐低之後，我哋分別都點咗壽司十二貫，前菜方面蝦湯茶碗蒸好滑，而個魚乾都唔錯，加埋個蒸煮八爪魚真係一個好開始👍🏻
之後就開始主菜，壽司十二貫！聽師傅講，每一日嘅十二貫都會有唔同，按食材新鮮度而定。 真鯛配鯛魚內臟

厚切深海池魚 配Wasabi 火灸金目鯛 赤背配紫蘇花 池魚仔充滿麻油香 火槍燒過嘅吞拿魚 赤海膽 白子 九繪魚


銀魚配白松露醬 壽司總括嚟講睇得出師傅好有心機去做，每一件壽司上面師傅都會諗一諗點樣令壽司嘅鮮味更加出， 從而去刺激我哋嘅味覺！ 其實食完壽司已經有八成飽，加埋個日本花菇、海綿蛋糕就啱啱好！甜品嘅霖酒提子雪糕可以話係一個完美嘅句號！

早前喺尖沙咀倒數經過焱丸水產已經覺得舖面裝修得好有日本風幾特別，所以隔幾日就黎試一試佢！餐廳裡面果然佈置得好有日本氣氛，打開menu，食物種類應有盡有，我地好快就叫到成枱嘢😳 《麻醬蕃茄豆腐沙律》
蕃茄好新鮮而且好甜，加埋日式芝麻醬好開胃。 《炸一口芝士》
粒一口芝士size剛剛好，一啖一粒全部新鮮炸起，咬落去外脆內軟，芝士味濃郁得嚟又唔太咸太流。 《炸蓮藕片》
蓮藕片炸得薄身得嚟十分脆，好似食緊薯片咁😁。 《刺身5盛》
刺身有盛款，顧名思義就係有五款刺身，包括三文魚  、油甘魚  、  吞拿魚  、帶子 同埋海膽  。刺身清一色全部都係厚切，而家食得岀非常新鮮，味道好鮮甜。 《壽司盛合》
通常餐廳啲壽司盛一叫得數量多就會重覆，但依個
盛合真係有10款唔同嘅壽司，壽司同樣做得好有誠意，油甘魚、三文魚、海膽、三文魚子同好岀色，反而我想講講個看似唔太起眼嘅青瓜小卷，好爽脆。 《  蟹味噌甲羅燒 》 《  芝士蟹肉甲羅燒 》 《鮑魚殼燒》 依到嘅店員會幫手燒好所有海鮮，作為客人唔需要擔心的海鮮會唔熟或者overcook。雨兩款甲羅燒都好足料，其中一款仲有最愛嘅芝士，不過最令我印象深刻嘅都係碟鮑魚一上枱嗰陣仲係郁架緊，我都忍唔住拍咗段片放上ig，好多朋友見到都問我喺邊度有得食🤭 食到口渴，我地叫咗杯Sapporo同巨峰啤酒，我個朋友話杯巨峰啤酒個酒精濃度同埋提子味個平衡攞得啱啱好，清甜得嚟又可以帶出海鮮嘅鮮味。

依間餐廳環境好特別，睇得出佢哋花咗唔少心機去裝修，好有日本風味，座位大部分都係卡位 ，一坐低心情已經幾好！

打開menu發現食物種類都算多，刺身、壽司、小食、串燒，應有盡有！ 刺身
依到嘅刺身種類都唔少，而我哋就叫咗三文魚腩同埋油甘魚，雖然件數唔係話好多，但全部都係厚切，而且非常新鮮😋 特選壽司三式拼盤
拼盤一共有六件，有甜蝦，赤蝦，兩件三文魚，吞拿魚同埋北寄貝，壽司嘅大細剛剛好，應該係師傅手握。
芝士年糕
個芝士年糕同樣出色，食完一粒就會想食第二粒，可惜得三粒，要同朋友搓包剪揼決定邊個食多一粒，可惜我輸咗☹️ 海老野菜天婦羅  最值得一提嘅就係個天婦羅海蝦，因為佢大隻得嚟，食落仲要啖啖肉🤪 一口和牛
和牛粒可以話係全晚最出色嘅菜式，雖然未算係入口即溶嗰隻，但非常多肉汁，脂肪比例亦都好均勻！但個重點係下面個洋蔥，索唒啲和牛油脂香同啲汁，不得了！ 鰻魚炒飯  份量十足，炒得夠鑊氣，鰻魚份量亦算多，係一個好嘅結尾

今日放半晝 同老公諗住食下壽司 之前其實經過呢度好多次 但以為一定要企係度食 所以一路都無興趣 點知原來可以坐 仲分上下層 即刻決定試試佢 我地揀左坐上層 因為下層比較窄咁 幾多人都坐得幾迫對住師傅 又唔係食OMAKASE 唔特別想有呢種拘束既感覺
上到上層佢比我地揀 我地揀左坐窗邊 （得我地坐窗邊所以可以好自然咁傾下計）大部分人就坐左師傅果邊 不過都闊落過樓下好多
一坐底侍應即刻比碗岩海苔湯我地暖下先 個人覺得幾有誠意 起碼唔係連鎖店果種得兩片海帶既麵豉湯先我揀左最平果個 $108 既鮨樂套餐 老公就揀左 $218 既特上壽司盛合 另外我地再外左一個北海道海膽軍艦 同埋炸蝦卷 兩樣野好似每樣大概$68
先講講我個餐啦 $108 有6貫壽司 一件玉子同埋三件拖羅小卷 （最好笑我以為蘿蔔係另一種玉子 一食酸到傻左）食材都好新鮮 雖然因為赤醋既比例較高 所以食到最後舊舊都差唔多味 但呢個價錢都算係咁啦 無乜邊一貫係特別標青 只可以講合起上黎值既然後到老公果個較貴既餐 我諗重點係果三舊好靚既軍艦 加拿大海膽係近期食過最鮮甜既 值得encore 我會記住你! 但另外既蔥拖羅同埋三文魚子軍艦就相當雞肋 無乜特別值得叫 如果你好喜歡海膽 就可以叫呢個餐 否則可作其他選擇北海道海膽軍艦本應係呢餐既高潮 可惜唔夠鮮味 只可以講佢又唔會腥 可以過下海膽癮咁解反而炸蝦卷值得一讚 可能因為炸野都無乜可能失手 哈哈 炸蝦熱辣辣香脆 同赤醋飯出奇地夾 值得再食總結：比連鎖店好 但千萬不要用食OMAKASE果種眼光去試 偶而經過諗唔到食乜可以再食 (Score: 7/10)

好多人排隊呀 應該好多人係因為桔梗既名氣而黎 不過都值得既 一入去覺得 嘩咁大既 都幾寬敞 雖然嘈左少少 但見到有狗仔 好開心呀哈哈 鮭魚 牛油果 香草 ($98) 呢個組合應該無女孩子抵抗到 牛油果醬聽落都夠健康 食落幾清新 伴碟既蔬菜都夠新鮮 芒果燕麥奶搖 ($48) 雖然差唔多50蚊一杯飲品好似唔平 但覺得好好味 上面既芒果夠鮮甜 而奶搖唔會一味鮮甜 幾好味 台北燉牛肉意粉 ($78) 意粉做到al denté 牛肉份量又夠多 鐘意麻辣既朋友必食呀 香蕉合桃 朱古力 冧酒提子 ($128) 最好食係呢一個 窩夫外脆內軟好好味伴碟既朱古力醬同雪糕同樣美味 唔係一味死甜 而係果種朱古力特濃既幸福感 好滿足呀