期待已久的長假期終於來臨, 同事一行4人一早已經約好食雞煲賀一賀去! 4個都係雞煲邊爐怪, 又鍾意食辣, 做晒資料搜集就黎呢間尚上下夏養生雞煲火鍋試下喇. 假期前夕座無虛席, 非常熱鬧, 但店家上菜速度都唔慢. 坐定定好快有得食. 雞煲一上枱已經好香, 配料亦都非常豐富. 我地各有喜好, 於是揀咗半邊淨雞脾, 半邊淨雞胸, 分別係中辣同小辣. 

呢間雞煲值得一讚的地方係, 雞件炒得好香口入味, 而且一D都唔鞋口, 尤其係雞脾個邊, 每一件都好滑好入味, 配料亦都好充足, 成個雞煲都好濃味好夠味! 辣度方面一D都唔可以睇小, 小辣個邊初時無乜野我地仲嫌唔夠辣, 一味食中辣個邊, 但慢慢食落先知勁, 個種辣味係越食越辣, 最後大家都食到雪雪聲! 加埋佢有陣好香的花椒麻味, 辣得好有層次, 搞到我地班港女越辣越想食. 食到中段先發現有意外驚喜, 就係--->豬皮, 豬皮係鍋低煮到入晒味, 實在係成個雞煲精華所在 

雞煲份量一D都唔少, 食完已經半飽, 下半場打邊邊只能叫D蔬菜同少量肉類黎食, 個個食到攬住個肚! 

已經有一段時間無食重慶燒, 咁啱好友邀約, 二人就再次光顧旺角呢間安安燒. 同之前一樣都係咁多人, 不過我地已經Book 好位, 唔洗等就可以入坐. 重慶燒但求夠火喉同夠濃味, 呢間啲的食物都做到呢兩個重點, 加埋佢d肉質大部份都唔錯, 醃得亦都好入味. 而家呢D天氣配埋杯生啤的確過癮!

惹味蒜蓉生燒茄子 - 呢樣幾乎係重慶燒必叫之物, 呢間啲茄子可以算係係King Size, 大大條, D茄子肉燒到軟淋淋好正

三重芝士燒蠔 - 蠔同芝士配搭已經係無得輸, 而且燒蠔比焗蠔多咗份炭香味, 贏晒

燒一口午餐肉 - 午餐肉厚切, 燒到外層香噴噴, 咬落啖啖肉, 最緊要連青椒一齊食, 可減低油膩感

燒手打魚皮餃 - 魚皮餃用黎燒都幾得意, 個皮本身煙煙韌韌, 咬落個饀亦多肉汁, 幾有新意

燒甜美地們菠蘿 - 飯後甜品/水果之選, 燒完的菠蘿除咗多份香味, 而且仲特別點, 作為最後點緻非常適合!

燒黃立倉 - 呢個係推介, 每次黎我地都會叫一條, 原條燒, 皮脆肉嫰, 加埋檸汁同酸甜汁打出條魚的鮮甜味, 好正!

今日同朋友去探一位長輩, 晚飯走咗入個商場, 見呢間餐廳幾乾淨而且都多人幫襯, 就入去試下喇. 食物選擇都幾多, 米線, 煲仔, 湯飯, 西式扒, 意粉都有. 我地兩個都鍾意食小菜, 所以叫咗兩個餸. 欖角肉鬆四季豆夠火喉, 四季豆炒得夠香口又唔會老, 欖菜肉鬆份量都好足夠, 餸飯好好味. 咕嚕肉都做得唔錯, 食落肉質鬆化, 味道唔會做得太甜, 又唔會杰撻撻, 一個小菜連飯加埋大大碗例湯$57都好合理 ,家庭小炒唔錯的選擇.