話說小妹同男友都好鍾意食辣, 好多時出去行完街食飯都鍾意搵辣魚同埋辣雞煲. 不過係香港搵到好味的辣野唔多. 以我地常幫襯的只有幾間. 不過今日試咗呢間尚上下夏, 就會加埋入我地常幫襯的名單當中.

呢間雞煲火鍋係尖沙咀山林道, 男友駕車去都好方便, 出面有代客泊車. 朋友話呢間唔多位, 所以早一個星期已經Book 好, 去到七點幾果然已經滿座. 我地主攻雞煲, 所以叫咗個鴛鴦煲, 一邊係小辣, 一邊係中辣, 試一試佢個辣度. 我鍾意佢有得揀全雞脾同埋雞胸, 全部啖啖肉易入口, 感覺上又會抵D, 每邊叫半份都係$138/半鍋. 雖然係叫半份, 但份量一D都唔少 (見圖). 上枱之後等佢焗多幾分鐘已經急不及待要食, 雞件食落夠滑而且好入味, 因為配料夠多, 所以雞件味道都好豐富, 洋蒽, 八角, 花椒, 莞茜等等, 令到成個煲都充滿香味. 重點係, 佢個辣做得好好, 入口唔會嗆喉, 食落辣味先會慢慢滲出來, 會越食越辣, 但唔會辣到入唔到口, 而且麻味適中. 各方面都配合得好好. 佢配有豬皮, 娃娃菜等吸味食材, 等到最尾先食, 特別入味.

呢間雞煲做得真係幾出色, 難Book位係有佢道理. 下次會挑戰大辣!

今日放假, 咁啱媽咪今日又係屋企, 就一齊去飲下茶喇. 不過今日唔係去酒樓, 而係去咗一間位於觀塘的點心餐廳. 食完野順便可以去APM行下街. 呢間點心餐廳之前食過一次覺得唔錯, 今日特登帶媽咪黎食下.

叫咗幾款點心: 潮洲蒸粉果, 灌湯餃, 鳳爪, 牛肉球同埋馬拉糕加埋個老火湯 (好多野食 XD). 同一般酒樓唔同的係, 除咗會有普通茶, 仲有花茶同埋咖啡可以揀, 我本身想叫花茶, 不過媽咪鍾意普洱. 就揀咗普洱喇. 坐位方面以4人枱為主, 適合返小家庭黎食. 不過坐位唔迫, 坐得都幾舒服.

食物方面, 呢間點心調味做得幾好, 甜品同咸味都唔會過火. 我自己比較喜歡粉果: 一客4粒, 皮夠煙韌, 裏面D餡料夠爽口唔會一pat pat, 唔錯. 灌湯餃: 個湯好濃 (看圖) 而且有蟲草花, 灌湯餃裏面都好多餡料好豐富, 味道做得幾好! 鳳爪同酒樓個D唔同, 佢個"Hin"唔會打得好杰, 鳳爪食落軟硬度適中, 我同媽咪都幾鍾意.

總括黎講, 呢間點心做得唔錯, 足料又無乜味精, 如果得閒會再黎幫襯

好友一向鍾意食辣, 今日佢生日, 我只好捨命陪君子. 一行4 人去幫襯安安燒, 其實我自己都好鍾意食串燒, 但成日都怕辣所以唔會話特別好, 不過今日試呢間安安燒又幾好喎, 佢全部都燒得好惹味但又唔會辣到食唔到 (友人要食辣D就自己加咗辣粉).

雖然得4個女仔, 但叫D野食份量一D都唔少, 大部份都燒得唔錯, 做到好香, D肉類都醃得好入味. 因為本身我鍾意食酸酸甜甜的野, 個人覺得值得一試係佢個車厘茄煙腩卷, 煙腩燒得夠脆口又不失肉汁, 肥瘦適中唔會過多脂肪, 一定要一口食落去, 咁蕃茄汁就會爆出來, 連埋個腩肉一齊食好正! 而另外我都會推介燒菠蘿, 佢有兩隻, 一隻原味, 一隻係要有焦糖個隻, 我鍾意食焦糖個隻, 呢間的菠蘿本身多汁又甜, 加埋個脆焦糖係面就多咗重口感, 好似食緊一度健康甜品咁, 好啱女仔食! 

我本身唔係好食得辣, 不過我都會推介一下呢隻麻辣牛骨髓,佢個麻辣做得好香同好入味, 我自己食咗少少覺得唔錯, 但比較辣, 所以大部份都係由我朋友清晒! 鍾意食辣的朋友唔好錯過啊~

香港美食, 就係勝在成日有新鮮感, 創意無限. 呢間酒吧係正我男友屋企樓下, 睇住佢開張, 都幫襯過佢幾次, 服務同環境都唔錯. 而且隔一排去食又有新野出, keep 住有新鮮感.

今日食完飯約咗朋友去飲野, 見又有新野出就捧下場. 今日試呢款係"辣菜甫雞蛋仔($43)" -> 將港式美食再度crossover. 一甜一辣的味道, 淨係諗, 諗唔到蹱出黎係咩味道, 但食落去又出奇地夾喎. 雞蛋仔新鮮整, 外層脆卜卜, 蛋漿做得夠香, 裏面軟腍香軟, 每一粒雞蛋仔都充滿菜甫, 口感係 脆 -> 軟 -> 爽, 層次好豐富, 而且味道都好夾, 蛋漿甜味做得啱啱好, 唔會功高蓋主, 食落係菜甫本身的香脆味再加埋蛋漿香味, 一粒一口, 令人忍唔住食完一粒又一粒.

呢間好多新奇古怪crossover 食物, 亦係其中一樣吸引我的地方. 雖然食物古怪離奇, 但大部份味道都唔錯, 睇得出店主花過心思去設計. 而且價錢都好親民, 值得推介!