放工約埋朋友食個韓餐，太耐無見，又太耐無食韓式燒肉喇！ . 雖然舖頭細細，但係韓國菜基本款式都有，我地仲叫左隻醬油蟹食添！$198一隻醬油蟹，配埋個紫菜飯，又唔算太貴喎👍🏻依度嘅醬油蟹係韓國老闆娘自己醃製，唔會死咸，仲食到蟹肉嘅鮮味。蟹膏撈埋個紫菜飯真係一流呀！ . 兩個人食唔到太大set嘅燒肉，我地叫個豬肉二人set，包括有五花腩肉，辣醬五花腩肉同豬頸肉。五花腩肉可以燒耐少少，燒到迫出肥油，到油脂變香，再配合旁邊嘅泡菜食，味道剛好。辣醬五花腩肉有豆瓣醬嘅香，實在唔太辣，醃得剛好。仲可以配旁邊燒至拉絲嘅芝士食，又係另一享受。我地慢慢燒豬頸肉到爽脆，我地就係少叫份生菜去包肉食，不過配上芽菜都係不錯。仲有個燒雪耳都好正呀，爽脆爽脆 . 燒肉食到差不多，係時候食個水冷麵清新一下味蕾。我喜歡水冷麵加少少白醋，配上韓國嘅梨子切條一齊食，好清新，好解油膩。

放假同朋友去食個lunch，傾下計，catch up一下。我地揀左間坐得舒服嘅餐廳，慢慢食，慢慢傾。 . 依度嘅點心好精緻呀！ . 魚子醬賽螃蟹餃🦀 隻餃有滿滿嘅賽螃蟹，相對清淡，配上面頭嘅魚子醬，帶少少咸香，無論賣相同味道都唔錯。 . 手磨紅米腸粉🦐 紅米腸粉入面包住脆脆嘅蝦卷，外滑內脆，入面嘅脆皮無被腸粉整到冧，就知佢係即叫即做，保證新鮮。入面嘅蝦亦相當爽脆。 . 金腿蘿蔔千絲酥🥟 依個我個人好喜歡，外面嘅千層酥好鬆化，入面有好多蘿蔔粗條呀！又juicy，熱辣辣，千絲酥下面仲有少少芝麻香，好好味呀！ . 花膠珍珠雞 個珍珠雞外形上已經好吸精，一打開，隻珍珠雞好靚，飯粒係粒粒分明，唔係爛pat pat，係有質素嘅珍珠雞。帶有淡淡嘅荷葉香，食到中間就夾到一件完整嘅花膠，好有誠意呀。 . 高湯海參灌湯餃🥟 我地都期待嘅灌湯餃隆重登場！好大隻呀，仲有一隻海參仔，口感係爽脆嘅。打開隻餃，入面有好多料，有豬肉，有蝦，隻蝦仲係脆嘅，個高湯同灌湯餃完美配合，我地都好欣賞😍

終於有機會同個朋友歎返個放題lunch喇！ . 時間充裕，我地揀個level 4，主打佐賀A4和牛，有多個部位可以揀，依個有肉有海鮮嘅餐簡直係享受，邊食燒肉，邊傾計。侍應先送上一個拼盤，我地可以先試左幾款肉，之後再追加。有和牛角切，肋胛，肩肉，牛肋肉，三角嫩肌，我個人就當然喜歡多油花嘅牛肋肉，同油花細膩嘅三角嫩肌，仲有就係牛味濃郁嘅封門柳，真係好正，正到要encore🤣至於牛角切都幾香，唔會好油膩，食完仲有牛脂香喺口中。依家仲有期間限定DIY壽喜燒，侍應好好話可以幫我地煮，我地當然要享受埋依個席前服務啦🤣先用牛脂起鍋，再加入洋蔥炒香，其後加入和牛煎香至五成，加入壽喜燒汁調味，食得！ . 另外我地都有叫海鮮，大海老，柚子鯛魚，帶子等等，每款都新鮮，個人特別喜歡大海老，鮮味十足，肉質爽脆，真係要一點再點，蝦都食左3隻。 . 燒肉過後仲有Movenpick雪糕做甜品，真係好圓滿。 . 總括黎講，依度嘅和牛質素真係同單點燒肉可媲美，肉質同油花分布都係令人回味，好適合約朋友黎聚會。

今日同事約我食好野，我又點會拓手踭呢🤪🤪 . 我地去左公司附近嘅戀，Tsukiau，食日本料理。lunch set都幾多選擇，有壽司set，有滑蛋豬扒丼，有燒肉燒魚set，太多野想食，我地決定share黎食🤭 . 滑蛋豬扒丼個滑蛋好嫩，而個豬扒係厚切嘅，個炸粉唔會厚，咬落啖啖肉，又有肉汁，配合埋珍珠米，成個組合恰到好處，很好👍🏻。 . 至於燒肉定食就更加吸引。依個set係包一個前菜，刺身三點式🤣三文魚，吞拿魚，同埋元貝，每款都幾新鮮，亦唔孤寒。燒肉一上枱都相當吸引，只係煎到表面熟，中間係未熟，等我地再自己燒，燒到自己喜歡嘅熟度。我同朋友都喜歡食medium rare，我地方上燒烤爐上兩面煎30秒左右，就啱啱好喇。食落唔會韌，但又有咬口，亦有肉汁，有燒汁可以點，不錯呀！ . 食到飽飽仲有飯後甜品添呀！

得閒同爸爸去食下居酒屋都幾好，可以試好多唔同嘅串燒。 . 先黎個海葡萄沙律，我記得海葡萄係沖繩嘅特產，對上一次食都好耐之前喇。依個沙律配上沙律醋，好開胃呀👍🏻 . 白飯魚干都好正！脆卜卜，又有炭香，連爸爸都食唔停口呀！我地原來都叫左好幾款串燒，有厚牛舌，免治雞肉棒，豚肉腩，牛小腸。個厚牛舌好正呀，又juicy，又香，少少嘅香草提味就已經好正，我個人非常喜歡。個免治雞肉棒配住個蛋黃食，好滑好嫩呀。至於個牛小腸，佢外皮燒到少少脆口，入面就似粉腸嘅口感，又唔會有內臟嘅腥羶味，幾好。 . 仲有我地比較少食到嘅雞腳筋同雞掌心。雞腳筋就比較脆，而雞掌心就較有咬口，唔會靭。 . 唔好睇少個粟米，本身諗住無乜特別，但係其實有好香嘅牛油同帶少少咸味，又係好正架，咸甜咸甜。 . 赤魚一夜干爸爸都好欣賞呀，油脂適中，燒完有魚油香，再點埋個柚子汁，都幾清新，唔會覺得好膩。

好耐無食潮州菜喇！ 朋友發現公司附近有間唔錯嘅潮州菜館，兩個人放工就殺過去食返餐🤭 每次食潮州菜，鹵水鵝肉都係必點嘅菜，當然唔少得蠔烙啦。鹵水鵝肉都鹵得幾入味，唔會太鹹，肉質都依然幼嫩，下面嘅豆腐亦都好味，厚厚嘅豆腐嫩滑，同鵝肉互相配合。 至於蠔烙，佢唔係炸到蜂巢狀，係煎香，個邊邊食到蛋嘅焦香，又有大大粒蠔，唔會太多麵糊，香氣十足。 我地仲叫左個芋頭炒香飯，個飯用煲仔上，好正呀！飯炒得粒粒分明，芋頭粒亦好綿，食到底仲有微微嘅飯焦添，幾香，幾好食呀！

今日又同同事出街覓食🤭 . 我地今日食好西，去Me Crab鋸個扒先啦！我地一坐低，睇睇個menu，兩個一齊話，我要食牛扒！🤣要medium rare! 真係約都無咁啱呀。 . 個set lunch先黎個南瓜湯，好creamy呀，又有南瓜嘅香，幾好飲呀。個雜菜沙律就不過不失啦。 . 牛扒好快就送上，佢有炭燒嘅香氣，切開睇睇，又真係medium rare喎👍🏻好多餐廳叫medium rare，上到枱都已經變左7成熟，依度又掌握得幾好喎。食落都幾juicy，唔會好韌，點埋個蜜糖燒汁，甜甜地都幾夾架。而薯條亦都好香脆，幾好👍🏻

我同同事又再出動覓食喇！其實公司附近嘅QRE Plaza有好多餐廳都未食過，我地決定要逐一拜訪😆 . 古琴雅苑就專食烤鴨嘅，一坐低，我地以為要等好耐，所以先叫半隻烤鴨先啦。另外再叫一個至尊拼盤。 . 至尊拼盤可以試到唔同嘅冷盤，仲有我喜歡嘅醉雞，烤麩亦好入味，涼拌青瓜好清爽呀，款款都唔錯。 . 至於個烤鴨都皮脆肉嫩，配埋青瓜，京蔥，哈密瓜，搽上京醬，一口咬落去，口感豐富。烤鴨會奉上一個小碟，有四小片烤鴨皮，依四片特別酥脆，齒頰留香。 .

忙裡偷閒，同同事去飲個茶，食個點心，俾少少空間自己抖抖氣。 . 之前去QRE多數都係去日式或者韓式餐廳食，都無去其他樓層探索下，今日就要打破習慣，去百花漁莊。 . 晏晝有點心食，都有成十幾款選擇，兩個人就叫三個點心，加個炒飯，就啱啱好喇。我去親飲茶都必食金錢肚，今次當然唔例外啦。另外叫左小籠包，同埋燒賣雙拼。 . 金錢肚: 係我喜歡嘅口味，好冧，有咬口，都幾入味，下面墊蘿蔔，吸晒d汁，好味呀！ . 小籠包: 出面一般都係三隻，唔夠分🤣依度有4隻之多，就咁睇個面就覺得好飽滿，咬開就有滿滿嘅肉汁，真係好juicy🤤 . 燒賣雙拼: 雙拼就係燒賣拼牛肉燒賣🤣兩款都好足料，亦唔會太乾，真係即叫即蒸。 . 頭抽和牛炒飯: 個炒飯都幾出色喎！和牛粒無俾醬油味遮蓋，食到牛肉嘅油脂味。而個炒都炒得粒粒分明，個頭抽味唔會完全死咸，帶少少甜味👍🏻 . Lunch時段仲會送紅糖果仁冰粉，唔會太甜，配果仁同果乾又幾襯喎，冰粉嘅口感幾得意，又有少少似啫喱，但係又帶少少少少煙韌感，成個甜品好清爽呀，食完都好滿足☺️涼透心呀

依間手工pasta餐廳開左一段時間，都未有時間去試一試，襯今個母親節就黎食個母親節lunch😆 我地個appetizer 係tomato & garlic on sourdough，味道都幾refreshing，又有唔同品種嘅蕃茄，配sourdough，都幾開胃呀，媽媽都好欣賞。 Main就叫一份breaded loin of veal with tomato sauce and grilled mozzarella，好大份呀👀佢仲要即叫即整，熱辣辣，雖然係炸，入面嘅牛肉都幾juicy。 . Pasta就一份係蕃茄羅勒貓耳朵意粉，同埋一份牛面頰肉闊條麵，手工pasta口感真係會彈牙d，面個蕃茄羅勒口味都幾濃郁，個貓耳朵掛住個sauce，幾好味。而牛面頰肉都煮到好冧，個汁唔會太濃，食到牛嘅味道，兩道手工pasta都唔錯。 . 媽媽都表示滿意🤩