因工作關係經常都會經過荃灣千色店，一路都好想試依間攞到米芝蓮推介既車仔麵小店但經常都坐滿人，今日見到比較少人所以終於決定入去一試。鋪頭細細間坐位不算多，似係舊式平民小店格局，無睇價錢隨便叫左3餸油麵再加杯豆漿，俾錢時發覺原來都已經六十幾蚊，價錢都算偏貴，所以更好奇質素如何。 我配料揀了鳳爪，豬腸，牛腩。先講湯底，佢係偏重味但不會覺得好鹹，係常見加左腩汁既湯底味道，不會重味精味又唔會令人好口渴，算係不錯。油麵滑身但無咩咬口，普通貨式。牛腩不會話太硬或太腩，合格但普通既感覺。豬腸煮得好淋但似係用梳打粉乸完既效果但勝在夠入味，不過個人鐘意厚身有咬口既感覺，下次唔會再叫依款。鳳爪又係煮得夠淋，味道不錯，唯獨無預先剪走鳳爪指甲感覺差少少。豆漿都係一般合格水準 整體感覺係穩穩陣陣，不會話好驚艷好好食嗰種，但都會有興趣再試其他款式配料，不過就唔會一次叫太多款餸，因為去到7,80蚊食一個車仔麵就太貴了

幾年前朋友帶過我嚟澤記話依度既粉麵平靚正，當時只叫了嗰普通牛腩河已覺得十分驚喜，性價比極高，今晚經開長沙灣已經10點半仲營業緊，原來澤記係開到11點的，馬上走入再回味多次 今次食好d選擇了牛坑腩河，因為豆漿已賣晒所以叫左凍檸茶。湯底味道同之前食既無太大分別，味道係剛好不太鹹又不會太啖，恰到好處既湯底，牛坑腩水準又好好，咬口不錯又夠入味，份量又足，河粉份量亦好夠，埋單total $46 算係抵食既價錢，店內廚房加樓面都可以叫得做婆婆了仲要開到夜晚11點，係值得支持既小店

朋友生日好想食片皮鴨，大家決定去試下係K11既大都烤鴨，剛好餐廳又剛裝修完可以趕上朋友生日飯。今次生日飯共七個人，連埋甜品叫左十幾款食品 烤北京填鴨 - 叫左一隻既份量，係以上兩份半隻片皮鴨咁既形式上枱，配料組合有紫蘿蔔，蜜瓜，青瓜，京葱絲，京醬，砂糖同荷葉餅，比一般坊間既片皮鴨配搭更講究，尤其嗰京醬非常出色，加左醬料後將原本已非常香脆美味既鴨皮同鴨肉提升到更美味既境界，包埋配料捲起一口吃下去，可以話係我食過最好味既片皮鴨，只係為依個片皮鴨已想盡備下次再encore 淮陽灌湯小籠包 - 皮薄爆汁夠熱好味道，無咩好挑剔既水準之作 鮮肉鍋貼 - 飽滿既鍋貼非常足料，嗰嗰都讚 二菘炒鴨末 - 可選配生菜或芝麻燒餅，我地選擇左燒餅，將鴨末畢入燒餅中一起食，非常香口惹味，必點之選 農家酸菜魚 - 湯底偏重味但味道係好的，魚肉嫩滑無腥味，索晒湯汁既豆卜都好食 乾煸四季豆 - 都係香口惹味菜，味道不錯，不過略嫌四季豆走油有點過左少少，變得太軟身缺少左口感 鎮江餚肉 - 好有風味既特色菜式，冷盤既鹹食，味道特別好難形容，值得一試 黃金蝦仁炒飯 - 非常美味既炒飯，飯粒充滿鹹蛋黃香，嗰嗰都讚好味，飯面上加柴魚絲更增加了風味，必試之選 甜品共叫了小鴨子酥，高力豆沙，酒釀小丸子，金陵驢打滾四款，因為唔係按人頭叫我無試晒，所以只放相唔逐一評論了 整體係非常滿意同愉快既一餐，已經想再約嚟多次試其他款式了

觀塘駿業街最近都新開左不少食肆，其中一間係專門做外賣燒賣飯盒既港燒味，因為工作地點就係附近，經過鋪面時刻意望一望價錢牌，無堂食既燒味飯盒要成五十幾蚊一盒可以算係非常進取既價錢，甚至有點懷疑做唔做得住，所以一於試一試水準係唔係直係值咁既價錢 叫左一盒切雞肥叉雙拼飯($58) 攞返公司食，有跟一款唔凍既紙包陽光檸檬茶或罐裝coke zero, 因為唔凍所以我選擇左檸檬茶。飯盒係用紙盒做，飯既温度同軟硬度適中，切雞係少見既嫩滑入味非常驚喜，肥叉香口惹味亦夠淋，仲有跟條油菜，薑葱同豉油味道調得不錯又不會太鹹，是屬於好食的燒味飯，難怪咁有信心做咁進取既價錢，只講燒味質素絕對比同街既其他餐廳燒味飯優勝，不過無堂食雙拼成$58真係未必嗰嗰願意試，揾日再試埋其他款先

已食左多年既北京水餃店，平時經開都會買佢地係門口既煎餃同春卷，味道非常不錯價錢又便宜。堂食選擇方面我多年嚟獨沽一味只食淨雲吞配凍豆漿，個人覺得水餃比較鹹所以只喜歡雲吞，隻隻郁夠晒大隻同多餡，不過湯頭比較淡，顏色賣相又不吸引係美中不足既地方。 今次同行朋友點左回鍋肉菜飯，老實講碟飯太大碟，一個成年男人都未必食得晒，回鍋肉份量亦多味道又不錯，係飽肚既好選擇。 另外一定要試依度既凍豆漿，完美甜度又清爽同夠凍，經常飲完都會再叫多杯

藍地新開左一段時間既米線鋪，logo 係嗰好搶眼既師奶，今日終於入去試一試，穩陣先叫左嗰酸辣米線配南乳雞件，再加肉醬同埋蘿蔔同豆漿。 米線外觀不錯，金黃色既雞湯底，配料擺盤都好企理，面頭既甜酸菜好好食，直情想另外外賣買一份攞走，米線軟硬度適中口感不錯，係略嫌湯底有點單薄同偏淡口，肉醬似係罐頭香菇肉醬嗰種味比較惹味，加左入湯底後肉醬連米線一起放入口感覺好味得多，南乳炸雞味道都不錯，整體合格，會回頭再試其他款式

係時代廣場睇完戲，同朋友一起行登龍街揾嘢食，最後選擇左依家朋友以前食過話唔錯既中式麵館。 我選擇左藥膳湯麵既成年人不作選擇版，即係豬牛雞都有既款式。一上菜碗麵係熱到滾的，因類似砂鍋既碗係熱到透，即使過左好耐湯底依然非常熱，係值得稱讚既地方。說回湯底，淡淡的藥膳味，略嫌太輕盈了，不算太突出，而且藥膳湯底加了罐頭粟米粒既感覺有點不太搭，麵款我選了刀削麵，麵質合格，豬牛雞配料亦不過不失。 額外點了的藥膳糖心蛋蛋黃太熟，没有糖心效果。白灼時蔬選了小唐菜，就係簡單白灼後淋上豉油，反而酥炸小雲吞其實幾好食，但就真係好小好細粒。飲品選了凍豆漿，相信真係自製的，但泡沫真係太多，入喉感覺非常不好，近1/4以上都係豆漿既泡嚟。 同行朋友選了新出的芫茜刀削麵配口水雞，我無試所以只係分享圖片就算了 整體就係無太大驚喜，回頭意慾不大。

港島區傳統名人飯堂之一既海都酒家，早前曾試過佢地既兩皇一后大閘蟹餐已覺非常出色，今晚朋友宴客，主廚安排了餐牌都無寫的私房菜單，見識到好多令食客大開眼界既精彩菜式。 頭盤蜜汁腩叉燒伴欖菜四季豆已經驚為天人，入口即溶既感覺尤如食緊大拖羅，而且全無油膩感但又極惹味，肯定係食過最好食既叉燒，而且四季豆切成幼條當冷盤既做法好有新意，保持到爽脆口感又可清新一下味蕾，跟肥美叉燒正好可以互補，精彩。 清蒸江蘇大閘蟹跟上次食過既二皇一后餐一樣高質，2隻5兩蟹公都有極多白膏，而且酒家蒸爐火力同家用無得比，連蟹身既肉都係熱的，屋企好難蒸到依個效果，夠熱既蟹膏同蟹肉味道格外鮮甜，食完大閘蟹配上美味花鵰及薑茶湯丸係必備之選，尤其薑茶極辛辣但又好易入口，原來看似簡單既薑茶係要花極長時間去製作，風乾老薑後再煮兩小時帶出濃烈薑味，大師製法果然係不同。 雞油花鵰澳洲龍蝦又係學到嘢既菜式，據講雞油花鵰係海都既傳統招牌做法，之前多用係蟹類既菜式當中，今次用係龍蝦身上非常之夾，雞油及花鵰混合後風味好特別又帶層次，食完龍蝦連汁我都唔放過，下次屋企都想試下咁煮，用嚟宴客一定好得體。 招牌豬骨湯翅，傳統魚翅感覺都係配雞湯打獻做法為主，用上胡椒豬骨湯真係無諗過，湯底好厚身但不似湯羹般有打獻既感覺，而且一滴油都見唔到又不混濁，盡顯功架。 掛綠荔枝伴葱燒牛柳粒，這種荔枝造型蝦丸雖然我之前無食過，但亦係其他餐廳介紹見過這種做法，相信不是海都獨有菜式，但擺盤肯定係我見過最有心思既一款，以樹枝掛上大大粒既荔枝做型脆蝦丸，再配上一杯杯既惹味牛柳粒成盤咁上菜，賣相200分，而且蝦丸非常美味，紅色脆米外層極香脆，蝦丸味道新鮮調味得宜，賣相味道都係一流既精彩菜式。 彩蝶花非花，係用新鮮大班去骨起肉，再擺盤成花既做型咁去蒸，魚肉鮮美而且不是用傳統配豉油既做法，係用配厚身上湯既做法，魚肉掛汁之餘一樣帶起到魚肉鮮甜味，啖啖魚肉極滿足。 鹿茸菇襌蔬，菌味香濃又有咬口，出色既一味野菌食完唔heavy, 作為最後一味主菜前既一個過渡剛剛好。 最後既主菜係招牌胞皮炸雞，係大路既炸子雞菜式但皮薄而脆，雞肉多準嫩滑，係高水準既炸子雞菜式，不用點淮鹽或醬汁已夠惹味。 點心大根蘿蔔絲酥餅，雖然已經飽左9成9，但大家一食都異口同聲說美味，一般酒家應該不易有依種水準既點心，功夫嘢嚟。 最後仲有菜單上無寫既生炒臘味糯米飯，實在太惹味感覺又不油膩，每人都分一小碗做嗰完美既結美，剩下的糯米飯就由我打包返屋企，盡興而歸。

位於藍地大街最入既位置，主要客源相信都係靠附近既屋苑，裝修算頗舒適光猛座位亦多，而食物款式同menu 設計，相片等都比人一種家庭式經營既感覺，價錢亦都相當平民化，除了食物款式多特飲款式亦多，似係餐廳+台式飲品店混合體既感覺 手撕雞烏冬，因為都係因大路麻醬關係味道好正路，麻醬份量充足夠晒味，配雞肉亦係正路配搭，基本上都好難會整得唔好食，穩陣之選 咖哩牛腩飯，帶有椰香，但咖哩汁係薄身較為"水"既感動，撈飯食時略嫌不夠惹味，牛腩亦偏韌，擺盤賣相不錯但味道一般 飲品之前有一款芒果紅茶非常不錯，但最近都好似無再提供了，其他試過幾款都中規中舉，所以都係叫返凍檸茶穩陣

睇完戲一行九人揾嘢食，經過佐敦既順德公漁村就即管睇下收爐未，嗰時都差唔多晚上10時，好在都肯做埋我地依枱客。之前係觀塘食過幾次都覺得幾唔錯，但觀塘店close 左之後好耐都未食過了，但因為都近收爐時間，好多想食既款式都已經無晒，最後就隨便叫左幾樣餸，名字都不太記得了 啫啫鱔煲夠晒惹味，可惜太夜無晒白飯 咕嚕肉粉漿幾厚，外表亦唔算脆，味道正常但口感一般 小炒王係用我最鐘意既甜豆嚟炒，配上蝦仁，蝦干，腰果等等，好味 外母生炒魚餅豬爽肉，臘肉，豬肉同魚餅都係惹味嘢，芥蘭亦炒得剛好，不錯 蒜蓉炒菜心，火喉恰到好處，簡單好味 不清楚叫甚麼名既炒飯，似係有薑粒加蝦仁菜粒，不過火喉十足飯粒分明，極有鑊氣，意料之外既美味