星期日都冇得抖，做野做到過曬飯鐘冇胃口，於是，來個coffee break啦。久聞呢間店的大名，但作為一名大叔，要去呢種年輕人的駐腳點，談何容易，鼓起勇氣之先，就係要先找到大廈入口，都幾難搵。 安坐在店中央的小檯，果然周圍都係後生仔女，看著店子的裝修，有格調，但比想像中殘舊。 只是叫了飲品和小吃：西班牙咖啡，咖啡味出，有誠意唔係行貨，上面的雪糕食唔出咩牌子，但味道佳，略嫌冰太多成杯飲品份量有限；反而薯條份量多，炸得夠熱夠脆，非常ok，當然一班人分享就更佳啦。希望下次能結伴再來試真一下主食和飲品，在輕鬆音樂下分享咖啡的味道。

工作壓力大，其中一個應對方法，當然係食物治療啦，今日病情嚴重，所以要落重藥，去食貴少少。 到了和匠，平時路過見好多人，難得今日有位，坐低二話不說就叫了汁燒極上牛丼($92再加埋一)，叫得極上，梗係有番咁上下，於是滿心期待，上菜了，簡潔的一大碗飯，另逐一放低麵豉湯，青瓜前菜，蒸蛋。 牛小排六片，well，份量ok啦，但原來躲在洋蔥低下，有兩片牛超肥，每片都有一半係肥膏，結果啲肥膏裝滿個湯碗蓋，唉，我係肥人，都唔係咁益我掛，講番食物，牛小排係好味既，肉質很嫩既，調味亦對版既，至於湯及其他都是一般般，沒什特別。作為午餐，如果我冇帶住高高既期望而來，基本上，都ok既。

為咗賀一賀我自己被人炒魷魚，於是就決定搵間貴野來食午餐，佐敦有很多酒樓，今日就去了不倒翁。 雖然價格比隔離左右的酒樓貴，估唔到午市時間都幾乎全滿，好彩牆角仲有張對碰檯比我，雖則話賀自己，但胃口麻麻，所以只叫了三個點心。 牛肉腸，非常熱，唔似拉定，腸粉皮厚，有咬口，牛肉稔滑。小籠包，包皮略厚，冇乜肉汁，肉味一般，唔算係好選擇。蝦餃好掂，又大隻又鮮味，心水推薦。 食完埋單，雖然我一支公兼生面口，都送我蕃薯糖口，心裏感謝。

一個人飲茶，難度在於叫幾多個點心，但你亦可以考慮一下，唔叫點心。今日被人鬧完，想有一個鐘(其實得半個)逃離現實，於是去心宴飲茶，坐得舒服，又有大電視，啱曬一支公。 如果你嫌貴或怕肥，呢篇食評未必適合你，因為我叫了乳豬燒骨及福建炒飯，又肥又唔平。 乳豬燒骨($28)，當然係骨多過肉，呢度既燒味向來有水準，所以大膽一試，肉香口，骨脆，有部分可以連骨都食埋，送啤酒就正(返工唔飲得)。 迷你福建炒飯($58)，飯底炒得唔算油，主角當然係上面的餸和汁，有蝦，帶子，雞，菇，菜，分量足，味道ok，適合我唔想用腦一口一口送飯入嘴巴。 埋單$92，其實，唔算好貴啦，填飽肚子，換了半粒鐘腦筋清淨。

自從被炒魷魚，預備執包伏走人，都諗有咩食店想再幫襯。油尖旺早餐選擇何其多，呢間都要一去再去。 早餐叫了麵+奄列：火腿麵用隻偏平的碟裝，好得意，麵身有點似福麵feel，應該唔係大光麵，奄列煎得少少燶，內含唔少餐肉，奶茶的橙紅色膠杯好懷舊。 如果只係講食物既質素和味道，我真係搵唔到理由叫你去(只限早餐)，但去了幾天，見到成班都係熟客，姐姐店主們落單堅持唔寫字，一份一份用口講，難免錯漏，一份一份慢慢整，亦考驗大家有耐性等，但偏偏熟客keep住來，我相信，除了加一蚊就可叫凍飲外，更令人吸引的，應該係店主的人情味，好似媽咪整早餐比你食咁款，令人日日都準時報到。

幾年前多次同媽媽幫襯位於鴨脷洲西邨的百分百，記憶中，感覺良好，於是，今日晨早開工去了華景山莊附近，別無他選，就走進百分百吃個早餐先。 地方寬敞，坐位舒適，選了雞扒加通粉。有紋通粉份外討好，不會太稔，湯底夠濃，合格以上；奶茶以連銷式集團來說，唔錯；雞扒份量唔大，大胃王應該會唔夠，雞扒冇雪味，但同時調味較輕口，而醬汁亦淡口，多士一般，反而隻蛋有驚喜，食到少少流心。 加分1: 回味與媽媽一起吃百分百。 加分2: 隔離檯食客話豬扒唔熟，侍應二話不說即刻換新的比佢，處理恰當，抵讚。

如果不是因為工作關係，我相信怎樣都冇可能會來到崇潔街，估唔到，短短一條街勁多食店，間間都好吸引，日韓美食，中西餐都有，考起我呢個選擇困難症患者，哈，最後去了探訪Auntie，正值午市，好彩有位，選了牛扒午餐。 甘筍忌廉湯，湯身夠杰，口感濃厚，味道唔會一味死鹹，配牛角包，包身微暖，雖看來唔似自家製，但算有誠意；牛扒叫了五成熟，上菜時切開果然夠生，亦易切易咬，唔會太多筋，牛味一般，反而個汁略鹹，蓋過了牛味；最後飲埋凍檸茶，可惜個茶底冇乜味。整體上滿意，午餐急急腳的話，是不錯的選擇。

雖然寫字樓在西九龍，但工作需要港九新界都去，今日晨早要去油塘做野，本著支持小店的精神，所以唔幫襯商場內集團式食店，反而走入街市搵太子，當然，入到去就發現，乾淨的裝修+闊落的卡位+勁大的電視，基本上沒有半點街市味道。 叉燒一丁，整齊的四片叉燒，貼心的附上幾條菜，叉燒唔係頭頭尾尾，亦冇話硬實實咬唔開，莫非就係在隔鄰的燒味店取貨所以較新鮮？餐配選了珍寶腸炒蛋多士，成個餐味道正正常常，奶茶夠熱但茶香一般。價錢38蚊以街市而言少少貴，應該揀咩？街市feel收費平？食好D收貴D?

炒魷魚後就開始周圍去見客人交待工作，於是就去土瓜灣了，我從來都唔熟呢頭地方，對我來說搵食好艱難，前往工作途中見到呢間餐廳，我曾經在堅尼地城多次幫襯，質素心裏有數，所以做完野行幾條街都回來食晏。 一到門口，咦，原來是開放式餐廳，望望門口的大餐牌，再望望出面的下雨天，就不作他選了，再睇真，原來是排隊購票，叫了燒汁牛肉定食，自己取餐，唉，見到紙碗紙碟已唔開胃，忌簾湯不過不失，牛肉真係唔太得，樣貌似廉價雪藏肥牛，成品卻連吉野家也比它好(真心認為吉野家幾好味)，沒有肉味都預咗，最慘係有筋𡁻唔開，加埋碗飯好痴住個紙碗，成件事令人好灰，於是我就做了大嘥鬼，食唔曬。 正面啲諗，唔關食物事嘅，係我被人炒魷魚心情唔好啫。

我唔覺得侍應當我係熟客，因為佢地唔識我亦唔知我點稱呼，但我呢兩年都幫襯了超過十次，由冇折到有折再到冇折，喜歡呢度，皆因地方靜局，而且有免費wifi，食物就穩穩陣陣。 其中一樣頗有水準的就係呢度的磨菇湯，喂真係好磨菇，雖然口味都幾重，但口感好，味道亦好，餐包以前是大大隻那款，但好多時焗到過硬，近來轉了細包仔，唔錯。好多時主菜我會叫卡邦尼意粉，表面上食少些肉，實際比肉更肥，呢度煮的意粉有咬口，至於汁醬，唔知係咪離愁別緒影響，好似冇之前咁好味。