今日傍晚嚟到油麻地度睇電腦，就食埋飯先返屋企。可能依兩日天氣凍，突然好想食雞煲，諗起有朋友推介，就嚟咗呢度試下。 一入門口就見到非常非常之靚嘅旺角市區夜景，簡宜有種大地在我腳下嘅feel。 坐低之後店員就會隨即奉上「混醬寶盒」俾客人混醬。 睇下有咩食先～依度算係主打雞煲，仲有好多款唔同款式嘅湯底，但今日一心衝着雞煲而嚟，所以就揀咗重慶麻辣雞煲，要BB辣。因為已經有半隻雞嘅關係，唔想食太多肉，所以就另外再點左一啲海鮮同配料，再要左杯鹹檸七，好豐富喇！ 首先嚟嘅係飲品，食雞煲呢啲比較重口味嘅嘢，飲杯冰凍嘅鹹檸七，就又聚火又解辣喇！而且依度嘅飲品都超大杯，食火鍋令人飲得盡興好緊要！ 然後主角雞煲就嚟喇！雞煲嘅雞件本身已經熟咗，輕輕滾翻熱佢，就可以開動喇！ 雞件好大件，好厚肉，醬料掛得啱啱好，味道當然係夠，但係唔會太油太鹹，BB 辣仲有少少刺激，就算係冇送白飯都唔係太重口味。 之後其他配料就陸陸續續咁嚟喇，叫咗脆肉鯇魚腩、桂花蚌、手打牛丸、冰菜同埋佢哋招牌嘅芝士響鈴。 食晒雞件之後就叫店員嚟加湯，因為叫咗蔬菜，唔想太油，於是我就撇左啲油佢就岩岩好喇！ 冰菜係冬季限定嘅，上邊係好似有一粒粒水珠咁，食落係非常之爽脆清甜，我係好鍾意食，未試過嘅一定要試下！ 桂花蚌同脆肉鯇魚就又係我嘅最愛！有一點嘅話，我通常都會叫。 桂花蚌灼一灼就食得，入口又鮮甜又爽滑，好正！ 脆肉鯇魚腩切得好大件，又爽又彈，好滿足。 牛肉丸係自家製手打嘅，入口有好濃嘅牛肉味，好似食緊「牛滑」咁！ 至於鋪頭嘅招牌芝士響鈴，上枱嘅時候仲熱辣辣，應該係新鮮炸起。略略過一過湯，一啖咬落去，又香又脆，啲湯汁又爆出嚟，入面仲有一層芝士會爆漿添！仔細睇一睇果然係一層芝士喺入面嘅，係比較特別！當然啦，一個人都唔食得太多件，食左依個都唔使食粉面喇。 留意返呢度如果係7:30之前埋單嘅話，火鍋配料就會做返有半價，算係非常之抵食！又多一個食雞煲嘅新選擇。 食下食下，一開頭時間尚早時比較清靜嘅鋪頭，就轉眼間都坐滿晒，果然係唔少野！

今日星期六咁岩行去大圍買啲嘢，時間黎到大概下晝2:00 ，朝早食咗嘢但冇食LUNCH，有啲唔三唔四，但有少少餓，就諗住都係食啲嘢先。行過見到呢度竟然唔知幾時開咗間新(?)西餐廳，店出面擺咗好多餐牌，好似都唔錯咁，就入咗去食啲嘢喇。 唔好講笑雖然話已經差下晝2:00，但推門入去先發現入面竟然都仲差唔多有八九成滿，喺一條咁靜嘅街都算幾有趣，而且仲見到有外籍人士嚟幫襯添。 坐低先望到成間餐廳個感覺係比較有格調，佢係算半BAR半西餐廳咁，天花吊左一盞好大嘅水晶燈，有種低調嘅奢華，算係幾落本嘅裝修，大圍後街街坊小店黎講有啲估佢唔到。店內有電視播直播球賽，夜晚黑應該幾適合一班人嚟睇波或者傾計。 睇吓餐牌仲係serve緊午餐，因為唔係十分肚餓嘅關係，所以就叫咗一個全日早餐嚟試一試。午餐包沙律或者餐湯，再加餐飲，都係一百幾十蚊有交易。 先來餐湯，是日餐湯係南瓜湯，夠熱，飲到有少少南瓜蓉，唔會太甜，亦都唔會係成口粉，唔錯。 然後主菜全日早餐就上檯，一睇陣容都幾鼎盛。有德國香腸、松露炒蛋、燒蕃茄仔、牛角包仲有砌成好靚一朵花咁嘅煙三文魚。 先試一試比較特別嘅黑松露炒蛋，一般來講我麻麻哋鍾意食坊間嘅松露乜乜乜，因為通常嗰陣黑松露嘅味都會好假，有時甚至有刺鼻難聞嘅味道。但呢度嘅松露醬味道唔錯，有返菌類嘅香氣。蛋炒得幾滑好嫩，唔錯。然後係細細粒嘅蕃茄又甜又香又好juicy，可以減低油膩感。個煙三文魚呢，都唔錯，食落有魚油嘅香味，唔會話太鹹。 德國香腸係非常脆皮，好正宗，好似喺德國餐廳食到嘅，有肉味亦都有香草味，一咬落去好juicy，係真材實料，應該係比較優質嘅來貨。 有驚喜嘅就係佢地嘅牛角包，唔知係佢哋自家製定係來貨 ，暖暖的，一咬落去係非常鬆化，可以見到入面嘅氣孔好靚，唔會話好油膩索哂油咁。唔怪之得我聽到隔離枱嘅外籍人士都話依間野嘅麵包真係好唔錯。 最後包連埋一杯熱檸水，幾十蚊就食咗一個好唔錯嘅late lunch。 我見到佢門口出邊好多餐牌，研究左一下，好似夜晚嚟食晚餐嘅話，仲有好多更多套餐同埋特色啲嘅西餐可以揀，下次過開嚟一定再要試真下。

說起來也有很久沒有入九龍城了，是晚放工要過來買點東西，路過看到有間新開的泰式串燒店，就進來吃些東西才回家。
串燒店在打鼓嶺道街尾、龍城邊陲，離城中心大概只三幾分鐘路程，但入夜後，就是有一種清清靜靜的感覺。 推門進去，由於時間尚早，暫時只有一檯年青客人。店經理迎了出來招呼，然後一個人就佔據了一張柱子旁的二人桌，自成一角。四周打量了一下，店面裝修乾脆利落，微微帶點東南亞風情，沒有一般串燒店的喧鬧油煙，感覺上是約人聊天聚會的好地方。
點菜就用一張「點心紙」，主力供應的固然是各式串燒，肉類海鮮蔬菜也有，然後再加一些基本的泰國菜式、小食跟粉麵，以小店來說，選擇也是豐富的。 一個人吃得不多，但憑感覺心多多的也畫了一堆串燒，再加一杯泰式鹹檸七來聚聚火，粉麵就真的吃不下了。
先來的是泰式鹹檸七。跟想像中有些不同，是完全沒有冰的，鹹檸檬已經預先被篤得粉碎，方便客人連渣一起喝，有意思。 串燒當然是要即燒的，也要略略等了一會第一batch的串燒才上檯，有燒蜜糖雞中翼、燒牛柳串、厚切鹽燒牛舌、燒雞心 、燒墨魚丸、燒泰式魚餅、燒雞肉腸，竟然也是一大碟了。 燒蜜糖雞中翼($14)－ 吃燒烤怎能沒有燒雞翼呢?! 還原基本步，要了蜜糖雞中翼，新鮮熱辣，皮微脆，肉嫩，也醃得夠入味，簡單就是美，是一個很不錯的開始。 燒牛柳串($14)－ 牛柳肉質鬆化，但又不會太過被梳打粉招呼過，輕輕的灑上一點孜然粉，再掃上一蜜糖，燒得香口，又帶juicy，很好。 厚切鹽燒牛舌($22)－再來就是牛舌，一看果真是「厚切」，幾乎有太卷般厚了，拿上手是「墜手」的，但豈不是容易很硬很韌？一口咬下去，咦?! 出奇地竟然外皮脆肉是稔的，肉中心更是帶點軟懦的感覺！一邊吃一邊在想，也有可能是先把牛舌鹵煮稔了才把外皮燒脆，是精采的。一串兩大件才賣$22，攪什麼?! 燒新鮮雞心 ($22)－ 標明是「新鮮雞心 」，燒得是略帶乾身，咀嚼起來，就是有一朕內臟特有的鮮甜甘香的感覺，喜歡內臟的朋友可以一試。 燒雞肉腸($10)－不知怎的，吃串燒，個人總是喜歡也叫幾味“processed food” 助助興。最喜歡的，就是這款最“basic” 的雞肉腸。沒有去考證是不是採用了廚師腸，但雞肉腸燒了以後，沾了蜜糖的皮微微脆口，肉質會變得稔滑，又香又軟，令人想起郊外bbq。這是個人最喜歡的雞肉腸演譯方式。$10 有兩條，便宜令人發笑，甚至可能是比屋邨大排檔還要便宜。 燒墨魚丸($12)－墨丸應該是來貨的，還好也不是一口粉的貨色。吃起來也有墨魚肉和脆骨，還可以的。 燒泰式魚餅 ($14)－個人飛弗。泰式魚餅應該也是來貨，咬下去是比想像中更加軟稔一點，也可以的。 吃到中途，剩下的幾味也來了，分別是燒翠玉瓜、燒白鱔，也有燒菠蘿。 燒翠玉瓜($12)－ 吃了太多肉類，總要來一點點蔬菜清清胃口。翠玉瓜燒得剛好，一咬下來，爽脆多汁，好吃。
燒白鱔($38)－接著就是期待以久的燒白鱔。個人喜歡吃白鱔，這裡的是「窄身厚切」做成串燒。沒有多餘的調味，就是爽脆、彈牙，唯一不滿意的，就是一串，一下子便吃光了。 燒菠蘿($18)－最後來個燒菠蘿作為「甜品」。菠蘿應該是有挑過的，又或應該是直接選用了金菠蘿，一客份量也不少。一口咬下，甜甜帶微酸汁液在口中迸發，為這一餐串燒畫上一個直接了檔的句號。 一邊吃著串燒，一邊感受著片刻悠閒的時光。時間漸晚，店裡也陸續來了客人。不要以為只吃了一堆串燒，沒有吃粉麵也是10成飽。埋單不用$200，貴嗎？吃串燒從來也不會超級平，始終是手工心機製作，就是當掃街站著吃的街鋪或大排檔也要十多元一串的時候，這裡坐得舒舒服服價錢也是差得不遠，食物又有水準，個人覺得是值回票價。 推門離開，才發現忘了拿外套，經理見狀立即幫忙跑進來替我取回，小店服務是真心不錯的。

話說石門京瑞一期商場地下依間日式shabu shabu店，見到佢裝修左好耐，呢個禮拜終於開咗喇。今日就趁去石門買嘢，一於就黎試一試佢哋嘅lunch先。價錢來講就係算係同其他日式shabu shabu店差唔多，幾標準。 lunch放題有$118同$168兩個價位。同一般日式火鍋店一樣，都係每人揀一個湯底（湯底都有例牌果幾款啦），肉品任食然後再喺出面蔬菜丸類飲品任拎咁。 之前行過見到佢哋門口個牌寫住星期五六日公眾假期有lunch放題，係開11點嘅，咁今朝瞓晏咗就諗住早早地11點嚟到就食啦，點知嚟到就見到佢地好似有排都未開，所以唯有行一陣，四圍兜一兜買住野先。之後兜左幾次返嚟，發覺佢都係未開，見到好多本來喺門口等緊嘅人都話又走咗。最後竟然等到12點先開門，足足比佢門口寫嘅時間遲咗一個鐘！我估可能餐廳新開張未咁有效率可以準時開，但建議餐廳可以更正一下，免得客人空等，呢度印象分左就要扣少少喇。 12點開門嘅時候大家擾攘左好一輪先安排到入坐，揀左貴Ｄ嘅＄168個prime 牛肉+黑豚肉set，要返最穩陣嘅北海道昆布湯底。不過睇真啲原來lunch放題限時只係得60分鐘，喺香港比較罕有，但我今次一個人黎食應該ok掛。 首先出去巡一巡。飲品方面，就有荔枝茶蘋果茶之類，亦都有汽水無糖茶任飲，都唔錯。 雞肉就任拎，丸類呢就有貢丸、麻辣包、芝士丸、芥末沙律醬包、芝士腸仲有菇類烏冬公仔麵之類，選擇唔係非常多，但係都算OK。 蔬菜類就正常啦，比較特別有冰菜同羽衣甘藍。 攞完嘢食返到埋位就見到牛肉豚肉同埋湯底已經嚟咗，但係湯底都又等左好一輪先至開始滾。12:05進店後一開單已經開始計時，其實進店起，到埋好位拎埋嘢食個湯開始滾可以開動嘅時候，其實都差唔多過左成15至20分鐘，即係話其實只係淨返大概得八九個字食野。 食物其實係唔錯嘅，prime牛肉質素ＯＫ，肥瘦適中，當然日式火鍋嘅style就會刨得比較薄啦，但係都唔會話好似張紙咁，食得出肉嘅質感。我偷睇左人哋普通嘅嚴選牛肉($118)，質素好似都唔錯，CP值似乎就高D。黑豚肉同雞肉就正常，煮太耐就會變柴。昆布湯底幾足料，味道唔錯，幾鮮甜，能夠帶出食物嘅原味，唔會完全好似清水咁。印象最深刻嘅食物，就係冰菜同麻辣包。冰菜灼一灼之後就非常爽脆鮮甜。麻辣包就最有驚喜，咬開入面真係有好香嘅麻辣香味，有啲啲辣油咁好香好刺激，我都食多咗兩粒。其他仲有啲糖果，夜晚好似應該仲會有雪糕供應。 店內裝修就正常，乾淨整齊，不過擺檯算迫，兩人檯比較窄，我自己一個人嚟安排左兩人枱但其實差唔多要霸晒成張枱。但佢地嘅放題食物檯就分開兩處，分別喺店面嘅一頭一尾，一邊係蔬菜，一邊係丸類，所以幾乎每個客人都要成間店行勻，就比較唔方便。而且我被安排坐咗喺中間嘅位置，就喺走廊邊，走廊只係夠又係一個人經過，變咗好似成日都好多人擦身而過，就比較坐得唔係咁舒服。 因為自己一個人嚟食，所以就唔需要傾計，可以埋頭密密食，但最後都係只係食到3盤牛肉（每盤4塊)，最後2, 3分鐘先用食哂煮好嘅烏冬! 但係其實石門呢度其實假日其實好多時都係有家庭客，見到六七成都係家長帶著一兩個比較小嘅細小朋友反黎，大嘅都係7,8 歲，黎食一個60分鐘嘅火鍋放題，個人感覺就真係比較有挑戰性喇，更加唔好話帶住3-5歲小朋友果D。我見到隔離嗰檯一家三口最後15分鐘買單嘅時候，第一round肉都係食咗3份2，好似完全根本都唔夠時間食咁樣。而且食到時間剩返15分鐘嘅時候店員就過嚟買單，坦白講啦咁樣有少少騷擾，因為好似感覺上又好似冇咗幾分鐘咁。但係價錢來講，佢哋價錢只係標準，又唔係特別優惠，但時間只係得60分鐘，其實唔係太係唔夠食，未必夠飽，操作上有啲困難，希望店方可以改善下呢一樣野，例如改成70-80分鐘都好。尤其呢度都唔係話市區頂級嘅旺區，都唔需要SET到時間咁趕嘅。 埋單＄１８５，算ＯＫ的，但唔係十分抵食，而且食得太急，同長輩黎要考慮一下。

之前見到佢哋買依間餐廳賣廣告賣得好行嘅五顏六色小籠包，就覺得好得意。今日約咗朋友嚟MK食飯，我都唔知道原來依間餐廳，就係食呢個彩色小籠包嘅地方！既然一場黎到，當然要好好試一試啦。 叫咗一份彩色嘅小籠包，我記得係有就係有原味，蟹粉味，麻辣味，鵝肝味之類嘅，仲有人蔘味，芝士味咁，有啲就比較正常，其實都算係食得出佢咩味道嘅。個人覺得最深刻印象係麻辣味，個味幾出，幾香，又唔辣。 其他仲叫左一Ｄ小菜同埋包點啦。依一味蟹粉豆腐都唔錯，份量都幾多，豆腐好滑，應該係用左盒裝豆腐。不過個蟹粉汁就鹹咗少少，可能係師傅落味落重手左，攞嚟送白飯就好。 甜品呢就叫咗一個驢打滾，佢應該係糯米卷之類嘅嘢，夾埋裡面係豆沙，外面再在沾上黃豆粉，係非常之軟糯有咬口。旺區黎講，依度食物都唔錯，又坐得幾舒服，位置又非常方便，感覺都食得過嘅，如果下次約朋友喺依頭食飯，佢都可以考慮吓。

沙田新城市地下，其實都有好幾間餐廳。如果午餐想食西餐嘅話，依間Parkview會係一個選擇。
今日叫左個雜扒餐set lunch，陣容其實都鼎盛。除咗一般雜扒有嘅牛扒豬扒之外，仲有羊架，半隻開左邊嘅虎蝦同埋脆皮腸，都幾豐富。配菜有燒翠玉瓜同薯仔，配埋同埋執醬汁食都OK，翠玉瓜都好，好爽脆多汁。 唯一就係呢度係半開放式嘅同商場，有時可能會比較嘈。價錢當然係新城市價，都唔係算平，但午飯時間日日都幾多人嚟食㗎。

沙田新城市廣場嘅底層有一間明珠閣，其實係好似飲茶咁食點心嘅。佢地午市嘅套餐都幾抵食，有單人粉麵餐，或者有兩個人以上就可以試二人餐，就最抵食。佢哋嘅二人套餐，有燒味，自選嘅點心，同埋炒粉麵飯，都係百二三蚊到，兩個人食其實一定食唔晒！差唔多３個人黎，都可以叫一份二人餐再加一兩樣點心。呢度比較推薦嘅就係佢地嘅叉燒，全部厚切，同埋部位應該揀過嘅，都係帶少少肥的梅頭，如果散叫嘅話其實都幾貴。 另外，當然仲有啲而家新興造型非常可愛嘅點心，好似依個一個雜錦三色包咁樣，最可愛嘅豬仔拎咗係手會係唔捨得食，餡料一般都係朱古力，豆沙，奶黃之類。如果行開附近要飲茶，其實可以一試，唔一定要上7樓去美心嗰度排隊啦。

老實講呢間薄餅店其實香港都開咗幾多，包括沙田有分店我哋都行咗好多次，但係唔知點解其實我自己就從來都冇黎過。今日晏晝先就第一次幫襯，一於嚟咗試下。
見到佢哋個LUNCH MENU好似選擇唔多，但既然諗住試吓佢地嘅Pizza，我就選擇左海鮮pizza啦。 當然啦，佢哋係正宗嘅鬼佬Pizza，唔會係好似鞋底咁厚，咬落去真係非常薄，好似有一張紙咁薄，香脆唔油膩。薄餅上面就輕輕搽咗應該係蒜蓉牛油嘅醬，之後上面都鋪左好多海鮮，擠少少檸檬汁，簡單直接，鮮味也美味。因為個Pizza底比較薄嘅關係，所以一個就係一個人嘅份量，一個人差唔多都食晒一個。
如果突然在附近想食鬼佬Pizza，依度都會係一個快捷方面的選擇。唯一就係lunch選擇就比較少，如果帶住老人家，或者咁啱果三款幾口味係唔啱嘅話，就會比較難選擇喇。

今日喺馬鞍山，近近地就揀咗喺頌安邨嘅百匯軒食飯。之前依個舖位好耐好耐都係稻香，係幾個月前就唔續租做。裝修咗之後就，變咗而家嘅百匯軒，好似係百樂門的。間酒樓人士行過見到都幾多人，可能因為近街坊地方啊，之前新開黎過一次食晚飯，感覺都唔錯，今次又嚟咗食飯。 叫咗一個孖寶，即係清蒸石斑一條，配半隻吊燒雞。另外都見到佢幾多海鮮嘅選擇，不過不過今日隨便嚟食飯，就嗌左幾個小菜就就算啦。除咗個孖寶，然後再叫多個特價嘅懷舊小菜，咕嚕肉同金銀蛋莧菜，三個人都應該好夠食。 最快來的就係一品吊燒雞，一上枱嘅時候我哋都有少少呆左，因為真係好細碟，好似半隻燒春雞咁瘦小，影出嚟玩OK，但係可能佢擺得有啲鬆散，變咗成個感覺好似好小好細嘅。味道都還可以，雞皮係非常之脆，雞髀地方肉質都幾嫩滑，配嘅甜豉油都唔錯。但係可惜就係，雞胸嘅部份就比較乾，係炸到乾晒咁，就比較差一啲。因為份量比較少嘅關係，如果係四個人應該都會麻麻地夠食。 另外嘅特價小菜食咕嚕肉，都係比較細份，其實你話特價佢都已經成$60，咁味道就一般，好似比較清淡，唔太夠味咁。 反而另外嗌嘅金銀蛋浸莧菜就唔錯，份量都幾多，好大碟，菜比較嫩口，應該係有揀過，所以整體感覺都唔錯。
最後嘅就係孖寶嘅蒸青斑，你話有一斤應該係有，因為份量都幾大條啦。喺酒樓食蒸魚，一般來講都唔係海魚架喇，係養班，但係佢哋蒸煮嘅火候會掌握得好，魚肉質都幾鮮嫩，豉油熟油同蔥絲依Ｄ配套都合格。係唔錯嘅，送白飯食一流。 雖然係只係食餐便飯，但都要四百幾蚊，其實都唔算十分之平。呢度嘅環境係新裝修，都可以，但係因為佢哋嘅枱就擺得比較密，而且安排入座嘅時候，佢會將客人先安排起一堆，所以就感覺上坐得唔係好舒服，加上電視播嘅節目麻麻哋，所以其實環境就一般啦。而且招呼時應嘅侍應就比較忙，又唔太醒目，成日都睇唔到人揮手，所以就差啲啦。 最好笑就係食緊嗰陣時，唔知點解見到隔離有咁多人都係食龍蝦同燒鵝，有啲唔明。點知出到去先睇到個廣告版，原來唔使$40左右一份特價菜色，但係入邊嘅菜單好似係完全冇，真係唔覺眼，我哋食完出嚟先睇到，就真係有點點兒那個。感覺上酒家搞得呢啲promotion嘅，就可以做得好啲，如果唔係俾人個覺得就好似有特價嘢都唔俾人睇到嘅，就唔係咁好。希望下次有改善下，話哂都做街坊生意。

呢排轉天氣，可能係秋天黎到啦，個人比較乾燥，好似有少少熱氣。行過見到鴻福堂，龜苓膏竟然做緊買一送一！咁就入去買咗兩盅食下。 之前好多年前有比較過鴻福堂、海天堂，同埋健康工房嘅龜苓膏，好似科學數字來講健康工房係最好嘅，然後就係鴻福堂，再之後先係海天堂。其實我三間都食過，感覺上，自己主觀感覺功效都好似係呢個次序，哈哈。但係價錢來講，反而係健康工房係，最平海天堂係最貴。 講返呢間鴻福堂嘅龜苓膏，味道有啲甘苦，畢起嘅時候，質感略為有啲水，就冇海天堂咁彈。至於功效，食一兩日個人都會清到熱氣。如果佢冇買一送一黎講，我就未必一定揀佢。但如果買一送一為，即為返只係20幾蚊一盅嘅話，隨便買一下都冇問題嘅，當清下熱氣都唔錯。