肥小脾的个人专页

同朋友慶祝生日，見呢間餐廳咁多好評又新開，滿心期待。網上預約時要full payment, 已經覺得有乜咁巴閉，平時啲餐廳最多咪比deposit。到咗食飯嗰晚，去到以為揀咗5-course就已經fix好哂，點知仲要scan QR code揀一輪。因為大家都想叫自己想食嘅嘢，所以我哋四個人有三個都要青口。落單嗰陣個經理唔建議我哋叫三個同一樣。所以聽佢話只叫一個。青口嚟到食咗斷隻，好彩無叫咁多。細隻兼overcooked，個汁無味。又油，個經理仲叫我哋當湯飲。食物質數真係大失所望。成晚最好食應該係Parma ham啲黑松露好大塊，但係無味嘅。油金魚片到好薄，好腥但紅蝦意粉咸到傻收呢個價錢，提供咁嘅食物質素，真係唔會再嚟，伏!…查看更多

之前經過見到新開，外賣又有折，見今日無帶飯所以就嚟試下個無骨海南雞飯啦。同同事一齊叫無骨海南雞飯午餐，套餐包湯同嘢飲，折後$47一盒。就咁睇落係好似平過x媽媽。是日餐湯係老黃瓜湯。點知...返到公司一打開盒飯。見到賣相已經麻麻，全雞胸，兩盒都有一舊雞翼痴住翼尖嗰個位嘅雞，但竟然係有骨架！諗住可能係以味道取勝啦。一擺落口，好鞋同埋無味嘅！雖然有三個汁點，但都係好難食。試下啲飯啦，硬到好似未熟咁。真係唔想再食落去。啱啱先開質素已經咁樣。伏...中一次就夠…查看更多

聽朋友話最近omakase做緊promotion, 原價$980嘅set有半價優惠。所以一於約埋幾個閨蜜嚟試下。因為係平日嘅晚上，所以餐廳都比較寧靜，當晚都唔算多人，座位寬敞舒適，環境靜靜地，啱哂約埋三五知己嚟飯聚吹下水。食物方面確係充滿驚喜，睇得出廚師花咗好多心思去設計每一道菜，就咁睇好似一件藝術品咁。第一道菜式係煙熏鴨胸鵪鶉蛋，成個雀巢加埋隻金絲雀裝飾，喺煙霧中送到枱上，賣相滿分。鴨胸嗰陣煙熏味十分突出。跟住係牛油果他他沙律，牛油果醬好滑，內藏刺身。好清新嘅配搭。我哋仲另外叫咗燒雞翼，師傅控制火力好好，外脆內軟。魚子醬刺身拼盤木魚湯，做法係用咖啡流斗將木魚塊混入湯中。金菠蘿雪芭，清一清壽司賣相特別，但味道無乜驚喜。鵝肝，本身我唔係太喜愛。所以無乜感覺。食飽飽，朋友原來為我準備咗earl grey cheesecake生日蛋糕，餐廳為蛋糕加咗裝飾，好有心思。睇得出餐廳廚師係好有心機經營，希望餐廳客似雲來，食物保持水準。…查看更多

第一次嚟係食brunch, 加百幾蚊就可以free flow, 食物質素又好，所以同朋友生日再嚟呢度慶祝。上次已經睇到佢有oyster set, 四隻生蠔加兩杯酒都係百幾蚊。今次嚟到一坐底就叫咗先。估唔到生蠔都幾大隻同埋厚身，質地好爽，味道甜，抵食呀！另外仲有叫咗個煮蜆係經理推介。隻隻都好大隻同新鮮，太好食連相都唔記得影。主菜叫咗牛扒，美中不足係唔夠熱，但都好食。我哋仲叫咗side dish西蘭花同埋薯條 （又唔記得影相）個薯條真係無得頂，即炸嘅好脆。最後甜品叫咗朱古力撻，朱古力味好濃，啱哂一眾朱古力迷呀。餐廳環境同食物質素都好好，經理同員工都熱情有禮，一定會再幫襯呀。另外設有室外坐位但數量唔多，大家記得訂枱時留定喇！…查看更多

之前farewell 老闆嚟過食lunch覺得質素OK所以朋友生日再嚟試下brunch。$482 + 10%12:35分入座，同朋友商討完之後決定叫2-hour free flow。有Prosecco, 紅白酒, 啤酒同cocktail, 每位 $150冷盤方面有生蠔，長腳蟹，蜆，青口，蝦同龍蝦。沙律吧好多選擇，有成十款比你揀。Parma ham即切。熱盤有乳豬，燒牛肉，雞。配菜有炸薯條，都保持到熱同脆，仲可以因應個人喜好叫Chef加melty cheese, 好味甜品方面有蛋糕，macaron, 雪糕，生果。本來都無諗住寫食評，所以無影食物相。但就係因為相中呢個侍應嘅服務態度實在太差，希望餐廳會留意並改善。因為朋友生日關係，我一早就叫咗餐廳預備寫好Happy Birthday字樣嘅甜品碟。我哋無跟次序將冷盤沙律吧熱盤甜品食完又食。正當我食食下蟹腳時 （約兩點），圖中侍應無啦啦遞上生日甜品盤上枱，因為太突然所以我問侍應點解咁快就上。佢仲要搏返我話因爲見到我朋友食甜品。究竟係咩道理嚟！跟住到2:20pm, 呢個侍應又行埋嚟問我哋會唔會加鐘轉三個鐘任飲 (我哋12:40pm落單)，我哋話唔需要。之後2:25pm我見差唔多就嚟兩個鐘夠鐘，我就叫佢幫我地加多啲酒，圖中是侍應拎酒嚟加之前喺我哋面前望錶。咁嘅服務態度竟然可以係一間中環高級餐廳度生存。我除咗覺得無奈都冇其他野可以做。一句講晒以後唔會再幫襯…查看更多

幾年前喺修頓嗰頭返工，成日都會嚟食。今日咁啱經過春園街，見無乜人就嚟食返個咖哩豬扒飯啦。叫咗兩個咖哩豬扒飯，侍應會將咖哩汁上咗比你先，每碗都有一大舊薯仔，過咗一陣就上埋豬扒同飯喇。個碗見到有成兩大塊豬扒，一個人根本食唔哂，心諗無理由咁大份架，望下個價錢牌...哇~~~~成$82! 好貴呀。今次之後都唔會再嚟。唔值咁嘅價。如果減一塊豬扒再減啲飯收$5-60就差唔多。豬扒係炸得幾鬆脆，肥瘦啱啱好，咖哩汁偏辣，港式咖哩味道，不過啲飯就偏硬。…查看更多

cafe12:30pm先開，我早咗五分鐘到，點知一開笠門連度閘都仲未拉起，所以要落返地下等夠鐘先入去。因為當日無供應白雲墨汁海鮮飯，所以淨係叫咗烏卒卒火山泡菜炒飯。賣相係幾得意嘅，外皮好似梳孚厘質地，叉開個外皮入面係泡菜炒飯，但係完全無泡菜味。$148另外叫咗雙拼炸雞芝士拼甜辣醬，外皮厚，不過雞都算滑。$158雖然餐牌都有幾多種類嘅食物，見佢甜品嘅相都幾靚。不過呢個質素收咁嘅價錢，真係一次無回頭。…查看更多

久仰大名，朋友轉工所以特地請佢食餐好。人頭收費，刺身拼盤～ 三文魚同蝦都算新鮮，其他睇色澤都已經知。小食~ 可以不吃雞煲啲雞比較瘦無乜肉食，又油食完雞煲有呢碗甜點隔一隔。不過我哋都無食到。牛肉個樣同味道係ok,不過無得加單。海鮮都好大碟，淨係食咗蛤，蝦，鮑魚，蟶子，蟹都夠。魚類其實都太多食唔哂呢個價錢色咁多嘢係抵，不過唔係樣樣啱食，所以試一次就夠，寧願揀去散叫嗰啲可以食多啲自己想食嘅嘢。順帶一提，間舖又唔係full,唔知點解上菜速度係唔會因應你食嘅速度而調節，未食刺身已經擺個雞煲上枱仲迫你去開大火叫你三分鐘搞一次。…查看更多

無意間見到呢間shabu shabu, eatigo訂枱仲有九折，就即管試下啦。七點到咗，當時得另一枱大枱有人。好冷靜。揀好湯底後侍應就會拎調味樽仔過嚟。有麻醬，辣椒，葱，蒜蓉。飲品叫咗抹茶味同梨味嘅KIRIN生啤。抹茶嘅味道同啤酒好唔夾。梨都唔覺有梨味。湯底揀咗豆腐豆乳湯。入面有腐竹同芽菜，都幾濃郁。仲有細菜藍兩碟唔同部位嘅燕麥牛，兩隻都好濃牛肉味，正!唯一缺憾就係枱上面見到有木蛩，又聽到大枱有人話有小強，點知隔咗一陣我張枱都見到小小強。放咗隻手喺枱邊又覺得痴笠，衛生問題存疑…查看更多

好姊妹同我慶生，今次揀咗鐵板燒，見到恒生信用卡七折優惠，生日月份仲免開瓶費添，就即刻book。我哋被安排坐喺靠左嘅鐵板燒枱，因為我帶咗兩支酒去，侍應都好好拎冰桶幫我裝住。同姊妹們乾杯先～鐵板晚餐有兩個套餐，價錢分別係$980 / $1380，分別就係多啲海鮮。我哋四個都係揀咗$1380。頭盤係生蝦沙律，材料都新鮮。不過隻蝦就咁食無嘢點，完全無味，同啲沙律格格不入。第一度菜係燒帶子，新鮮彈牙。跟住就到燒龍蝦，隻隻都好生猛。一人一隻，拆肉後份量都多。龍蝦肉嘅汁係用蝦膏整出嚟，好正。鍾意辣可以點下碟右下角嘅辣粉。味道都唔錯架。鮑魚又係睇住佢郁，超新鮮，爽甜。食咗以上幾度海鮮後，呢舊鱈魚就相對地遜色喇。最後當然唔少得炒飯啦，師傅會因應個人喜好問你要乜蛋。我就揀咗太陽蛋。原來仲有個龍蝦湯！好濃又唔會太喊，啱啱好。甜品係當造嘅桃。細心嘅師傅寫上生日快樂。好圓滿嘅一餐，唯一決點就係侍應唔夠細心。全晚都見到幾個圍住傾計，又唔會主動幫我哋加酒。…查看更多

行過渣甸街幾次老虎堂都大排長龍試唔到。今日見到隔離新開木衛二無乜人所以決定一試。排隊諗緊飲乜時counter職員遞上一小杯lady grey tea latte試試。飲落有淡淡茶味，本身想試earl grey嘅產品，所以就決定買earl grey tea latte ($29)，朋友揀咗奶蓋earl grey tea ($34), 等咗十分鐘終於有，滿心歡喜飲一啖.....只飲到奶味，只有5%茶味，勁失望! 而朋友嗰杯都麻麻，每第一啖奶蓋都要吐返啲茶葉出嚟。咁嘅質素真係以後唔會再嚟！另外，個杯蓋係吸唔實，差啲倒到我成身都係…查看更多

連續兩個星期五嚟呢度食午餐，特登要求坐sushi bar，點咗自選12件壽司餐，師傅會按你食嘅速度而一件件整完送到你面前。每件都好好食仲好新鮮，不過我就唔係完全知道自己食緊乜。因為好不幸我兩次都被安排坐喺靠右邊嘅sushi bar, 兩次都係同一個黑面師傅，全程就係掛住同個學徒細聲講大聲笑。又唔講我哋食嘅係咩嚟。sushi bar左手邊另外兩位師傅就差好遠，全程同客人有傾有講，仲每一件都會講係乜嚟。$305一個午餐其實唔平，質素嚟講係值嘅，可惜比個黑面師傅扣哂分囉。…查看更多

四月已經見到fashion walk貼哂廣告話會開，終於等到喇～滿心期待由八點排到十點先有位。試業期間免收加一餐廳裝修新潮，燈光偏暗似酒吧，全晚播放英文快歌，氣氛良好。而且每一個侍應都好有禮貌，坐上客都食得開心。海南雞每日限量供應，我哋叫咗一個例牌加油飯。唔駛五分鐘就送到上枱，效率超快。本身想叫埋炸雞或豬腩肉兩拼，可惜試業其間未有。主菜海南雞無令我失望，連雞胸都好嫩滑。老闆話佢哋係用自家養嘅雞。果然不同凡響。最後我哋加咗個牛筋腩，連相都無影，無乜特別。雖然係好味，但要排兩個鐘真係怕怕。如果唔駛排隊我一定會再嚟! 希望遲啲會做埋午市咁就有更多人試到啦～…查看更多

星期六尖沙咀食晏時間周圍都咁多人，無意中發現小糖鈕仲唔駛等位，一於試試。一推門入去侍應就好有禮貌同我哋打招呼，然後安排入座，見到餐廳嘅裝修都以鈕為主題，好有心思。初時仲以為淨係得甜品食，估唔到做埋正餐，仲要出名海南雞飯。我同老公叫咗海南雞飯同咖喱雞飯套餐。一見到碟海南雞飯不禁暗笑，因為係雞肶呀！平時喺街食海南雞十次有十次都係雞胸，今次完全唔駛加錢就有成隻雞肶真係好開心。雞肶滑好厚肉，味道偏淡，不過點埋醬料就啱啱好。飯嘅味道較啖，唔似平時食開嘅油飯咁好漏。另外個咖喱雞飯外表平平無奇，但連我唔係太鐘意食咖喱都覺得好味。跟餐包一杯玫瑰花茶，唔係茶包嚟架餐牌有提到切忌唔食甜品就走，跟餐係栗子蛋糕，既然佢係標榜甜品店就試埋佢啦！老闆見我望咗個餐牌好耐，好熱情咁走嚟問我想試邊個，仲推介神秘甜品，咁我就可以試三款迷你版嘅甜品。神秘甜品包括: 朱古力慕絲, 意大利芝士餅 & 栗子乜乜。我最鐘意中間嗰個意大利芝士餅，如果有大嘅就好喇。個人認為正餐比甜品更出色，一定會再去食海南雞飯最後題外話，希望餐廳可以改善一下抽風系統，因為一推門入去就聞到好重油煙味呀。…查看更多

年初四落街食個早餐，點知好多茶餐廳都無開，見呢間有開就是但入啦。叫咗三拼早餐，炸菜肉絲五香肉丁鮑片米+熱奶茶多奶。碗米粉好快就到，但賣相一般，米粉口感幾好，肉丁嘅肉質好硬，炸菜肉絲偏咸，鮑片正常。最有期望嘅奶茶竟然有銹水味，試咗一啖就唔想再飲，埋單走人，絶對無下次!…查看更多