winnielee0719的个人专页

今次專程嚟到觀塘區一間專食雞白湯拉麵店，位置係近牛頭角果邊有少少隔涉，兩點幾去到，可能過咗岩岩lunch繁忙時間，所以等一陣好快就有位。第一次到訪，冇特別諗就即刻揀咗佢嘅瑪瑙瑙鳥白湯麵，麵條可揀黃麵同白麵，同店員查詢，原來白麵係比較順滑爽口，黃麵比較彈牙，比較多人揀黃麵，於是就揀咗黃麵，另外再加錢加埋溏水蛋。個麵除咗慢煮雞胸外，仲有雞叉燒，店員會即場將湯打泡同埋燒叉燒。第一啖飲嘅湯係好濃雞湯味，湯身質地唔算濃稠，但飲落係濃滑而不膩，黃麵唔算掛湯，食落係有少少偏鹼水嘅麵，煮果時見係現成拆包裝倒入去煮類似即食嘅麵，感覺冇咩特別，反而雞胸嫩滑，而且燒叉燒食落比較好香口。整體嚟講，雞肉同湯底係出色，如果再花功夫喺麵條上應該會更加分下次會想試埋白麵同埋其他湯底…查看更多

lunch時間同同事特登嚟試太古新開無耐專食肉餅嘅餐廳食飯，去到有條小長龍，等咗差不多大半個鐘先入到去食。餐廳提供嘅肉餅種類選擇都多，有蒸同燒，有傳統口味亦有比較新派口味。同同事分別叫咗兩個肉餅，一蒸一煎share嚟食，蒸揀咗鹹蛋黃蒸肉餅、燒揀咗燒原隻虎蝦球蝦米肉餅，每份肉餅都會跟餐有個中湯同埋一碗飯，飯可以揀十六穀米或者日本白米飯。鹹蛋黃蒸肉餅味道中規中矩，肉餅夾雜着馬蹄，食落爽口，個人覺得比較出色嘅係燒原隻虎蝦球蝦米肉餅，煎咗嘅肉餅食落會比較香口，而且虎蝦肉質爽口，唯一來不足嘅地方就係見唔到肉餅裏面有蝦米。望見其他枱都多人叫三吊油雞，望落色水唔錯，下次再嚟都會想試吓。整體嚟講食物味道唔錯，肉餅款式特別，都會想再次來訪試更多口味，不過以家常便飯嘅菜式嚟講價錢一啲都唔平民，而且排隊時間比較長，未必會吸引到人經常到訪。lunch時間同同事特登嚟試太古新開無耐專食肉餅嘅餐廳食飯，去到有條小長龍，等咗差不多大半個鐘先入到去食。同同事分別叫咗兩個肉餅，一蒸一煎share嚟食，蒸揀咗鹹蛋黃蒸肉餅、燒肉餅揀咗…查看更多

近排喺太古城新開咗間來自東京過江龍可麗餅嘅舖頭，見佢新開張咁多人排心思思就去試吓。同朋友揀咗兩款口味，分別係炙燒焦糖吉士鮮忌廉同埋草莓香蕉朱古力鮮忌廉味。落咗單之後即叫即整，可能因為得一個店員整，每次淨係整一個可麗餅，所以等緊整第二個嗰陣，第一個可麗餅就會好快凍咗。可麗餅食落去係名副其實嘅薄，好軟腍腍，可能因為咁，食完頭幾啖之後，打開個包裝食埋餘下嘅部份就有啲狼狽。草莓味嗰款食落正常發揮，沒有太大驚喜。cream brulee嗰款會再甜啲膩啲，同埋唔知係咪燒得唔夠，會不停食到砂糖夾雜喺可麗餅裏面。整體嚟講質素還好，價錢算合理，店舖仲係新開張冇耐，仲未有鹹食味供應。會再等佢出埋鹹食味再試多次。…查看更多

作為開心果控，見到呢排有啲咩關於開心果嘅甜品梗係要一試啦。行街順路去到太子呢間分店見到有開心果糯米糍賣，$36一盒兩大粒，外面鋪滿超多開心果碎，心諗一定好濃開心果味啦。咬一口裏面超多開心果cream，但就係冇開心果味，有少少失望。超微弱嘅開心果味都係來自外皮嘅開心果碎，整體嚟講試一次就算👋🏻…查看更多

公司附近新開咗一間主打醬油蝦湯嘅拉麵店，繼尖沙咀本店後開另一分店，店面睇落比尖沙咀大兩三倍，Lunch去食排咗大概半個鐘就入去，可能因為新開座位多，反而廚房唔係好夠人手，有位都要喺出面等。成間舖淨係得一款拉麵，岩晒選擇困難嘅我，麵款有拉麵同刀削麵揀，另外仲可以追加啲醬油小食，第一次食揀咗拉麵同加咗個是日精選醬油蟶子，啲海鮮超新鮮爽口，下次會試埋其他醬油海鮮。拉麵上枱時，店員會再額外喺上面加啲蝦油，個濃蝦湯底總括嚟講鮮甜濃稠，濃而不膩，後加嘅蝦油令個湯底錦上添花，滿口濃濃嘅蝦味，啱晒重口味人士，真係忍唔住會飲晒成碗湯。…查看更多

有日平日lunch同埋友人去咗沙田呢間新開嘅另一間日本過江龍漢堡扒專門店，拎咗飛等咗大概15分鐘就有得入去，入去前會喺購票機落訂單先，呢間嘅套餐比較有彈性，可以根據自己食量揀三個或者兩個漢堡扒。今次同朋友分別叫咗兩個餐，一個係兩塊原味和牛漢堡扒加一塊和牛芝士漢堡扒，另一個係各一塊和牛芝士漢堡扒加和牛蟹肉漢堡扒，套餐已經包括咗一碗飯、少量蔬菜、一碗麵豉湯同埋一隻已經打咗加咗豉油嘅生雞蛋，而且白飯蔬菜同湯都可以任加。一坐低冇耐，啲漢堡扒好快就上枱，漢堡扒裏面嘅肉比較偏生，侍應話可以按照自己嘅生熟喜好程度再煎耐啲個扒先進食。建議嘅進食方法係先就咁食原汁原味嘅漢堡扒，然後再加埋啲醬汁配料一齊食，最後係將隻蛋撈埋落啲飯一齊享用。調味料相對簡單，冇乜特別驚喜，加上漢堡扒本身已經調咗味道，其實都需要點調味料。呢度嘅漢堡扒搓出嚟感覺比較鬆散，味道都唔錯，比較印象深刻嘅係食和牛芝士漢堡扒，上枱嘅時候塊扒已經鋪咗一層熱熔芝士，跟住侍應會即刻喺面前再額外跑一堆芝士碎喺塊扒上面，拎嚟送飯一流。最後就係試蟹肉和牛漢堡扒，呢塊扒本身已經放咗喺一個鐵兜上面，裏面浸咗啲調味酸汁，漢堡扒上面嘅紫蘇葉放咗一啲蟹肉、蘿蔔蓉及青檸。撈埋一齊食之後發覺蟹肉同漢堡扒唔係好夾，分開嚟食好似比較適合。…查看更多

預約咗好幾次，終於book到去食呢間日本過江龍漢堡扒餐廳，用餐時間限時60分鐘，食得好趕。如果book咗要取消，餐廳會收返一定charge ，可見個取消政策對食客有點嚴苛。套餐包三舊漢堡扒、白飯（可任添）、一碗麵豉湯同埋雞蛋一隻，店員會俾一張指印食客睇吓個建議食法。第一件漢堡扒會建議原味食，可以品嚐食物嘅原汁原味。餐廳亦有提供五款配料，可以在吃漢堡扒是隨意點嚐，配料包括：生醬油、青唐辛子鹽漬檸檬、油漬青唐辛子、麻辣粉、椒麻醬及香炸蒜碎。第二件漢堡扒會建議配以蘿蔔泥同埋自家製柚子醋食用，酸酸地、口感清新，食落一啲都唔油膩。第三件漢堡扒會建議加生雞蛋配以白飯一齊食用。整體嚟講，漢堡扒冇想像中咁爆汁Juicy，但佢食落一啲都唔油膩，初初以為食晒三件會有一定難度，點知食食吓仲添多碗飯。以$138呢個價錢嚟講套餐真係非常抵食，加上店舖位置仲要喺中環商場裏面一個望海嘅地段，環境氣氛一流。雖然未算驚艷地好味，但CP值整體來說都很高，值得再訪！…查看更多

第三次食呢間拉麵店，三次都叫咗唔同魚湯拉麵，第一次中環店食清湯、第二三次天后店分別試沾麵同白湯。個人偏好濃味湯底，所以比較推薦同好者揀沾麵同埋白湯。兩者都有濃濃嘅魚香味清湯魚味唔算濃，特別在佢有多一塊炸鯛魚皮同蠔醬，個人覺得同普通食到嘅魚皮差唔多，可以唔洗特登另加錢食。沾麵唔同其他兩款拉麵，佢係用咗粗身嘅刀削麵，用嚟沾湯會比較掛汁。另外沾麵每日數量有限，夜晚去食有機會賣晒。白湯整體適合鍾意魚湯但又唔想太重口味嘅朋友，飲到一滴不剩。…查看更多

聽朋友仔介紹呢間餐廳好耐，終於俾我lunch時間book到去試吓佢個lunch set。咁啱撞正佢換咗餐牌，試唔到佢出名嗰個Duck Ragu Pappardelle, 唯有今次主菜揀佢個Festonati同Reginette，另外前菜叫咗最出名嘅Wagyu Beef Tartare同埋Risotto Ball. 最後甜品分別叫咗Tiramisu同Ice Cream Coupe，再另外加錢叫咗一杯mocktail同紅酒。原本另外仲想散叫佢出名嘅Malakoff, 可惜lunch冇a la carte, 唯有下次dinner再去試。Wagyu Beef Tartare- 生牛肉配以上面脆脆嘅薯仔絲同埋下面嘅蛋黃醬，食落好有口感同creamyPistachio Arancini- 呢個係非一般嘅Risotto Ball, 而係加咗Pistachio、肉腸同煙燻咗嘅 provolone cheese，食落好香口得嚟，但又唔滯口Festonati- 呢款pasta係羊肩肉配上Pecorino羊奶芝士同埋薄荷汁製成，羊肉香配上淡淡薄荷汁，簡直係絕配。pasta嘅形狀包裹着羊肉、芝士同埋薄荷汁，麵條口感煙靭，兩款pasta中我較喜歡這款Reginette- 呢款pasta係結合咗辣肉腸加Mascarpone, Parmesan cheese而成。鍾意食辣嘅人應該會喜歡呢款pasta，味道過癮，食落又唔會膩Tiramisu- 呢度個Tiramisu我超級鍾意，因為佢好重好重酒味，好少地方會食到咁重酒味嘅Tiramisu，Ice Cream Coupe- 雪糕冇咩特別整體嚟講價錢及食物質素性價比都高，可惜lunch時間得60分鐘，食得有啲趕。下次會再搵機會試埋dinner。…查看更多

第一次食烏克蘭菜，每款菜色都別具特色，響香港好少機會食到。餐廳位置好近大館，食飽可以去行陣散步。 餐廳環境好有烏克蘭同俄羅斯特色，入去用饍，有種去呢兩個地方旅行嘅感覺。先試個傳統羅宋湯，有別於響香港平時飲嘅羅宋湯，係完全另一個味道，次試揀咗傳統口味，成碗湯紅當當，裡面有好多紅菜頭，少量牛肉，飲落甜甜地清清地幾開胃之後上咗個雞肉蘑菇卷同傳統蘑菇薯仔餃子。雞肉蘑菇卷都算大份，食落幾creamy；餃子皮偏厚，食落有少少膩口，味道一般，食咗兩舊都飽飽地。最後就係招牌菜基輔雞扒，雞扒一切落去就爆晒汁，裡面嘅牛油流晒出嚟，食落好juicy好嫩口, 一啲都唔鞋口，另外伴碟嘅薯片都炸到十分薄脆惹味，值得推介。唔知今後仲有冇機會可以去烏克蘭呢個地方，如果未試過或想重溫去烏克蘭食過嘅菜色，呢間餐廳會係一個唔錯嘅選擇。…查看更多

秋意濃濃，最適合食時令嘅秋刀魚，難得搵到尖沙咀呢間餐廳有秋刀魚刺身食，梗係要試試佢！一坐底即刻叫咗條秋刀魚刺身， 個擺盤十分精緻，好打卡able, 秋刀魚睇落好新鮮，另配上有碟類似蒸魚豉油味嘅蔥花豉油，食落好鮮甜。見到隔離枱，食完條魚叫師傳拎啲魚頭魚骨去炸嚟當小食食，我哋都跟住做（原來免費架）。條秋刀魚炸完後，啲骨脆卜卜超惹味，送酒一流！叫咗碗味增煮牛舌，真心超好味，口感十分軟腍，個味增汁煮到啲牛舌同蘿蔔好入味，而且份量十分多，好抵食。另外叫咗個甲羅燒（左）同鯛魚奶湯（上），將啲蟹膏同蛋黃撈勻再搽多士食，超好味🤤。另外個鯛魚奶白湯，湯嘅質地好濃厚，飲得出無味精味，飲完都幾飽肚。叫咗個火炙蝶魚邊壽司，啲蝶魚食落好多油脂，十分香口肥美🤤不過個飯包得有少少散，拎起好易跌落，可以再包得好啲。跟住再上個鰹魚蕃茄沙律，鰹魚搭配蕃落食落清爽，酸酸甜甜咁，可以去一去膩。再嚟重頭戲——特上錦繡刺身，總共有8款刺身各兩件，五百幾蚊呢個份量都算係咁，海膽分量算慷慨，另外仲有好少食到嘅金目鯛刺身，整體所有刺身都好新鮮（可惜冇得就咁叫金目鯛刺身）…查看更多

平日夜晚收工嚟食晚餐，唔算多人，環境闊落，一入餐廳會見到左邊係吧枱，適合放工嚟Happy Hour，右邊大部分都係卡位，坐得幾舒服，餐廳裝潢都好印度feel, 到處都有印度電影嘅海報，仲會有電視播印度電影。餐廳嘅侍應全部都係印度人，招呼幾好。食物方面，頭盤免費送左幾塊薄脆片配三色醬，綠色醬係薄荷醬，紅色醬係有少少甜辣口味嘅醬，呢款點脆片最惹味，另一款係超酸嘅醬，未必人人喜歡個味。前菜叫咗Pani Puri, 係一款印度特色街頭小食，個餡有雞豆、薯蓉、洋蔥碎同香辣汁，再倒入薄荷醬或芒果醬，食落都幾特別之前仲食咗個前菜Pan Fried Shammi Kebab, 配埋碟上嘅洋蔥食特別香口主菜叫咗Kalimirch Murgh Tikka, 鐵板上熱辣辣，個雞肉卷無骨，岩岩好熟，質感好juicy, 十分嫩滑，而且配上大量黑胡椒，加埋墊住嘅洋蔥一齊食，非常香口好味道！最後食印度菜梗係要食naan, 另外叫咗個菠菜芝士Paneer點嚟食，個醬好似海底泥咁厚身，搽落naan食超級飽肚，naan有3塊，同友人各食咗一塊之後已經食唔落，呢餐十分飽足。整體嚟講呢間印度菜餐廳食物質素唔錯，而且菜色種類多，會令人想再encore去試唔同菜色。餐廳環境都幾好，適合情侶、三五知己同埋放工同班同事嚟小聚。…查看更多

食呢間預約困難嘅刺身飯專門店，要早一個月1號朝早上網book先book到（依家響香港想食個飯都咁難）今次第一次，同朋友諗都唔諗就試佢最出名同最貴果款廚師發辦魚生飯（特上），兩個月前仲見佢$380，一加價加$50，依家要成$430。一set包括沙律、茶碗蒸、15款時令刺身丼飯及麵豉湯。間店環境唔算好闊落，待應服務親切，會內心講解刺身飯嘅15款配料，亦建議我哋由海膽開始順時針咁食。佢亦會主動問我哋洗唔洗幫手影合照，服務態度加分👍🏻食物方面，海膽同三文魚都十分鮮甜，同埋好少機會食到嘅鮟鱇魚肝，三者一啲腥味都冇，好好味！因為每款刺身都係得一件左右，食完好似唔係好夠喉🤣。整體嚟講，服務同味道質素都好好，味道係拍得住響日本餐廳食嘅質素。環境同價錢如果響日本食可能以平一半價錢就食到，不過咁耐冇去日本，都值得一試嘅😋…查看更多

第三次揸車假日經過嚟食，感覺食物質素大不如前，尤其係個菠蘿焗飯，唔知偷功減料定點，冇蝦少肉鬆同變左用大量三色豆焗個飯，味道一般（見其他人食嘅有蝦）。蒜蓉薄餅略為唔夠熱，食落唔算十分軟熟惹味。唯一比較好味係個雜錦拼盤，蝦餅、魚餅同香葉雞，食落仲係熱辣辣。整體嚟講食物質素一般，CP值一般。…查看更多