mohkc的个人专页

餐廳負責人做好一樣先一樣啦，職員同廚房踢晒腳，刺身同熱盤都掉轉次序上，你哋廚房出咗少少問題唔關我哋事，我地好介意呀刺身同熱盤mix埋，都諗唔明點解你哋好意思會咁樣上菜。又做KKday半價優惠，又請打手Blogger宣傳，作為一個俾錢嘅食客聽到啊好受咩？即係人哋免費就可以好好招呼，聽到其他客人有Booking未安排板到座位，又要企喺出邊等冇冷氣咁等，雖然職員都好好，斟凍水俾客人係岀面唞吓，但樓梯有人食煙，咁就真係有啲差。時令海鮮有機雜菜沙律，講到咁勁，原來煙三文魚捲着啲沙律菜 笑。季節前菜一品，係溫泉蛋加啲白松露油撈埋啲青瓜絲一齊食，都ok嘅，一個同行朋友唔識生食，想轉全熟嘅蛋，廚師竟然諗到茶餐廳煎熟蛋嘅做法，OMG冇賣相可言，其他配料同你走晒，真係~呢個可能係我嘅問題啦，嗌酒嘅時候我問有咩優惠，職員話: 暫時未有，不過呢支”作”就$398，如果貴價少少就呢支”鬼面”$598，我都記得呢段對話，買單嗰陣就收我 “作” $666，話我聽錯ok fine，(666咁好記我會唔會係聽錯啊？)下次真係要睇住個酒單嗌。總括嚟講食物都唔係話唔好食嘅，(不過有隻龍蝦唔新鮮，餐廳都肯換嘅)，如果想食嘅話係KKday買半價menu都冇咁嬲，千幾蚊食啲咁嘅真係唔抵。…查看更多

見佢哋咁多好評諗住試吓，真係唔好食㗎！兩個人$700，食咗一個頭盤，一個炸生蠔，一個生蠔泡菜煲(6隻急凍生蠔同菜，泡菜搞到成個煲好鹹)，完全唔好食貼錢買難受。牡蠣小屋諗住主打生蠔，惠比須生蠔$240/6隻，過咗season所以冇買，日本各地生蠔$300/3隻，咁樣睇性價比都唔高，好難消費得落手🤷🏻‍♀️，我寧願去專食生蠔嘅西餐。見到職員上錯生蠔落另外一張枱，即係叫廚房職員換過第二個盤，再放返落另外一張枱，有啲奇奇怪怪。請職員介紹吓個餐，淨係話呢樣好食，嗰樣好食，咁樣唔係叫介紹。…查看更多

港島區食蠔嘅餐廳，第一時間諗起The Oyster House，生蠔種類多質素有保證之外，餐廳做嘅優惠都好吸引，如果每人兩杯紅白餐酒，再點生蠔有6折優惠，啱哂幾個鍾意食生蠔嘅朋友一齊嚟，上年餐廳搬咗舖，座位更加闊落，推介俾大家~🥳Pacific $59/pc, Sentinelle $63/pc, La Lune $79/pcTomato and mozzarella cheese salad $139首先嚟幾隻生蠔同沙律做個頭盤，三款都好肥美吸引，柔和嘅海水味新鮮易入口，店員細心介紹令到風味更加有想像力。Roasted octopus $169 🐙八爪魚用類似西班牙傳統的烹調方法，肉質軟熟，尾部彈牙有香濃煙熏味。Truffle mushroom soup, Oyster Bisque $89好欣賞佢嘅蠔湯，用咗大量嘅生蠔熬煮，再用blender處理，鮮甜真材實料值得一試。Spring chicken $239春雞肉質好嫩滑，烹調時間都唔過火，薯蓉保留一啲薯仔粒口感唔錯，如果喺夏天加啲生果元素，例如青提子一齊焗，再襯酸味一啲嘅白酒，一解暑熱更加特別。😊Banoffee Pie $89甜品環節，當然係舖頭嘅signature香蕉拖肥批，拖肥嘅甜度適中唔會太漏，呢道甜品由謝斐道舊舖到依家新舖都保留住，食嘅時候諗返起以前嘅回憶。😇…查看更多

要客人用手機落單，落飲品個陣唔小心撳錯咗，走甜撳咗多甜，係自己唔啱落錯，都有同職員承認自己落錯咗，同職員講可唔可以換過一杯，店員態度冷淡”自己撳錯，真係幫唔到你換”。使唔使咁惡呀？唔緊要，我可以唔飲照俾錢，但係如果客人因為身體原因唔可以飲甜嘢，唔小心落錯單呢，照同一個方法對客人？識唔識得逆地而處？其實餐廳食嘢落單，無論職員同客人有時都會有錯，態度咁樣，要食嚟做乜嘢。食物係幾好嘅，但係最後一次。餐廳老闆你真係要多謝職員呀燕 🙂…查看更多

首先由排隊開始，我哋先到排隊，但安排左其他遲嚟嘅食客入去先，要同店員反映先有位，安排有啲唔成熟。嗌一個套餐，牛肉丼自動轉咗沙律，牛肉丼同沙律都差幾遠，雖然店員聲稱有通知我哋🤷🏻‍♀️，但如果真係有講，我都可以揀轉韓式拌飯或者沙律，我都無揀過，你就轉咗沙律，有無講到就自己諗啦。漢堡個食法幾特別嘅，一個生嘅免治牛肉球，自己將牛肉分成細份，放喺鐵板上面煎熟，味道一般啦。晚飯套餐$318/2位，係唔算貴嘅，但係影響心情，唔會有下次，如果服務可以揀零分，我會揀🙂…查看更多

今日約冇海鮮不歡嘅朋友，試吓新加坡名物胡椒炒蟹~ 多肉大肉蟹 仲有樂天經典嘅招牌豆腐同老火靚湯！馬來風光 $78，淮山杞子螺頭湯 $188非常惹味嘅馬拉盞炒通菜~ 到咗某個年紀就開始注重養生 哈哈，出街食飯都一定要嗌老火湯，螺頭滋潤脾胃，捱夜要飲多啲喔。黑胡椒炒蟹 $368推出五款味道，有辣椒螃蟹、黃金焗螃蟹、龍虎燴可以選擇香辣或海鮮湯、花雕油雞蒸螃蟹同黑胡椒炒蟹。如果想試蟹嘅鮮味，可以試花雕油雞蒸螃蟹，我就想試吓新加坡嘅黑胡椒炒蟹，睇吓喺星加坡好食啲定係樂天經典煮得好食啲？我就覺得呢道好食啲，黑胡椒同蒜頭惹味濃郁，蟹都好多肉，推介嘅！餐廳除咗供應手套同濕紙巾，仲有圍巾方便食蟹嘅時候唔會整污糟，有時候着條的衫真係好需要架！聚寶海鮮豆腐 $128豆腐厚身嫩滑，餐廳另一個菜香鐵板豆腐都好好食樂天經典尖沙咀加拿芬道20號加拿芬廣場2樓星期一至日 11:30 - 01:00電話：28823313…查看更多

養生鍋湯底主要用人參同藥材、金華火腿、老雞同豬骨煲成，要飲碗湯先！蜂巢豆腐吸收哂所有味道，火鍋配料揀咗精選手切牛肩肉、皇室魚肚、黑松露蝦丸&鵝肝墨魚丸、鹹蛋黃金炸魚皮、台灣水蓮同新竹米粉。首先放皇室魚肚，煲長時間啲更好味，非常美顏喔~精選手切牛肩肉，牛味濃郁，油脂分佈就一般啦。黑松露蝦丸&鵝肝墨魚丸，製造需要心機，黑松露味特岀，墨魚丸裏面有一粒鵝肝，襯墨魚丸唔會搶咗鵝肝咁甘香唔錯！另外炸魚皮都係必食嘅！餐廳就造成鹹蛋黃金炸魚皮，魚皮薄又脆口，加鹹香蛋黃金特別惹味。台灣水蓮原來咁長架😯，有鉸剪俾你剪段，灼十幾秒就夠，好爽口！老鍋台式火鍋星期一至日: 17:00-01:00地址: 銅鑼灣駱克道491-499號京都廣場2樓電話: 28186678分店: 尖沙咀、銅鑼灣…查看更多

春天 選時令的去到元朗，一真念念不忘幾年前到訪過的寿司の神，新鮮日本直送刺身，加上精心製作嘅調味，令整頓晚餐吃到眼花撩亂，不一浪接一浪的鮮味衝擊味蕾，令人回味。今日再嚟質素上升咗唔會失望！揀咗$1500晚餐set，有三款海膽、八件刺身、兩款海鮮料理、八件壽司、日本鮑魚，就有二十道菜，仲有前菜、湯及甜品，份量同質素亦係相當滿足！先有頭盤麵豉蒜頭、芝麻牛蒡及酸薑作開胃小食，隨即送上南瓜豆腐木同沙律菠菜，蒸熟嘅南瓜再加豆腐造成形好健康。第一道刺身，有春天獨有嘅鰻魚苗，鰻魚大家都食得多，鰻魚bb都係第一次見，同河粉差唔多粗，全條透明中間有一條好幼嘅魚骨，食落去好似薯粉咁好咬口，加柚子汁同紫蘇花就可以，係幾特別嘅食材喔！第二道、深海池魚肥美滿足。第三道象拔蚌刺身，平時食嘅象拔蚌會切薄片，但切條就更有咬口，廚師切完之後拍一拍象蚌，佢哋即刻縮埋，證明仲好新鮮，配粉紅色岩鹽提升鮮味。第四道真鯛，廚師先用熱水焯一焯外皮，避免刺身食咬唔開，鮮味已經相當足夠，並可配酸汁、蔥花及辣蘿蔔蓉更加調味。第五道螢光魷魚，依家都係螢光魷魚嘅產卵季節，所以每條都有豐富嘅卵，非常珍貴哦~第六道鰤魚，有一種油脂嘅光澤，配柚子胡椒 帶點辛辣風味不錯。第七道太刀魚，火灸過油脂滲出，配清香辛辣薑花卉吃兩件都不會太油膩。第八道銀雪魚，要數今晚最回味嘅刺身，我會揀呢件！加了點沙律醬在火炙，入口即溶還有還有滿的甘香。食完共八款刺身，分別有兩款料理，金木鯛及子持烏賊。金木鯛用木魚湯煮魚肉紮實，用茄子一齊煮吸收鮮味，係個好方法喔~子持烏賊係指烏賊裏面有卵，因為春天亦係定限量季節，用鰻魚汁煮濃郁彈牙。一整隻北海道蝦夷鮑魚，有手掌咁大，廚師切走鮑魚的裙邊，只係中間非常矜貴，用波浪形的刀工切法，令食起嚟更加有咬口。休息一下，就到一浪接一浪的壽司，先吃第一件北寄貝，清新嘅貝類係最好嘅開始，非常爽甜！第二件剝皮魚肝壽司，壽司中我最回味這一款！剝皮魚刺身加一片魚肝，冰凍入口即溶好像雪糕滑落喉嚨~第三件鰆魚，火炙過油脂都滲出。第四件北海道毛蟹，拆肉後加了一點甘香蟹膏，非常想念毛蟹喔! 第五件吞拿魚、第六件醋醃青魚、第七件腦天，可是最矚目的！！腦天即是吞拿魚腦後面部份嘅肉，只有左右兩邊，魚身越大腦天份量就越多，也是十分珍貴喔，入口即溶，比起拖羅冇咁油膩。第八件魚子，加了自家的調味，脆卜卜~有三款海膽作為晚餐的結尾，這是一人前的份量，太奢侈了吧！對於以上嘅刺身、壽司及各款料理，都非常滿足，食材都是時令和罕見，這更加值得！還有蜆肉湯、綠茶豆腐布甸及芝士蛋糕配茨城縣士多啤梨，可算是美滿的一餐！寿司の神星期一19:00 - 23:00星期二至日12:00 - 15:00, 19:00 - 23:00元朗馬田路安寧大廈20-30B七號地舖Tel: 21783163$1500晚餐set，有3款海膽、8件刺身、2款海鮮料理、8件壽司、日本鮑魚，就有二十道菜，仲有前菜、湯及甜品，份量同質素亦係相當滿足！…查看更多

米酒豬腳生菜包 $310豬腳醬汁炆煮得幾入味，外皮處理得好乾淨，亦非常彈牙，但係瘦肉就乾咗小小，用生菜包住豬腳、泡菜同醃蘿蔔，非常爽口，又唔會好似燒肉咁油膩，配米酒一齊食，感覺幾豪邁！大醬鍋 $180之後嗌個大醬鍋暖暖胃~ 裏面有豆腐、翠玉瓜、豚肉、拉麵同大量韭菜洋蔥，都係一個健康選擇。平均消費$278/位，2位，2份主菜Bingo & Cook星期一至六12:00-23:00, 星期日休息地址: 銅鑼灣駱克道487-489號駱克駅2樓電話: 24558766…查看更多

睇過餐廳嘅訪問，知道老闆係秘魯人認識咗香港嘅女朋友之後結婚，就一齊經營呢間秘魯菜餐廳ChullsChick，我哋都未去過秘魯，就試吓食秘魯菜啦~Tofu Anticuchero $78頭盤嘅豆腐用咗菲律賓香料調味，加上一碗蒸飯，同中國嘅麻婆豆腐差唔多，外國人食應該覺得幾有趣。Half Pollo a la Brasa $128半隻烤雞加兩個自選嘅配菜，烤蕃薯及沙律，烤雞搽了大量香料，黑啤同茴香等醃足兩日好入味，肉質都唔錯，Set Lunch包埋一個湯，有蔬菜蓉同蒜頭，好暖胃。Anticuchero Steak $128，House White Wine $48，Beer $58用咗牛小排所以肉質好淋，香料味十足，牛嘅油脂滲入薯條更加好食！Churros $48麵包質感重啲，切開後裏面嘅肉桂醬唔係好多，用嚟點朱古力醬即係好似細個食欣欣杯咁。餐廳服務親切，我對佢哋嘅印象好好，所以過幾日就再嚟食多一次，勝價比高，晚餐好似特別好食添~ 知道老闆同老闆娘去咗honeymoon，真係恩愛啦😍平均消費$200/位，1個頭盤、2個主菜、1個甜品及3杯飲品Chullschick星期一至四: 12:00 - 22:30星期五至六: 12:00 - 02:00星期日: 12:00 - 21:00中環蘇豪嘉咸街45-53號地下D舖Tel: 26683948…查看更多

🏢今日嚟到觀塘工廈覓食，見呢間裝修同氣氛唔錯，精心製作海膽杯好吸引喔~🤗🥑🥗油甘魚牛油果海膽沙律 $98🍣藍鰭呑拿魚壽司 $48，黃鰭呑拿魚壽司 $24🍹北極光海膽杯 $168海膽杯做成芭菲嘅造型，第一層係海膽同黑色嘅魚子，之後就係脆卜卜魚子同玉子，最底紫薯都幾特別。🇯🇵燒白鱔 $38 ，紫蘇雞肉串 $23，大蔥雞肉串 $18燒白鱔當然係我嘅首選，皮脆肉嫩有魚嘅油脂滲岀，推介喔~ 🍶清酒煮大蜆 $78大蜆新鮮每隻都無沙，處理得好好，清酒帶出鮮甜味，非常暖胃冬天食就啱晒，份量都幾多。丼瀛星期一至日: 12:00-16:00, 18:00-23:00地址: 觀塘巧明街109號榮昌工業大廈5樓A室電話: 37088705平均消費 $333/位…查看更多

用果醬搽麵包，相信都係好多人嘅最愛，但係市面買嘅果醬，一樽糖分就佔50%，真係誇張很嚇人，知道餐廳Let’s Jam主打無添加自家製果醬，口味多樣令食客有更多選擇！All day breakfast 有3款揀供應至夜晚6點，果醬有11款！！另外可以食多士、窩夫、鬆餅都會配果醬。英式早餐 $99 (+$8 轉英式鬆餅)，Affogato $54早餐有芝士炒蛋、煙肉、牛仔早餐腸、紐倫堡腸、焗車里茄、炒磨菇、焗豆、桂花雪梨配鬆餅。早餐配嘅果醬都可以自選！食物份量都幾豐富，英式鬆餅配清香桂花雪梨唔錯。素食英式早餐 $99 (+$14 轉牛角包)，特調果醬紅茶 $50有芝士炒蛋、烤大啡菇、焗車里茄、田園沙律、炸薯角、焗豆、同木瓜雪耳秋冬季節，可以滋潤乾燥日子。特調果醬紅茶，就先加入自選果醬再倒入紅茶，風味因果醬以轉變，肉桂蘋果同紅茶幾夾喔！🍞果醬九宮格多士 $49，🍸冰搖咖啡 $42餐廳有11款自家製果醬！！想一次過試多幾個口味，就要食呢個果醬果醬九宮格多士，雜莓同熱情果都好食，特別係鹹蛋鳳梨果醬令人最驚喜，鹹鹹甜甜，要睇睇餐牌先咁肯定自己味蕾。冰搖咖啡平衡一下甜味，係個好選擇！一起果醬星期一至五: 12:00-23:00星期六: 11:00-22:30星期日11:00-23:00地址: 尖沙咀松山道15-17號地下D舖電話: 39565646分店: 西貢平均消費$150-200…查看更多

Latte $32忙碌城市大家都講求效率，咖啡店喺繁忙嘅旺角都處都有，如果想要環境舒服，咖啡有質素嘅我會推介呢間CoffeeZine，係廣華街時裝相機裏面，位置比較靜，啱想專心做野或者放鬆一下嘅客人，行入嚟會聞到咖啡味飄過。咖啡豆烘焙度適中，香氣濃郁，餐廳仲有手沖咖啡同蛋糕甜品，下次再見你餐廳擺放畫家Keo Chow 電影小咭，每張小卡畫有電影角色，背後有一句對白，如果電影中嘅故事感動到你，可以以自由付費嘅方式帶佢返屋企。Coffeezine地址: 旺角廣華街1號仁安大廈地下5A號舖…查看更多

🌹🎂法國玫瑰花戚風蛋糕 $350情人節就快到💛我都苦勞緊送咩禮物，點知爸爸經過蛋糕店，就買咗媽咪最鍾意嘅淺粉紅色法國玫瑰蛋糕。有花同蝴蝶做裝飾，玫瑰味道淡淡又好香，令人唔會抗拒，配埋忌廉甜度啱啱好。時不時給伴侶驚喜，每日都係情人節🥳La Famille星期一至五: 12:00-21:00星期六: 11:00-21:00星期日: 11:00-19:00地址: 銅鑼灣耀華街25號丹納中心地下2號舖電話: 24722989分店: 旺角、紅磡、尖沙咀、銅鑼灣…查看更多

呢一年疏乎厘pancakes都好受女士歡迎，做得出色餐廳都大排長龍，最近係又一城I.T新開J.S. FOODIES都相當吸引。今日約咗大食朋友一齊試吓，佢最關心嘅係主打甜品嘅餐廳，到底識唔識得飽？J.S. FOODIES關心到呢一點，有推岀意粉、沙律、漢堡包等，絕對可以食飽飽即刻食甜品，女朋友帶男朋友嚟，就唔使擔心啦！明太子醬海膽意粉 有鮮甜海膽已經係首選~ 有晶瑩魚子增加口感，帶點辛辣嘅明太子醬，化身可愛い粉紅色，配上幼天使麵意粉味道一流，加上紫菜伴碟增添和式風味。番茄海鮮意粉海鮮有大蝦、青口同兩粒厚身帶子，海鮮份量都挺豐富，配酸甜蕃茄特別開胃。兩款意粉都好好食，有海鮮味道好性價比高！2個人share唔會太膩可以留肚食甜品~Honey Orange Lemonade ，Green Tea Latte Kiseki Strawberry Pancakes 🍓🥞疏乎厘pancake有原味同士多啤梨揀，送上時一陣濃郁蛋香飄過，Pancakes超鬆軟，配酸甜士多啤梨味都唔會單調，特意排隊試試也值得，需要大約15分鐘製作襯熱食喔😋J.S. FOODIES星期一至日: 11:00-22:00地址: 九龍塘達之路80號又一城LG2樓30號舖i.t blue block電話: 22658019平均消費$100-300/位…查看更多