珍為食的个人专页

同事提議試呢間新野, 話之前響銅鑼灣已好好評, 就趁blue monday去開心下！去到見到人龍有d 驚驚地, 不過既然行到黎就即管試下排。點知排左唔夠十分鐘已經有位。我點左秘製豬扒飯 (肉燥汁), 同事叫左蔥油豬扒粗麵。上枱見到大大塊厚切豬扒已經流哂口水！一咬真係勁好味呀！豬扒帶肥好香、仲要肉質鮮嫩, 加上個皮脆卜卜, 正到暈呀！同事個蔥油豬扒粗麵都好正, 蔥油份量充足, 仲好香添喎！以呢個價錢, 呢個品質同份量, 響中環黎講, 真係好good呀！以後又多一個飯堂選擇了 …查看更多

響中環搵食唔難，不過要揾價錢相宜又好吃的，則非常艱難。閒閒地一餐過百，對於小小打工仔黎講，真係負擔好重架！好彩有食神同事，捐窿捐罅搵野食，搵到黎呢間都幾隱世下既地方。未食已經比佢個裝修吸引左，一個字, 靚！舖面座位唔多，lunch 時間黎到，都等左約10分鐘先入座。見佢餐牌上面主打健康野，又特別標明 「無添加」、「無麩質」，應該係個敏感體質、着重健康人士既好地方。因為呢類人平日唔會食車仔麵呢d 「垃圾」食物架嘛 我揀左大腸、雞翼腸粉，配石磨芝麻花生醬。份量都算ok，腸粉幾爽滑，38蚊黎講，算係超值！ …查看更多

路過觀塘東廣場，隨意選了這間小店歇一歇。點了最basic 的經典牛肉漢堡，配薯條汽水。先來薯條，有驚喜！熱辣辣，即點即炸之餘，仲係厚實豐滿嘅。再來漢堡，嘩！肉味濃、一咬落去，流哂d肉汁出來。雖是小店，服務人員不多，但serive 還是相當不錯的。當日，隔離枱有個小朋友不斷要求要水(父母只自顧自吃)，waitress 還是耐心地招呼。結果，個小朋友玩到連水杯都丟埋，一地玻璃。這時，疑似老闆娘立即從counter跑出來友善地處理。值得一讚！…查看更多

一早起身見到閨蜜message，心血來潮黎個即興午餐。地點選在她家附近的太子區，方便佢late afternoon 去做 facial。到左太子，我地行左幾轉，本來想試下d 新店，結果見d 舖唔係其貌不揚，就係屬於唔坐得耐既style。行來行去之後，都係去返難得糊塗。我地兩個都揀左漢堡包薯條餐。餐湯羅宋湯夠熱，配的牛油法包夠脆，好味。至於主菜既漢堡包塊漢堡扒略嫌乾左少少，但味道是ok 的；另外薯條都好熱好脆好好味。…查看更多

一班舊朋友十幾人聚舊，預計會嘈到拆天，所以希望搵個地方包場玩得開心D。揀左一輪，決定揀銅鑼灣，就腳D，方便大家收工過黎。Café Zense有室內室外兩個area，我地15人包左室內場，係一張大枱圍住坐。佢既Party menu有兩種：Standard (平日$318/ 假日$358)、Deluxe (平日$398/ 假日$438)。我地揀左Standard，沙律、主菜連甜品共12款，另外派對特款任飲。三款任飲飲品。兩款沙律無咩特別。招牌芝士薯條超好味。薯條夠熱，芝士醬另上，夠多夠濃。蜜燒香草雞翼好好味，正！諗住幾好喎，d野食有驚喜喎！可惜…… 中段開始接唔住，d 野食開始咸……芝士葡汁焗雜菜，好咸，d菜亦好硬。泰式冬蔭功炒蜆，繼續咸，仲好辣。唔知大廚係咪聽到我地話咸，佢即時作出調整，跟住出場既醬燒美國豬肋骨，完全無味，仲好老好韌。菠菜芝士龍利魚卷叫做正正常常。意式茄薯煙辣腸雜菌長通粉，都ok。蛋黃忌廉汁煙肉意大利扁麵味道算係幾香，不過依舊稍咸。最後兩款甜品，先上伯爵紅茶奶凍，同行朋友覺得幾好味，但我個人就麻麻地。另一款甜品迷你雲呢拿泡芙伴焦糖醬有驚喜，勁大盆之餘仲好好味。叫做臨尾來個niceending。…查看更多

Mega box有好多餐廳，星期六中午人流唔多，基本上你揀邊間都有位。我同朋友揀左一輪，決定食台灣野墾丁茶房。餐廳座位寬敞，我地揀左張弧形梳化坐下，望正溜冰場，可以欣賞小朋友溜冰之餘，仲有冰場免費流行曲聽，確實係一個好好hea既地方。午市主要提供兩類套餐：招牌套餐、午市精選套餐。主食連前菜和飲品，價錢由$65-$78。我地揀左口水惹味雞同鹽酥雞排配香菇肉燥飯套餐。套餐份量適中，前菜係細細碗檸檬青瓜，正常無咩特別。主菜口水惹味雞味道ok不太辣、鹽酥雞排略嫌燶左少少，兩邊雞肉較「鞋」，好彩中間兩件都係嫩滑的。反而伴菜的酸菜好清新。最出色的，莫過於杯凍泡沫奶茶，大大杯無冰兼自己加甜，又香又滑。由於無咩人，坐幾耐都得，我地hea左響樹打機吹水兩粒幾鐘先埋單走人。…查看更多

聽同事提起「周記」好多次，卒之搵到一日夾齊成team人一齊由公司飛的過西環食個lunch。舖仔雖小，但點心就有好多選擇。同事極力推薦芝麻蝦多士，嘩！一上枱，完全顛覆左蝦多士響我心目中既形象！厚厚既蝦膠配上薄薄一片，兼炸到好脆但又不油膩的多士，頂級好味！一碟四大件，都只係$35，真係攪蝦膠既手工錢都唔止。一班同事叫左幾廿碟點心，基本上樣樣都好好味，特色推介黑松露湯餃。個湯真係充滿黑松露味，忍唔住成碗乾左。同事一直叫我要留肚試西多，我地點哂兩款奶黃流沙和香芋流沙。兩款都勁正。香芋味道好濃但又唔會太甜；而奶黃流沙食到好多鹹蛋黃響入面，感覺似食緊某某酒店受到熱捧的奶黃月餅。好味！值得一讚的，係lunch時段，全場爆滿，門口仲有一大班人排緊隊，店內得兩位姐姐做野，但上菜、加茶、招呼完全無問題，速度亦好快。仲送左碟怪味拍青瓜俾我地食添！…查看更多

本身好鍾意食車仔麵，見到新開，門面裝修幾有特色，$35三餸麵、$40四餸麵，價錢合理，就入去試下。麵同餸既種類算多，仲有四種不同醬汁加配。我同朋友都係叫三餸麵，我揀左豬紅、豬腸、墨魚卷米線(沙爹汁)，朋友就叫左豬紅、五香牛腩、瑞士雞翼油麵(腩汁)。上麵既速度算快，餸既份量算正常，但麵既份量太少，一個正常男士應該唔夠飽。我同朋友坐響一張由兩張二人枱泊埋既枱，我地坐左一邊，另一張枱無人。岩岩影完張相，放低電話，一個waiter忽然拉開另一邊枱，另一個waiter就同一時間拎起我朋友碗麵！結果，我放響枱面部電話跌左落地！原來門口有一班人，佢想泊枱比佢地，又想我地調枱。其實調枱我真係無所謂，我都係食個晏啫，唔係想阻你做生意，但係點解你唔可以先問一聲、通知我一聲先呢？個電話比人整跌左，魂都未定，兩碗麵已經比人搬左去隔離枱了。至於食物既味道，個墨魚卷都幾好味，其他就好一般，豬紅算滑但唔夠味，豬腸亦不夠入味。失望。…查看更多

去灣仔譚臣道搵食，條街以茶記、快餐店為主。行到街尾丶近大有商場，發現有間日食小店，看上去不太日式，估計都應該係localized 左嘅日本野啦。不過今日真係唔想食茶記，見佢又有位，於是心口掛個「勇」字入去試下。2:00後原來有下午茶，以飯同拉麵為主。我揀左個$50嘅滑蛋雞扒飯，包熱飲。碗飯黎到，個樣已相當吸引，看得出是誠意之作。味道仲有驚喜！滑蛋好滑漏，雞扒亦好入味，而且佢係用珍珠米的，撈埋滑蛋，我都扒多左幾啖飯呢。…查看更多

懶洋洋的星期六，訓到自然醒，再hea 一輪先出街，歎個tea 是最好的選擇。今日過灣仔整野，所以揀左瑞士咖啡室。佢d tea都幾多選擇，兼且其他餐都有下午茶優惠價。細食嘅我揀左＄31 的三隻瑞士雞全翼餐配熱飲。上枱d全翼都幾大隻，且色澤均勻。吃下覺得味道調得好好，重點係d肉仲好滑。正！呢個平民價錢可以食到咁嘅質素的瑞士雞翼，實在太高興。唔怪得隔離間大快活無乜人，佢依然可以全餐廳滿座，兼搭哂枱啦。一定要會再來！…查看更多

完全港式，仲叫乜澳門茶餐廳？下午茶居然係乾炒牛柳絲意粉、瓜粒湯飯？！免強搵到似係澳門野嘅茶餐，2個葡撻1杯熱飲收$35，偏貴。重點係超難食！又凍又硬！KFC 都好食過佢百倍！…查看更多